“Pangitaa Ninyo si Jehova” Pinaagi sa Pagsimba nga Iyang Giuyonan

1. Unsang mga panalangin ang imong gipahimuslan taliwala sa katawhan sa Diyos?

PAGKADAKONG pribilehiyo nga ikaw nakaila sa Diyos nga nagatuman sa mga tagna! Mahimo nimong mapahimuslan ang kahimtang nga gihubit sa manalagnang si Oseas: “Ako makigsaad kanimo sa kaminyoon diha sa pagkamatinumanon; ug ikaw makaila gayod kang Jehova.” Si Oseas naghubit dinhi ug malinawon, paraisonhong kahimtang nga masinati sa katawhan sa Diyos sa ilang pagbalik gikan sa pagkadestiyero sa Babilonya. Sa susamang paagi, ang katawhan sa Diyos sa modernong panahon nagtagamtam ug espirituwal nga kadagaya ug kasegurohan; ang ilang kahimtang maoy paraisonhon. (Oseas 2:18-20) Karon, ikaw nagdala sa ngalan sa Diyos ingong usa sa iyang nagpahinungod nga mga alagad—usa sa mga Saksi ni Jehova—ug buot nimong ipadayon kana.—Isaias 43:10, 12; Buhat 15:14.

2, 3. (a) Nganong miabot ang panahong gidumtan ni Jehova ang paagi sa pagsimba sa iyang karaang katawhan? (b) Nganong angay natong tun-an ang mga mensaheng gipahayag sa mga manalagna?

² Ang karaang Israel maoy usa ka nasod nga nagpahinungod kang Jehova ug iyang gihatagan silag usa ka hugpong sa mga balaod nga wala madawat sa laing nasod. (Deuteronomio 4:33-35) Apan, pagkatapos sa ikasiyam ka siglo W.K.P., nausab kaayo ang kahimtang sa mga Israelinhon nga sila giingnan sa Diyos pinaagi sa manalagnang si Amos: “Gidumtan ko, gisalikway ko ang inyong mga pista . . . Kon kamo motanyag kanako sa tibuok nga mga halad-nga-sinunog, bisan sa inyong mga halad nga gasa ako dili mahimuot.” (Amos 5:21, 22) Bisan pag ang Diyos wala magsulti niana sa iyang tibuok-kalibotang kongregasyon karon, makahanduraw ka ba kon unsay imong bation kon madunggan nimo ang maong pagtulotimbang bahin sa imong paagi sa pagsimba? Aduna bay pagtulon-an nga makat-onan ang tagsatagsa kanato gikan niana?

³ Pagkatapos sa ikasiyam ka siglo, ang katawhan sa Diyos nag-angkon nga sila nagsimba kang Jehova sa paagi nga iyang giuyonan. Bisan pa niana, daghan kanila ang nagsimba ug paganong mga diyos, sama kang Baal sa Canaan ug sa mga imaheng baka, ug nanaghalad diha sa hatag-as nga mga dapit. Sila nagyukbo ngadto sa panon sa kalangitan samtang sila naghimog mga panumpa kang Jehova. Busa, gipadala sa matuod nga Diyos ang mga manalagna aron awhagon ang katawhan sa pagbalik kaniya diha sa putling pagsimba. (2 Hari 17:7-17; 21:3; Amos 5:26) Nan, tin-aw nga bisan sa nagpahinungod nga mga alagad sa Diyos, aduna tingaliy mga butang nga nagkinahanglan ug pagtagad—mga buhat o mga tinamdan nga angayng susihon sa pagpaneguro nga kini nagpabanaag sa paagi sa pagsimba nga giuyonan ni Jehova.

“KAHIBALO SA DIYOS”

4. Unsang mga kahimtang ang naglungtad panahon sa pagmando ni Haring Jeroboam II?

⁴ Hunahunaa ang yugto nga ang una sa 12 ka manalagna misulti alang sa Diyos. Ang adlaw ni Jehova gitagna nga modangat sa napulo-ka-tribong gingharian sa Israel niadtong yugtoa. Apan, ang nasod sa panggawas daw nagmauswagon. Sumala sa gitagna ni Jonas, si Haring Jeroboam II nagpasig-uli sa utlanan sa Israel gikan sa amihanan duol sa Damasco paingon sa Patayng Dagat. (2 Hari 14:24-27) Bisan pag ang gibuhat ni Jeroboam maoy daotan, si Jehova nagpakitag hataas nga pailob, tungod kay dili niya gustong bug-os nga malaglag ang Israel. Gihatagag panahon sa Diyos ang mga Israelinhon sa paghinulsol, aron ‘mangita kang Jehova, ug mabuhi.’—Amos 5:6.

