Unsa ang Labing Bililhon sa Imong Kinabuhi?
SIYA gidungog nga kinadatoang tawo sa kalibotan. Ang personal niyang bahandi miabot sa bilyonbilyong dolyar. Gidayeg siya sa daghan tungod sa pagkaabot sa pungkay sa kalamposan. Apan duha ka tuig una siya mamatay, si J. Paul Getty miingon: “Ang salapi wala gayoy labot sa kalipay. Tingali sa kasub-anan hinuon.”
Sa pagpangagpas sa giisip sa daghan ingong bililhon sa kinabuhi, ang nadato tungod sa aseite tinong milampos sa talagsaong paagi. Apan siya ba sa atong paminaw usa ka tawong nakakaplag ug kalipay tungod sa butang iyang gihagoan pag-ayo aron mabatonan? O siya sa atong paminaw nakaamgo sa kataposan nga ang butang iyang gihagoan pag-ayo dili diay bililhon?
Mithi ug Kamatuoran
Unsay imong giisip nga labing bililhon sa imong kinabuhi? Ang pila ka tawo tingali moingon nga ang kagawasan mao ang labi nilang gimahal. Ang uban tingali moingong ang kalamposan mao ang labing bilihon sa ilang mga kinabuhi. Ang uban pa gayod nagabutang sa personal nga katagbawan nga una sa tanan.
Bisan pag dili nila buot angkonon kini, ang pagkinabuhi ug mga lihok sa daghang tawo nagapadayag nga ang salapi ug kalingawan mao gayod ang labing bililhon sa ilang mga kinabuhi. Determinado kaayo silang madato o determinado kaayong ‘maglingawlingaw,’ nga wala ra sa ilang buot ang pagpasagad sa ilang pamilya, ilang panglawas, ug ilang espirituwal nga kaayohan sa pagbuhat niana. Ug makaiikag, gitagna sa Bibliya nga sa “kataposang mga adlaw” ang mga tawo mahimong “mga mahigugmaon sa ilang kaugalingon, mga mahigugmaon sa salapi” ug “mga mahigugmaon sa kalingawan inay sa Diyos.”—2 Timoteo 3:1, 2, 4.
Butang nga Labi Pang Bililhon
Si Jesu-Kristo, ang magtutukod sa Kristiyanidad, misukna sa makapapukaw-sa-hunahuna nga pangutana. “May maangkon ba ang usa ka tawo bisan pag iyang maangkon ang tibuok kalibotan apan mawad-an sa iyang kinabuhi?” siya nangutana. (Marcos 8:36; Today’s English Version) Hunahunaa kana. Unsay mabuhat sa usa ka tawo kon walay kinabuhi? Wala!—Ecclesiastes 9:5, 10.
Tingali bata ka pa ug mao nga mobating ikaw daghag panahon sa pagbuhat sa tanang butang buot nimong buhaton. Apan tinuod ba kana? Ang mga gubat, krimen, mga sakit, ug mga aksidente nakapukan sa dili-maihap nga kusgang mga lalaki ug mga babaye—sa kalit ug wala dahoma. Unsay nahitabo sa tanan nilang plano ug mga tumong?
Tingali ikaw may pamilya o tingali tigulang ka na sa edad. Busa tingali mobati kang kinahanglang ibutang nimo ang tanan nimong panahon ug paningkamot sa pagtukod sa may-kasegurohang kaugmaon alang sa imong kaugalingon ug sa imong mga minahal una ka maghunahuna sa laing butang. Apan unsay isipon nimong butang may kasegurohan? Sumala sa imong nasayran, ang implasyon, pag-us-os sa ekonomiya, ug pagkawalay-trabaho nag-ut-ot sa tinigom sa tibuok nga kinabuhi sa daghan, nga nagbilin kanilang timawa ug walay balay. Gawas pa, tungod kay mabalhinon ang mga kahimtang sa tibuok kalibotan, unsa ang pasalig nga ang mga butang imong gihagoan dili mawagtang tungod sa wala-dahomang kausaban sa mga hitabo?
Busa, pihong nasabtan nimo ang bili sa pagsusi sa personal nimong mga tumong. Busa, unsa gayod ang giisip nimong labing bililhon sa imong kinabuhi?