Paghinumdom sa 93 Anyos nga Pagkinabuhi

Sumala sa giasoy ni Frederick W. Franz

NIADTONG Septiyembre 12, 1893, ang usa ka batang lalaki natawo sa Covington, Kentucky, nga anaa sa habagatang bahin sa suba nga atbang sa Cincinnati, Ohio. Ang malipayon niyang amahan, si Edward Frederick Franz, ug ang nahimuot nga inahan, si Ida Louise née Krueger, nagngalan sa maong anak nilang lalaki nga Frederick William Franz.

Kadto ang sinugdanan sa akong 93 anyos nga pagkinabuhi. Ang akong amahan, kinsa natawo sa Alemanya, nag-angkong sakop sa Luteranong Iglesya ug busa ako gipabawtismohan sa pagpatong sa klerigo sa iyang basang kamot sa akong agtang. Gisulatan ang usa ka sertipiko sa bawtismo, ug kadto gikuwadro ug gibitay sa bungbong sa among balay, uban sa mga sertipiko sa bawtismo sa akong duha ka magulang nga lalaki, si Albert Edward ug Herman Frederick. Sa 20 anyos lamang sa ulahi akong nasayran nga dili gayod kasulatanhon ang maong relihiyosong pormalidad.

Maoy sa among pagbalhin ngadto sa Greenup Street nga akong nakita sa unang panahon ang karwahe nga walay kabayo, ang duhag-sakay bukas nga awto, nga gipadagan sa karsada. Katuigan sa ulahi una kong nakita ang usa ka ayroplano. Kami nagpuyo niadto sa tupad sa Krieger’s Bakery, diin ang akong amahan nagtrabaho sa magabii ingong panadero. Siya mopauli sa mabuntag ug matulog. Dayon sa hapon siya malibre sa paggugol ug diyutayng panahon uban kanamong mga batang lalaki.

Dihang ako miabot sa panuigong moeskuyla, ako gipasulod pag-una sa parokyal nga tunghaan ug sa relihiyosong mga serbiyo sa St. Joseph’s Roman Catholic Church, sanglit kadto duol man sa 12th ug Greenup nga mga kalye. Makahinumdom pa ako sa klasrom sa eskuylahan. Sa usa ka okasyon ang relihiyosong “brader” nga nagsilbing magtutudlo nagpaadto nako sa atubangan sa klase ug nagpabuklad sa akong palad aron palpalon sa makadaghan pinaagig 12-pulgadang ruler tungod sa pagminaldito sa akong bahin.

Ako mahinumdom usab nga misulod sa walay-sugang kompisalang kahon sa simbahan, nga nakigsulti sa kompisalanang tawo luyo sa partisyon, ug militok sa sinag-ulo nga pangadye ug mikompisal unsa ko ka daotan nga bata. Tapos niadto, ako miadto sa barandilya sa altar ug miluhod didto samtang ang usa ka pari nagbutang ug ostiyas sa akong baba, sa ingon naghatag kanakog Komunyon sumala sa gitudlo sa simbahan, samtang nagreserba sa bino alang sa iyang kaugalingon aron imnon sa ulahi. Kadto ang sinugdanan sa akong pormal relihiyosong pagbansay ug ang akong pagtahod sa Diyos midako sa katuigan nga umaabot.

Sa pagkatapos nako sa usa ka tuig sa parokyal nga tunghaan niadtong 1899, ang akong pamilya mibalhin sa tabok sa Subang Ohio ngadto sa Cincinnati, ngadto sa 17 Mary Street (karon gitawag East 15th Street). Sa maong panahon ako gipatungha sa publikong tunghaan ug gibutang sa tersero grado. Ako maoy dili-maminaw nga estudyante, ug ako mahinumdom nga, sa usa ka okasyon, ang estudyante sa talad sa akong tuo ug ako gipaadto sa opisina sa prinsipal tungod sa among pagminaldito. Didto kami gipatikubo ni Prinsipal Fitzsimmons ug gipahikap ang tumoy sa among sapatos sa among mga tudlo samtang kami iyang gilatos sa makadaghan pinaagig usa ka uway nga latigo sa among sampot. Sumala sa imong madahom, ako wala makapasar.

Apan dili gusto sa akong amahan nga akong gugolon ang duha ka tuig sa samang grado. Mao nga sa pagsugod sa sunod nga tingtungha, ako iyang gidala ngadto sa Liberty Street nga tunghaan, ngadto sa opisina sa prinsipal sa tunghaan, si Gn. Logan. Iyang gihangyo si Gn. Logan sa paglista kanako sa kuwatro grado. Si Gn. Logan nagmaluluton kanako, ug siya miingon: “Aw, atong tan-awon kon unsay nahibaloan niining bataa.” Human nako matubag ang daghang masusihong pangutana sa iyang dayag nga katagbawan, siya miingon: “Aw, maorag kuwalipikado siya sa kuwatro grado.” Sa maong paagi, siya personal nagpromot kanako ngadto sa gradong mas taas kay sa akong nahulogan. Sukad niadto ako nagpuyo na ug nagkugi nga seryoso sa akong trabaho sa tunghaan, ug wala na gayod ako mahulog.

