Nagaatiman sa Nagkatibulaag nga “mga Karnero” sa Caprivi

ANG gatas ug kolor nga Land-Rover gikargahan ug mga suplay, mga ligid, ug mga literatura sa Bibliya. Nagpaingon kini sa amihanan gikan sa Windhoek, kapital sa South-West Africa (Namibia). Ang panahon? Mayo 1981. Samtang nagmaneho sila sa patag, ugang lugar, ang upat ka pasahero nakapanahon sa pagpalandong sa kulbahinam nga panaw sa unahan.

Ang drayber, si Chris du Plessis, ug ang iyang kauban mga Saksi ni Jehova ug regular payonir, sa ato pa, bug-os panahong mga magwawali sa maayong balita sa Gingharian. Bag-o pa lang nilang natapos ang daghang makalilipayng mga semana sa Katatura, ang dakong lungsod sa mga itom duol sa Windhoek. Nakita sa duha nga makawiwili ang pagsangyaw sa maayong balita sa Gingharian sa balay ug balay taliwala sa mga tawong itom uban sa ilang mahigalaong tinamdan ug maayong pagsanong sa balita.

Ang duha ka batan-ong lalaki gihangyo sa pagtaganag transportasyon sa magtatan-aw sa sirkito nga si Schalk Coetzee ug iyang asawa paingon sa nalain nga mga grupo sa mga Saksi sa amihanan, diin ang ubang mga dalan dili maagian sa ordinaryong mga sakyanan. Apan pinaagi sa Land-Rover makakampo sila bisan asa​—ang mga Coetzee mangatulog sa “silong” sa sakyanan ug ang duha ka batan-on sa “itaas” sa tolda sa atop sa sakyanan!

Tapos nakamanehog duolan sa 370 ka kilometroa ang grupo miabot sa “trayanggulo sa kamatayon”​—nga gitawag tungod kay daghang mga tawo nawad-an sa ilang mga kinabuhi didto tungod sa dakong kalihokan sa gerilya batok sa mga manunulong gikan sa Angola. Sa halayong amihanan ilang nakita ang nangagubang mga sakyanan apan wala sila magkaproblema.

Ang ilang unang giduaw mao ang Ondangwa, usa ka kuwartel sa militar nga dili layo sa Angola. Mga espesyal payonir ang nag-atiman sa gamayng kongregasyon didto. Si Christo Els ug ang iyang asawa si Elizabeth nakakat-on sa lokal nga pinulongan, Ndonga​—nga usa ka tinuod nga hagit. Apan namati pag-ayo ang mga tawo ug may dulot nga pagtahod sa Bibliya. Usahay mopuli si Christo sa pagdaro sa asno ug namunglay ang iyang asawa aron ang mga tagbalay libreng makapamati sa balita sa Gingharian!

Sanglit naggubatay ang maong lugar, ang mga biyahedor sa batoong dalan bukas sa kapeligrohan sa mga mina. Busa nagmaneho si Christo ug Elizabeth sa balasong mga dalandalan sa sulop, ug ang mga tawo nga ilang nahibalag natingala kaayo nga wala silay dalang mga armas.

Usa ka tinuod nga kalipay ang pagtan-aw kanilang miduaw sa mga tawo sa Ovahimba nga nagkinabuhi sa kinaraang paagi sa halayong mga lugar. Kining mga tawhana nagbesti mga panit sa mananap, ang ilang mga lawas giduhigan ug okre. Gigamit sa mga payonir ang publikasyon nga niini nakatabang sila sa paghubad. Pagkadakong kalipay ang pagtan-aw niining mga tawhana nga nagpakitag pagpabili sa balita sa Gingharian!

Ang usa ka adlaw nga asembliya gihimo sa panahon sa pagduaw sa usa ka semana ni Igsoong Coetzee ug sa iyang mga kauban. Sanglit diyutay lang ang namuyo ning lugara, gamay ra ang mitambong. Apan ang tanan dinhi ning halayong lugar nalipay sa programa ug sa maayong pag-ubanay.

