Kapitulo 14

Pagtahud Alang sa Gasa sa Kinabuhi

1, 2. Nganong kinahanglan kita magpakita sa lalum nga pagtahud alang sa gasa sa kinabuhi?

ANG lalum nga pagtahud alang sa gasa sa kinabuhi usa ka patukoranan sa matuod nga kalinaw ug kasegurohan. Apan ang maong pagtahud sa kinabuhi makapasubo nga kulang karon. Ang mga tawo nahimong batid sa paghunos sa kinabuhi, apan walay usa kanila ang makapasig-uli sa kinabuhi sa dihang kini mawala na.

² Ang pagtahud alang sa kinabuhi maoy usa ka sagradong obligasyon ngadto sa Maghahatag sa kinabuhi, si Jehova nga Diyos. Bahin kaniya ang salmista nag-ingon: “Kay uban kanimo mao ang tuboran sa kinabuhi.” (Salmo 36:9) Utang nato ang atong mga kinabuhi sa Diyos, dili lamang tungod kay siya naglalang sa tawo apan tungod usab kay siya nagtugot sa katawhan sa pagpadayon hangtud karon ug nagtagana sa mga paagi sa pagsustenir sa kinabuhi. (Buhat 14:16, 17) Kapin pa niana, siya naghikay sa iyang Anak nga mahimong Manunubos, o Manlulukat, sa tawhanong panimalay, nagapalit niini uban sa iyang kaugalingon nga dugo sa kinabuhi. (Roma 5:6-8; Efeso 1:7) Ingon nga resulta, siya karon nagapaabut sa tanan kinsa magadawat niini sa kahigayonan sa pagkabuhi sa walay katapusan sa iyang matarung Bag-ong Kahikayan. Tungod niining tanan, sa unsang paagi atong ikapakita ang atong lalum nga pagtahud ug pag-ila alang sa gasa sa kinabuhi sa Diyos?

3. Sa unsang paagi ang pagtan-aw sa pagkamaharuson ingon nga kalingawan magaapektar sa pagpanglantaw sa usa ka tawo sa kinabuhi?

³ Alang sa usa ka butang, kon kita ugdang sa pagpakitag pagtahud alang sa kinabuhi, dili kita magaduyog niadtong kinsa, sa yanong kalingawan, nagapakaon sa ilang mga hunahuna sa mga kalingawan nga nagapasundayag sa pagkamaharuson. Ang pagdawat sa pagkamaharuson ingon nga “makalingaw” nagapahinabo sa daghan nga mahimong gahi ug walay pagbati sa tawhanong pag-antus ug pagkawala sa kinabuhi. Apan kon kita mapasalamaton sa pagkamaayo sa Diyos ug sa paglaum nga iyang ginahatag, magasukol kita sa maong espiritu. Kita magaugmad sa pag-ila alang sa kinabuhi ingon nga gasa gikan sa Diyos. Kini magaapektar kon giunsa nato paggamit ang atong kaugalingong mga kinabuhi, kon giunsa nato pagtratar ang ubang katawhan, bisan gani kon giunsa nato pagpanglantaw kadtong kinsa wala pa matawo.

Pagtahud sa Kinabuhi sa Wala pa Matawo

4. (a) Kanus-a ang kinabuhi ginapasa ngadto sa liwat sa usa? (b) Unsa ang nagapakita kon ang Diyos ba interesado sa tawhanong kinabuhi una sa pagkatawo?

⁴ Ang gahum sa pagpasa sa kinabuhi usa ka dakung pribilihiyo, nga gihatag sa langit. Kanang kinabuhi ginapasa, dili sa pagkatawo, apan sa panahon sa pagpanamkon. Ingon sa gipahayag sa Encyclopædia Britannica, nga sa maong panahon nga “ang kinabuhi-kasaysayan sa indibiduwal, ingon nga usa ka lahi ug biyolohiko nga persona, nagasugod.” Kana nagaingon usab: “Ang bag-ong indibiduwal gilalang sa dihang ang mga elemento sa usa ka makusog nga binhi sa lalaki motapo sa mabungahong ovum sa babaye, o itlog.”⁶⁰ Mao man usab, ang interes sa Diyos sa tawhanong kinabuhi nagasugod una pa sa pagkatawo. Ang salmista David nagsulat, nga nagaingon sa Diyos: “Gitabonan mo ako sa tagoangkan sa akong inahan. . . . Ang imong mga mata nakakita bisan wala pa mahingpit ang lawas ko, ug sa imong basahon ang tanang bahin niini gisulat.”​—Salmo 139:13-16; Ecclesiastes 11:5.

