Mga Magmamantala sa Gingharian Nagtaho
Pag-uswag sa Gingharian sa Tibuok Kalibotan
SI Isaias nga manalagna tukmang mitagna sa kauswagan sa intereses sa Gingharian sa atong adlaw sa miingon siya: “Sa kauswagan sa kagamhanan [ni Kristo] ug sa pakigdait walay kataposan.” (Isaias 9:7, King James Version) Ang mga taho gikan sa kapin sa 200 ka nasod diin ang mga Saksi ni Jehova nagasangyaw sa maayong balita nagapakita sa pagpanalangin ni Jehova sa buluhatong gihimo. Ania ang pila ka kapahayagan gikan sa lainlaing bahin sa yuta.
◻ Aprika: Ang sanga sa Senegal nag-ingon nga “karong tuiga sa pag-alagad sa makausa pa nakakita sa tugob nga pagpanalangin ni Jehova.” Sa isla sa Mauritius, diin ang buluhaton gisugdan sa 1951, ang gidaghanon sa mga Saksi nakaabot ug 100 sa 1964 ug 679 sa 1984. Ang Ghana nagtaho nga ang mga Saksi nianang nasora miuswag gikan sa 30 sa 1938 ngadto sa 25,755 karong adlawa! Ang payunir nga ministeryo nagapadayong maayo kaayo sa Aprika usab. Usa ka payunir sa Sierra Leone mihatag sa katarongan nganong siya anaa sa bug-os-panahong buluhaton: “Gipalabi ko ang pagpayunir tungod kay ang pagsulod sa kolehiyo o unibersidad mahimong pag-usik sa bililhong panahon nga magamit sa pagtabang sa mga mabuot-ug-kasingkasing nga makabatog tukmang kahibalo kang Jehova ug sa iyang Anak, si Jesu-Kristo, sa dili pa moabot ang kataposan.” Ang mga kombensiyon nga bag-o pang gihimo sa South Africa nagpasundayag sa panaghiusa. Ang sanga sa Watch Tower didto nag-ingon: “Karong tuiga nabatonan namo ang unang bug-os sagol-rasa nga mga kombensiyon niining nasora . . . Ang daghag-rasa nga bawtismo sa 343 maoy talagsaong panig-ingnan sa panaghiusa sa mga karnero ni Jehova niining daghag-rasa nga nasod.” Sa Zimbabwe ang usa ka lokal nga politiko midawat sa kamatuoran ug mihatag sa iyang pagluwat sa partido. “Kadto nagpahinabog dakong kagubot ug kadto gihisgotan uban sa usa ka miduaw nga opisyal sa usa ka publikong tigom. Sa gipangutana kon unsay buhaton sa maong igsoon ang opisyal miingon, ‘Wala kamoy buhaton. Kana mao ang ilang polisa sa bisan diin sa kalibotan. Kon mopadayon siyang membro sa partido siya dili tinuod nga Saksi ni Jehova.’”
◻ Asia ug Pasipiko: Ang espiritu sa bug-os-panahong payunir nga pag-alagad talagsaon sa Hapon diin 40 porsiento sa tanang magmamantala misulod sa bug-os-panahong pag-alagad niadtong Mayo. Ang sanga sa Pilipinas nag-ingong ilang ginatala ang duolag 200 ka bag-ong payunir kada bulan. Ang Australia nag-ingong “ang espiritu sa payunir tinuod nga talagsaon karong tuiga.” Ang India dunay bag-ong mga pasilidad sa sanga ug bag-ong kinatas-ang ihap nga 6,506 ka magmamantala. Ilang gihimo ang 14 ka kombensiyon uban sa 7 pa nga gihimo sa unang panahon diha sa lokal nga mga pinulongan. Kapin sa 9,000 ang mitambong ug 246 ang nabawtismohan. Kita malipay sa pagkakitag pag-uswag sa maong dako kaayong nasod. Dayag usab kaayo ang kauswagan sa Korea. Ang ilang bag-ong sanga gidedikar sa 1982 apan karon kini gamay na kaayo. Sila nagatukod na usab aron doblehon ang ilang hawanan. Ang mga regular payunir miuswag ug 56 porsiento nianang nasora. Ang Western Samoa maoy usa ka bag-ong sanga nga giporma sa pag-atiman nga maayo sa panginahanglan sa mga tagaisla sa Samoa. Busa ang “uma” ni Jehova diha sa Asia ug Pasipiko ginaani na.
◻ Uropa: Ang pag-uswag sa Gingharian dayag sa Uropa. Ang Portugal misulat: “May ‘pagbuto’ sa interes diha sa tanang natad. Dili pa dugay nga makab-ot ang usa ka kinatas-ang ihap nga kini hilabwan na usab sa sunod bulan.” Ang Belgium nagpalanog sa samang pagbati, nga nag-ingon: “Sa bisan diin nagakahitabo ang kauswagan.” Ang Selters, Alemanya, nagdedikar sa ikaduhang-kinadak-ang sanga sa kalibotan, nga ang tanan gawas sa usa sa Nagamandong Lawas sa mga Saksi ni Jehova miapil. Usa ka igsoon natukmod sa pagsulat: “Mahanduraw ba ninyo ang among gibati tapos ang 60 ka tuig nga pag-alagad—nga ang 20 ka tuig niana gigugol sa prisohan tungod sa duha ka sunodsunod nga paglutos—nga makaarang sa pagpakig-ambit niining kahibulongang espirituwal nga kombira diha sa espirituwal nga paraiso?”
◻ Mga Amerika: Ang Canada may talagsaong tuig sa pag-uswag nga may 80,939 nga mitahog pag-alagad. Ang sanga didto mihimo niining komentoha: “Labing makapadasig nga bisan pa sa nagausbaw nga mga kalisod ug mga panghaylo gikan sa nagkadunot nga kalibotan . . . kami nagapadayon sa pagtubong kahibulongan. Kini katumbas sa talagsaong kauswagan sa sayong Kristiyanidad panahon sa madunotong kataposang adlaw sa Romanong kalibotan. (2 Timoteo 3:1-5)” Ang Belize, Sentral Amerika, nag-ingon nga usa sa mga haylait sa tuig mao ang “usa ka biyahe sa pagduaw sa kabalangayan sa Mayan nga mga Indian sa habagatan sa nasod. Aron makaabot nianang hilit nga mga balangay (12 tanan), ang usa kinahanglang mobaktas ug 113 milya (180 km) ubay sa mga dalan sa lasang.” Napulog-duha ka igsoon ang mibiyahe nga sinangkapan sa mga bag sa bukobuko ug mga briefcase, unom-boltaheng slide projector, ug mga bateriya sa motorsiklo. Ilang gipasalida ang mga slide sa buluhaton sa Gingharian ni Jehova sa tibuok kalibotan. Usa ka tawo nga wala sukad makakitag slide mibatbat niana ingong “dakong letrato sa bungbong nga may hayag nga suga.” Ang Mexico miuswag gikan sa 81 ka magmamantala sa 1931 ngadto sa kinatas-ang ihap nga 151,807 sa 1984 (16-porsientong pag-uswag alang sa tuig), ug 695,769 ang mitambong sa Memorial sa miaging Abril. Ang Tinipong Bansa may talagsaong kinatas-ang ihap nga 690,830 ka magmamantala.
Ang pag-uswag sa Gingharian nagapadayon sa tibuok kalibotan.