Ang Ipasabot sa Balita

Pagdukiduki sa Kapuling Dugo

● Ang Fluosol-DA, usa ka kapuling dugo nga nagdalag oksihino nga hinimo gikan sa kemikal, wala makapasar sa medikal nga pagdukiduki sa Tinipong Bansa, ug ang pag-eksperimento sa pluwido diha sa mga tawo gipahunong sa tigbuhat niini. Sulod sa lima ka tuig, ang Alpha Therapeutic Corporation, ang tiggama sa T.B. sa “sentitikong dugo,” ang Fluosol-DA 20%, maoy gigamit sa piniling ospital sa Tinipong Bansa ug sa Canada diha sa klinikal nga mga pagsulay sa paggamit niini. Kapin sa 120 ka pasyente ang giobserbahan. Ang mga taho nagpakita nga ang Fluosol dili bililhong kapuli sa dugo sumala sa gilaoman ug ang ubang mabatonan dayong mga solusyon sama ra ka epektibo sa Fluosol. Ang Chicago Tribune mitaho nga ang usa ka ospital nga gigamit sa pagdukiduki mihatag duha ka rason sa kapakyasan sa Fluosol. “Dili kini makadalag igong oksihino ngadto sa pangunang mga organo,” miingon ang artikulo, “ug dili kini magdugay sa sistema sa tawo sa pagtipig kaniyang buhi hangtod nga mapulihan ang natural nga produksyon sa selula sa pulang dugo.”

Apan, ang pagtuon sa Fluosol nagpasiguda, nga sobra ra ang paggamit sa mga siruhano sa dugo ug, sumala sa Tribune, “nga mahimong makaopera sa tawong kulang ug dugo nga dili kinahanglag pag-abuno sa dugo.” Si Dr. Bruce Friedman, direktor sa mga ospital sa University of Michigan, miingon: “Ang akong pagbanabana mao nga 25 porsiento ngadto sa 33 porsiento sa dugo niining nasora wala kinahanglana.” Bisag nahunong na ang pagsulay diha sa mga tawo, mopatim-aw nga ang pagdukiduki sa pagpauswag sa fluorocarbon “artipisyal nga dugo” magpadayon.

● Ang kaamgid nga kapuling dugo giugmad ni Dr. Henry A. Sloviter sa School of Medicine sa University of Pennsylvania. Kining “artipisyal nga dugo” maoy kemikal nga sambog nga gipaagig ultrahigh-frequency sound waves ug dayon gisapawan ug lecithin nga gikuha sa itlog. Gisulayan lamang kini diha sa mga hayop sa pagkakaron, apan walay makadaot nga epekto ang nakita bisan kon hatagan ug daghang gidaghanon sa putiong pluwido. Ang Almanac, nga gipatik sa unibersidad, miingon nga kini adunay mga bentaha kay sa natural nga dugo: “Nakitang luwas bisan dili tagdon ang tipo sa dugo; dili kinahanglang ipabugnaw; ug walay kapeligrohang mapasahan sa mananakod nga mga sakit sama sa AIDS, hepatitis ug malarya diha sa mga pag-abunog dugo.” Dili pa kini magamit sa kinatibuk-an labing menos tulo ka tuig.

● Nagpadayon ang pagdukiduki diha sa laing kontinente. “Ang mga Australianong mga siyentipiko nakadiskobreg kapuli sa dugo nga matud nila mas maayo alang sa daghang kagamitan kay sa dugo sa tawo ug sa plasma,” miingon ang The Bulletin, magasin sa ekonomiya sa Australia. Ginganlag CH (casein hydrolysate), protena kini ug mahimong magama gikan sa gatas o soybeans. Si Dr. Louis Hissink, ang usa sa nakadiskobre sa CH, “nagtuo nga peligroso ang pagpasulod ug dugo gikan sa laing tawo ngadto sa pasyente,” mipadayon ang artikulo, “dili lamang sa tsansa nga makahatag sakit kondili sa mga reaksiyon sa pagsagang sa sakit.” Si Hissink miingon: “Sa kataposan, nagkatin-aw ngadto sa mga tawo nga ang dugo (gikan sa mga taghatag) dili diay usa ka dakong butang.” Kinahanglang kab-oton pa sa CH ang pag-uyon sa departamento sa panglawas sa nasod sa Australia.

Ang mga Saksi ni Jehova interesado niining matanga sa pagdukiduki. Samtang ang mga Saksi ni Jehova motugot ug dili dugong mga pluwido nga gamiton sa pag-abuno nga katuyoan, dili gayod sila mokompromiso sa ilang relihiyosong pagtuo—bisan sa atubangan sa kapeligrohan—sa pagsugot sa pag-abuno sa dugo. Sa tanang panahon kining mga Kristiyanoha malig-ong nagpabilin sa Biblikanhong tambag: “Pagpahilayo gikan sa . . . dugo.”—Buhat 15:29.

Pag-abuso sa Alkohol

● Nakaapekto ang pag-abuso sa alkohol sa mga batan-on ug tigulang. Ang surbi nga gihimo sa Division of Alcoholism and Alcohol Abuse sa 27,414 ka estudyante sa New York State nga nagpanuigong 12 ngadto sa 18 nadiskobrehang 10 porsiento mahubog labing menos kas-a sa usa ka semana. Sa laing ang-ang sa panuigon, ang basahong Medical Aspects of Human Sexuality nag-ingon nga ang pag-abuso sa alkohol “maoy dakong problema taliwala sa mga edad-edaran nga gibanabanang nakaapekto sa 10% ngadto sa 15%—nga pagkakaylap nga mas taas kon itandi niadtong napasulod sa ospital.” Makaikag, ang usa sa ebidensiya nga ang katawhan miabot na sa “kataposang mga adlaw” mao nga ang mga tawo “walay pagpugong sa kaugalingon.” (2 Timoteo 3:1-3) Ug ang pag-abuso sa alkohol maoy usa lamang ka timaan sa pagkakulang sa pagpugong sa kaugalingon.