Ang relihiyosong mga bahin sa akong pagkabata nausab usab. Sa usa ka paagi, ang mga hawas sa Second Presbyterian Church sa Cincinnati nakigkita sa akong inahan, ug siya mihukom sa pagpadala kang Albert, Herman, ug kanako ngadto sa Sunday school nianang iglesyaha. Niadtong panahona, si Gn. Fisher mao ang superintendente sa Sunday school, ug ang batan-ong si Bessie O’Barr nahimong akong magtutudlo sa Sunday school. Sa maong paagi, akong nasinati ang inspiradong Balaang Bibliya. Pagkamapasalamaton nako dihang ako gihatagan sa akong magtutudlo sa Sunday school ug personal nga kopya sa Balaang Bibliya ingong pinaskohan!

Akong gihukom nga himoong kinahanglanon sa akong kinabuhi ang pagbasa sa usa ka bahin sa Bibliya sa kada adlaw. Kadto misangpot sa akong pagkasinati pag-ayo nianang balaang basahon. Ug ang maayong impluwensiya niana nagpugong kanako nga malangkit sa daotang sinultihan ug kagawian sa akong mga klasmet. Dili katingad-ang ako ilang giisip nga lahi.

Hayskul ug Kolehiyo

Human ako makagraduwar sa ikatulong intermedia nga tunghaan sa 1907, gitugotan ako sa akong mga ginikanan sa pagpadayon sa akong edukasyon ug pagsulod sa Woodward High School, diin si Albert, kinamagulangan kong igsoong lalaki, nakatungha sa usa ka tuig. Sama kaniya, ako mihukom sa pagkuha sa klasikal nga kurso. Busa ako mikuha sa kurso sa Latin​—usa ka pagtuon nga akong gihimo sulod sa sunod pito ka tuig.

Dayon miabot ang graduwasyon sa tingpamulak sa tuig 1911. Ako napili nga valedictorian sa Woodward High School sa programa sa graduwasyon nga gihimo sa kinadak-ang awditoryum sa Cincinnati, ang Music Hall.

Niadtong panahona, ang tanang tulo ka hayskul sa Cincinnati​—ang Woodward High School, Hughes High School, ug Walnut Hills High School​—nagtingob alang sa programa sa graduwasyon. Ang senyor nga mga hayskul nanglingkod sa dakong plataporma nga nag-atubang sa napuno nga awditoryum. Ang pangunang pakigpulong gihatag sa valedictorian sa Woodward High School. Ang ulohang akong gipili alang sa okasyon mao ang “Tunghaan ug Pagkalungsoranon.” Ang tanang tulo ka mamumulong gihatagan ug nindot nga pakpak. Niadtong panahona ako diha na sa ika-18 anyos sa akong kinabuhi.

Gitugotan ako sa akong mga ginikanan nga magpadayon sa akong edukasyonal nga karera, mao nga ako misulod sa University of Cincinnati, nga mikuha sa kursong liberal arts. Sa maong panahon ako mihukom nga mahimong Presbyterianong magwawali.

Ngadto sa padayong pagtuon sa Latin, akong gidugang ang pagtuon sa Grego niadtong panahona. Dako gayod nga panalangin ang pagtuon sa Grego sa Bibliya ubos kang Propesor Arthur Kinsella! Ubos kang Dr. Joseph Harry, usa ka awtor sa pila ka Gregong mga basahon, ako mituon usab sa klasikal nga Grego. Ako nasayod nga kon buot kong mahimong Presbyterianong klerigo, kinahanglang ako maantigo sa Grego sa Bibliya. Busa ako naningkamot pag-ayo ug nakakuhag pasadong mga grado.

Dugang pa sa pagtuon sa Grego ug Latin sa tunghaan, ako nainteres sa pagtuon sa Kinatsila, nga akong nakaplagan nga susama sa Latin. Wala ako makaamgo niadto nga magamit nako pag-ayo ang Kinatsila diha sa akong Kristohanong ministeryo.

Ang usa ka hataas nga punto sa akong akademikanhong kinabuhi maoy sa dihang si Dr. Lyon, ang presidente sa unibersidad, mipahibalo ngadto sa usa ka asembliya sa mga estudyante sa awditoryum nga ako napili nga moadto sa Ohio State University aron mokuha sa maindigong mga pasulit duyog sa uban pa aron makaangkon sa Cecil Rhodes Scholarship, nga magpatakos kanako sa pagsulod sa Oxford University, Inglaterra. Usa sa mga mag-iindig nakalupig kanako bahin sa field athletics, apan tungod sa akong susamang mga grado, buot nilang ako, kauban niya, ipadala ngadto sa Oxford University. Giapresyar ko nga ako nakakab-ot sa mga kinahanglanon sa pagbaton sa eskolarsip, ug, sa kasagaran, kadto makapatagbaw unta kaayo.