5. Unsay wala mabatoni sa mga Israelinhon nga tungod niana sila gisalikway ni Jehova?

⁵ Ang mauswagong mga Israelinhon makagamit unta sa panahon sa pagbalik kang Jehova pinaagi sa pagkaila kaniya nga labaw pa ug pagpaningkamot sa pagbuhat sa mga butang nga iyang giuyonan. Hinunoa, sila nagmasaligon sa kaugalingon, nga mibati nga ‘ang katalagman dili moduol o makaabot kanila.’ (Amos 9:10) Makaingon ka nga sila nalimot kang Jehova sa pagkaagi nga “sila nangabusog ug ang ilang kasingkasing nabayaw.” (Oseas 13:6) Dili angay natong hunahunaon nga dili kita apektado kay kini maoy karaan lamang nga kasaysayan. Matikdi ang hinungdan kon nganong si Jehova may legal nga kaso batok sa mga Israelinhon: “Tungod kay imong gisalikway ang kahibalo, ako magsalikway usab kanimo sa pag-alagad ingon nga akong saserdote.” Sila nagpahinungod kang Jehova ug gilibotag nagpahinungod nga mga membro sa pamilya. Bisan pa niana, sa tinagsa sila walay matuod nga “kahibalo sa Diyos.”—Oseas 4:1, 6.

6. Sa unsang diwa ang mga Israelinhon kulang ug kahibalo sa Diyos?

⁶ Dili kay wala gayod sila makadungog sa mga pulong sa Diyos, nga angayng hisgotan sa mga ginikanang Israelinhon uban sa ilang mga anak. Lagmit nakadungog na ang kadaghanan ug pipila ka asoy sa Bibliya gikan sa ilang mga ginikanan, sa dihang sila nakigkabildo sa uban, o panahon sa publikong mga panagkatigom. (Exodo 20:4, 5; Deuteronomio 6:6-9; 31:11-13) Pananglitan, nakadungog sila kon unsay nahitabo sa dihang si Aaron nagbuhat ug usa ka bulawang baka samtang si Moises didto sa Bukid sa Sinai nga nagdawat sa Napulo ka Sugo. (Exodo 31:18–32:9) Busa, panahon sa mga manalagna, ang mga Israelinhon may diyutayng kahibalo bahin sa Balaod ug sila nakadungog ug mga asoy bahin sa kasaysayan. Bisan pa niana, ang ilang kahibalo wala magpulos kay wala kana makadasig kanila sa pagsimba sa Diyos sumala sa paagi nga iyang gusto.

7. (a) Sa unsang paagi ang mga Israelinhon dali kaayo nga nahimong dili masinugtanon? (b) Sa unsang paagi ang usa ka Kristohanon mahimong ‘mosugod sa pagkalimot sa iyang Magbubuhat’?