5. Ngano ang mga argumento nga ginabangon sa usa ka pagpanlimbasug sa pagpamatarung sa aborsiyon dili lig-on?

⁵ Ang mga kinabuhi sa minilyon wala pa matawong mga bata tinuyo nga ginapatay pinaagi sa aborsiyon. Sa moral husto ba kini? Ang uban nagaergo nga ang wala pa matawong bata walay animo sa kinabuhi ug dili makaarang sa paglungtad gawas sa tagoangkan. Apan matuod man usab kana sa bata nga bag-ong natawo. Sa pagkatawo kini walay pagsabut sa kahulogan sa kinabuhi, ni kini makapadayon sa paglungtad kon walay makanunayong pag-atiman. Ang buhi nga selula nga naporma sa panahon sa pagpanamkon mahimong usa ka bata kon dili baldahon. Busa kon pagkuha sa kinabuhi sa usa ka bata nga bag-ong natawo giisip ingon nga usa ka krimen halus bisan asa, ug ang dakung panlimbasug ginahimo sa pagluwas bisan ang mga bata matawo nga dili pa panahon, ngano, nan, dili usab usa ka krimen sa pagkuha sa kinabuhi sa wala pa matawo? Ngano ang kinabuhi pagaisipon lamang nga sagrado human kini makabiya sa tagoangkan ug dili usab samtang kini anaa pa sa sulod sa tagoangkan?

6. Sa unsang paagi ang Bibliya nagapakita sa pagpanglantaw sa Diyos sa tinuyo nga paghunos sa kinabuhi sa usa ka wala pa matawong bata?

⁶ Ang importante nga butang dili lamang kon giunsa sa mga tawo pagpanglantaw ang mga butang apan kon unsa ang ginaingon sa Diyos, ang Maghahatag sa kinabuhi. Alang kang Jehova ang kinabuhi sa wala pa matawong bata maoy bililhon, dili menos ug balor. Siya naghatag sa usa ka balaod sa karaang Israel nga sa tino nagapanalipud nianang kinabuhia. Kon, sa pag-away sa duha ka tawo, ang usa ka mabdos nga babaye masamdan o makuhaan, kining balaora nagapahaluna sa estrikto nga mga silot. (Exodo 21:22, 23) Ang tinuyong pagkuha sa kinabuhi sa usa ka wala pa matawong bata labi pa ganing seryoso. Sumala sa balaod sa Diyos, ang bisan kinsa nga tinuyong naghunos sa tawhanong kinabuhi sentensiyahan ngadto sa kamatayon ingon nga mamumuno. (Numeros 35:30, 31) Ang Diyos nagahupot sa samang taas nga pagtahud alang sa kinabuhi karon.

7. Batuk sa unsa kita ginapanalipdan kon kita nagatahud sa kabubut-on sa Diyos mahitungod sa kinabuhi sa usa ka wala pa matawong bata?

⁷ Ang lalum nga pagtahud alang sa kabubut-on sa Diyos mahitungod sa kinabuhi sa wala pa matawong bata nagabuhat sa matuod nga kaayohan. Pinaagi sa paghimo sa mga ginikanan nga bug-os responsable alang sa maong kinabuhi, si Jehova nagatagana sa usa ka pugong sa seksual nga kaulag uban sa tanang dautang mga epekto niini. Kini nagalakip sa makatakod nga mga sakit sa sekso, wala kinahanglanang pagmabdos, mga anak sa gawas, bungkag nga mga panimalay, ug ang kahasol sa hunahuna sa usa ka hugaw nga konsiyensiya. Busa, ang pagtahud sa kinabuhi makaamot sa kalinaw sa panimalay karon ug usa ka importante nga butang sa atong pagbaton sa umaabut nga mga panalangin.

