Ang Ipasabot sa mga Balita
‘Nakapukawg Reaksiyon’
Sa Disyembre 22, 1984, nahimong ulohan ang usa ka dramatikong hitabo diha sa tren sa subwey sa New York City. Trayentay-siyete anyos nga pasahero si Bernhard Hugo Goetz giduol sa upat ka batan-on kinsa, matud pa niya, sa pagtulis kaniya. Si Goetz, nga nabiktima sa mga tulisan, mihulbot sa posil ug giluthang ang upat, naparalisar ang usa kanila sa tibuok kinabuhi.
Nakapukawg tibuok nasod nga panaglantugi ang pagposil may kalabotan sa krimen ug sa pagkaluwas sa peligro sa katilingban. “Kining hitaboa nakapukawg reaksiyon,” miingon ang kabulig sa tigsibya sa balita sa cable TV. “Adunay dakong pagbati sa pagkabalo ug kasuko batok sa sistema sa hustisya sa kriminal sa nasod.” Ang editoryal sa The New York Times mibatbat: “Napakyas ang kagamhanan sa paghatag [sa publiko] sa pangunang kaakohan niini: ang pagkaluwas sa peligro sa katilingban. Ang pagbuotbuot sa pagpatuman sa balaod sa imong kaugalingon nagpasabot sa pagkuha niini gikan sa mga kamot sa mga opisyales. Apan ang balaod, nianang sa tren sa subwey sa Dis. 22, wala mahiagom sa kang bisan kinsang kamot.”
Ang dakong kaikag sa publiko sa nahitabo kang Goetz nagpakita sa gibati sa kadaghanan: ang kalisang batok sa hulga nga matulisan o makulatahan, ug ang pagkabalo ug kasuko batok sa kamatuoran nga walay ginahimo sa pagpanalipod sa pagkaluwas sa peligro sa katilingban. Sa pagkatinuod, ang mga suliran bahin sa mga tulisan dili butang bag-o. (Itandi sa 2 Corinto 11:26.) Ang butang bag-o mao ang sukod diin ang krimen ug ubang makapabalakang mga kahimtang nakahimo sa mga tawo nga “panguyapan tungod sa kalisang ug sa pagpaabot sa mahitabo.” (Lucas 21:26) Apan, ilalom sa kagamhanan sa Gingharian sa Diyos kining mga kalisanga hapit nang matapos. Nianang gisaad nga bag-ong sistema, ang tanang pomuluyo sa yuta magpuyo diha sa pakigdait ug panaghiusa, ug “wala na unyay magpahadlok kanila.”—Miqueas 4:4.
“Mas Taas” nga Edukasyon
“Nagsaad kanimo ang kadaghanang mga kolehiyo sa paghimo kanimong mas maayo sa kultural ug moral, apan walay pamatuod nga nakahimo sila,” miingon si William J. Bennett, ang bag-ong sekretaryo sa edukasyon sa Tinipong Bansa. “Wala sila makatuman sa ilang mga saad.” Adunay laing hinungdan kon nganong negatibo siya bahin sa kahimtang sa edukasyon sa kolehiyo karon. “Gituohan nga ang mga graduwado sa kolehiyo mao ang pariong matang ug nga daghang katingalahang mga butang ang mahitabo kon makakuha kag titulo,” miingon si Bennett. “Kon ang akong kaugalingong anak . . . moduol kanako ug moingon ‘Nagsaad ka nga imong bayran ang akong matrikula sa Harvard; unsa kahay maayo nga imo akong hatagan ug $50,000 aron makasugod ug gamayng negosyo?’ Hayan isipon ko kana nga maayong ideya.”
Ingnon tang mohatag ug masanag nga kaugmaon ang kolehiyo, makagarantiya ba kini ug kalamposan? Dayag dili gayod. Apan alang sa kadaghanang tawo, adunay butang nga mohatag kalamposan. Ang tinuod nga mga Kristohanon karon makapamatuod sa kultural, moral, ug pinansiyal nga mga kaayohan nga ilang madawat gikan sa pagtuon sa Pulong sa Diyos ug sa pagpadapat niini diha sa ilang mga kinabuhi. Sila nasayod, sumala sa gipamulong ni Pablo, nga “ang tanang kasulatan . . . mapuslanon sa pagpanudlo, sa pagbadlong, sa pagtul-id, . . . aron ang tawo sa Diyos masangkapan alang sa tanang maayong mga buhat.” (2 Timoteo 3:16, 17) Walay kapeligrohan ang mahatag sa edukasyon sa Bibliya. Ang paggamit sa kaalam nga gikan sa Diyos ‘kansang mga hunahuna mas hataas kay sa atong mga hunahuna’ motultol sa tinuod nga kalamposan.—Isaias 55:9.
Nakabahin ang Aborsiyon
“Hapit 10 ka tuig nga milabay,” miingon si William Shannon sa The Boston Globe, “giingnan ako sa usa ka obispo sa Romano Katoliko, ‘nabalaka ako nga kita ingong iglesya nagmaneho sa sayop nga dalang one-way bahin sa isyu sa aborsiyon. . . . Tan-awa ang Polandiya. Tingali kini mao ang labing Katolikong nasod sa Uropa. . . . Apan bisan pa niana sa miaging tuig, ang mga babayeng taga Polandiya nakahimog 400,000 ka aborsiyon. Kon ang mga obispo sa Polandiya dili makapahunong sa aborsiyon sa Polandiya, diin ang 90 porsiento mga Katoliko, kita pa kaha nga minoriya lamang niining nasora?” Mipadayon si Shannon: “Hinungdanong pangutana kana niadto. Ug mas hinungdanong pangutana kini karon sanglit . . . ang gidaghanon sa mga aborsiyon sa [Polandiya] . . . misaka ngadto sa 800,000 sa usa ka tuig.”
Ang isyu bahin sa aborsiyon nagpabiling tandogonong ulohan sa Batikano, sa politika ug sa iglesya mismo. Sa Oktubre 1984 usa ka tibuok-panid nga anunsiyo sa The New York Times, nga gitunol sa 24 ka madre ug sa ubang 73 ka Katoliko, miingon nga ang pagtunglo sa iglesya sa aborsiyon sa tanang kahimtang dili “mao lamang ang matarong nga baroganan”—usa ka pamulong nga gilantugian sa Batikano. Ang gikutlong impormasyon sa paanunsiyo nga gikuha gikan sa bag-ong surbi nagpakita nga 11 porsiento lamang sa mga Katoliko ang mibatok sa aborsiyon sa tanang kahimtang. Sa matin-aw, nabahin ang iglesya sa isyu sa aborsiyon. Apan ang Pulong sa Diyos nagtambag sa mga Kristohanon nga “magasulti sa mao rang usa ka butang” ug nga “magkausa sa panghunahuna.”—1 Corinto 1:10; 2 Corinto 13:11.