“Kini ang Kamatuoran!”

Atong mahinumdoman nga sa usa ka okasyon si Jesu-Kristo miingon ngadto sa iyang mga tinun-an: “Kamo mahibalo sa kamatuoran, ug ang kamatuoran magapahigawas kaninyo.” (Juan 8:32) Sa miaging tuig, 1913, ang akong igsoong si Albert nakabaton sa “kamatuoran” sa Chicago. Sa unsang paagi nabatonan ni Albert ang “kamatuoran”?

Usa ka gabii sa Sabado sa tingpamulak sa 1913, si Albert natulog ug sayo sa dormitoryo sa YMCA, diin siya nagpuyo samtang nagtrabaho sa Chicago. Sa ulahi, ang iyang kauban sa kuwarto mikalit pagsulod sa kuwarto aron isaysay ang usa ka suliran. Siya nadapit niadtong gabhiona sa balay ni Gn. ug Gng. Hindman, ug ang ilang anak babaye si Nora may higalang dalaga nga maatua sa balay. Ang duha ka babaye dili masagubang sa kauban ni Albert sa kuwarto sa iyang kaugalingon. Uban ang kadasig, si Albert mitanyag sa pagtabang. Sa lakaw sa gabii, ang kauban ni Albert sa kuwarto nagkasinabot ug maayo uban sa duha ka dalaga. Apan si Gn. ug Gng. Hindman naghatag sa bug-os nga pagtagad kang Albert, nga nagpailaila kaniya sa mga pagtulon-an sa Watch Tower Bible and Tract Society.

Dayon gipadad-an ako ni Albert ug usa ka pulyetong nag-ulohang Where Are the Dead? nga gisulat sa usa ka Scottish nga doktor, si John Edgar, usa ka membro sa Glasgow nga Kongregasyon sa Internasyonal nga mga Estudyante sa Bibliya. Sa sinugdan, akong gipadaplin ang pulyeto. Unya usa ka gabii, kay may diyutayng panahon una pa moadto sa pagbansay sa koro, akong gisugdan pagbasa kadto. Ako naikag kaayo nga ako wala makabutang niadto. Akong gipadayon pagbasa kadto samtang ako milakaw sa duolag usa ka milya paingon sa Presbyterian nga simbahan. Sanglit sirado pa ang pultahan sa simbahan, ako milingkod sa bugnawng hagdan nga semento ug nagpadayon sa pagbasa. Ang organista miabot ug, sa pagmatikod unsa ka bug-os ang akong pagtagad sa pagbasa, miingon: “Makaiikag gayod kaayo kana.” Ako mitubag: “Tinuod!”

Sanglit ako nakaangay kaayo sa bag-ong mga kamatuoran nga akong nakat-onan, ako nakahunahuna sa pagpangutana sa magwawali, si Dr. Watson, kon unsay iyang hunahuna sa maong pulyeto. Busa niadtong gabhiona mismo, gitunol ko kaniya ang pulyeto ug nangutana: “Dr. Watson, unsay imong nasayran bahin niini?”

Iyang gikuha ang pulyeto, gibuksan kana, ug dayon mitamihid: “Oy, kini usa nianang mga basahon ni Russell. Unsay iyang nasayran bahin sa kronolohiya?” Ako natingala sa iyang matamayong tinamdan. Samtang akong gikuhag balik ang pulyeto ug mipahawa, ako naghunahuna sa akong kaugalingon: “Unsa may naa kon unsay iyang hunahuna niini. Kini ang KAMATUORAN!”

Sa wala madugay, sa usa sa iyang mga pagduaw sa balay, gidad-an ako ni Albert sa unang tulo ka tomo sa Studies in the Scriptures, nga gisulat ni Charles Taze Russell. Gipasinati usab ako sa lokal nga kongregasyon sa mga Estudyante sa Bibliya, nga nahitabong nagtigom sa tupad gayod sa simbahang Presbyteriano. Nalipay ako sa butang akong nakat-onan ug sa wala madugay mihukom nga miabot ang panahon nga akong putlon ang akong koneksiyon sa Presbyterianong Iglesya.

Busa sa ulahi, dihang si Albert nagduaw na usab kanamo, kami nangadto sa usa sa mga lektura ni Dr. Watson sa gabii sa Dominggo. Human niadto, si Albert ug ako miadto sa dapit diin siya nakiglamano sa talilakaw nang mga parokyano. Ako miingon kaniya: “Dr. Watson, ako mobulag na sa iglesya.”

Siya miingon: “Daan pa lagi ako! Daan pa lagi ako! Dihang nakita ko ikaw nga nagbasa niadtong basahon ni Russell. Kanang tawhana, si Russell, dili ko siya pasudlon sa akong balay!” Dayon siya midugang: “Fred, dili ba maayo nga moadto ta sa akong sakristiya ug mag-usa sa pag-ampo?” Giingnan ko siya: “Dili na, Dr. Watson, nakahukom na ako.”