Pagtahud Alang sa Imong Kaugalingong Kinabuhi

8. Nganong kita nagapakitag pagtahud sa kabubut-on sa Diyos sa paagi nga kita nagatratar sa atong kaugalingong lawas?

⁸ Kumusta na man ang paagi sa atong pagtratar sa atong kaugalingong kinabuhi? Daghang tawo magaingon: ‘Wala ko pilia nga matawo. Busa kon unsa ang buhaton ko sa akong kinabuhi anaa ra kanako. Buhaton ko ang gusto ko.’ Apan kinahanglan ba nga hangyuon ang usa ka gasa aron ang nagadawat magapabili niini? Ang kinabuhi mismo dili ikalimud nga maayo. Ang tawhanong pagkadili hingpit lamang ug kadautan mao ang nagakawat sa kinabuhi sa daku sa kasadya niini. Si Jehova nga Diyos dili pagabasulon alang niini. Ug siya nagasaad sa pagtul-id niana pinaagig iyang kagamhanan sa Gingharian. Busa, kinahanglan magakinabuhi kita sa kinabuhi nga iyang gihatag kanato sa paagi nga nagapakitag pagtahud alang sa iyang kabubut-on ug katuyoan.​—Roma 12:1.

9. Unsa ang ginaingon sa Bibliya mahitungod sa kadalo ug pagpahubog?

⁹ Usa ka paagi nga kita makapakita sa maong pag-ila mao ang pagkakasarangan sa pagkaon ug pag-inum. Ang pagkahakugan ug pagpahubog kondenado sa Diyos. (Proverbio 23:20, 21) Labot pa, maingon man nga ang kasarangan nga pagkaon nagakaigo mao man usab ang kasarangan nga pag-inum sa isug de alkohol nga mga ilimnon. Kini ginapakita sa daghang mga kasulatan.​—Deuteronomio 14:26; Isaias 25:6; Lucas 7:33, 34; 1 Timoteo 5:23.

10. (a) Sa unsang paagi ang palahubog nagapakitag walay pagtahud alang sa kinabuhi? (b) Sumala sa ginapakita sa 1 Corinto 6:9, 10, nganong importante ang paglikay sa pagpahubog?

¹⁰ Busa dili ang pag-inum ang kondenado sa Bibliya. Ang abuso sa alkohol mao ang gitunglo. Ug uban sa maayong katarungan kay kana nagadaut sa lawas, nagahimo sa mga tawo sa paglihok nga estupido, ug bisan ngani makahimo kanila nga peligro sa uban. (Proverbio 23:29-35; Efeso 5:18) Sa Tinipong Bansa lamang, labing menos 10 ka milyon ka tawo ang nagaantos sa alkoholismo, ang usa ka resulta maoy 30,000 ka kamatayon matag tuig gikan sa cirrhosis (pagdalag) sa atay. Ang Nasudnong Konsilyo sa Alkoholismo nagaingon: “Ang total nga gasto ngadto sa nasud maoy duolan sa 43 ka bilyong dolyar sa kada tuig tungod sa pagpalta, panglawas ug hinabang nga mga serbisyo, kadaut sa propyedad ug medikal nga galastohan. . . . Sa tanang makapatayng aksidente nga nahitabo sa kadalanan karon, 50% ang naglangkit sa alkohol. Sa kapin sa 80% sa mga namatay sa sunog, 65% sa pagkalumos, 22% sa mga aksidente sa balay, 77% sa mga pagkahulog, 36% sa mga aksidente sa pedestriano ug 55% sa mga pagdakup maoy nalambigit sa paggamit ug alkohol. Ngadto sa 44% sa mga piloto nga naaksidente nanag-inum. Ang mabangisong panlihok tungod sa paggamit sa alkohol maoy nakaingon sa hapit 65% mga pagbuno, 40% mga pag-atake, 35% mga paglugos, 30% sa ubang mga krimen sa sekso, 30% sa mga paghikog, 55% sa mga away o mga pag-atake diha sa balay ug 60% sa mga kaso sa pag-abuso sa bata.”⁶¹ Ang gasto sa nabungkag nga panimalay, nadaut nga kinabuhi, ug tawhanong pag-antos dili maarangan sa pagbanabana. Busa dili makapatingala nga ang Pulong sa Diyos nagaingon: “Dili magpahisalaag. Bisan ang mga makihilawason, . . . ni mga palahubog, ni mga mapanamastamason, ni mga hinapian dili makapanunod sa gingharian sa Diyos.”​—1 Corinto 6:9, 10.

