KABAHONG

Usa ka nuka sa lawas apan dili tungod sa usa ka samad, bisan tuod nga ang kabahong nga mohubag sagad maoy resulta sa usa ka dili kaayo dakong samad, sama sa pagkagasgas sa panit. Ang mga kabahong mahimong anaa sa gawas o sa sulod sa lawas, nga motungha diha sa panit o diha sa danglogon nga mga bahin sa lawas. Kini sagad magnana ug mosangpot sa inanayng pagkaut-ot ug pagkamatay sa tisyu diha sa apektadong bahin. Ang mohubag nga mga kabahong, nga mag-ul-ol, magngutngot, sagad motungha diha sa bitiis sa usa ka tawo.

Sa Hebreohanong Kasulatan, ang pulong nga usahay gihubad nga “kabahong” maoy ma·zohrʹ, nga mahimong magtumong sa usa ka kabahong, nuka, o sa usa ka hubag. Ang pipila ka eskolar nagtuo nga nagtumong kini sa usa ka matang sa samad nga tingali kinahanglang pisilon aron molugwa ang sulod niini. Ang Gregong pulong nga helʹkos, nga nagtumong sa kabahong, gigamit diha sa Kristohanon Gregong Kasulatan; kini makita diha sa Gregong Septuagint sa Exodo 9:9 ug Job 2:7 alang sa Hebreohanong pulong nga shechinʹ, nga nagtumong sa usa ka hubag.​—Tan-awa ang HUBAG.

Mahulagwayong Paggamit. Sa matagnaong paagi, ang Epraim (Israel) gilarawan ingong nasakit ug ang Juda adunay “kabahong,” mga kahimtang nga miresulta tungod sa ilang pagpakasala ug sa pagkawala sa pag-uyon sa Diyos. Apan, inay nga mosalig kang Jehova aron mapanalipdan batok sa ilang mga kaaway, sila kawang nga nangayog tabang sa hari sa Asirya, kinsa wala makaalim sa ilang “kabahong.” (Os 5:13) Sa ulahi, ang Zion, ang iyang katawhan nga gidestiyero ngadto sa Babilonya, gihulagway ingong natakboyan ug kabahong.​—Jer 30:12-15, 17; itandi ang Luc 16:​20, 21; Pin 16:​2, 10, 11.