Niana, si Albert ug ako migawas sa simbahan. Pagkanindot sa akong pagbati nga mahigawas sa pagkaulipon sa usa ka relihiyosong sistema nga nagtudlog kabakakan! Pagkamaayo nga dawaton sa kongregasyon sa Internasyonal nga mga Estudyante sa Bibliya, kinsa maunongon kaayo sa Pulong sa Diyos! Niadtong Abril 5, 1914, sa Chicago, Illinois, akong gisimbolohan ang akong konsagrasyon​—sumala sa among pagtawag niadto sa pagpahinungod​—pinaagi sa bawtismo sa tubig.

Wala gayod ako magbasol nga, sa dayon na sa pagpahibalo sa mga awtoridad sa tunghaan bahin sa resulta sa mga pasulit alang sa Cecil Rhodes Scholarship, ako misulat ngadto sa mga awtoridad ug nagpahibalo kanila nga ako nawad-ag kaikag sa eskolarsip sa Oxford University ug ako ilang tangtangon gikan sa listahan sa mga mag-iindig. Kadto akong gihimo bisan pag ang akong propesor sa Grego sa unibersidad, si Dr. Joseph Harry, nagpahibalo kanako nga ako napiling magadawat niana.

Duha ka bulan sa ulahi, o sa Hunyo 28, 1914, ang pagpatay kang Archduke Ferdinand sa Austria-Hungaria ug sa iyang asawa nahitabo sa Sarajevo sa Bosnia. Niadtong petsaha mismo, ang Internasyonal nga mga Estudyante sa Bibliya naghimo sa ikatulong adlaw sa ilang heneral nga kombensiyon sa Memorial Hall, Columbus, Ohio. Usa ra ka bulan sa ulahi, o sa Hulyo 28, 1914, misilaob ang unang gubat sa kalibotan sa tibuok kasaysayan sa tawo. Kaming mga Estudyante sa Bibliya nagdahom sa pagkatapos sa Hentil nga mga Panahon nga may 2,520 ka tuig sa pagka Oktubre 1 niadtong tuiga.

Uban ang pagtugot sa akong amahan, ako mibiya sa University of Cincinnati niadtong Mayo 1914, duha ra ka semana una sa pagkatapos sa akong ikatulong term didto ingong usa ka junior classman. Akong gihikay dayon uban sa Watch Tower Bible and Tract Society nga mahimong colporteur, o payunir, sumala sa pagtawag karong adlawa sa usa ka bug-os-panahong ministro. Sa maong panahon ako aktibong nakig-uban sa Cincinnati nga Kongregasyon sa Internasyonal nga mga Estudyante sa Bibliya.

Sa ulahi ako nahimong ansiano sa Cincinnati nga Kongregasyon. Busa dihang ang Tinipong Bansa sa Amerika nalangkit sa Gubat sa Kalibotan I sa kiliran sa mga Alyado, ug ang mga batan-ong lalaki gipanguha alang sa kasundalohan, ako nahigawas ingong usa ka ministro sa ebanghelyo.

Pagkaila Kang Igsoong Russell

Apil sa mga hitabo sa akong kinabuhi nga akong mahinumdoman uban ang kalipay mao ang mga panahong nagkalipay ako sa paghimamat sa unang presidente sa Sosyedad, si Charles Taze Russell. Ako unang nakaila kaniya sa personal sa adlaw una pa sa unang eksibisyon sa Photo-Drama of Creation sa Music Hall sa Dominggo, Enero 4, 1914. Niadtong Sabadoha ang usa ka ansiano sa Cincinnati nga Kongregasyon mitagbo kanako sa gawas sa Music Hall ug miingon: “Oy, si Igsoong Russell anaa sa sulod, ug kon ikaw moadto sa likod sa entablado imo siyang makita.” Nga maikagon kaayo ako misulod ug busa ako nakasulti kaniya nawong ug nawong. Siya mianha sa pagsusi sa kahikayan alang niadtong unang pagpasalida sa Photo-Drama of Creation.

Dayon niadtong 1916 siya nahitabong naghulat sa koneksiyon sa tren sa Cincinnati ug mihapit sa ubay-ubay nga oras. Ang usa ka igsoong babaye ug ako, kay gisultihan bahin niana, midali pag-adto sa estasyon sa tren, diin amo siyang nakaplagan uban sa iyang sekretaryo. Nagdala siyag paniudto, ug sa pag-abot sa oras sa paniudto, kana iyang gipaambit kanamo.

Sa pagkatapos sa paniudto, siya nangutana kon may si bisan kinsa ba nga may pangutana sa Bibliya. Ako nangutana sa purohang mabanhaw si Adan tungod sa kamatuorang siya dili mahinulsolon, tinuyong makasasala. Uban ang pagkidhat sa iyang mata, siya mitubag: “Igsoon, ikaw nagapangutana ug nagatubag niana sa samang panahon. Karon, unsa ba gayod ang imong pangutana?”

