Hustisya Duol na Alang sa Tanang Nasod
“Hustisya—hustisya ang imong pagasundon, aron mabuhi ka ug magapanunod ka sa yuta nga ginahatag kanimo ni Jehova nga imong Diyos.”—DEUTERONOMIO 16:20.
1. Unsa ang orihinal nga katuyoan sa Diyos alang sa tawo, ug sa unsang paagi lamang siya makatuman niana?
ANG katuyoan ni Jehova nga Diyos sa paglalang sa lalaki ug babaye maoy aron pun-on ang yuta sa hingpit nga mga linalang. Silang tanan magadayeg kaniya ug makabatog bahin sa paggahom sa yuta. (Genesis 1:26-28) Sanglit ang tawo gibuhat sa dagway ug kasamahan sa Diyos, siya gihatagan sa mga hiyas sa kaalam, hustisya, gugma, ug gahom. Pinaagi lamang sa timbang nga paggamit nianang mga hiyasa nga ang tawo makatuman sa katuyoan sa iyang Magbubuhat alang kaniya.
2. Unsa ka hinungdanon ang pagsunod sa hustisya alang sa mga anak sa Israel?
2 Sumala sa giingon sa miaging artikulo, ang tawo mirebelde batok sa mga kahikayan sa Diyos ug nasilotan sa kamatayon. Karon, tungod sa pagkadili-hingpit, dili na siya makatuman sa orihinal nga katuyoan sa Diyos sa katawhan. Ang pagkawalay-katakos sa tawo nga magpakitag hingpit nga hustisya usa ka dakong hinungdan sa maong kapakyasan. Nan, dili katingalahan nga si Moises nagpahinumdoman sa mga anak sa Israel: “Hustisya—hustisya ang imong pagasundon”! Ang ilang mga kinabuhi ug katakos sa pagpanunod sa Yutang Saad nagdepende sa ilang pagsunod sa hustisya.—Deuteronomio 16:20.
Usa ka Landong sa Umaabot nga Maayong mga Butang
3. Nganong ang pagsusi sa mga pakiglabot ni Jehova uban sa Israel hinungdanon alang kanato karong adlawa?
3 Ang mga pakiglabot ni Jehova sa nasod sa Israel nagalig-on sa atong pagsalig nga iya gayong himoong tin-aw ang iyang hustisya alang sa tanang nasod pinaagi sa iyang piniling Alagad, si Jesu-Kristo. Si apostol Pablo nagsaysay sa mga butang niining paagiha: “Kay ang tanang butang gisulat kaniadto gisulat aron sa pagtudlo kanato, nga pinaagi sa atong pag-antos ug paglipay gikan sa Kasulatan kita makabaton untag paglaom.” (Roma 15:4) Sanglit ang Diyos “nahigugma sa pagkamatarong ug hustisya,” gibaod niya nga ang mga Israelinhon mosundog kaniya sa tanan nilang pakiglabot sa usag usa. (Salmo 33:5) Kini tin-awng makita sa pagsusi sa pipila sa 600 ka kasugoan nga gihatag sa Israel.
4. Giunsa sa pagsulbad ang mga suliran sa sibil nga mga katungod ubos sa Moisesnong Kasugoan?
4 Ang mga suliran sa sibil nga mga katungod wala maglungtad sa dihang ang Kasugoan ni Moises gisunod. Sa paghisgot sa kaso sa dili-Israelinhon nga mipuyo sa yuta, ang Levitico 19:34 nagaingon: “Ang dumuloong nga nagapuyo uban kaninyo pagahimoon ninyong ingon sa molupyo ninyo; ug higugmaon mo siya sama sa imong kaugalingon.” Pagkamatarong ug mahigugmaong kahikayan! Dugang pa, ang mga maghuhukom ug mga saksi gitambagan: “Dili ka magsaksi mahitungod sa usa ka buruka aron mahisimang nga mokuyog sa panon sa pagtuis sa katarongan. Mahitungod sa kabos, dili ka magpakitag pagpalabi sa iyang buruka.” (Exodo 23:2, 3) Hunahunaa lamang—hustisya nga ipadapat sa samang dato ug kabos!