Ang Caprivi Strip

Tapos nga mihapit sa Rundu sa pagpangayog mga permiso, ang grupo misulod sa Caprivi Strip. Sumala sa makita sa mapa, hiktin kini nga koridor nga teritoryo nga nagtadlas sa amihanang-sidlakan sa Namibia paingon sa kinapusoran sa habagatang Aprika. Kini maoy 480 ka kilometrong katas-on ug 80 kilometrong kalaparon ug managsamag mga utlanan sa Angola, Zambia, ug Botswana. Bisag gikontrolar usab kining dapita sa militar, mas malinawon kini may sa teritoryo sa kasadpan.

Ang populasyon sa Caprivi maoy duolan sa 40,000, nga ang kadaghanan mga itom, ug may mga Bushmen o mga Laag sa bukid nga naglibodlibod sa kasadpang bahin. Iningles ang sinultihan sa kadaghanang molupyo ug makabasa ug makasulat. Sa nagpasidlakan ang grupo, nagpanghapit sila sa pagpakigsulti sa mga tawo, ug nawili usab sila sa talan-awon​—mga kahoy ug ihalas nga mga mananap, lakip sa mga elepante ug mga antelope. Sa miabot sa Katima Mulilo, ang bugtong “lungsod,” ang pundokpundok sa mahinlong mga payag nagkadaghan. Nawili kaayo ang mga payonir ning dapita nga sa gipangutana ni Schalk Coetzee kon gusto ba nilang moalagad ning hilit nga lugar, malipayon nilang gidawat kining pribilehiyoa.

Tapos sa mubong pagduaw sa Katima Mulilo, ang upat mipaingon na usab sa pagduaw sa hilit nga grupo sa Kasane sa amihanan sa Botswana. Miagi sila sa Chobe Game Reserve, usahay sa daplin sa dakong panon sa mga bupalo ug mga elepante. Dihang nagkampo sila sa gabii, nakadungog silag mga lion nga nagangulob sa duol.

Diha sa Kasane, pinaagi sa paghubad sa lokal nga mga payonir, misangyaw sila sa payag ug payag, estilo Aprikano. Ang pagduol mahinay ug matahuron. Magbarog ang bisita gawas sa payag ug manangpit ug makakuhag pagtagad. Tubagon siya ug dapiton siya sa pagsulod ug palingkoron. Kasagaran tawgon ang tibuok pamilya aron makapaminaw. Dayon mosunod ang taas nga pagbayloayg mga pangomosta ug mga pangutana bahin sa panglawas ug gigikanan. Ayha pa nga makasugod ang Saksi sa paghisgot bahin sa topiko sa Bibliya.

Ang lokal nga mga Saksi nalipay kaayo ug mapasalamaton nga nagkugi ang grupo sa pagduaw kanila. Ang mga miting gihimo sa mga payag nga hinimo sa lapok. Busa gidasig sila ni Schalk Coetzee sa pagtukod ug ilang kaugalingong Kingdom Hall.

Mibalik sa Katima Mulilo, ang mga biyahedor nalipay sa usa ka semanang pagduaw sa lokal nga mga Saksi. Sa gabii nagkampo sila duol sa Zambezi River ug nalipay sa kahilom, nga mabalda lamang sa hinagtok sa lagyong mga tambol​—ang “pulso” sa Aprika. Ilang nakita ang grupo nga madasigon apan nagkinahanglag dakong pag-agak kon unsaon sa pagdumala ug mga miting, sa pagsangyaw gikan sa payag ug payag, sa tukmang pagpalegal sa ilang mga kaminyoon, ug uban pa.

Nalipay gayod ang mga bisita sa buluhatong pagsangyaw! Miingon ang usa: “Dihang nahibaloan sa mga tawo nga may mga basahon kami sa Bibliya sa Silozi, nga ilang pinulongan, nakurat kami kanila, naghangyo dili lamang sa mga libro kondili nga may motudlo kanila. Pagkadili katuohan niadto!”

