Sulat Gikan sa Nagamandong Lawas

Minahal nga Nahigugma Kang Jehova:

“Kamo mahibalo sa kamatuoran, ug ang kamatuoran magpagawas kaninyo,” nag-ingon si Jesus. (Juan 8:32) Makapadasig gayod kanang mga pulonga! Mahibaloan gayod nato ang kamatuoran bisan niining makuyaw nga “kataposang mga adlaw” nga kaylap ang kabakakan. (2 Timoteo 3:1) Nahinumdom ka ba sa una nimong nailhan ang kamatuoran sumala sa gipatin-aw sa Pulong sa Diyos? Makalilipay gayod kadto nga kasinatian!

Apan, ingon nga hinungdanon ang pagbatog tukmang kahibalo sa kamatuoran ug regular nga pagpaambit niana sa uban, ang atong panggawi kinahanglang uyon usab sa kamatuoran. Aron mahimo kana, kinahanglang magpabilin kita sa gugma sa Diyos. Unsay nalangkit niini? Ang giingon ni Jesus sa gabii antes sa iyang kamatayon nagtubag niini. Iyang giingnan ang iyang matinumanong mga apostoles: “Kon sundon ninyo ang akong mga sugo, kamo magpabilin sa akong gugma, ingon nga ako nagsunod sa mga sugo sa Amahan ug nagpabilin sa iyang gugma.”​—Juan 15:10.

Matikdi nga si Jesus nagpabilin sa gugma sa Diyos pinaagi sa pagtuman sa mga sugo sa iyang Amahan. Kini mapadapat usab kanato karon. Aron makapabilin sa gugma sa Diyos, kinahanglang ipadapat nato ang kamatuoran sa adlaw-adlaw nga pagkinabuhi. Niadtong gabhiona mismo, si Jesus miingon: “Kon nahibalo kamo niining mga butanga, malipayon kamo kon inyo kining buhaton.”​—Juan 13:17.

Gilaoman gayod namo nga kining libroha makatabang aron ipadayon nimo ang pagpadapat sa kamatuoran diha sa imong kinabuhi ug niana makapabilin ka “sa gugma sa Diyos . . . nga nagapanglantaw sa kinabuhing walay kataposan.”​—Judas 21.