“The Finished Mystery”

Sa Martes, Oktubre 31, 1916, si Charles Taze Russell namatay, nga wala makagama sa ikapitong tumo sa iyang serye sa Studies in the Scriptures. Sa naghigda siya sa dayon niyang kamatay, sakay sa usa ka tren nga nagpauli gikan sa California, siya gisukna sa iyang sekretaryo bahin sa ikapitong tomo, siya mitubag: “May lain nga mosulat niana.”

Sa sunod tuig, 1917, ang ikapitong tomo mitungha gayod ingong komentaryo sa matagnaong mga basahon ni Ezekiel ug sa Pinadayag, uban ang nindot nga katin-awan sa basahong Ang Awit ni Solomon sa Bibliya. Giplano sa Sosyedad ang dako kaayong sirkulasyon sa bag-ong libro. Busa, sila nagpadalag kartonkarton niining ikapitong tomo ngadto sa pila ka tawo diha sa mga kongregasyon sa tibuok Tinipong Bansa. Daghang karton ang gipadala ngadto sa akong balay sa 1810 Baymiller Street, Cincinnati, Ohio, ug gipondo samtang kami nagpaabot ug dugang instruksiyon kon sa unsang paagi ang sulod niadto iapod-apod.

Dihay walo ka panid sa The Finished Mystery nga naundan sa mga kinutlo sa dili maayong mga komento sa inilang mga tawo mahitungod sa gubat. Tungod sa paghulhog sa relihiyosong mga organisasyon sa Kakristiyanohan, Katoliko ug Protestante, ang gobyerno sa Tinipong Bansa mipatunghag mga pagtutol, busa gitangtang ang mga panid 247-54. Human niadto, sa dihang ang The Finished Mystery gitanyag sa katawhan, ang katin-awan gihimo ngadto kanila kon nganong kadtong mga panira wala. Ang gobyerno sa Tinipong Bansa wala magpabiling tagbaw sa maong lakang, ug sa dugang paghulhog sa relihiyosong mga organisasyon sa nasod, kadto nagdili sa tibuok ikapitong tomo sa Studies in the Scriptures.

Akong mahinumdoman nga sa usa ka buntag sa Dominggo ako nagtrabaho sa pultahan sa luyo sa among balay. Ang mga lalaki nangabot nga misubay sa dalan tapad sa balay, ug ang lider nagbali sa kuwelyo sa iyang amerkana, nagpakita kanako sa iyang metalikong badge ug nag-ingon nga sila mosulod sa balay. Busa ako misugot sa pagpasulod kanila ug gipakita kanila ang mga karton nga naundan sa mga kopya sa The Finished Mystery. Pila ka adlaw, sila nagpadalag trak ug nagkuha nianang tanan.

Sa ulahi among nasayran nga si Joseph F. Rutherford, ang ikaduhang presidente sa Watch Tower Society, ug unom sa iyang mga kauban nga nag-alagad sa hedkuwarter sa Brooklyn sa sayop gihukmang sad-an sa pagbalda sa singkamot sa gubat sa Tinipong Bansa. Sila gisentensiyahan sa pag-alagad ug 20 ka tuig sa Atlanta Federal Penitentiary sa matag usa sa upat ka sumbong, nga ang mga sentensiya, hinunoa, magdungan. Ang gubat natapos niadtong Nobyembre 11, 1918, ug unya sa Marso 25, 1919, si Igsoong Rutherford ug iyang mga kauban gibuhian nga piyansado. Sila sa ulahi bug-os nahukmang walay sala. Ang librong The Finished Mystery wala na idili ug giawtorisar nga ipaapod-apod na usab.

Nakapadasig gayod kaayo sa among mga espiritu sa dihang gihikay sa Sosyedad ang among unang tapos-gubat nga kombensiyon sa Cedar Point, nga nahimutang sa tumoy sa usa ka lulinghayawang peninsula duol sa Sandusky, Ohio, sa Septiyembre 1-8, 1919! Labing makapalipay kadto nga pribilehiyo nga ako nakatambong niadtong kombensiyona.

Gidapit sa Bethel

Sa sunod tuig sa 1920, gidawat ni Presidente Rutherford ang usa ka imbitasyon sa pagdiskurso ngadto sa usa ka publikong mamiminaw sa Cincinnati, Ohio. Ako nagbuhat sa buluhatong colporteur niadtong panahona, ug si Igsoong Rutherford midapit kanako nga sulatan siya nga moaplay sa pag-alagad sa hedkuwarter sa Brooklyn Bethel.

Nagpadala akog sulat, ug tapos makadawat sa paborableng tubag, ako misakayg tren paingon sa New York City. Sa gabii sa Martes, Hunyo 1, 1920, ako miabot didto ug gitagbo ni Leo Pelle, usa ka karaang higala nga taga Louisville, Kentucky, ug siya nagdala kanako ngadto sa balayng Bethel. Sa sunod adlaw, Miyerkoles, ako pormal nga giasayn sa kuwarto uban ni Hugo Riemer ug ni Clarence Beatty sa usa ka kuwarto sa dapit sa kisame, nga nahimong numero 102 sa pamilya sa Bethel sa Brooklyn.