Nagpanukong mibiya ang grupo sa ilang bag-ong mga higala sa Katima Mulilo ug misugod sa pagbalik ug biyahe. Migugol silag usa ka semana sa lokal nga kongregasyon sa Rundu sa amihanan sa Namibia. Ang kadaghanan sa mga igsoon didto maoy mga lagiw gikan sa Angola nga Portuges ug sinultihan. Laing suliran sa pinulongan! Tapos sa pagbiyaheg duolan sa 4,000 ka kilometro, nakaabot sila sa Windhoek, gikapoy apan malipayon ug mapasalamaton kaayo kang Jehova sa daghang mga pribilehiyo nga ilang gitagamtam.

Balik sa Katima Mulilo

Ang duha ka payonir mibalik sa Katima Mulilo, karong panahona sa pagpabilin ug sa pagtabang sa “mga karnero” ni Jehova. Aron makapabilin, sila nagkinahanglag kapuy-an ug partaym nga trabaho. Sa ilang unang pagpangita nakakaplag silag trabaho. Nakapangayo usab silag permiso sa paggamit ug karabano, usa ka sakyanang de-motor, nga iya sa Watch Tower Society. Ug nagpasalamat sila kang Jehova sa pag-atiman sa ilang mga panginahanglan.

Sa ulahi, ang mga payonir okupado kaayo sa pagtabang sa lokal nga mga Saksi sa daghang mga paagi. Lakip niini mao ang pagtukod ug Kingdom Hall. Namutol silag mga kugon aron iatop, nanigom ug espesyal nga lapok nga makita sa mga bungdo sa hulmigas nga gahi kaayo kon mouga, ug nakakat-on sa paghimog atop​—estilong Aprikano. Uban sa napaputing mga bungbong, ang hall hinlo ug nindot tan-awon. Sanglit dili man sila makaabot sa pagpalit ug mga lingkoranan, bangko ug kahoy ang lingkoranan. Bisag dili kadto trabaho sa mga eksperto, apan ilang kaugalingong Kingdom Hall kadto!

Wala pay nahimong maayong pagkadumalang mga miting. Busa ang mga payonir nangandam sa lima ka senemanang mga tigom nga gihimo sa nga Saksi ni Jehova sa tibuok kalibotan. Nagkahulogan kinig daghang trabaho, apan alang kanila ug sa lokal nga mga Saksi, kadto maoy makapalig-on sa espirituwal. Apan kinahanglang makakat-on usab ang mga payonir sa Silozi, ang lokal nga pinulongan.

Wala magdugay, naporma ang kongregasyon. Sa ulahi, upat sa lokal nga mga igsoon makahimo na sa paghatag ug mga pakigpulong sa publiko ug makaatiman sa tanang mga tigom, ug ang usa natudlo nga ministeryal nga alagad. Kasamtangan, gitagamtam sa mga payonir ang dakong kalipay sa buluhatong pagsangyaw sa payag ug payag. Daghan kaayo ang gustong magtuon sa Bibliya nga dili nila maatiman ang tanang mga hangyo. Dili ka ba gustong moalagad sa teritoryo nga ingon niini? Dili ba?

Laing Pagduaw sa Kasane

Gihangyo sa magtatan-aw sa sirkito ang mga payonir sa pagduaw sa grupo sa Kasane sa Botswana sa matag karon ug unya. Sa usa ka okasyon, nakasugat silag makuyaw nga hitabo. Gipahunong sila sa mga sundalo duol sa utlanan sa Botswana.

“Mga espiya kamo!” miingon ang lider.

“Dili, mga ministro kami, mga Saksi ni Jehova, nga nagapanudlo sa mga tawo bahin sa Bibliya.”

“Dili ko motuong mga Kristohanon kamo. Mga sundalo kamo sa South Africa.”

Malisod nga situwasyon kadto. Apan sa nakita sa mga sundalo ang suplay sa mga basahon sa Bibliya ug walay mga posil, ilang gipalakaw ang mga igsoon.

