Nabalaka Ka ba sa Imong mga Anak?
SIYEMPRE mabalaka ka gayod! Ang sakit, mga pag-abuso sa droga, ug delingkuwensiya maoy tulo lamang sa mga problema nga imong nahibaloang makapameligro sa imong mga anak. Normal nga mabalaka ang mga ginikanan sa ilang mga anak—mahingawa pa gani kanila.
Mao kanay gibati sa kadaghanang mga ginikanan sa nangaging kasaysayan, sumala sa gipakita sa Bibliya. Hinumdomi nga gisugo ni Jacob si Jose sa pagsusi sa iyang mga igsoon tungod kay nabalaka siya kanila. (Genesis 37:13, 14) Si Job, usab, nabalaka, bisag dagko na ang iyang mga anak ug may pamilya na sa ilang kaugalingon. Siya nagpalandong: “Tingali nakasala ang akong mga anak ug nakapasipala sa Diyos diha sa ilang mga kasingkasing.”—Job 1:4, 5.
Ngani, nabalaka usab si Jose ug Maria sa ilang hingpit nga anak nga si Jesus! Sa pagkatinuod, sa usa ka okasyon dihang 12 anyos pa si Jesus, nabalaka kaayo sila kaniya, kay ilang nakita nga siya nawala. Bisan pa, ang ilang anak nga si Jesus maoy ilang garbo, ug sila walay angay nga ikaulaw. Atong tan-awon kon unsa gayoy nahitabo niadtong halandomong okasyon ug tagdon kon unsay mga pagtulon-ang makuha sa mga ginikanan karon gikan niini.
Usa ka Nawalang Anak
Kon usa ikaw ka ginikanan, tingali mosimpatiya ka sa gibati ni Maria dihang mabadlongong miingon siya kang Jesus: “Anak, nganong gibuhat mo man kini kanamo? Ako ug ang imong amahan sa among kabalaka nangita kanimo.” Nabulag si Jose ug Maria kang Jesus sa tulo ka adlaw. Imong masabtan ang ilang kabalaka kon hain na ang 12-anyos nga batan-on.—Lucas 2:48, Today’s English Version.
Nganong nawala man ni Jose ug Maria si Jesus? Gisaway kini sa usa ka iladong komentarista, ug misulat: “Nahibalo sa dakong bahandi nga ilang nahuptan, nganong wala man dayon nila siya pangitaa? Hain man ang kaluoy ug kahangawa sa inahan?” Apan sa tinuod, sa ato unyang makita, ang pag-usisag maayo sa hitabo nagpakita nga dili mabasol si Jose ug Maria.
Ang kamatuoran mao nga nagpakita ang Bibliya nga maayo ug buotang inahan si Maria. Ang manulondang si Gabriel, dihang miduol sa pagtagna sa pagkatawo ni Jesus, miingon nga siya “nakaangkon sa kahimuot sa Diyos.” (Lucas 1:28, 30) Malipayon niyang gidawat ang asaynment sa pagpakatawo niining espesyal nga bata, uban sa mabug-at nga responsibilidad sa pagpadako ug sa pagbansay kaniya. Mapainubsanon siya nga babaye ug may malig-ong pagtuo sa Diyos. Human nga natawo si Jesus, iyang gihimo ang tanan nga gipangayo sa Kasugoan ni Jehova, “sumala sa nahisulat.”—Lucas 1:38, 45-48; 2:21-23, 39.
Si Jose, ang lalaki nga nagminyo kang Maria ug nahimong ama-ama ni Jesus, maoy buotan, matarong nga tawo nga nakapakigsulti sa manulonda ni Jehova sa upat ka higayon. (Mateo 1:19, 20; 2:13, 19, 22) Hinumdomi, gipili ni Jehova si Jose ug Maria sa pagmatuto sa Iyang pinalangga, bugtong Anak. Dili ba mopili ang Diyos ug magtiayon nga molampos sa pagtabang niining anaka nga modako diha sa balaang kaalam?
Siyempre, ang mga ginikanan karon nabalaka sa ilang mga anak tungod sa peligroso ug daotang kahimtang sa ilang palibot. Ug sila nasayod nga ang ilang mga anak dili-hingpit dili sama kang Jesus. Bisan pa, makakuha kitag kaayohan gikan sa pananglitan ni Jose, Maria, ug Jesus.