Pagsimba Kang Satanas sa Atong Panahon

WALAY pagduhaduhang buot ni Satanas nga pagasimbahon. Sa nanental kang Jesus, mitanyag siya nga ihatag ang dako kaayong ganti sa usa lamang ka kondisyon: “Kon ikaw moyukbo ug mohimo sa usa ka buhat sa pagsimba kanako.” (Mateo 4:9) Hinuon, si Jesus midumili apan dili tanan nagsunod sa iyang panig-ingnan. Ang pagsimba kang Satanas kaylap sa atong modernong kalibotan.

Pananglitan, sa Canada ang The Calgary Herald nagpatik sa usa ka serye sa mga artikulo ubos sa titulong “Mga Disipulo sa Yawa.” Ang peryodiko nagkutlo sa taho sa usa ka polis nga imbestigador, nga nagaingon: “Pinaagi sa mgainterbiyo akong nasayrang ang Satanismo dili iya lamang sa usa ka linaing grupo sa katilingban. Ang impormasyon nga gitigom sa Serbisyo sa Kapolisan sa Calgary ug Royal Canadian Mounted Police nagpadayag nga sa Calgary lamang adunay giingong 5,000 ka aktibong Satanista.”

Ang ubang mga taho sa prensa nagapakita nga ang kulto ni Satanas, sa nagkadaiyang mga dagway, nagagimaw sa tibuok Tinipong Bansa ug sa Uropa. Bisan ang kapolisan nagapakitag kaikag sa Satanismo. Ngano? Tungod kay sa daghang kaso sila nakakaplag ug mga koneksiyon tali sa mga krimen ug sa satanasnong mga kulto. Sa bag-o pa lang, ang usa ka polis detektib nakutlo nga mipahayag: “Ang atong gipakiglabotan maoy usa ka relihiyon ug katawhan nga nagtuo niana sama nga ang uban nagtuo sa Kristiyanidad, Judaismo o Islam. Ang imong makita dili mga krimen tungod sa krimen,kondili mga krimen tungod sa usa ka relihiyon.”

Usa ka dakong pananglitan mao ang mga pagpatay sa Manson nga pundok sa California niadtong 1969. Sumala sa propesor sa kasaysayan si Jeffrey Russell, “Si Manson nag-angkon nga mao si Kristo ug si Satanas . . . Ang sumusunod ni Manson si Tex Watson nagpahibalo, sa gipatay niya si Sharon Tate, ‘Ako mao ang yawa; ako ania sa pagbuhat sa buluhaton sa Yawa.’” Apan ang Satanismo dili kanunay sama dayag niini.

Pagpamarang, Espiritismo, ug Pangdiwata

Sa pagkamatuod, ang pagsimba kang Satanas dili lamang mao ang direktang pagsimba kang Satanas pinaagi sa ngalan. Si apostol Pablo nagpasidaan: “Ang mga butang nga ginahalad sa kanasoran ilang ginahalad ngadto sa mga demonyo.” (1 Corinto 10:20) Ug ang pagsimba sa demonyo sa pagkamatuod sama ra sa pagsimba kang Satanas, sanglit si Satanas gitawag man “ang punoan sa mga demonyo.” (Marcos 3:22) Unsang mga buhat sa “mga nasod” ang mailhang pagsimba sa demonyo, o pagsimba kang Satanas? Ang mga pulong sa Diyos ngadto sa Israel nagahatag kanatog pila ka pananglitan: “Dili pagahikaplagan diha kaninyo . . . si bisan kinsa nga nagagamit sa panagna, usa ka salamangkero o usa nganagapangitag mga tilimad-on o usa ka diwatahan, o usa nga nagaIamat sa uban o usa nga nagakonsulta sa usa ka espiritista o propesyonal nga manalagna sa mga panghitabo o nagapangutana sa mga patay. Kay ang tanan nga nagabuhat niining mga butanga maoy dulumtanan kang Jehova.”—Deuteronomio 18:10-12.

Busa, kita gipasidan-an batok pagsakripisyo sa dugo ug pakigsulti sa espiritu nga gihimo sa mga paring voodoo sa Brazil o pinaagi sa houngans ug mambos sa Haiti. Ug kita gipasidan-an batok sa susama kaayong mga batasan sa Santeria, nga gihimo sa pila ka nadistiyerong mga Cubano sa Tinipong Bansa. Kita gipasidan-an, usab, batok sa mga diwatahan nga nagapakigsulti sa mga patayng kalag aron mapukaw ang kahadlok diha sa mga buhi.—Itandi ang 1 Samuel 28:3-20.