⁷ Mahibulong ka tingali, ‘Nganong ang mga Israelinhon dali kaayong nahaylo nga dili magmasinugtanon?’ Gihubit ni Oseas ang hinungdan: ‘Ang Israel misugod sa pagkalimot sa iyang Magbubuhat.’ (Oseas 8:14) Ang porma sa orihinal nga berbong Hebreohanon tukmang gibatbat nga ‘misugod sa pagkalimot.’ Wala kalit atakehag amnesia bahin kang Jehova ang mga Israelinhon. Hinunoa, pag-aginod sa panahon nalimot sila sa kahinungdanon sa pagsimba kaniya sa paaging iyang giuyonan. Sa imong hunahuna, mahimo bang mahulog sa maong lit-ag ang usa ka Kristohanon? Pananglitan, tagda ang usa ka lalaki nga seryosong naghunahuna bahin sa pagtagana sa mga panginahanglan sa iyang pamilya. (1 Timoteo 5:8) Aron siya makatagana niana, tukmang isipon niya nga ang iyang sekular nga trabaho maoy hinungdanon. Basin adunay wala dahoma nga suliran, ug busa siya maghunahuna nga kinahanglang dili siya motambong ug pipila ka Kristohanong mga tigom aron magtrabaho. Ngadtongadto, mas sayonan na siyang dili motambong ug kana mahimong mas subsob na. Nagakahuyang na ang iyang relasyon sa Diyos—siya ‘nagsugod na sa pagkalimot sa iyang Magbubuhat.’ Ang susamang butang mahimong mahitabo sa usa ka Kristohanon nga adunay dili-magtutuong mga ginikanan o mga paryente. Moatubang siya niining mga isyuha: Unsa ka dakong panahon ang iyang igahin alang kanila, ug kanus-a? (Exodo 20:12; Mateo 10:37) Unsa man ang bahin sa pagdesisyon kon unsa ka dakong panahon ug atensiyon ang gamiton alang sa mga biyahe, pasatiempo, o kalingawan?

8. Sa adlaw ni Amos, unsay gipasabot sa “kahinlo sa mga ngipon”?

⁸ Nakatuon na kita sa Pulong sa Diyos ug nagpadapat sa atong nahibaloan. Bisan pa niana, ang matag usa kanato makahisgot sa mga pulong nga gigamit diha sa basahon ni Amos: “kahinlo sa mga ngipon.” Nagpasidaan ang Diyos sa Iyang katawhan pinaagi ni Amos: “Ako usab, sa akong bahin, naghatag kaninyo ug kahinlo sa mga ngipon diha sa tanan ninyong siyudad ug kakulang sa tinapay diha sa tanan ninyong dapit.” (Amos 4:6) Ang maong kahinlo dili gumikan sa pagsepilyo sa mga ngipon. Nahinlo kana tungod kay sila walay gikaon, nga nag-antos sa kagutom. Dugang pa, kana maoy usa ka pasidaan bahin sa “usa ka gutom, dili sa tinapay, ug usa ka kauhaw, dili sa tubig, kondili sa pagpatalinghog sa mga pulong ni Jehova.”—Amos 8:11.

9, 10. (a) Sa unsang paagi nga ang usa ka Kristohanon tingali magutman sa espirituwal nga paagi? (b) Nganong kinahanglan kitang magmaigmat sa mga kapeligrohan sa espirituwal nga kagutom?

⁹ Sa espirituwal nga paagi, ang makapasubong kahimtang sa Kakristiyanohan maoy katumanan sa gihubit ni Amos. Sa kasukwahi, “ang mga ganghaan sa tubig sa kalangitan” gibuksan alang sa katawhan sa Diyos sa tibuok kalibotan. Sila adunay dagayang espirituwal nga pagkaon. (Malaquias 3:10; Isaias 65:13, 14) Busa ang usa ka Kristohanon makasukna, ‘Unsa ka daghang espirituwal nga pagkaon ang akong ginakaon?’ Makapaikag nga ang pipila ka tigdukiduki nakadiskobre nga ang gieksperimentohang mga hayop nga nadaot ang parte sa utok nga makapabatyag sa kagutom, nawad-ag gana sa pagkaon sa puntong magutman kini hangtod mamatay bisan pag may daghang pagkaon! Mahimo kaha nga ang pagbati sa kagutom sa usa ka Kristohanon maapektohan sa punto nga siya magutman bisan pag siya gilibotan ug daghang espirituwal nga pagkaon?

¹⁰ Tagda kini nga naghunahuna sa imong kahimtang mismo: Nagtagana si Jehova ug dagayang espirituwal nga pagkaon sa mga Israelinhon. Sila may Balaod, nga makapalig-on sa ilang relasyon kaniya; sila may programa sa pagpanudlo aron isilsil ang kahibalo sa Diyos diha sa ilang mga anak; ug sila may mga manalagna sa pagtabang kanila nga makasabot sa kabubut-on sa Diyos. Bisan pa niana, misugod sila sa pagkalimot kang Jehova. Ang Bibliya nag-ingon nga sa panahon ni Oseas, “sila nangabusog [sa materyal nga paagi] ug ang ilang kasingkasing nabayaw.” (Oseas 13:6; Deuteronomio 8:11; 31:20) Kon dili nato buot nga ang atong materyal nga kahimtang mahimong mas hinungdanon kay sa atong relasyon sa Diyos, kinahanglang maghunahuna kita sa maong kapeligrohan kada adlaw.—Sofonias 2:3.