11. May punto ba sa pagsulay sa pag-ikyas sa personal nga mga suliran pinaagi sa sobrang pag-inum?

¹¹ Matuod, ang pipila mahait nga nagabati sa masulub-on nga epekto sa situasyon sa kalibutan. Ang mga gubat niini, krimen, inflation, kakabus, ug usab ang kahasol ug pagpig-ut niini nagaamot sa personal nga mga suliran. Apan walay bisan unsang butang maganansiya sa pag-ikyas niini pinaagi sa makadaut nga pagpasobra nga pag-inum. Kini nagalalang lamang sa dugang mga suliran alang sa kaugalingon ug alang sa uban ug, sa palakaw, nagalaglag sa dignidad sa usa, sa katuyoan sa pagkinabuhi, ug sa pagbarug uban sa Diyos.

Paggamit sa mga Droga

12. Nganong daghang mga tawo nagaliso sa paggamit sa mga droga?

¹² Sa pagpanlimbasug sa pag-ikyas sa mga suliran sa kinabuhi, daghang katawhan nagaliso ngadto sa makamilamila nga mga droga. Ang mga nagagamit sa maong mga droga nagabaylo sa katinuoran alang sa nagadamgong pagbati o sa kahimtang nga nagahanduraw. Daghan ang nagagamit sa maisug nga mga droga sama sa heroina ug ‘cocaine.’ Ang uban nagatomar sa tinagdaghan sa lainlaing mga droga pinaagig mga pildora. Sa unsang paagi ang ilang kinabuhi apektado?

13. Unsa ang epekto sa pipila niining mga droga sa nagagamit niini, ug sa unsang paagi ang Bibliya nagapasidaan niini?

¹³ Ang ilang paggamit niining mga droga sayong naghatud sa pagkawala sa pagpugong sa kaugalingon, sa pagpatungha sa mga epekto nga susama niadtong makita sa usa ka tawo nga hubog. (Proverbio 23:29-34) Ug kasagaran giila nga kining mga droga mahimong peligroso. Sa New York City, pananglitan, ang pagkagiyan sa heroina mao ang nagapangunang hinungdan sa kamatayon sa mga tawo taliwala sa mga panuigon nga 18 ug 35. Pagkadakung walay pagtahud alang sa gasa sa kinabuhi!

14, 15. Ngano kadtong kinsa nagatabakog marijuana wala nagapakita sa pagtahud alang sa gasa sa kinabuhi?

¹⁴ Apan unsa na man ang hawot nga drogang marijuana? Kini usab peligroso sa ubay-ubayng paagi. Ang mga tiggamit sa marijuana sagad maladlad ngadto sa mas isug nga mga droga pinaagi sa mga kontak uban sa mga nagabaligya sa droga ug sa ubang mga nagagamit. Usab, daghan ang nakadangat sa pagdepende sa maong droga, nga nagatuo nga kini makahupay sa kahasol ug kasubo, dayag nga magapadayon ngadto sa mas isug nga mga droga.

¹⁵ Apan bisan pa kon kini dili mahitabo, ang pagpanigarilyo sa marijuana peligroso. May dugang mga bahin kini nga makakanser kay sa segarilyo, ug labaw nga makadaut sa mga baga. Ang padayon nga paggamit makapahinabog kadaut sa atay, mga depekto genitiko, ug kadaut sa utok. Nag-ingon ang Addiction Research Foundation sa Canada nga ang marijuana “maoy isug nga droga uban sa dakung gilapdon sa riyesgo ngadto sa panglawas.”⁶² Miingon ang usa ka eksperto sa droga: “Ang marijuana maoy makadaut kaayo nga droga. Kapin sa 10 ka tuig nga miagi mga 10,000 ka papeles ang napatik diha sa siyentipikong komunidad nga nagpunting sa riyesgo sa panglawas.” Siya mimatikud sa “grabeng riyesgo nga seryoso kaayo diha sa mga nagakahingkod nga nagasulay sa pagsag-ulo,” tungod kay kana makapaluya sa pundohanan sa memorya ug sa katakus sa pagpunting. Bahin sa tiggamit ug marijuana siya miingon: “Siya dili sa husto makamaneho ug kotse o makagamit ug makenilya. Ang padayong paggamit magpahinabog mas seryosong kadaut ngadto sa kublan nga sistema nga magapanalipud sa lawas batuk sa sakit.”⁶³ Ang mga babaye nga nagatabakog marijuana sa panahon sa pagmabdos adunay mas dakung riyesgo nga makabaton ug mga anak nga adunay daut sa utok. Tungod niining tanan, ikaingon ba nga ang paggamit ug marijuana nagapakitag pagtahud alang sa gasa sa kinabuhi?