5. Itandi ang kriminal nga mga balaod ubos sa Moisesnong Kasugoan sa anaa karong adlawa.
5 Ubos sa kalagdaan sa Kasugoan ni Moises, ang kriminal nga mga balaod labaw kaayo kay sa mga balaod sa mga basahon sa balaod sa kanasoran karong adlawa. Pananglitan, ang kawatan dili mabilanggo nga makapabug-at sa kugihang mga tawo nga nagsunod sa Kasugoan. Kinahanglang siya motrabaho ug mobayad ug doble o kapin pa alang sa butang iyang gikawat. Busa ang biktima dili maalkansi. Pananglitan dili motrabaho ug mobayad ang kawatan. Sa maong kaso, siya ibaligya nga ulipon hangtod makabayad. Kon mopadayon siya sa pagpakitag pagkagahian, siya pagapatyon. Niining paagiha gihatagag hustisya ang biktima, ug kadto makapugong gayod sa uban nga tingali makiling sa pagpangawat. (Exodo 22:1, 3, 4, 7; Deuteronomio 17:12) Dugang pa, sanglit ang kinabuhi sagrado sa panan-aw sa Diyos, ang mamumuno pagapatyon. Kana nagwagtang sa daotan, mamumuno nga tawo gikan sa nasod. Bisan pa niana, ang kaluoy gipakita ngadto sa dili-tinuyong mga mamumuno.—Numeros 35:9-15, 22-29, 33.
6. Ang pagsusi sa mga balaod sa Israel motultol kanato sa unsang konklusyon?
6 Nan, kinsay makalimod nga ang hustisya nagtimaan sa tanang hudisyal nga mga pakiglabot sa Diyos uban sa nasod sa Israel? Busa, mahupong gayod kita sa kahupayan, sa paglaom kon atong palandongon sa unsang paagi ang saad sa Diyos sa Isaias 42:1 pagatumanon pinaagi kang Kristo Jesus! Dinha kita gihatagan sa pasalig: “Hustisya sa mga nasod mao ang iyang pagadad-on.”
Hustisya Gitimbangan sa Kaluoy
7. Batbata ang maluluy-ong mga pakiglabot ni Jehova uban sa Israel.
7 Ang hustisya sa Diyos gitimbangan sa kaluoy. Kini tin-awng gipasundayag sa dihang ang mga Israelinhon misugod sa pagrebelde batok sa matarong nga mga paagi sa Diyos. Patalinghog sa pagbatbat ni Moises sa maluluy-on nga pag-atiman ni Jehova kanila panahon sa ilang 40 ka tuig sa kamingawan: “Iyang hikaplagan siya didto sa yuta sa kamingawan, ug sa haw-ang, makalilisang nga kamingawan. Siya nagliyok kaniya, nag-atiman kaniya, nagbantay kaniya sama sa kalimutaw sa iyang mata. Ingon sa agila nga nagapukaw sa iyang salag, nagalupadlupad ibabaw sa iyang mga kuyabog, nagabuklad sa iyang mga pako, nagakuha, nagadala kanila ibabaw sa iyang mga pako, si Jehova lamang ang nag-agak kanila.” (Deuteronomio 32:10-12) Sa ulahi, sa dihang nahimong apostata ang nasod, si Jehova mihangyo: “Palihog, bumalik kamo gikan sa inyong daotang mga dalan ug gikan sa inyong daotang mga buhat.”—Zacarias 1:4a.
8, 9. (a) Diin kutob gipakita sa Diyos ang maluluy-ong hustisya ngadto sa mga Hudiyo? (b) Unsang kataposang katalagman ang nakaapas kanila, apan unsay ikaingon sa paagi sa Diyos sa pagpakiglabot kanila?
8 Ang tanyag ni Jehova nga kaluoy wala pamatii. Pinaagi sa manalagnang si Zacarias, ang Diyos miingon: “Sila wala magpatalinghog, ug sila wala mamati kanako.” (Zacarias 1:4b) Busa ang maluluy-ong hustisya sa Diyos nagdasig niya sa pagpadala sa iyang bugtong Anak aron motabang kanila sa pagbalik Kaniya. Si Juan Bautista nagpailaila sa Anak sa Diyos pinaagi sa pag-ingon: “Tan-awa, ang Kordero sa Diyos nga nagakuha sa sala sa kalibotan!” (Juan 1:29) Sa ubay-ubayng katuigan, nga wala kapoyi si Jesus nagtudlo sa mga Hudiyo sa matarong nga mga dalan sa Diyos, nga nagbuhat sa dili-maihap nga mga milagro ug sa ingon nagpamatuod nga siya mao ang gitagnang Manluluwas. (Lucas 24:27; Juan 5:36) Apan ang mga tawo wala mamati o motuo. Busa, si Jesus naaghat sa pagpatugbaw: “Jerusalem, Jerusalem, ang nagpatay sa mga manalagna ug nagbato niadtong gipadala kaniya,—pagkadaghan nga buot kong tigomon ang imong mga anak, sa paagi nga ang usa ka himungaan nga nagatigom sa iyang mga piso sa ilalom sa iyang mga pako! Apan wala ninyo kana tinguhaa. Tan-awa! Ang inyong balay gibiyaan nganha kaninyo.”—Mateo 23:37, 38.
