Si Jehova—Dako Gayod!

HALANGDON, hamili, hataas, dungganon, bantogan, ug kahibulongan. Kini pipila ra sa daghang kaamgid nga pulong alang sa pulong “grand” (dako) nga nalista sa usa ka popular nga thesaurus. Ug matuod, bisan hain niana magamit sa pagbatbat sa “Dakong Maglalalang,” sumala sa pagtawag kang Jehova nga Diyos diha sa Ecclesiastes 12:1.

‘Apan hulat una,’ tingali makaingon ka, ‘ang akong hubad sa Bibliya wala magagamit niining mabatbatong pulong dako o “grand.”’ Ang New World Translation husto ba sa paggamit niana?

Kini dili gayod usa ka pananglitan sa pagdugang sa Pulong sa Diyos​—butang nga tin-awng ginatunglo niini. (Deuteronomio 4:2; 12:32; Proverbio 30:6; Pinadayag 22:18) Hinunoa, kini usa ka paningkamot sa pagpasa diha sa modernong Ingles sa eksakto ug kompletong kahulogan sa orihinal Hebreohanong teksto. Ang hubad nga “Maglalalang,” bisan tuod husto, dili paigo. Ang usa ka potnot niining tekstoha diha sa 1984 Reference Edition sa New World Translation nagasaysay: “‘Imong Dakong Maglalalang.’ Heb[reohanon], Boh·re’eyʹkha. Ang participle sa Heb[reohanon] nga berbong ‘paglalang’ maoy pl[ural] sa pagpasabot sa kahamili o pagkalabaw.”

Busa ang mga magsusulat sa Bibliya, nga dinasig sa Diyos, may panahong migamit sa plural nga mga porma sa berbo o nombre sa pagbatbat sa Diyos. Bisan pa niana, kini wala magkahulogang sila nagtuo sa plural, o tingali trinidad nga Diyos. Sa kaatbang. “Alang kanato sa pagkamatuod adunay usa ka Diyos ang Amahan,” misulat si apostol Pablo, nga midugang, “ug adunay usa ka Ginoo, si Jesu-Kristo.” (1 Corinto 8:6) Ang paggamit nila sa plural maoy pagpunting lamang sa dili-ikatanding nga posisyon ni Jehova. Siya halangdon, hamili, hataas, dungganon, bantogan, ug kahibulongan​—kining tanan ug labaw pa. Oo, yanong ipahayag, siya dako!

Diyos, Usa ka Maglalalang ug Magtutudlo nga Par Excellence

“Kay kinsa man sa mga langit ang ikatanding kang Jehova?” nangutana ang salmista. “Kinsay makasama kang Jehova taliwala sa mga anak sa Diyos?” (Salmo 89:6) Bisan ang panganay nga Anak kinsa nag-alagad sa panahon sa paglalang nga Iyang “batid nga magbubuhat” dili makatumbas pagkadako ni Jehova. Siya mismo miila niini, nga miingon dihang dinhi sa yuta ingong tawong si Jesu-Kristo: “Ang Amahan labaw kay kanako.” (Juan 14:28) Ug bisan pa sa iyang pagka “batid nga magbubuhat” sa iyang Amahan, siya wala gayod mangangkon sa titulo nga kaubang-Maglalalang. Iyang gihimaya ang Diyos ingong ang usa ug bugtong Maglalalang.​—Itandi ang Genesis 1:26, 27; Proverbio 8:30; ug Mateo 19:4.a

Si Jehova dili lamang usa nga gamhanan, o diyos, nga dunay daghan niana, kondili siya mao ang Diyos nga Labing Gamhanan, nga niana aduna lamay usa. (Salmo 82:6; Pinadayag 11:17) Tungod sa iyang talagsaong posisyon, labing angay nga tawgon siyang “ang dakong Diyos.” Kana ang pagtawag kaniya ni propetang Daniel sa gihangyo siya sa paghubad sa usa ka damgo ni Haring Nabukodonosor. Siya miingon: “Ang dakong Diyos mismo nagpahibalo ngadto sa hari kon unsay mahitabo tapos niini. Ug ang damgo kasaligan, ug ang hubad niini katuohan.” Niana ang hari mitubag: “Sa pagkamatuod ang inyong Diyos maoy Diyos sa mga diyos ug Ginoo sa mga hari ug Magbubutyag sa mga tinago.”​—Daniel 2:45, 47.