Ang makuyaw nga kahimtang sa militar sa maong dapit nakapahimo usab sa pakigkontak sa Zambia nga malisod kaayo. Ang Zambezi River lang ang nagbulag sa Katima Mulilo gikan sa Zambia, diin daghan ang mga Saksi ni Jehova ug may daghang suplay sa basahon sa Silozi. Sanglit may nagbantay man nga mga sundalo, wala gayod mangahas ang lokal nga mga tawo sa pagtabok sa suba sa ilang mokolos, o mga baroto. Kas-a o makaduha girakrakan sila tabok sa suba.

Pag-atiman sa Nagkatibulaag nga “mga Karnero”

Apan, kining tanan, wala makapugong sa mga payonir sa pag-atiman sa “mga karnero” sa Caprivi Strip, lakip sa pila nga nagkatibulaag. Pananglitan, sila nakadungog nga si Andrew, usa ka edad-edarang lalaki nga taga baryo nga mga 70 kilometro ang kalay-on gikan sa Katima, nga interesado kaayo sa Bibliya. Sa ilang nakita siya, siya nagbasa sa librong Ang Kamatuoran nga Motultol sa Kinabuhing Dayon ug hilabihang lipaya nga giduaw! Daghan nang katuigan nga nag-inusara siya sa pagtuon, ug naikag kaayo sa tabang sa mga payonir nga gihatag kaniya.

Si Frank Mwemba nahilain usab sa layong lugar. Nagpuyo siya sa baryo nga duolan sa usa ka gatos ka kilometro gikan sa Katima. Maabot ang iyang balay pinaagi lamang sa upat ka ligid nga sakyanan, ug bisan pa niana sa pipila lamang ka panahon sa tuig, sanglit ang dakong bahin sa Caprivi kalamakan man ug panapanahong malunopan. Midawat sa kamatuoran si Frank sa Zambia, gibawtismohan didto, ug dayon mipauli sa iyang lumad nga baryo sa Caprivi. Sa daghang katuigan nagpadayon siyang nag-inusara. Nagpadayon ba siya sa pagsangyaw sa nahilain nga lugar? Nasuklan ba niya ang lokal nga mga praktis sa pamarang ug poligamiya? Narehistro ba ang iyang kasal? Oo! Gisustentohan ni Frank ang iyang asawa​—usa ra​—ug mga anak sa pangisda ug panguma, gigugol niya ang mga adlaw sa pagduaw sa hilit nga mga baryo sa iyang mokolo o magbaktas aron sa pagpakaylap sa maayong balita. Regular niyang gitun-an ang iyang pamilya, naglikay sa mga tambalan, ug magarbohon sa pagpakita sa mga bisita sa iyang kontrata sa kasal!

Sa laing okasyon, mibiyahe si Chris pinaagig barge sa Zambezi River ngadto sa patag, lamakong mga bahin sa Nantungu. Nakadungog siya nga adunay mga interesado didto. ‘Unsa kahay akong makita?’ nagpalandong si Chris samtang, may hapsak sa iyang likod, milukso siya gikan sa barge paingon sa tampi sa suba. Sa iyang kalipay iyang nakita ang gamayng grupo nga nanlimbasog sa pagkinabuhi sumala sa Bibliya sanglit natudloan sila sa mga Saksi sa Zambia. Nalipay kaayo sila sa pagkakitag mga publikasyon sa Silozi nga gidala ni Chris, lakip sa labing bag-ong mga gula sa Ang Bantayanang Torre. Sulod sa tulo ka adlaw, okupado si Chris sa mga panaghisgot sa Bibliya ug mga pagduaw sa kasikbit nga mga baryo sa pakigkita sa mga interesado. Sa wala pa migikan, mihimo siyag mga kahikayan sa regular nga mga tigom ug sa pagsangyaw sa Gingharian.

Pag-ilis ug mga Kauban

Tungod sa suliran sa panglawas, ang kauban ni Chris mibiya sa Caprivi sayo sa 1982. Sa ulahi, giubanan si Chris sa ikaduhang kauban nga si Melt Marais, usa ka igsoon nga madasigong nakaalagad sa Caprivi halos usa ka tuig. Sa Mayo 1983, iyang gipakaslan si Magda, usa ka batan-ong igsoong babaye, ug siya nahimong iyang ikatulong kauban sa Caprivi. Ang ilang pakigpulong sa kasal gihatag sa gamayng Kingdom Hall nga nakatabang si Chris sa pagtukod.