9 Gipugngan sa Diyos ang pagpatuman sa iyang dili-maayong hukom sulod sa laing 37 ka tuig, hangtod sa 70 K.P. Dayon gitugtan niya ang mga Romano nga maglaglag sa Jerusalem ug magdala sa libolibong Hudiyo sa pagkabinihag. Kon atong palandongon ang hataas-nga-pag-antos ug pagpailob ni Jehova latas sa daghang siglo, kinsay mapakyas sa pagkakita sa timaan sa hustisya diha sa tanan niyang pakiglabot sa balay sa Israel?
Hustisya Alang sa Tanang Nasod
10. Sa unsang paagi ang hustisya sa Diyos gipaabot sa tanang nasod?
10 Human sa pagsalikway sa Israel kang Jesus, si Santiago miingon: “Ang Diyos sa unang panahon nagliso sa iyang pagtagad ngadto sa mga nasod aron kuhaon gikan kanila ang usa ka katawhan alang sa iyang ngalan.” (Buhat 15:14) Kini nga “katawhan,” apil kadtong pila ka Hudiyo nga nagdawat kang Jesus ingong Mesiyas, sa tingob mao ang “[espirituwal] nga Israel sa Diyos” ug gilangkoban sa 144,000 inanak-sa-espiritung mga sumusunod ni Kristo Jesus. (Galacia 6:16; Pinadayag 7:1-8; 14:1-5) Ang unang dili-tinuli nga magtutuong Hentil mao si Cornelio. Sa gidawat ni Cornelio ug sa iyang panimalay ang dalan sa Diyos sa kaluwasan, si Pedro miingon: “Sa pagkamatuod akong naila nga ang Diyos walay pinalabi, apan sa matag nasod ang tawo nga nahadlok kaniya ug nagabuhat sa pagkamatarong dalawaton kaniya.” (Buhat 10:34, 35) Si Pablo nagtin-aw sa pagkamatarong sa pagkawalay-pinalabi ni Jehova sa miingon siya: “Walay Hudiyo o Grego, walay ulipon o tawong may kagawasan, walay lalaki o babaye; kay kamong tanan maoy usa ka tawo nga nahiusa kang Kristo Jesus. Dugang pa, kon kamo iya ni Kristo, kamo gayod maoy binhi ni Abraham, mga manununod maylabot sa usa ka saad.”—Galacia 3:28, 29.
11. Unsang saad ang gihatag kang Abraham, ug sa unsang paagi kini pagatumanon?
11 Dinhi gipahinumdoman kita sa usa ka talagsaong saad nga gihatag ni Jehova kang Abraham. Pinasukad sa kaandam sa maong patriarka sa paghalad sa iyang minahal nga anak si Isaac, giingnan siya sa Diyos: “Tungod sa kamatuoran nga imong gibuhat kining butanga ug wala nimo ihikaw ang imong anak, ang imong bugtong nga anak, pagapalanginan ko ikaw . . . Ug pinaagi sa imong binhi ang tanang nasod sa yuta magapanalangin sa ilang kaugalingon.” (Genesis 22:16-18) Sa unsang paagi kining saara matuman? Ang “binhi ni Abraham,” nga gilangkoban ni Jesu-Kristo ug sa iyang 144,000 dinihogang mga sumusunod nga nagapamatuod nga matinumanon hangtod sa kamatayon, magamando sa katawhan gikan sa mga langit sulod sa usa ka libo ka tuig. (Pinadayag 2:10, 26; 20:6) Mahitungod sa maong bulahang panahon, si Jehova nagapasalig kanato: “Sa kadagaya sa prinsipinhong pagmando ug sa pakigdait walay kataposan.” Ngano? Kay “ang prinsipinhong pagmando” sa maong Mesiyanikong Gingharian ‘pagalig-onon pinaagi sa hustisya ug pagkamatarong sa panahong walay katinoan.’—Isaias 9:7.