Ang Sosyedad nagtukod na sa unang planta sa imprenta sa 35 Myrtle, Avenue, nga sa silong niana giinstalar ang una namong rotary nga makina sa imprenta, nga among gitawag Battleship tungod sa gidak-on niadto. Kami nag-imprenta niadto sa bag-ong magasin sa Sosyedad nga may titulong The Golden Age​—sa ulahi ginganlag Consolation ug karon Awake! o Pagmata! Samtang ang mga magasin misaka agi sa usa ka bangag sa salog ug gidala sa usa ka sistema sa alambre ibabaw sa hanayhay nga tabla, ako ang naghipos niana, naghuping ug nagtumpi niana aron matabas ug maputos sa ulahi.

Sa buntag sa Sabado, kon walay imprentahong mga magasin, ang ubay-ubay kanamong mga igsoong lalaki magputos sa mga magasin sa brawon nga pliego sa papel nga may mga ngalan ug mga direksiyon sa mga suskritor. Unya amo kanang selyohan aron madala sa koreyo. Gipadayon ko ang pagbuhat niining trabahoa sa ubay-ubayng bulan hangtod nga si Donald Haslett, kinsa nag-alagad diha sa Colporteur Desk, migawas aron magminyo kang Mabel Catel. Dayon ako gibalhin gikan sa 35 Myrtle Avenue ngadto sa opisina sa Sosyedad sa 124 Columbia Heights sa pag-alagad sa Colporteur Desk.

Gawas pa, ingong membro sa New York nga Kongregasyon, ako giasayn sa pagdumalag usa ka pagtuon sa libro sa balay sa pamilyang Afterman sa Ridgewood nga bahin sa Brooklyn.

Mga Pribilehiyo sa Radyo ug sa Kombensiyon

Ako nagpadayon sa pag-alagad sa Colporteur Desk hangtod sa 1926. Kasamtangan, ang Watch Tower Bible and Tract Society nagtukod sa Staten Island sa unang estasyon sa radyo niini, ang WBBR. Kadto maoy niadtong 1924. Nabatonan ko ang makalipayng pribilehiyo sa pagbatog mga bahin sa mga programa sa Sosyedad, dili lamang sa paghatag ug mga pakigpulong kondili sa pag-awit usab sa mga tenor solo, ug bisan sa pagtugtog sa mandolin nga dinuyogan sa piano. Dugang pa, ako miawit nga ikaduhang tenor sa among WBBR nga quartet. Siyempre, si Igsoong Rutherford, ingong presidente sa Sosyedad, mao ang linaing mamumulong sa WBBR ug may daghan kaayong mamiminaw.

Maoy sa tuig 1922 nga ang usa ka heneral nga kombensiyon sa Watch Tower Bible and Tract Society gihimo sa ikaduhang panahon sa Cedar Point, Ohio. Didto kami giawhag nga kusganon kaayo ni Igsoong Rutherford nga “imantala, imantala, imantala, ang Hari ug ang iyang Gingharian.”

Usa sa akong gimahal pag-ayong mga pribilehiyo sa katuigang 1920 mao ang pag-alagad uban kang Igsoong Rutherford sa internasyonal nga kombensiyon sa London, Inglaterra, niadtong 1926. Didto iyang gihatag ang iyang pakigpulong publiko sa Royal Albert Hall sa London sa atubangan sa usa ka dakong mamiminaw tapos ako moawit sa usa ka tenor solo nga dinuyogan sa bantog nga organo sa tigomanan.

Sa sunod gabii siya mipakigpulong ngadto sa mga Hudiyong mamiminaw bahin sa “Palestina Alang sa mga Hudiyo​—Ngano?” ug ako miawit sa usa ka solo gikan sa Messiah ni Handel, “Comfort Ye, My People.” Ang pila ka libong Hudiyo mitambong niadtong espesyal nga serbisyo. Niadtong panahona, kami sayop nagpadapat sa mga tagna gikan sa Hebreohanong Kasulatan ngadto sa unodnon, sinirkunsidahang mga Hudiyo. Apan niadtong 1932 gibuksan ni Jehova ang among mga mata sa pagsabot nga kadtong mga tagnaa napadapat sa espirituwal nga Israel.

Ug nakapalipay kaayog dako kanako nga maatua sa kombensiyon sa Columbus, Ohio, niadtong 1931 dihang gisubmitir ni Igsoong Rutherford ang ‘bag-ong ngalang’ mga Saksi ni Jehova, ug kaming tanan nagsagop niana nga madasigon! Dihadiha human niadto, ang tanang kongregasyon sa katawhan ni Jehova sa tibuok yuta nagsagop nianang ‘bag-ong ngalan.’​—Itandi ang Isaias 62:2.