Taastaas nga panahong nagpasibo si Magda sa kinabuhi sa Caprivi. Ang karabano gibalhin sa usa ka lugar gawas sa lungsod nga walay elektrisidad o gripo sa tubig. Didto kanunay silang “sulngon” sa mga elepante magabii. Sa nagpasigag sulo sa bentana sa karabano ug sa pagkakitag dakong elepante nga duha ka metros ang kalay-on o kapin pa sa sinugdan nakakurat kang Magda! Apan sa ulahi misagop ra siya sa bag-ong kinabuhi ug nakaangay niana. Ang iyang panig-ingnan nakadasig sa gamayng kongregasyon sa Katima.

Ang labing makadasig usab sa mga igsoon sa Caprivi mao ang pagtambong ug mga asembliya sa Francistown, Botswana (650 ka kilomotero ang kalay-on). Nalipay sila ilabina sa pagtambong sa distritong kombensiyon duol sa Johannesburg (mga 1,400 ka kilometro ang kalay-on). Natingala sila sa pagkakitag dakong panon sa mga Saksi ug sa mahapsay nga pagkaorganisar ug sa pagtagamtam sa dakong kalulot sa puting mga igsoong lalaki ug mga babaye​—ang tanan ebidensiya sa espiritu ni Jehova nga nagalihok.

Apan ang matinumanon ug mahigugmaong ministeryo sa batan-ong mga payonir mao ang labing makapalig-on sa “mga karnero” sa Caprivi nga may dinaliang panginahanglan ug tabang. Sa baylo, ang pagtagana nianang maong tabang nakahatag dakong kalipay sa mga payonir kinsa andam sa pag-alagad diin dako kaayo ang panginahanglan.

Apan, sa Septiyembre 1983, kinahanglang mobiya si Chris ug Magda sa Caprivi. Ngano? Siya misaysay: “Gidapit kami sa pag-alagad sa sanga sa South Africa sa Watch Tower Society. Naguol kami sa pagpanamilit sa 13 ka magmamantala sa Caprivi ug daghang mga interesado sa gamayng kongregasyon ug sa tulo ka grupo nga among gitalikdan. Ang among mga pag-ampo nga motagana unta si Jehova ug dugang mga mamumuo sa pagtikad ning umaha, nga hinog nang anihon.”​—Mateo 9:37, 38.

Dunay daghan pang mga dapit diin gikinahanglan ang tabang. Makahimo ka ba ug andam sa pag-alagad ning paagiha, sa pagtanyag sa imong kaugalingon sa pag-atiman sa mga karnero ni Jehova? Kon mao, dunay dagayang mga ganti ang anaa sa unahan kanimo. Sumala sa gipamulong ni Jesus: “Labi pang bulahan ang paghatag kay sa pagdawat.”​—Buhat 20:35.

[Mga footnote]

[Mga Mapa/Letrato sa panid 21]

(Alang sa bug-os nga pagkahan-ay sa teksto, tan-awa ang publikasyon)

ANGOLA

Zambezi River

Katima Mulilo

Ondangwa

Rundu

CAPRIVI STRIP

Kasane

OVAMBOLAND

Tsumeb

Otavi

Grootfontein

BOTSWANA

NAMIBIA

Ang “trayanggulo sa kamatayon”

ATLANTIC

OCEAN

Windhoek

[Hulagway sa panid 23]

Nagkampo sa tampi sa Zambezi River sa Katima Mulilo. Si Schalk Coetzee naghimo sa iyang senemanang report ingong magtatan-aw sa sirkito. Matikdi ang “itaas” nga tulogan sa Land-Rover

[Hulagway sa panid 24]

Pagsangyaw sa Gingharian sa Kasane, amihanang Botswana