12. Sa unsang gidak-on ang mga panalangin sa Abrahamnong pakigtugon gitagamtam na?
12 Apan dili kinahanglang mohulat sa pagsugod sa Usa ka Libo ka Tuig nga Paghari ni Jesu-Kristo aron matagamtam ang mga panalangin sa Abrahamnong pakigtugon. Ang maong mga panalangin gipahimuslan na sa “usa ka dakong panon” sa katawhan “gikan sa tanang nasod ug mga tribo ug mga katawhan ug mga pinulongan.” Pinaagi sa simbolikong ‘paglaba sa ilang mga biste ug pagpaputi niana sa dugo sa Kordero,’ si Jesu-Kristo, sila nahidangat sa matarong nga baroganan atubangan kang Jehova. Sama kang Abraham, sila nahimong mga higala ni Jehova! Ang hustisya mao gayod ang timaan sa dalan ni Jehova sa kaluwasan alang sa minilyon gikan sa tanang nasod.—Pinadayag 7:9, 14.
Nagasanong Ka ba sa Matarong nga mga Dalan sa Diyos?
13, 14. (a) Unsang personal nga pagsusi sa kasingkasing ang pagahimoon natong tanan? (b) Sa unsang paagi ikapahayag ang atong pagpasalamat kang Jehova?
13 Ang imo bang kasingkasing natukbil ug natandog sa dulot sa dalan sa hustisya ug gugma sa Diyos sa paghatag sa iyang bugtong Anak ingong usa ka lukat alang kanimo? Handurawa ang gibati ni Abraham sa gihangyo siya ni Jehova nga ihalad ang iyang anak, ang usa nga minahal kaayo niya! Apan ang mga gibati sa Diyos labi pang lalom. Hunahunaa ang iyang mga gibati sa dihang ang iyang minahal nga Anak nag-antos sa mga kapintasan, sa pasipala sa lumalabay, sa labihang kasakitan sa kahoy sa pagsakit. Handurawa ang sanong ni Jehova sa tiyabaw ni Jesus: “Diyos ko, diyos ko, nganong gibiyaan mo ako?” (Mateo 27:39, 46) Bisan pa niana, ang hustisya nagkinahanglan nga itugot ni Jehova nga Diyos nga ang Iyang Anak mamatay sa maong paagi aron pamatud-an ang iyang pagkamatinumanon sa pagbayaw sa pagkamatarong sa Diyos. Dugang pa, pinaagi sa pagtugot nga mamatay ang iyang Anak, gibuksan ni Jehova ang dalan sa kaluwasan alang kanato.
14 Nan, tinong ang atong pagpasalamat kang Jehova ug sa iyang Anak angay magdasig kanato sa pag-ila sa dayag: “Utang nato ang kaluwasan sa atong Diyos . . . ug sa Kordero.” (Pinadayag 7:10) Pinaagi sa atong pagsanong sa positibo niining paagiha, atong ginapakita nga kita nagtuo sa mga pulong ni Moises: “Ang tanang dalan [ni Jehova] maoy hustisya.” (Deuteronomio 32:4) Pagkadako sa kalipay nga atong mahatag sa mga kasingkasing ni Jehova ug sa iyang Anak samtang atong ilhon ug dayon sundon ang matarong nga mga dalan sa Diyos alang sa kaluwasan sa tawo!
15. Unsa ang kahulogan alang kanato ang mga pulong ni Jesus kang Nicodemo?
15 Dili ba kita malipay nga ang atong kaubang mga magtutuo sa katuigang 1870 mibarog nga malig-on bahin sa isyu sa halad-lukat? Dili ba kita malipay nga kita sakop karon sa usa ka organisasyon nga sama ka determinado sa pagkupot sa matarong ug mahigugmaong paagi sa Diyos alang sa kaluwasan sa tawo? Kon kita malipay, nan angay hatagan natog espesyal nga pagtagad ang gisulti ni Jesus kang Nicodemo: “Gipadala sa Diyos ang iyang Anak sa kalibotan, dili aron pagahukman niya ang kalibotan, kondili aron ang kalibotan maluwas pinaagi kaniya. Ang motuo kaniya dili pagahukman. . . . Siya nga nagabuhat sa matuod moanha sa kahayag, aron ang iyang mga buhat mapadayag ingon nga nagbuhat nga nahiuyon sa Diyos.” Aron makaikyas sa dili-maayong hukom sa Diyos, kinahanglang pamatud-an nato ang atong pagtuo sa Anak pinaagi sa pagbuhat sa ‘mga buhat nga nahiuyon sa Diyos.’—Juan 3:17, 18, 21.