TAGDA ANG MAS HINUNGDANONG MGA BUTANG

11, 12. (a) Panahon sa pagmando ni Haring Uzzias, nganong gidasig sa mga manalagna ang katawhan nga mobalik kang Jehova? (b) Unsay gipasiugda ni Joel?

¹¹ Samtang si Jeroboam II naghari sa Israel, si Uzzias (nga ginganlan usab ug Azarias) naghari sa Juda. Gipadak-an ni Uzzias ang iyang teritoryo ug gipalapad ang Jerusalem. Siya “nagpasundayag ug kusog sa talagsaon nga sukod” tungod kay “ang matuod nga Diyos nagpadayon pagtabang kaniya.” Siya “nagpadayon pagbuhat kon unsay matarong sa mga mata ni Jehova” ug “nakiling sa pagpangita sa Diyos.” Bisan pa niadto, ang daghang katawhan sa Juda nagpadayon sa pagtanyag ug gipaaso nga halad diha sa hatag-as nga mga dapit.—2 Cronicas 26:4-9.

¹² Imong masabtan gikan niini nga bisan pag ang katawhan sa Juda ug Israel nagdala sa ngalan sa Diyos, subsob nga ang ilang pagsimba naglakip ug mga butang nga wala niya uyoni. Gipaningkamotan sa mga manalagna ang pagtabang kanila aron makaila sila sa matuod nga pagsimba gikan sa bakak. “Balik kanako uban sa bug-os ninyong kasingkasing, ug uban sa pagpuasa ug uban sa paghilak ug uban sa pagminatay,” nangaliyupo ang Diyos pinaagi ni Joel. (Joel 2:12) Matikdi: Gusto sa Diyos nga ang iyang katawhan moduol kaniya ‘uban sa bug-os nilang mga kasingkasing.’ Ang suliran mao nga ang ilang pagsimba sa Diyos maoy dili kinasingkasing. (Deuteronomio 6:5) Ang usa makaingon nga sila sa panggawas nagsimba kang Jehova, apan dili uban sa bug-os nilang kasingkasing. Subsob niyang gipasiugda pinaagi sa mga manalagna ang kahinungdanon sa mahigugmaong-kalulot, hustisya, ug kaaghop—nga kanang tanan maoy mga hiyas sa kasingkasing.—Mateo 23:23.

13. Unsay kinahanglang tagdon sa mga Hudiyo nga nahibalik gikan sa pagkadestiyero sa Babilonya?

¹³ Unya, tagda kon unsay nahitabo human sa pagbalik sa mga Hudiyo sa ilang yutang-natawhan. Bisan pag napasig-uli na ang matuod nga pagsimba nga nahiuyon sa Balaod, sila wala bug-os magsunod sa mga sugo sa Diyos. Ang mga Hudiyo nagpuasa sa mga adlaw nga maoy mga anibersaryo sa mga hitabong nalangkit sa kalaglagan sa Jerusalem. “Kamo ba nagpuasa gayod alang kanako, bisan kanako?” nangutana si Jehova. Nalaglag ang maong siyudad tungod kay ang Diyos nagpahamtang ug hustisya, usa ka hitabo nga dili angayng ikasubo. Inay maghinumdom sa nangagi ug magpuasa nga nagbangotan, ang mga Hudiyo angay untang magmalipayon, nga magsadya sa mga panahon sa pista tungod sa mga panalangin sa matuod nga pagsimba. (Zacarias 7:3-7; 8:16, 19) Ug kinahanglang hatagan nilag pagtagad ang ubang mga butang. Pananglitan, unsang mga butanga? “Himoa ang inyong paghukom uban sa matuod nga hustisya; ug ipakita sa usag usa ang mahigugmaong-kalulot ug mga kaluoy . . . ug ayaw paglaraw ug daotan batok sa usag usa diha sa inyong mga kasingkasing.” (Zacarias 7:9, 10) Kitang tanan makapahimulos sa mga butang nga gitudlo sa maong mga manalagna sa katawhan sa Diyos bahin sa bug-os-kasingkasing nga pagsimba sa Diyos.