Ang Dakong Diyos nga may katakos sa pagkahibalo daan sa umaabot ug pagbutyag sa mga tinago dayag takos mogiya sa iyang katawhan sa tukmang paagi, nga magatudlo kanila kon unsaon sa paglikay sa mga kapeligrohan. Siya usa ka Magtutudlo nga walay kasama, ang “Dakong Magtutudlo,” sumala sa pagtawag kaniya sa Isaias 30:20, 21. Kini matuod, una sa tanan, tungod sa kinalabwang kaalam nga nasulod diha sa iyang ginatudlo. Pananglitan, ang Diyos miluwat ug mga pasidaan nga nagpasidaan sa iyang katawhan sa mga kapeligrohan nga kinaiyanhon sa tabako, pag-abusar sa droga, mga abuno sa dugo, ug seksuwal nga imoralidad sa dugay na una pa kini bug-os ilha sa mga siyentipiko ug mga doktor.b

Ikaduha, siya walay kasama sa iyang paagi sa pagpanudlo. Kini kanunayng positibo, nga ihatag sa mahigugmaong paagi uban ang pailob ug hingpit nga pagsabot sa indibiduwal nga mga panginahanglan ug mga katakos sa estudyante. Busa kini labing epektibo. Dili katingalahang ang usa ka karaang alagad sa Diyos kas-a nangutana, aron sa pagtandi, sa pangutana: “Tan-awa! Ang Diyos mismo nagalihok sa hataas nga paagi tungod sa iyang gahom; kinsa ang magtutudlo nga sama kaniya?”​—Job 36:22.

Usa ka Hari, Usa ka Magbubuhat, ug Usa ka Agalon

Ang Jerusalem, ang sentro sa kagamhanan alang sa mahulagwayong teokrasya ni Jehova, gitawag “ang lungsod sa dakong Hari.” (Salmo 48:1, 2) Ang Salmo 135:21 nagapaila sa maong “dakong Hari” ingong “si Jehova, kinsa nagapuyo sa Jerusalem.” (Tan-awa usab ang Salmo 47:8; Mateo 5:35.) Hinuon, ingong unibersohanong Soberano diha sa langitnong trono, ang Dakong Hari wala gayod sa literal magpuyo sa Jerusalem, apan ang mga tawhanong hari nga naghari ingong iyang mga hawas maoy nagpuyo didto.​—Salmo 10:16; 29:10; Jeremias 10:10; Daniel 4:34.

Karon, sukad 1914, si Jehova makausa pa nagahari pinaagi sa iyang hawas nga Hari, nga karong panahona ang iyang Anak, si Kristo Jesus, kinsa gientrono na sa “langitnong Jerusalem.” (Hebreohanon 12:22; Pinadayag 11:15; 12:10) Ang iyang Mesiyanikong Gingharian permanenteng magpamatuod sa pagkamatarong sa pagkasoberano ni Jehova ug maghinlo sa uniberso sa tanang maghahagit sa pagmando sa Dakong Hari.

Sumala sa Job 35:10, Salmo 149:2, ug Isaias 54:5, si Jehova mao usab ang “Dakong Magbubuhat.” Ang naulahing duha ka teksto nagatumong sa pagbuhat ni Jehova sa Israel nga usa ka nasod aron sa pag-alagad sa iyang intereses. Busa, gawas nga makalalang, si Jehova makapahinabo usab nga ang iyang mga linalang mamahimo nga bisan unsa nga buot niyang mamao sila aron mangatuman ang iyang mga katuyoan. Kini nahiuyon sa kahulogan mismo sa balaang ngalan: “Siya Nagapahinabo nga Mamao.”

Ang maong Dakong Hari ug Dakong Magbubuhat takos sa atong pagsalig ug pagpiyal. Labaw pa niana, siya takos sa atong gugma, debosyon, ug​—labaw sa tanan​—sa atong pagsimba. Siya takos tawgong atong “dakong Agalon.” (Oseas 12:14) Angay natong likayan ang paglihok sama sa dili-matinumanon nga Israel, kinsa milandong sa modernong-adlawng Kakristiyanohan. Bahin sa maong mga apostata si Malakias misulat: “‘Ang usa ka anak, sa iyang bahin, nagapasidungog sa usa ka amahan; ug ang usa ka sulugoon, sa iyang dakong agalon. Busa kon ako usa ka amahan, hain ang akong dungog? Ug kon ako usa ka dakong agalon, hain ang kahadlok kanako?’ Si Jehova sa mga panon miingon kaninyo, Oh mga saserdote nga nagatamay sa akong ngalan.” (Malakias 1:6) Angay natong pasidunggan ang atong Dakong Agalon pinaagi sa diyosnong kahadlok, nga dili magatamay sa iyang ngalan pinaagi sa pagsulay pagtago niana​—sama sa ginahimo sa pila ka modernong mga maghuhubad​—o pagpala niana gikan sa Bibliya nga daw makauulaw ang paghisgot niana. Sa kaatbang, angay nga kita magarbohong magadala niana sa pagpaila sa atong kaugalingon nga Iyang mga saksi.