16. Ngadto sa unsang ubang ugdang peligro nga ang paggamit sa droga makayagyag sa usa ka tawo, ug sa unsang paagi kini magaapektar sa atong pagpanglantaw sa butang?

¹⁶ May dako pang rason sa paglikay sa paggamit sa droga. Kini makabukas sa dalan nga mailalom ang tawo sa gahom sa mga demonyo. Dili bag-o kining paglangkit sa droga sa okultismo. Sa kanhiay ang mga barangan naggamit ug mga droga. Nagamatikod ang Expository Dictionary of New Testament Words ni Vine: “Sa mga anting-antingan, ang paggamit ug droga, bisan simple o puerte, sagad giubanan sa inkantasyon ug paghangyo sa gahom nga okulto.” Kining pahayaga gihimo nga maylabot sa Gregong pulong gihubad “buhat sa espiritismo” (phar·ma·kiʹa, sa literal “pagpangdroga”) sa Galacia 5:20. (Tan-awa usab ang Pinadayag 9:21; 18:23.) Busa ang droga makayagyag sa usa sa inpluensiya sa demonyo. Sa unsang paagi ang usa ka tawo kinsa adunay pagtahud sa iyang Maghahatag-kinabuhi makayagyag sa iyang kaugalingon ngadto sa maong peligro tungod lang sa umalaging pagbati?

17, 18. (a) Unsang ubang dautang bunga ang nalangkit sa paggamit sa droga? (b) Busa, sa unsang paagi ang Kristohanong mga saksi ni Jehova nagalantaw sa paggamit sa mga droga?

¹⁷ Nahibaloan na kaayo nga ang paggamit sa droga suod nga nalangkit uban sa krimen ug sa moral nga kagun-oban sa katilingban. Ang dili legal nga pagpamaligya sa droga usa ka dakung kahinguhaan sa salapi alang sa organisadong krimen. Daghang mga ulipon sa droga nagapangawat sa pagsuportar sa ilang naandan. Ang uban nagapamampam. Ang mga pamilya mabungkag kon ang usa ka membro mahimong giyanon. Ang nagamabdos nga mga inahan nagapasa sa pagkagiyan sa ilang mga bata, nga usahay mamatay samtang nagaantus sa mga kalisud sa pagbiya. Ug sa daghang kayutaan ang pagbaton ug ang paggamit sa maong mga droga alang sa dili mediko nga mga katarungan supak sa balaod.​—Mateo 22:17-21.

¹⁸ Buot ba nimo nga may bisan unsang kalabutan sa usa ka buhat nga nalangkit uban sa tanang dautang bunga? Ang mga Saksi ni Jehova dili gusto! Dili nila buot ang bisan unsang bahin sa paggamit sa mga droga alang sa kahinam o sa pagkalagiw sa kamatuoran. Sila dunay taas nga pagtahud alang sa kinabuhi ug buot magagamit niana diha sa usa ka paagi nga uyon sa kabubut-on sa Diyos.

Paggamit sa Tabako ug sa Susamang mga Produkto

19. Ngano ang pagtahud alang sa gasa sa kinabuhi nagasulod sa pagpanglantaw sa usa mahitungod sa paggamit sa tabako, bunga, ug sa dahon sa buyo?

¹⁹ Labi pang kumon karon mao ang paggamit sa tabako ug, sa pipila ka kayutaan, sa bunga ug sa dahon sa buyo. Ang tagsa niini makadaut sa lawas ug, sa pipila ka kaso, sa hunahuna. Ang mga gobiyerno nagpasidaan sa kalabotan sa tabako uban sa mga sakit sama sa kanser sa baga, sakit sa kasingkasing, chronic bronchitis, ug emphysema. Nagapakita ba kini sa pagtahud alang sa gasa sa kinabuhi sa paggamit sa maong makagiyan ug makadaut nga mga produkto?