Niadtong Biyernes, Mayo 31, 1935, ako nag-alagad ingong konduktor sa orkestra sa atubangan gayod sa ubos sa podium sa entablado nga gikan niana gihatag ni Igsoong Rutherford ang iyang mihimog-kasaysayang diskurso bahin sa Pinadayag 7:9-17, nga tukmang nagpaila alang kanamo sa mga membro sa “dakong kapid-an” nga gihulagway dinha. Ang gitawag nga matang Jonadab gidapit sa linain nga motambong, ug ang hinungdan sa ingon nadayag dihang gipakita ni Igsoong Rutherford nga ang “dakong kapid-an” (King James Version), o “dakong panon,” pagalangkoban sa “ubang mga karnero” sa “maayong magbalantay,” si Jesu-Kristo. (Juan 10:14, 16, KJ) Kadto usa ka okasyong makalilipay. Alang kanako kadto makapatandog sa kasingkasing dihang sa sunod adlaw, Sabado, Hunyo 1, 840 ka kombensiyonista ang nagpabawtismo sa tubig sa pagpasimbolo sa ilang pahinungod sa Diyos pinaagi ni Kristo uban ang gipanglantaw nga yutan-ong paraiso! Sukad niadto, ang gidaghanon sa “ubang mga karnero” ni Kristo nagpadayong nagalabaw, sa pagkakaron, sa nagkadiyutayng mga membro sa “gamay nga panon” sa inanak-sa-espiritung samag-karnerong mga tinun-an sa Maayong Magbalantay, si Jesu-Kristo.​—Lucas 12:32.

Ugaling lamang, dihang misilaob ang Gubat sa Kalibotan II niadtong 1939, mipatim-aw nga daw kadto nagpasabot sa kataposan sa pagtigom sa “dakong panon.” Akong mahinumdoman nga si Igsoong Rutherford miingon kanako usa ka adlaw: “Aw, Fred, mopatim-aw nga ang ‘dakong kapid-an’ dili diay dako kaayo.” Wala gayod namo hiamgohi ang dakong pagtigom nga diha pa sa unahan.

Ang Sosyedad nagpailaila sa mabitbit nga ponograpo niadtong 1934, ug ang mga rekording sa mga pakigpulong ni Presidente Rutherford gigamit sa pagpailaila sa mga basahon sa Bibliya. Dihang ang iyang mga rekording, nga gihubad sa Kinatsila, migawas, gibug-os ko ang akong pagtagad sa paggamit kanila aron maabot ang katawhang tigsultig Kinatsila sa silinganan sa among pabrika sa 117 Adams Street. Dayon, pinaagig mga balikduaw, akong gitabangan ang mga tawong interesado sa pagkakat-on sa mga kamatuoran sa Bibliya, ug sa maong paagi ako sa kataposan nakapribilehiyo sa pag-organisar sa unang tigsultig-Kinatsilang kongregasyon sa Brooklyn. Ako nasakop sa Brooklyn Kinatsilang Kongregasyon, numero uno, sukad kana naporma.

Kausaban sa Pagkapresidente sa Sosyedad

Sa pagkamatay ni Igsoong Rutherford niadtong Enero 8, 1942, si Nathan H. Knorr mipuli kaniya sa pagkapresidente sa Sosyedad. Bisan pa sa nagsilaob nga ikaduhang gubat sa kalibotan, ang iyang pakigpulong publiko sa ting-init sa 1942 bahin sa ulohang “Kalinaw​—Makalahutay ba Kini?” nagbalit-ad sa among panglantaw sa duol nga umaabot. Wala madugay human niadto, gibuksan ni Igsoong Knorr ang Watchtower Bible School of Gilead sa Kingdom Farm niadtong Lunes, Pebrero 1, 1943, uban ang usa ka gatos ka estudyante nga naglangkob sa unang klase. Ako nakapribilehiyo sa pagbatog bahin sa programa sa okasyon sa inagurasyon. Si Igsoong Eduardo Keller, Maxwell G. Friend, Victor Blackwell, ug si Albert D. Schroeder nagsilbing mga magtutudlo.

Sa iyang pang-abling pakigpulong, gipahibalo kami ni Igsoong Knorr nga ang Sosyedad may igong salapi aron magpadayon ang tunghaan sa lima ka tuig. Apan tan-awa, karong adlawa si Jehova nga Diyos nga Makagagahom sa Tanan nagapadayon sa pagpadagan sa tunghaan sa lima ka pilo ka beses nianang gidugayona!

Usa ka dako kaayong pribilehiyo nga makauban kang Nathan H. Knorr. Wala gayod nako hiamgohi nga sa nabawtismohan siya tapos sa diskursong akong gihatag ngadto sa mga kandidato sa bawtismo niadtong Hulyo 4, 1923, sa daplin sa Subang Little Lehigh sa gawas sa iyang lungsod nga Allentown, Pennsylvania, nga siya mahimong ikatulong presidente sa Watch Tower Bible and Tract Society.

