Ang Kamatuoran Bahin sa Kalag Hinungdanon
“Inyong mahibaloan ang kamatuoran, ug ang kamatuoran magpagawas kaninyo.”—JUAN 8:32.
1. Nganong hinungdanon ang pagsusi sa atong mga tinuohan bahin sa kalag ug sa kamatayon?
ANG mga tinuohan mahitungod sa kamatayon ug sa Laing-Kinabuhi sagad maoy resulta sa relihiyoso ug kultural nga kagikan sa usa. Sumala sa atong nakita, kini nagkadaiya gikan sa kombiksiyon nga ang kalag mahidangat sa kataposang tumong niini human lamang sa ubay-ubayng pagkatawo pag-usab ngadto sa ideya nga ang usa lamang ka pagkinabuhi maoy magtino sa kataposang dulnganan sa tawo. Busa, ang usa ka tawo tingali mobating masaligon nga makaduyog sa kataposan sa kinalabwang katinuoran sa dihang mamatay, ang lain bahin sa pagkadangat sa Nirvana, ug ang lain pa gayod sa pagkabaton ug langitnong ganti. Nan, unsa ang kamatuoran? Sanglit ang atong mga pagtuo mag-impluwensiya sa atong mga tinamdan, mga lihok, ug mga desisyon, dili ba angayng kita magmabalak-on sa pagkaplag sa tubag nianang pangutanaha?
2, 3. (a) Nganong makasalig kita sa ginaingon sa Bibliya bahin sa kalag? (b) Sumala sa gipahayag diha sa Bibliya, unsa ang kamatuoran bahin sa kalag?
2 Ang labing karaang basahon sa kalibotan, ang Bibliya, nagsubay sa kasaysayan sa tawo balik ngadto sa paglalang sa unang tawhanong kalag. Ang mga pagtulon-an niini walay mga pilosopiya ug mga tradisyon sa mga tawo. Ang Bibliya tin-awng nagpahayag sa kamatuoran bahin sa kalag: Ang imong kalag mao ikaw, ang mga patay hingpit nga wala maglungtad, ug kadtong anaa sa panumdoman sa Diyos pagabanhawon sa iyang gitakdang panahon. Ang pagkahibalo niini nagkahulogan sa unsa alang kanimo?
3 “Inyong mahibaloan ang kamatuoran, ug ang kamatuoran magpagawas kaninyo,” matod ni Jesu-Kristo ngadto sa iyang mga sumusunod. (Juan 8:32) Oo, ang kamatuoran naghatag ug kagawasan. Apan gikan sa unsa kita mapagawas tungod sa kamatuoran bahin sa kalag?
Kagawasan Gikan sa Kahadlok ug Kawalay-Paglaom
4, 5. (a) Unsang kahadlok ang gipapas sa kamatuoran bahin sa kalag? (b) Sa unsang paagi ang paglaom sa pagkabanhaw naghatag ug kaisog ngadto sa usa ka tin-edyer nga may sakit nga ikamatay?
4 “Ang kadaghanang tawo mahadlok sa kamatayon ug gustong molikay sa paghunahuna niini,” nag-ingon ang The World Book Encyclopedia. “Ang pulong ‘kamatayon’ mismo nahimong halos dili-hisgotanan sa Kasadpan,” nagpahayag ang usa ka historyano. Ug sa pipila ka kultura ang nindot kapuling mga pulong sama sa “mipanaw” ug “mitaliwan” sagad gamiton sa pagbatbat sa kamatayon sa usa ka tawo. Kining kahadlok sa kamatayon sa pagkatinuod maoy kahadlok sa wala-hisayri, sanglit alang sa kadaghanang tawo ang kamatayon usa ka misteryo. Ang kahibalo sa kamatuoran bahin sa kon unsay mahitabo sa dihang kita mamatay mohupay niining kahadloka.
5 Tagda, pananglitan, ang panghunahuna sa 15-anyos nga si Michaelyn. Siya may leukemia ug nag-atubang sa makapasubong kamatayon. Nahinumdom ang iyang inahang si Paula: “Si Michaelyn miingon nga waybale kon siya mamatay tungod kay nahibalo siya nga ang kamatayon temporaryo lamang. Kami nagsigeg estorya bahin sa bag-ong kalibotan sa Diyos ug sa tanang pagabanhawon diha niini. Si Michaelyn dako kaayog pagtuo kang Jehova nga Diyos ug sa pagkabanhaw—walay bisan gamayng pagduda.” Ang paglaom sa pagkabanhaw nagpahigawas niining maisogong dalagita gikan sa hilabihang kahadlok sa kamatayon.
6, 7. Gikan sa unsang kawalay-paglaom nga ang kamatuoran bahin sa kalag magpagawas kanato? Iilustrar.
6 Unsay epekto sa kamatuoran diha sa mga ginikanan ni Michaelyn? “Ang kamatayon sa among pinanggang anak mao ang labing makaguol nga butang nahitabo sukad kanamo,” matod ni Jeff, ang iyang amahan. “Apan kami bug-os nagsalig sa saad ni Jehova sa pagkabanhaw, ug kami nagapaabot sa adlaw nga magakos namog usab sa among mga bukton ang among pinanggang Michaelyn. Pagkatagsaon unya kana nga reunyon!”
7 Oo, ang kamatuoran bahin sa kalag magpagawas sa usa ka tawo gikan sa kawalay-paglaom nga ipatungha tingali sa pagkamatay sa usa ka minahal. Siyempre, walay bug-os makapapas sa kaguol ug kasubo nga maagoman sa dihang ang usa ka minahal mamatay. Hinuon, tungod sa paglaom sa pagkabanhaw ang pagbangotan matibhangan ug ang kaguol mas sayong maantos.
8, 9. Gikan sa unsang kahadlok nga ang kamatuoran bahin sa kahimtang sa patay magpagawas kanato?
8 Ang Kasulatanhong kamatuoran bahin sa kahimtang sa patay magpagawas usab kanato gikan sa kahadlok sa patay. Sukad hisayri kining kamatuorana, daghan nga sa nangagi nagapos sa matuotuohong mga rituwal mahitungod sa patay dili na mabalak-on bahin sa mga tunglo, mga tilimad-on, mga panagang, ug mga anting-anting, ni sila mohalad ug mahalong mga halad aron paghupay sa ilang mga katigulangan ug pagpugong kanila sa pagbalik aron pagsamok sa mga buhi. Sa tinuoray, sanglit ang patay “wala nay nahibaloan nga bisan unsa,” ang maong mga buhat walay epekto.—Ecclesiastes 9:5.
9 Ang kamatuoran bahin sa kalag, nga hikaplagan diha sa Bibliya, sa pagkatinuod magpagawas ug kasaligan. Apan tagda usab ang usa ka talagsaong palaaboton nga gipadayag sa Bibliya kanimo.
[Blurb sa panid 29]
Ang kamatuoran bahin sa kalag magpagawas kaninyo gikan sa kahadlok sa kamatayon, kahadlok sa patay, kawalay-paglaom tungod sa pagkamatay sa usa ka minahal