16. Sa unsang paagi ang mga tinun-an ni Jesus makahimaya sa langitnong Amahan?
16 Si Jesus miingon: “Ang akong Amahan gihimaya niini, nga kamo mamungag daghan nga bunga ug magpamatuod nga kamo akong mga tinun-an. Kon inyong bantayan ang akong mga sugo, kamo magpabilin sa akong gugma, maingon nga ako nagbantay sa mga sugo sa Amahan ug nagpabilin sa iyang gugma.” (Juan 15:8, 10) Unsa ang pipila nianang mga sugoa? Ang usa hikaplagan sa Juan 13:34, 35, diin giingnan ni Jesus ang iyang mga tinun-an: “Nagahatag ako kaninyo ug bag-ong sugo, nga kamo mahigugma sa usag usa . . . Pinaagi niini ang tanan makaila nga kamo akong mga tinun-an, kon kamo may gugma sa inyong taliwala.” Ang bunga sa gugma dayag taliwala sa mga Saksi ni Jehova. Si Jesus nagsugo usab: “Panlakaw kamo ug himoang mga tinun-an ang mga tawo sa tanang nasod, nga magabawtismo kanila sa ngalan sa Amahan ug sa Anak ug sa balaang espiritu, nga magatudlo kanila sa pagbantay sa tanang butang akong gisugo kaninyo.” (Mateo 28:19, 20) Ikaw personal bang nagabuhat niining ‘mga buhat nga nahiuyon sa Diyos’?
17. Unsang resulta ang nagapakita nga ang buluhatong pagwali ug pagtudlo maoy pasundayag sa hustisya ni Jehova?
17 Ang pagkamatarong o hustisya sa dalan ni Jehova sa pagtugot sa mga sumusunod ni Jesus sa pagbuhat niining mga buluhaton sa pagwali ug pagtudlo madayag kon atong palandongon kon unsay nahimo sa mga Saksi ni Jehova sa usa ra ka tuig. Panahon sa 1988, may 239,268 ka bag-ong tinun-an nga gibawtismohan! Dili ba makalipay kini sa imong kasingkasing?
Ang Diyos sa Hustisya Molihok Dayon
18. Unsang mga pangutana ang mahimong ipatungha tungod sa paglutos sa katawhan ni Jehova?
18 Ang buluhaton sa pagsangyaw wala buhata nga walay pagsupak. Giingnan ni Jesus ang iyang mga sumusunod: “Kon sila naglutos kanako, kamo ilang pagalutoson usab.” (Juan 15:20) Ang modernong-adlawng kasaysayan sa mga Saksi ni Jehova nagapamatuod sa kamatuoran nianang pamulonga. Ang mga pagdili, mga pagbilanggo, mga pagdagmal, ug bisan pagsakit naagoman sa mga Saksi sa sunodsunod nga nasod. Ang matagnaong mga pulong ni Habakkuk moabot na usab sa atong hunahuna: “Ang kasugoan dili makalihok, ug ang hustisya dili mopadayon.” Busa, usahay, bisan ang katawhan ni Jehova tingali gustong mangutana: ‘Nganong si Jehova nagatan-aw kanilang nagabuhat nga mabudhion? Nganong Siya nagahilom sa diha nga ang tawong daotan nagalamoy sa tawong labaw nga matarong kay kaniya?’—Habakkuk 1:4, 13.
19. Unsang ilustrasyon ang gihatag ni Jesus nga motabang nato sa pagsabot sa mga butang gikan sa punto de vista sa Diyos?