14. (a) Unsay kinahanglang ilakip sa nahibalik nga mga nadestiyero diha sa ilang pagsimba? (b) Sa unsang paagi gipasiugda sa mga manalagna ang mas hinungdanong mga bahin sa pagsimba?

¹⁴ Unsay nalakip sa bug-os-kasingkasing nga pagsimba? Buweno, unsay gikinahanglan sa katawhan sa Diyos sa wala pa ug human sa pagkadestiyero? Nahibalo ka nga ang mga sukdanan sa Diyos bahin sa moralidad kinahanglang ituboy. May tino nga mga buhat o kalihokan usab nga gipatuman sa Balaod, lakip ang pagpakigtigom aron makapatalinghog ug makakat-on sa kabubut-on sa Diyos. Dugang pa niana, gipasiugda sa Diyos pinaagi sa mga manalagna ang pag-ugmad ug pagpasundayag sa mahigugmaong-kalulot, hustisya, kaaghop, kaluoy, ug pagkamakasaranganon. Matikdi kon giunsa kini pagpasiugda ni Jehova: “Ako may kahimuot sa mahigugmaong-kalulot, ug dili sa halad; ug sa kahibalo sa Diyos inay kay sa tibuok halad-nga-sinunog.” “Pagpugas kamo ug binhi sa pagkamatarong; pag-ani kamo sumala sa mahigugmaong-kalulot.” (Oseas 6:6; 10:12; 12:6) Si Miqueas mipahayag: “Unsa ba ang gipangayo ni Jehova kanimo kondili ang pagbuhat sa hustisya ug ang paghigugma sa kalulot ug ang paglakaw nga makasaranganon uban sa imong Diyos?” (Miqueas 6:6-8) Ug ang manalagnang si Sofonias miawhag sa katawhan sa Diyos: “Pangitaa ninyo si Jehova, kamong tanang maaghop sa yuta . . . Pangitaa ang pagkamatarong, pangitaa ang pagkamaaghop.” (Sofonias 2:3) Ang maong mga tinamdan gikinahanglan gayod alang sa pagsimba nga giuyonan sa Diyos.

15. Segun sa gitambag sa mga manalagna, unsay kinahanglang buhaton sa mga Kristohanon sa ilang pagsimba?

¹⁵ Unsay kalabotan sa maong mga tinamdan diha sa atong pagsimba? Nahibalo ka nga ang pagsangyaw sa maayong balita sa Gingharian hinungdanon kaayo. (Mateo 24:14; Buhat 1:8) Apan makasukna ka sa imong kaugalingon: ‘Ako ba dunay kiling sa pag-isip sa pagsangyaw sa akong teritoryo ingong hago o bug-at nga katungdanan? O giisip ko ba kini ingong kahigayonan sa pagtabang sa mga tawo aron sila makabati sa nagaluwas-ug-kinabuhing mensahe sa Bibliya? Maluoy ba ako kanila?’ Oo, ang kaluoy ug mahigugmaong-kalulot angayng magtukmod kanato sa pagpasidaan sa uban bahin sa adlaw ni Jehova. Ang hustisya ug pagkamatarong angayng magtukmod usab kanato aron paningkamotan nga ang maong mensahe makaabot sa tanang matang sa katawhan.—1 Timoteo 2:4.

16, 17. Nganong hinungdanon kaayo ang kaaghop ug pagkamakasaranganon diha sa imong pagsimba?

¹⁶ Ingong laing pananglitan, tagda ang atong obligasyon sa pagtambong ug Kristohanong mga tigom, nga nasayran nimong hinungdanon. (Hebreohanon 10:24, 25) Nakahunahuna ka ba kon sa unsang paagi ang kaaghop ug pagkamakasaranganon nalangkit niana? Ang mga maaghop maoy mapaubsanon mao nga sila modawat ug instruksiyon ug unya magpadapat sa ilang makat-onan, sa ingon nagatuman sa hudisyal nga hukom ni Jehova. Ang usa nga makasaranganon, kay nag-ila nga duna siyay mga limitasyon, makaamgo nga siya nagkinahanglag pagdasig ug kahibalo nga mabatonan pinaagi sa mga tigom.

