Ang Ipasabot sa mga Balita

Ang Iglesya Ingong Magpupukan sa Gahom

Tungod sa nagatubong pagkadayag, ang mga iglesya sa Kakristiyanohan maisogong misulod sa talandogong politikal nga mga isyu. Diha sa pangunang artikulo nga nag-ulohang “Mikanaog Gikan sa Pulpito Ngadto sa mga Dalan,” ang The Toronto Star sa Canada mipunting sa pagtagad sa “daghang higayon sa pagpangilabot sa mga lider sa iglesya [sa politika].” Ang magsusulat si Jack Cahill miingon nga ang Iglesya Katolika Romana “nakadulag dakong papel sa pagpukan kang Ferdinand Marcos sa Pilipinas” ug nagtapos sa pagmando ni Jean-Claude Duvalier sa Haiti. Si Cahill midugang: “Sa Habagatang Aprika, ang Anglicanong Arsobispo si Desmond Tutu . . . ug ang ubang mga membro sa klero mipasidaan sa kagamhanan nga mopadasig silag komprontasyon sa kagamhanan” batok sa mga isyu sa pagpinig.

Gilantaw ang paagi sa pakigkomprontasyon ingong tukmang kalihokang Kristiyano kon kini mangitag kausaban sa dili-popular nga pagmando o mga balaod. Samtang tinuod nga mipadala si Jesu-Kristo sa iyang mga tinun-an ngadto sa kadalanan, dili kadto sa pagtabang sa pagpatunghag politikal nga kausaban. Hinunoa, miadto sila sa publikong mga dapit ug sa mga pultahan sa katawhan sa pagwali sa langitnong Gingharian ingong paagi sa pagpanalangin sa katawhan. (Mateo 10:5-7; 24:14) Sa giakusar si Jesu-Kristo sa politikal nga mga kalihokan​—nga naghimo sa iyang kaugalingon nga hari​—tin-aw niyang gipahayag nga ang maong kalihokan dili mapaabot kaniya o sa iyang mga sumusunod. Iyang gisultihan ang usa nga naghukom nga ang “akong gingharian dili niining kalibotana.” Sa pagsulti niini, ang tinuod nga mga sumusunod sa tanang panahon nagabaton ug neyutral nga baroganan bahin sa politika, kay sila miingon mahitungod kanila: “Dili sila bahin niining kalibotana.”​—Juan 18:36, Catholic Jerusalem Bible; Juan 17:4.

Gidumilian ang Hail Mary

Karong bag-o ang wala pa sugdi sukad nga kalihokan sa presidente sa Brazil, si José Sarney, mibando sa pagpasalida sa kontrobersiyal nga salidang Hail Mary nga nakapukaw ug mga protesta sa sulod ug sa gawas sa Katolikong Iglesya. “Dili ako mouyon,” miingon ang Obispong si Mauro Morelli, “nga ang Katolikong Iglesya, sumala sa nahimo niini sa panahon sa Inkisisyon, mohangyo sa Estado sa paghimog mga paagi sa pagdepensa sa pagtuo.” Ug ang pederal nga deputado sa estado si Eduardo Matarazzo Suplicy mireklamo nga ang presidente sa Brazil “nagpadaog sa mga pag-ipit sa konserbatibong bahin sa Iglesya.” “Mibalik kita sa paghiusa sa altar ug sa trono,” misulat ang propesor sa Campinas University si Roberto Romano diha sa mantalaang Folha de S. Paulo. “Nahitabo kini bisag walay tin-awng kasabotan, sama sa nahitabo sa Lateran Treaty uban kang Mussolini ug sa Imperial Concordat uban kang Hitler. Dili, kining tanan nahitabo sa siradong mga opisina sa kagamhanan.”

Ang maong relihiyosong mga taktika sa pag-ipit ug sa reaksiyon kanila makapahinumdom sa mahulagwayong pagkabatbat sa Bibliya sa simboliko samag bigaon relihiyosong babaye kinsa “adunay gingharian sa ibabaw sa mga hari sa yuta.” Kining mga haria, kini nag-ingon, sa ulahi “modumot sa babayeng bigaon ug siya pagalaglagon ug pagahuboan, . . . ug sunogon siya pinaagig kalayo.”​—Pinadayag 17:1, 2, 15-18.

“Mga Katarongan sa Kasuko”

Diha sa iyang bag-ong librong Raisons de la colère (Mga Katarongan sa Kasuko), ang iladong Pranses nga agronomista si René Dumont nakapanghinaway sa iyang gitawag nga “dakong kapakyasan” sa atong “nabansay sa produksiyon nga sibilisasyon.” Ang rebista sa libro diha sa mantalaan sa Paris nga Le Monde misumariya sa pila ka pananglitan nga gikutlo ni Dumont: “Aron maabot ang dakong panginahanglan sa newsprint, ang Canada matag tuig nagapamutol ug dugang mga kahoy kay sa ginapatubo niini; sa Unyon Sobyet gipasobrahan ug tikad ang dos-tersiya sa mga yuta niini. Ug bisan ang Pransiya gitaho nga ‘gidaot ang pagkatabunok sa iyang yuta, nga naugmad sa kasiglohan sa paggamit sa hugaw ug sa pagkaon sa mananap ingong abuno,’ pinaagi sa paggamit ug kemikal imbes natural nga mga abuno.”

Giakusar usab ni Dumont ang industriyalisadong kanasoran nga ‘nagdaot’ sa planeta pinaagi sa pagkausikan ug sa dili maayong pagdumala sa pag-apod-apod sa mga butang, ug midugang: “Dako kaayo ang kadaot sa atong pagdumala sa ekonomiya sa kalibotan nga takos kitang mawad-an sa atong pagkahimong labaw.” Siya miingon nga ang Kasadpang sulondan sa kauswagan “nakadaot sa ekonomiya sa Ikatulong Kalibotan” ug nakasuyop sa mga tawo palayo gikan sa kauswagan sa agrikultura ngadto sa “makahahadlok nga mga siyudad” nga mitubo diha sa dili kaayo ugmad nga mga nasod.

Kon kining mga kahimtanga mao ang “mga katarongan sa kasuko” sa mga tawo nga nakakita sa kapeligrohan, dili ba may dakong katarongang masuko niining mga butanga ang Usa nga naglalang ning planetaha? Busa ang Bibliya sa matagnaon nagbatbat sa tulin nga nagsingabot nga panahon sa dihang ang malaglagong kalihokan sa katawhan moresulta sa “kaugalingong kasuko” sa Diyos, nga mopahinabo kaniya sa “paglaglag niadtong nagalaglag sa yuta.”​—Pinadayag 11:18.