Bug-os nga Pag-ila sa Pagkadako ni Jehova

Ang Diyos mao ang personipikasyon sa gugma, ingon man sa tanang ubang maayo ug positibong hiyas. (1 Juan 4:8) Busa dili kita matingala nga ginabatbat ni Isaias kining “matuod nga Diyos, si Jehova, . . . ang Maglalalang sa mga langit” sa yano ingong “ang Usa nga Dako.” Siya mao ang personipikasyon mismo sa pagkadako.​—Isaias 42:5.

Kon atong bug-os ilhon siya ingong Dakong Hari nga karon nagamando sukad 1914 sa linain kaayong diwa, atong huptan ang estriktong Kristohanong neyutralidad sa politikanhong kahikayan. Atong likayan ang pagdapig, bisan sa pasibong paagi. Ug sa positibong paagi atong paluyohan ang pagmando sa Diyos pinaagi sa “pagpangita pag-una sa gingharian ug sa iyang pagkamatarong,” nga aktibong magasangyaw “niining maayong balita sa gingharian” sa uban.​—Mateo 6:33; 24:14.

Kon bug-os natong ilhon siya ingong Dakong Agalon, likayan nato ang pagsupak sa sinultihan o aksiyon sa iyang inuyonang paagi sa pagbuhat sa mga butang. Kita daling mosugot kaniya. Tungod sa iyang talagsaong posisyon ingong Dakong Diyos, ang Dakong Maglalalang, ug ang Dakong Magbubuhat, atong pabilhan ang iyang katungod sa linaing debosyon. Kita dili mosinta sa iyang mga kinahanglanon, bisan kadtong morag alang kanato sobra ka mapig-oton. Atong dawaton dayon ang iyang mga kahikayan alang sa paghupot sa pakigdait ug panaghiusa diha sa kongregasyon ug sulod sa atong mga pamilya mismo.​—Tan-awa ang Hebreohanon 13:17; Efeso 6:1-3.

Kon bug-os natong ilhon siya ingong Dakong Magtutudlo, dili nato dudahan o tamayon ang mga paagi sa pagtudlo nga gigamit karong adlawa sa “matinumanon ug maalamong ulipon” nga matang. Hinunoa, atong paluyohan ang mga aksiyon sa pagdisiplina nga usahay kinahanglanon aron sa pagtudlo, ug sa samang panahon maningkamot nga makakuha sa labing dakong kaayohan gikan sa maayong mga tabang sa pagpanudlo nga ginatagana sa makita nga organisasyon sa Diyos.​—Mateo 24:45-47.

Oo, ingong kasumahan, kon atong bug-os ilhon si Jehova ingon, sa yanong pagkasulti, ang Usa nga Dako, kita maikag sa pagpahimulos sa tanang higayon sa pag-alagad kaniya. Ang mga posisyon nga may gahom, kabantog, ug bahandi, sama sa gipahimuslan sa mga politiko, mga maglilingaw, o mga kapitalista, wala ra kon itandi sa pribilehiyo sa pagkaanaa sa pag-alagad sa Usa nga Dako.

Daghang katawhan ang tingali andam modawat kang Jehova ingong ilang Maglalalang ug Magbubuhat. Apan kon bahin sa pagdawat kaniya ingong ilang Diyos, ilang Magtutudlo, ilang Hari, ug ilang Agalon​—niini sila mosupak. Hinaot dili gayod nato himoon kanang sayopa. Hinumdomi, bisan kon ingong Maglalalang, Magbubuhat, Diyos, Magtutudlo, Hari, o Agalon, si Jehova maoy halangdon, hamili, hataas, dungganon, bantogan, ug kahibulongan​—kining tanan ug labaw pa. Oo, si Jehova dako gayod!

[Mga footnote]