Ang pagpamarang kaylap sa lainlaing mga bahin sa Aprika. Pananglitan, sa Habagatang Aprika ang mga tambalan dakog gahom, ug gituohan kaayo sila sa mga tawo. Ang bag-oug gituohan kaayo sila sa mga tawo. Ang bag-o pang mga kaso nga gitaho sa prensa maoy bahin sa mga panong maguboton nga nagsunog nga buhi sa mga tawo nga gisumbong nga nagpahinabo sa liti nga Inihampak sa mga katagibalangay! Ang lokal nga mga tambalan nag-akusar sa inosenteng mga biktima niining “dili-kinaiyanhon” nga mga hitabo ug unya gigaid sila sa usa ka kahoy aron sunogon. Ang maong pagtuo sa pangdiwata o salamangka susamang usa ka pagsimba sa mga demonyo.

Hinuon, ang pagpamarang dili lamang didto sa Aprika. Niadtong 1985, si Herbert D. Dottmer, nga nagsilbi sa usa ka sentensiya sa prisohan sa usa ka sentrong koreksiyonal sa Virginia, T.B.A., gihatagag katungod sa Distritong Korte sa Silangang Distrito sa Virginia nga makabaton sa sinina ug mga artikulo aron siya makatuman sa iyang relihiyon sulod sa prisohan. Ug unsa ba ang iyang relihiyon? Sumala sa rekord sa korte, Siya usa ka membro sa “Iglesya sa Wicca (mas nailhang pagpamarang).” Busa, si Dettmer may legal nga katungod sa paggamit diha sa iyang pagsimba sa asupre, asin sa dagat, o walay-iodine nga asin; mga kandila; insenso; usa ka orasan nga may alarma; ug usa ka puting taas nga biste.

Oo, sumala sa mga timailhan, ang pagpamarang kaylap sa Kasadpan. Ang Britanikong mantalaang Manchester Guardian Weekly mitaho: “Lima ka tuig nga miagi, gihunahunang may mga 60,000 ka barangan sa Britanya: karong adlawa [1985] ang gidaghanon gibanabana sa pila ka barangan nga mitubo ngadto sa 80,000. Ang Prediction, ang binulang magasin sa astrolohiya ug sa okulto, may sirkulasyon nga 32,000.”

Satanismo ug Musika

Si Propesor Russell, sa iyang librong Mephistopheles—The Devil in the Modern World, nagadani sa atong pagtagad sa laing paagi nga niana ang mga katuyoan ni Satanas ginatuman. Siya nagsulat: “Ang dayag nga Satanismo tuling nahanaw tapos sa katuigang 1970, apan ang mga elemento sa kultural nga Satanismo nagpadayon abot sa katuigang 1980 diha sa ‘heavy metal’ rock nga musika uban ang panalagsang pagtawag niini sa ngalan sa Yawa ug sa dakong pagtahod sa Satanasnong mga prinsipyo sa kapintasan, mga droga, kangil-ad, depresyon, pagpatuyang-sa-kaugalingon, kabangis, kalangas ug kalibog, ug pagkawalay-kalipay.”—Italiko amoa.

Tingali ang mga musikero nga nagsukip sa mga elemento sa Satanismo sa ilang musika dili seryoso. Tingali sila nagasulay lamang sa pagpakurat o mahimong katingad-anan. Bisan pa niana, naapektahan ug dako ang pila ka huyang nga tawo. Si Propesor Russell nag-ingon nga ang “kanunay suluseryosong propaganda sa kadaotan may daotang mga epekto diha sa buangon ug huyang nga mga hunahuna. Ang usa ka resulta mao ang pagsulbong sa makalilisang ang pagkadaotan nga mga krimen, apil ang pag-abusar sa sekso sa mga bata ug pagputolputol sa mga hayop.”

Ang usa ka bag-ong kaso nakapakurat sa mga taga-New York. Sumala sa usa ka taho sa mantalaan, ang usa ka 14-anyos nga batang lalaki,“kay nalinga sa Satanismo,” nagdunggab sa iyang inahan hangtod namatay ug dayon naghikog. Ang Canadianhong magtatambag sa pamilya miingon, nga gitaho sa magasing Maclean’s nga ang nagkadaghang may-sulirang mga tin-edyer miangkon nga nagbuhat sa “Satanismo nga kadaghanan gikombinar sa mga droga ug sa mas malupigong mga klase sa heavy-metal rock nga musika.”

Dili Lamang Uso

Ang usa ka uso nga lukop karon sa Tinipong Bansa gitawag channeling. Ang mga tawo kadaghanan mobayad sa pila ka gatos ka dolyar aron makaapil sa mga sesyon nga niana ang usa ka “channel,” nga mao usa ka medium, nagaangkon (ang mga channel kasagaran mga babaye) nga makakomunikar sa espiritu sa usa ka tawong dugay nang namatay. Sa kaso sa usa ka channel, mitaho ang prensa, ang mga sesyon “panapanahon ipasa pinaagig telebisyon satelayt hookup ngadto sa linibong tawo dihadiha diha sa katunga sa dosenang siyudad.” Kining usoha dayag nga pagsupak sa tambag sa Bibliya nga likayan ang mga espiritista ug propesyonal nga mga manalagna sa mga hitabo. Busa, kini ang matang sa pagsimba nga maila ingong pagsimba sa demonyo. Ug sama sa tanang espiritismo, kini gibase sa satanasnong bakak nga ang tawhanong kalag dili mamatay.—Ecclesiastes 9:5; Ezekiel 18:4, 20.