20, 21. (a) Ang kamatuoran ba nga ang Bibliya wala sa tino nagakondenar sa maong mga batasan pinaagig pagngalan nagapasabut nga husto kana? (b) Unsang mga prinsipyo sa Bibliya ang nagapakita nga ang maong mga batasan walay luna sa kinabuhi sa usa ka alagad sa Diyos?

²⁰ Basin ang usa makaingon nga tanan kining butang linalang sa Diyos. Matuod, apan mao usab ang mga uhong. Apan ang pipila ka klase makapatay kon kaonon. Basin may moingon pang ang Bibliya wala sa tino magakondenar nianang mga batasan. Wala, apan, sa nakita na nato, daghang butang wala sa tino kondenaha diha sa Bibliya nga sa dayag sayop. Ang Bibliya bisan asa wala sa tino nagadili sa paggamit sa tugkaran sa silingan nga laboganan sa basura. Apan ang sugo niana nga “higugmaa ang silingan mo sama sa imong kaugalingon” igo na nga maila sa bisan kinsa kanato kon unsa ka sayop kana. Sa susama, ang pagtabako nagabutyag sa kakulang sa gugma, sanglit ang mga aso makahasol sa uban ug makadaut pa gani sa ilang panglawas.​—Mateo 22:39.

²¹ Sa 2 Corinto 7:1 ang Pulong sa Diyos nagasulti kanato nga “hinloan ang atong kaugalingon sa tanang kahugawan sa unod ug espiritu, nga nagahingpit sa kabalaan sa kahadluk sa Diyos.” Ang “pagkabalaan” sa butang nagkahulogan nga “hinlo, waymantsa, dili dunot.” Si Jehova nagapabiling hinlo gikan sa walay kadunot, nga dili gayod magpaubos sa iyang kaugalingon sa paglihok diha sa dili balaan nga paagi. Tukma nga dahumon niya nga magpadayon kitang “magahingpit sa pagkabalaan” kutob sa mahimo sa mga tawo. (Roma 12:1) Usab, ginadahum niyang kita ‘mahigugma kaniya uban sa tibuok natong kasingkasing, kalag, hunahuna, ug kusog.’ Apan unsaon paghimo niini sa usa kon magabuhat siya sa mga batasang magahugaw sa iyang lawas, magadaot sa iyang kahimsog, ug magapamubo sa iyang kinabuhi?​—Marcos 12:29, 30.

22. Unsa ang makapahinabo sa usa ka tawo sa pagbungkag sa pagluok sa maong dautang batasan diha kaniya?

²² Bisan kon ang usa o ang lain sa maong mga batasan mahimong nakatuok sa usa ka tawo, makabuntog siya niini ug makabaton sa kagawasan. Ang kahibalo sa Diyos ug sa iyang mga katuyoan nagatagana sa usa ka gamhanang katarungan alang sa pagbuhat niana. Ang usa ka tawo mahimong ‘magbag-o sa puwersa nga nagapalihok sa iyang hunahuna.’ (Efeso 4:23) Kini magabukas sa usa ka bag-ong dalan sa kinabuhi, usa nga nagaresulta sa personal nga katagbawan ug nagapasidungog sa Diyos.

Pagtahud Alang sa Kinabuhi nga Girepresentahan sa Dugo

23. (a) Unsa ang bugtong paagi sa paggamit sa dugo ang aprobado sa Diyos sa iyang balaod sa Israel? (b) Ngano ang kahulogan sa maong mga sakripisyo magapahinabo kanato sa maampingong pagpalandung sa kabubut-on sa Diyos niining butang?

²³ Ang atong dugo, usab, takus sa pagpalandung kon kita nagahisgut mahitungod sa kinabuhi. Ang Diyos nagpili sa dugo sa tawo ug sa mga mananap ingong simbulo sa kinabuhi. Kini gipakita sa balaod nga iyang gihatag kang Noe ug sa ulahi ngadto sa nasod sa Israel. Ang bugtong aprobado nga paggamit sa dugo mao ang sakripisyo. (Genesis 9:3, 4; Levitico 17:10-14) Ang maong mga sakripisyo tanan naghulagway sa usa ka sakripisyo ni Jesus, nga niana iyang gibubo ang iyang dugo-kinabuhi alang sa katawhan. (Hebreohanon 9:11-14) Kini mismo magapahinabo kanato sa paghatag sa maampingong pagtagad sa kabubut-on sa Diyos niining butang.

