Ang Katuyoan sa Diyos Karon Haduol na sa Iyang Kinatayuktokan

Ang katuyoan sa Diyos sa paglalang sa yuta mao nga papuy-an kini sa malipayong katawhan nga magkinabuhi ilalom sa matarong nga mga kahimtang. Aron padayong mabuhi, kinahanglang sundon sa katawhan ang mga kasugoan sa Diyos, apan ang unang tawhanong magtiayon misupak ug nahimong mga makasasala, gihukman sa kamatayon. Miresulta kinig sala ug kamatayon sa tanan nilang mga anak.—Genesis 1:​27, 28; 2:​16, 17; 3:​1-19; Roma 5:​12.

Ang Diyos, kansang ngalan mao si Jehova, determinado sa pagwala sa mga epekto sa pagsupak ug sa sala gikan sa yuta. Sa ulahi iyang gitan-aw ang yuta ug nakita taliwala sa katawhan ang usa ka matinumanong tawo, si Abram, kansang ngalan Iyang giusab nga Abraham. Misaad ang Diyos kang Abraham nga mahimo ang iyang anak nga usa ka dakong nasod ug nga pinaagi nianang nasora ang Diyos motagana ug usa ka binhi nga pinaagi niini ang tanang mga pamilya sa yuta magapanalangin sa ilang kaugalingon.—Genesis 12:1-3; 18:​18, 19; 22:​18; Salmo 83:​18; Hebreohanon 11:​8-16.

Sa naghinapos ang ika-16 nga siglo W.K.P., ang anak sa apo ni Abraham si Jacob, o Israel, nahimong 12 ka tribo nga naulipon sa Ehipto. Giluwas ni Jehova kining mga Israelinhon gikan sa Ehipto ug gihimo silang usa ka nasod. Pinaagi kang Moises diha sa Bukid sa Sinai iyang gihatagan sila ug Kasugoan ingong ilang nasodnong batakan-balaod. Si Jehova mao ang ilang Hari, Maghuhukom, ug Maghahatag-Balaod. Ang nasod sa Israel nahimong piniling katawhan sa Diyos, iyang mga saksi, nga giorganisar sa pagtuman sa iyang katuyoan. Pinaagi kanila mianhi ang Mesiyas, nga nagtukod ug usa ka walay kataposang gingharian alang sa kaayohan sa katawhan sa tanang kanasoran.​—Exodo 19:​5, 6; 1 Cronicas 17:​7-14; 1 Hari 4:​20, 25; Isaias 33:​22; 43:​10-12; Roma 9:​4, 5.

Human sa 15 ka siglo, o mga 2,000 ka tuig kanhi, gipadala sa Diyos ang iyang bugtong Anak gikan sa langit dinhi sa yuta, aron matawo diha sa usa ka Hudiyo nga ulay si Maria. Ginganlan siyag Jesus ug manunod sa Gingharian nga gisaad sa Diyos sa iyang kagikang si David. Sa nagpanuigong 30, gibawtismohan si Jesus ni Juan Bawtista ug misugod sa pagpahayag sa Gingharian sa Diyos. Pinaagi sa pag-ayo sa mga masakiton, iyang gipakita kon sa unsang paagi panalanginan nianang umaabot nga Gingharian ang katawhan. Pinaagi sa mga ilustrasyon, iyang gitin-aw kon unsay gikinahanglan sa tanang nagatinguhag kinabuhing walay kataposan. Dayon gipatay si Jesus sa estaka, ang iyang hingpit tawhanong kinabuhi nahimong lukat alang sa katawhan.—Mateo 1:18-24; 3:​13-16; 4:​17-23; 6:​9, 10; kapitulo 13; 20:​28; Lucas 1:​26-37; 2:​14; 4:​43, 44; 8:​1; Juan 3:​16; Buhat 10:​37-39.

Misaysay si Jesus nga ang Mesiyanikong Gingharian tukoron sa halayong umaabot, sa konklusyon sa sistema sa mga butang. Sa maong panahon siya presente nga dili makita sa mga langit ingong nagamandong Hari ug magpahibalo sa iyang presensiya pinaagi sa paghatag sa iyang pagtagad sa yuta. Ang mga hitabo sa kalibotan nagpakita nga kita nagakinabuhi na niining panahona sukad sa 1914. Sumala sa gitagna ni Jesus, ang maayong balita sa Gingharian ginasangyaw na sa tibuok yuta sa pagpamatuod sa tanang kanasoran. Ingong resulta, ang katawhan nga gikan sa tanang kanasoran ginatigom sa kiliran sa Gingharian sa Diyos. Kini sila maluwas sa kataposan sa presenteng sistema sa mga butang ug makabaton ug kinabuhing walay kataposan sa yuta ilalom sa Mesiyanikong Gingharian.​—Mateo, kapitulo 24 ug 25; Pinadayag 7:​9-17.

Daghang mga simbahan nagaangkong nagabuhat sa kabubut-on sa Diyos karon. Apan sa unsang paagi imong maila ang tinuod nga Kristohanong kongregasyon? Pinaagi sa pagsusi sa Kasulatan bahin sa Kristohanong kongregasyon sa unang siglo ug dayon sa pagtan-aw kon kinsa karon ang nagasunod nianang sumbanana.

● Unsay bahin ni Abraham ug Israel sa katumanan sa katuyoan ni Jehova?

● Unsay nahimo ni Jesus sa iyang ministeryo ug sa iyang kamatayon?

● Unsang mga hitabo ang gitagna nga nagatimaan sa atong presenteng panahon?