Ubos sa pagkapresidente ni Igsoong Knorr, ako nagsigeg biyahe, nga nagpakigpulong ngadto sa dagkong mga katigoman sa mga igsoon sa tibuok kalibotan​—apil ang Latin Amerika ug Australia​—nga nagdasig kanila sa pagpabiling matinumanon. Sa usa sa maong okasyon, niadtong 1955, dihang may pagdili sa buluhaton sa mga Saksi ni Jehova sa Espanya, ako nag-alagad sa usa ka sekretong asembliya sa kakahoyan sa gawas sa Barcelona. Ang among panagkatigom sa Katsilang mga igsoon gisirkolohan sa armadong mga sekreta, ug ang mga lalaki gidala sa mga trak ngadto sa hedkuwarter sa kapolisan. Didto kami gihuptan ug gisukitsukit. Sanglit ako usa man ka Amerikanong lungsoranon, ako nagpakaaron-ingnong dili mahibalog Kinatsila. Gawas pa, duha ka igsoong babaye ang nakaikyas ug nagpahibalo sa Amerikanhong Konsulada bahin sa akong pagkadakop, ug sila, sa baylo, nakigkita sa kapolisan. Kay buot molikay sa internasyonal nga hitabo ug sa daotang publisidad, sila sa kataposan nagpagawas kanamong mga langyaw, ug sa ulahi, sa ubang mga igsoon. Human niadto, ang ubay-ubay kanamo nagkatigom sa balay sa mga igsoong Serrano ug nagkalipay ug dako mahitungod sa pagluwas ni Jehova sa iyang katawhan. Niadtong 1970 ang Espanya naghatag ug legal nga pag-ila sa mga Saksi ni Jehova. Karong adlawa kita may usa ka sangang buhatan duol sa Madrid, ug niining miaging tuig ang organisasyon sa Espanya nag-apil sa kapin ug 65,000 ka magmamantala sa Gingharian, uban sa mga kongregasyon sa tibuok yuta.

Niadtong Hunyo 8, 1977, si Nathan H. Knorr namatay, nga nagtapos sa iyang yutan-ong dalan, ug ako ang mipuli kaniya sa opisina sa presidente sa Sosyedad. Si Igsoong Knorr nag-alagad sulod sa kapin ug 35 ka tuig sa pagkapresidente, nga mas dugay kay sa bisan hain sa duha ka nag-unang presidente sa Sosyedad, si Russell ug Rutherford. Ingong membro sa Nagamandong Lawas sa mga Saksi ni Jehova, ako giasayn sa pag-alagad sa Komite sa Pagpamatik ug sa Komite sa Pagpanulat sa Nagamandong Lawas.

Usa ka dakong pribilehiyo ug kalipay gayod ang pagpadayon sa pag-alagad sa mga opisina sa Sosyedad sa 25 Columbia Heights. Kini nagakinahanglan ug regular nga pagbaktas alang sa trabaho sa adlaw tali sa heneral nga mga opisina ug sa balayng Bethel​—ekselenteng ehersisyo sa lawas alang sa nagkatigulang nga lawas. Bisan pag ako 93 anyos na sa edad ug ang akong panan-aw nagkahanap, ako malipayon kaayong gipanalanginan ako ni Jehova ug maayong panglawas, mao nga ako wala makapaltag usa ka adlaw nga trabaho tungod sa sakit sulod na sa 66 ka tuig sa Bethel, ug ako makaarang gihapon sa pag-alagad sa bug-os panahon. Usa gayod ka kaluoy sa Diyos nga ako maania dinhi sukad sa tuig 1920 ug makakita sa pagtubo ug pag-uswag sa organisasyon sa hedkuwarter sa Brooklyn ug sa tibuok kalibotan.

Uban ang bug-os nga pagsalig sa Unibersohanong Soberano, si Jehova nga Diyos, ug sa iyang Mariskal de Kampo, si Jesu-Kristo, kinsa nagadumala sa dili-maihap nga mga panon sa serapin, kerubin, ug balaang mga anghel sa langit, ako nagapanglantaw sa unahan, sa panahon sa pagsulat niini, uban sa minilyong kaubang mga Saksi, ngadto sa ginapakita sa Bibliya nga anaa pa sa unahan: ang pagkalaglag sa Dakong Babilonya, ang imperyo sa kalibotan sa bakak nga relihiyon, ug ang gubat sa dakong adlaw sa Diyos nga Makagagahom sa Tanan sa Armageddon, nga mosangko sa kadaogan sa mga kadaogan sa bahin sa Unibersohanong Soberano, si Jehova nga Diyos, kinsa maoy “gikan sa panahong walay kataposan ngadto sa panahong walay kataposan.” Aleluya!—Salmo 90:2, Byington.

[Hulagway sa panid 24]

Naa sa ubos sa sentro kauban sa isigkamagbubuhat sa Bethel 1920

[Hulagway sa panid 25]

Uban kang N. H. Knorr 1961

[Hulagway sa panid 26]

Naghatag ug pakigpulong sa usa ka kombensiyon sa Hapon 1978