24. Unsa ang ginaingon sa Buhat 15:28, 29 mahitungod sa pagpanglantaw nga kinahanglan batonan sa Kristohanon mahitungod sa paggamit sa dugo?

²⁴ Ang pagdili ba sa Diyos mahitungod sa paggamit sa dugo aplikado pa gihapon sa matuod nga mga Kristohanon? Oo, sumala sa gipakita sa opisyal nga pahayag nga gihimo sa mga apostol ug ubang mga ansiano sa Kristohanong kongregasyon sa unang siglo. Ubos sa paggiya sa espiritu sa Diyos, sila nagsulat: “Ang balaang espiritu ug kami mismo nag-uyon sa dili na pagdat-og ug dugang lulan kaninyo, gawas niining kinahanglanong mga butang, sa pagdumili sa mga butang nga gihalad sa mga idolo ug sa dugo ug sa mga butang nga naluok [busa, wala makatulo ang dugo] ug sa pagpakighilawas. Kon kamo maampingong magalikay niining mga butang, kamo magamauswagon.”​—Buhat 15:28, 29.

25. Pinaagi sa unsang mga buhat ang kalibutan nagapakita sa walay pagtahud alang sa kabubut-on sa Diyos mahitungod sa dugo?

²⁵ Daghang mga tawo ang walay pagtagad sa kabubut-on sa Diyos mahitungod sa dugo. Sila nagagamit sa dugo sa pagkaon, sa medisina, bisan sa komersiyal nga mga produkto. Apan dili gayod kini magpatingala kanato, sanglit ang kalibutan nagapakitag diyutay kaayong pagtagad alang sa gasa sa kinabuhi mismo. Bisan pa niana, kon kita nagaila sa kinabuhi ug sa atong tulobagon sa Diyos, dili ta isalikway ang iyang kabubut-on o insultohon siya pinaagi sa paglapas sa iyang mga sugo.

26, 27. Ngano ang mga panlimbasug sa pagtipig sa presente nga kinabuhi sa usa pinaagi sa pagsupak sa Diyos wala nagapakita sa pagtahud alang kaniya?

²⁶ Busa, bisan pa kita kinahanglan mabalaka sa atong kahimsog ug manlimbasug sa pagpanalipud sa atong mga kinabuhi, dunay pipila ka limite nga pagasundon. Si Jesus nagklaro niini sa iyang pag-ingon: “Siya nga nahigugma sa iyang kalag [o, kinabuhi] nagalaglag niini, apan siya nga nagadumot sa iyang kalag niining kalibutan magapanalipud niini alang sa walay katapusang kinabuhi.”​—Juan 12:25.

²⁷ Kon kini usa ka suliran sa pag-atubang sa kamatayon tungod sa pagsugot sa Diyos o sa pagsupak kaniya aron makalikay sa kamatayon, ang alagad sa Diyos magapalabi sa kamatayon inay kay sa pagsupak. Pinaagi sa pagsupak sa Diyos, si Jesus nakaikyas unta sa kamatayon. Apan wala siya maghimo niana. Ug ang mga tawo una kaniya nagpakita sa samang dili mabungkag nga debosyon ngadto sa Diyos. (Mateo 26:38, 39, 51-54; Hebreohanon 11:32-38) Wala nila tugoti ang ilang presente nga kinabuhi nga magaali sa dalan sa pagbaton nila sa kinabuhing dayon.

28. Pinaagi sa pag-ugmad sa pag-ila sa panlantaw sa Bibliya bahin sa kinabuhi, sa unsa kita nagapangandam?

²⁸ Kana ba usab ang panlantaw mo sa kinabuhi? Giila mo ba nga alang sa kinabuhi sa pagbaton ug tinuod nga kahulogan, kinahanglang magkinabuhi ka uyon sa kabubut-on sa Diyos? Ang pag-ugmad karon nianang panlantaw maoy bahin sa pag-andam sa kinabuhi sa Bag-ong Kahikayan sa Diyos. Pagkasiguro ug luwas ang bation ta unya, bisan asa ug bisan kanus-a, kay nasayod nga ang tanang buhi ibabaw sa yuta adunay dalisay nga pagtahud sa gasa sa Diyos sa kinabuhi!