SELAH

Usa ka Hebreohanong ekspresyon nga kanunayng makaplagan diha sa Mga Salmo ug usab makita diha sa Habacuc kapitulo 3. Bisan tuod gihunahuna sa kadaghanan nga usa kini ka teknikal nga termino alang sa musika o balak, ang tukmang kahulogan niini wala mahibaloi. Gituohan sa pipila nga kini nagkahulogang “paghunong o pag-undang,” mahimong sa pag-awit sa salmo aron isal-ot ang tugtog sa musika o kaha paghunong sa pag-awit ug pagtugtog alang sa hilom nga pagpamalandong. Bisan hain niini, ang paghunong sa walay duhaduha gigamit aron mas mapasiugda ang punto o pagbati nga bag-o lang gipahayag ug aron matisok ang bug-os nga kahulogan sa kataposang gipamulong. Ang hubad sa Gregong Septuagint sa Selah maoy di·aʹpsal·ma, nga gihubit ingong “usa ka pagsal-ot sa tugtog sa musika.” Ang Selah kanunayng makita diha sa tumoy sa usa ka hugpong sa mga pulong ug sagad diha sa tumoy sa usa ka estansa, ug kini makita sa matag higayon diha sa usa ka awit nga adunay marka o mga pulong ingong giya sa musika. Sa Salmo 9:16 inubanan kini sa “Higgayon,” diin gisabot sa pipila nga kini nalangkit sa honi sa alpa.