Ang Impluwensiya sa Yawa sa Kalibotang Punog Pagdumot

Ang makalilisang nga kahimtang sa katawhan niining ika-20ng siglo nagapahunahuna kanato kon kaha ang impluwensiya ni Satanas wala ba makaabot sa layo pa. Si Propesor Russell naghisgot niini sa miingon Siya: “Sa pagkakaron, tungod sa mga pondohanan sa mga armas nukleyar nga gibanabana nga kapitoan ka pilo sa gidaghanon nga gikinahanglan sa pagpatay sa matag buhing tawo sa yuta, kita sa gahian nagapangandam sa usa ka gubat nga dili makahatag kaayohan sa tawo, nasod, o ideolohiya apan maghatod sa libolibong milyon ngadto sa makalilisang nga kamatayon. Unsang gahoma ang nagaagda kanato sa pagsubay sa usa ka dalan nga sa matag adlaw nagkahimong mas peligroso? Kang kansang kaayohan ang paglaglag sa planeta pinaagig nukleyar nga armas? Ang gahom lamang nga sukad sa sinugdanan tungod sa way-kinutbanang kapintasan ug kadaotan nagtuyo nga malaglag ang cosmos.”

Kinsa o unsa ba kanang gahoma? Ang propesor nagahatag sa iyang kaugalingong tubag niining mga pulonga: “Ang Yawa gibatbat ingon ang espiritu nga nagatinguha sa pagnulo ug paglaglag sa cosmos sa Diyos kutob sa iyang gahom. Dili ba kaha ang gahom nga nagaagda kanato sa paggamit ug nukleyar nga armas mao ang samang gahom nga kanunay naganulo sa iyang pagkamao? Niining kinalabwang krisis sa atong planeta, dili kita makasalikway sa posibilidad.” Ang mga Kristohanon tinong dili mosalikway sa posibilidad! Si Jesus mismo nagpakita sa dakong impluwensiya ni Satanas niining kalibotana sa dihang Iyang gitawag siya “ang punoan niining kalibotana.” (Juan 12:31) Sa pagbatbat sa tinamdan sa hunahuna ni Satanas karong adlawa, ang basahonsa Pinadayag nagaingon nga siya may “dakong kapungot, kay nahibaloan niyang siya may hamubo na lamang panahon.” (Pinadayag 12:12) Sa pagtumong sa kon unsay gipaningkamotan ni Satanas nga buhaton sa atong panahon, kanang basahona mismo nagaingon nga Siya nagagamit ug demonyohanong propaganda sa pagtigom sa mga magmamando niining kalibotan “sa tingob alang sa gubat sa dakong adlaw sa Diyos nga Makagagahom sa Tanan.” (Pinadayag 16:14) Dili, kita dili makapahigawas sa impluwensiya ni Satanas nga Yawa kon atong sulayan pagsabot ang hinungdan sa buangon nagalaglag-sa-kaugalingon nga dalan sa katawhan.

Gitawag ni apostol Pablo si Satanas “ang magmamando sa pagbulot-an sa kahanginan, ang espiritu nga karon nagalihok diha sa mga anak sa pagkamasupilon,” ug “ang diyos niining sistema sa mga butang.” (Efeso 2:2; 2 Corinto 4:4) Dili katingad-an nga daghan ang mangutana kon ang tanang kapintasan niining “nalamdagan” siyentipikanhong panahon—ang duha ka gubat sa kalibotan, ang pakyaw nga mga pagpatay sa Uropa ug Kampuchea, ang kagutmanan tungod sa politika sa Aprika, dulot tibuok-kalibotang relihiyoso ug rasanhong mga pagkabahinbahin, pagdumot, pagpatay, sistematikanhong pagsakit, ang kriminal nga pagpukan sa katawhan pinaagig mga droga, sa pagngalan lang ug pipila—dili kaha mao ang pagsunod sa dakong plano sa samang gamhanan, daotang gahom nga determinado sa pagpahilayo sa katawhan gikan sa Diyos ug tingali hangtod pa sa tibuok-kalibotang paghikog.

Nan, kinsa ba si Satanas? Unsa ba ang iyang tinguha? Unsay atong mahimo sa tinagsatagsa? Gidapit ka namo sa pagtagad sa paghisgot niining mga pangutana sa mosunod duha ka artikulo.

[Hulagway sa panid 7]

Sa paglikay sa satanasnong musika, ang katawhan sa Diyos nagatinguha sa maayong kalingawan