¹⁷ Imong masabtan gikan sa maong mga pananglitan nga kita makabatog kaayohan sa mga butang nga gitudlo sa mga manalagna. Apan, komosta na man kon imong masabtan ang panginahanglan sa paghimog mga pagpasibo sa usa o duha ka butang nga gihisgotan sa itaas? O unsa na man kon ikaw nakahimog seryosong mga sayop, nga makahasol kanimo sa dihang mahinumdom ka niana? Ang 12 ka manalagna mohatag kanimog kahupayan ug tabang.

BALIK KAMO KANG JEHOVA

18. (a) Alang kang kinsa nga ang 12 ka manalagna adunay makahupay kaayong mensahe? (b) Unsay imong pagbati bahin kang Jehova, nga siya nagahangyo sa katawhan sa pagbalik kaniya?

¹⁸ Sumala sa atong nasabtan, ang mga manalagna nga atong gihisgotan wala lang magpahayag ug mga pagbadlong ug paghukom. Ilang gihubit si Jehova ingong nag-awhag sa katawhan sa pagbalik kaniya. Palandonga ang pagbati nga gipadayag diha sa mga pag-awhag ni Oseas: “Umari kamo ug mamalik kita kang Jehova, kay siya nagkuniskunis kanato apan kita iyang pagaayohon. Siya nagsamad kanato, apan kita iyang pagabugkosan. . . . Ug kita makaila, kita magpadayon sa pag-ila kang Jehova.” (Oseas 6:1-3) Tinuod, tungod sa iyang hustisya, si Jehova nagpatuman sa paghukom batok sa Israel ug dayon sa Juda. Bisan pa niana, angay untang isipon sa iyang katawhan nga kadtong maong mga kasakitan maoy mga lakang sa pagpasig-uli sa ilang espirituwal nga kahimsog. (Hebreohanon 12:7-13) Kon ang masupilong katawhan mobalik kang Jehova, siya ‘magaayo kanila’ ug ‘magabugkos kanila.’ Handurawa ang usa ka tawong nagluhod aron bugkosan ang samad sa iyang isigkatawo. Karon handurawa nga si Jehova naghimo sa susamang butang. Pagkamaluluy-ong Diyos si Jehova, nga siya nagabugkos niadtong gustong mobalik kaniya! Dili ba kana magdasig kanato sa pagtinguha nga mobalik kaniya kon kita makasala batok kaniya?—Joel 2:13.

19. Unsay nalangkit sa pagkaila kang Jehova?

¹⁹ Unsay nalangkit sa pagbalik ngadto sa Diyos? Si Oseas nagpahinumdom kanato sa panginahanglan nga dili lamang “makaila” sa Diyos kondili “magpadayon sa pag-ila kang Jehova.” Ang modernong reperensiya nag-ingon bahin sa Oseas 6:3: “Adunay dakong kalainan tali sa pagkahibalo bahin sa Diyos ug pagkaila sa Diyos. Susama kini sa kalainan tali sa pagbasa bahin sa gugma ug pagkanahigugma.” Kita nagkinahanglag halalom nga kahibalo bahin kang Jehova. Siya kinahanglang tinuod alang kanato, atong sinaligang Higala nga atong maduol sa bisan unsang panahon. (Jeremias 3:4) Tungod sa maong suod nga relasyon, imong masabtan kon unsay iyang bation sa dihang ikaw molihok sa usa ka paagi, ug kana maoy dakong tabang sa pagpadayon sa pagsimba nga iyang giuyonan.

20, 21. Sa unsang paagi gipadapat ni Haring Josias ang kahibalo bahin sa Diyos?

