Ang Ipasabot sa mga Balita
Ebanghelismo sa TV—Paagi sa Diyos?
Kon ania pa si Jesu-Kristo sa yuta, karon, miingon ang ebanghelisador sa TV si Jim Bakker, “segurado nga mogula usab siya sa TV.” Nganong sa telebisyon? Tungod kay, sumala kang Bakker, “mao lamang kanang paagiha nga maabot niya ang mga tawong iyang gimahal.” Sama kang Bakker, ang nagkadaghang mga magwawaling pundamentalista sa Tinipong Bansa nagtuo nga ang telebisyon mao ang labing maayong kasangkapan sa pagpakaylap sa Pulong sa Diyos. Apan, ang pagtuon sa 1984 nagpakita nga, sa dakong bahin, ang mga ebanghelisador sa TV “nakadugang sa kalig-on sa tawong may panaad na sa ebanghelikal nga relihiyon.”
Makaikag, diha sa usa ka sulat ngadto sa editor sa magasing Ministry, ang usa ka magbabasa misulat: “Kamo miingon nga sila [mga telebisyon] mao ang labing gamhanang gamit sa iglesya sa pagpugas ug binhi, apan ang Diyos nag-ingon nga ang labing hinungdanong buluhaton mao ang pagduaw sa balay ug balay—sa pagpangitag mga kalag. . . . Ang atong Manluluwas mas hilig magpalayo sa panon sa katawhan, ug Siya miadto sa balay ug balay—nagpangitag mga kalag. Ang usa-ka-kalag nga tigpaminaw mao ang Iyang kalipay. . . . Dili ba kita makahimo sama niana?”
Sumala kang Jesu-Kristo, ang katuyoan sa Kristohanong ministeryo dili lang ‘magpakaylap sa Pulong’ kondili “maghimog mga tinun-an.” (Mateo 28:19, 20) Iyang gisugo ang iyang mga sumusunod sa pagduaw sa mga balay sa mga tawo. (Mateo 10:7, 11-13) Gidawat ni apostol Pablo kining paagiha sa pagsangyaw ug miingon mahitungod sa iyang ministeryo: “Wala ako maglilong sa pagsulti kaninyo sa mga butang nga mapuslanon ni naghikaw sa pagtudlo kaninyo sa atubangan sa kadaghanan ug sa balay ug balay.” Ang personal nga ministeryo sa balay ug balay sa mga disipulo nakaanig maayong mga resulta.—Buhat 5:42; 20:20.
Kon gihatagag pasiugda ni Jesus kining paagiha sa pagsangyaw aron maghimog mga tinun-an, nganong daghang ebanghelisador mas gustog TV ingong ilang kasangkapan? Ang The Courier-Mail sa Brisbane, Australia, miingon nga ang mga ebanghelisador sa TV “makasapig duolan sa $120 ka milyon sa usa ka tuig sa pagpamaligyang kaluwasan. Sila makita diha sa sulawng dagitabnong suga ug himaya diha sa 300 ka estasyon sa TV, ug ginasimba samag mga popular mga idolo. . . . Bisan pa sa tanan nilang mga taktika, kining mga tawhana nga nagapangangkon nga gimaniobra gani bisan ang Diyos, modangat sa kataposan ug kasabotan sa negosyo. Padalhi silag $10 ug ila kamong ipadala sa langit.”
Walay Pagtuong Pagpanguna
Si Jesu-Kristo miingon: “Ako mao ang pagkabanhaw ug ang kinabuhi.” (Juan 11:25) Apan, “daghan sa mga teologong Katoliko nga nagtrabaho sa mga unibersidad ug mga seminaryo dili makasulti nga sila nagtuo, o labing menos nagtuo sa literal, sa pagkabanhaw.” mitaho ang magasin sa balita nga Insight.
Sa unsang paagi ang Romano Katoliko nga sinserong nagtinguha sa pagsunod sa mga pagtulon-an mapalig-on sa ilang pagtuo niining klaseha sa mga magtutudlo? Sila dili makahimo, kay si apostol Pablo misulat: “Kon, tinuod, nga walay pagkabanhaw ang mga nangamatay, nan, bisan si Jesu-Kristo wala diay banhawa. Apan kon si Kristo wala banhawa, nan, kawang lamang ang among pagwali, ug kawang lamang usab diay ang among pagtuo.”—1 Corinto 15:13, 14.
Dihang Walay Kalinaw
Sa Oktubre 24, 1985, gideklarar sa United Nations General Assembly ang 1986 nga Internasyonal nga Tuig sa Kalinaw. Ang resolusyon nag-ingon nga ang tuig “gipahinungod sa hiusang paningkamot sa Tinipong Kanasoran ug sa Membrong mga Estado niini sa pagpauswag ug sa pagkab-ot sa mga tumong sa kalinaw sa tanang paaging maarangan.” Unsay ilang paaging gilaoman aron makab-ot kini? Pinaagi sa “padayon ug positibong aksiyon sa mga Estado ug sa mga tawo nga nagtinguha sa pagsumpo sa gubat.”
Karon nga hapit na natong matapos ang tuig sa “Kalinaw,” unsay atong nakita? Kining dungganong mga tinguha nalabwan sa mga engkuwentro sa militar nga padayong gisangka sa tibuok-yuta. “Ang mga gubat sa gerilya, ginaawayang mga teritoryo, mga kabangian sa ideolohiya ug sa rasa ug ang ‘balaang mga gubat’ nakadugang labing menos ug 19 ka dagkong mga gubat, ug uban pang daghang mga away,” miingon ang The West Australian. Ang artikulo sa pamantalaan nagpunting nga duolan sa usa ka milyong mga sundalo nakig-away karon sa tibuok-yuta. Sa matin-aw, alang sa milyonmilyon nga nangabiktima sa maong mga gubat, wala gayoy kalinaw.
Makalaom ba ang tawhanong mga lider ug tinuod nga sulbad pinaagi sa umaabot nga mga proklamasyon nga nagapanawag ug kalinaw? Dili, kay ang Jeremias 10:23 nag-ingon: “Oh Jehova, ako nasayod nga ang dalan sa tawo wala diha sa iyang kaugalingon. Kini wala sa tawo nga molakaw aron sa pagtultol sa iyang mga lakang.” (Itandi sa Jeremias 6:14.) Sa dayag, ang tinuod nga kalinaw moabot pinaagi lamang sa Diyos.