²⁰ Si Haring Josias maoy usa ka maayong panig-ingnan sa pagpadayon sa matuod nga pagsimba. Tagda sa dugang pa ang iyang kasinatian. Sa pagkahari ni Josias, ang nasod nadaot tungod sa idolatriya, kapintasan, ug panglimbong nga midagsang panahon sa paghari ni Manases ug Amon. (2 Hari 21:1-6, 19-21) Si Josias nadasig pag-ayo sa tambag ni Sofonias sa ‘pagpangita kang Jehova,’ kay “siya misugod sa pagpangita sa Diyos ni David.” Gisugdan ni Josias ang kampanya sa pagwagtang sa idolatriya gikan sa Juda, nga nagwagtang pa gani sa idolatriya diha sa mga dapit nga kanhi teritoryo sa amihanang gingharian.—Sofonias 1:1, 14-18; 2:1-3; 3:1-4; 2 Cronicas 34:3-7.

²¹ Human sa maong pagpanghinlo, si Josias mipadayon sa pagpangita kang Jehova. Iyang gimando nga ang templo ayohon. Panahon sa maong pagpang-ayo, nakaplagan “ang basahon sa balaod ni Jehova nga gihatag pinaagi sa kamot ni Moises,” nga lagmit mao ang orihinal nga manuskrito sa Balaod. Unsay reaksiyon ni Josias sa dihang gibasa ang maong basahon? “Sa pagkadungog gayod sa hari sa mga pulong sa balaod, dihadiha iyang gigisi ang iyang mga besti.” Iyang ‘gigisi usab ang iyang kasingkasing’ ug gipadapat dayon ang iyang nabasa. Wala siya mosulay sa pagpangatarongan sa iyang kaugalingon, sa pag-ingon nga daghan na kaayo ang iyang nahimo. Nahinumdom ka ba sa resulta sa iyang reporma? “Sa tanan niyang mga adlaw [ang mga anak sa Israel] wala mobulag gikan sa pagsunod kang Jehova nga Diyos sa ilang mga katigulangan.”—2 Cronicas 34:8, 14, 19, 21, 30-33; Joel 2:13.

22. Unsay atong makat-onan gikan sa panig-ingnan ni Josias?

²² ‘Kon ikaw pa si Josias, unsa kahay imong reaksiyon?’ tingali mangutana ka. Ikaw ba, sama kang Josias, mamati gayod sa mga pulong sa mga manalagna ug maghimo sa gikinahanglang mga kausaban sa imong mga lihok o panghunahuna? Bisan pag wala kita magkinabuhi sa mga adlaw ni Sofonias ug Josias, masabtan nato nga kinahanglan kitang mosanong sa mga mensahe ug tambag sa Diyos karong adlawa. Busa kon kinasingkasing nga gibati sa usa ka Kristohanon nga ang iyang paagi sa kinabuhi o pagsimba kinahanglang ipasibo, ang pagtuon sa mga basahon sa 12 ka manalagna makapaigmat sa paghimo gayod sa maong pagpasibo.—Hebreohanon 2:1.

23. Kon imong gihunahuna nga aduna kay kinahanglang pauswagon, unsay imong mahimo?

²³ May higayon nga tingali mobati ka sama kang Jonas samtang didto siya sa tiyan sa dakong isda: “Giabog ako gikan sa atubangan sa imong mga mata! Unsaon ko pagsud-ong pag-usab sa imong balaang templo?” (Jonas 2:4) Bisan pa niana, makapalig-on gayod ang mga pulong ni Jehova alang kanato nga maoy mga tawong dili hingpit nga makahimog mga sayop! “Balik kanako, ug ako mobalik kaninyo.” (Malaquias 3:7) Kon imong nasabtan ang panginahanglan sa pagpalig-on sa imong relasyon kang Jehova, ang mga ansiyano sa inyong kongregasyon malipayng motabang kanimo. Sama sa pagmanehog kotse, magsugod ka una sa primera, ingnon ta. Sa dihang nagdagan na ang kotse, mas dali nang pakusgan ang dagan niana. Makapaneguro kang si Jehova mahinangop ug motabang kanimo, kay siya “mapuangoron ug maluluy-on, mahinay sa kasuko ug dagaya sa mahigugmaong-kalulot.” (Joel 2:12-14) Ang mga mensahe gikan sa mga manalagna seguradong makapadasig sa tanang nagapadayon sa pagsimba nga giuyonan sa Diyos.