19 Si Jesus mihatag ug usa ka ilustrasyon nga motabang sa pagtubag sa maong mga pangutana ug makapaarang nato sa pagkakita sa mga butang gikan sa panglantaw sa Diyos. Sa Lucas 17:22-37, gibatbat ni Jesus ang mapintasong mga kondisyon nga magtimaan sa kataposan niining sistema sa mga butang. Siya miingon nga sila mahisama niadtong mga kondisyon una pa sa Lunop sa adlaw ni Noe ug sa pagkalaglag sa Sodoma ug Gomora sa mga adlaw ni Lot. Dayon, sumala sa gibatbat sa Lucas 18:1-5, si Jesus miliso ngadto sa iyang mga tinun-an ug “mipadayon sa pagsugilon kanila sa usa ka ilustrasyon mahitungod sa panginahanglan nga sila sa kanunay mag-ampo ug dili mohunong.” Giasoy ni Jesus ang bahin sa usa ka babayeng balo nga nanginahanglan pag-ayo ug “usa ka maghuhukom” nga makaarang sa pagtagana sa iyang mga panginahanglan. Ang babayeng balo padayong mihangyo: “Tinoa nga makabaton akog hustisya gikan sa akong kaaway sa balaod.” Tungod sa iyang pagkamalahutayon, sa kataposan ang maghuhukom ‘nagtino nga siya nakabatog hustisya.’
20. Unsa ang pagtulon-an alang kanato sa ilustrasyon ni Jesus?
20 Unsa ang pagtulon-an alang kanato karong adlawa? Sa pagtandi sa kalainan sa maong dili-matarong nga maghuhukom kang Jehova, si Jesus miingon: “Patalinghogi ninyo ang giingon sa maghuhukom, bisan pag dili matarong! Sa pagkamatuod, dili ba hatagan sa Diyos ug hustisya ang iyang mga pinili nga nagatuwaw kaniya sa adlaw ug sa gabii, bisan pag siya nagapailob kanila? Sultihan ko kamo, sa madali Iyang hatagan silag hustisya.”—Lucas 18:6-8a.
21. Unsaon nato pag-isip ug pagsulbad sa atong personal nga mga suliran?
21 Hinumdomi sa kanunay nga kon bahin sa atong personal nga mga suliran, ang daw pagkalangan sa usa ka tubag sa atong mga hangyo dili tungod sa pagkadili-gusto sa bahin sa Diyos. (2 Pedro 3:9) Kon mahitabong kita nagaantos sa usa ka matang sa paglutos o inhustisya sama sa iya sa babayeng balo, makabaton kitag pagtuo nga tinoon sa Diyos nga sa kataposan ihatag ang hustisya. Sa unsang paagi makapakita kita sa maong pagtuo? Pinaagi sa pag-ampo sa walay hunong ug pagpaluyo sa atong mga pag-ampo pinaagi sa pagpadayon sa matinumanong binuhatan. (Mateo 10:22; 1 Tesalonica 5:17) Pinaagi sa atong pagkamatinumanon, atong pamatud-an nga adunay pagtuo sa yuta, nga adunay matuod nga mga nahigugma sa hustisya, ug kita nahiapil kanila.—Lucas 18:8b.
“Magakalipay, Kamong mga Nasod, Uban sa Iyang Katawhan”
22. Sa unsang diwa sa kadaogan nga gitapos ni Moises ang iyang awit?
22 Daghang siglo nga miagi, gitapos ni Moises ang iyang awit niining madaogong diwa: “Magakalipay, kamong mga nasod, uban sa iyang katawhan, kay siya magapanimalos sa dugo sa iyang mga alagad, ug iyang ibayad ang panimalos ngadto sa iyang mga kaaway ug magapala sa sala alang sa yuta sa iyang katawhan.” (Deuteronomio 32:43) Ang adlaw sa panimalos ni Jehova nagakahiduol na. Pagkamapasalamaton nato nga siya nagapakita gihapon ug pailob duyog sa hustisya!
23. Unsang malipayong sangpotanan ang nagahulat niadtong makaambit sa kalipay sa katawhan sa Diyos?
23 Ang dalan bukas pa alang niadtong mga tawo sa tanang nasod “aron mahidangat sa paghinulsol,” apan walay panahong usikan. Si Pedro nagpasidaan: “Ang adlaw ni Jehova moabot sama sa kawatan.” (2 Pedro 3:9, 10) Ang hustisya sa Diyos nagaobligar nga kining daotang sistema pagalaglagon sa dili madugay. Kon malaglag na kini, hinaot kita hikaplagang nahiapil niadtong misanong sa makalipay nga awhag: “Magakalipay, kamong mga nasod, uban sa iyang katawhan.” Oo, hinaot kita mahiapil niadtong mga malipayon nga nakakitang ang hustisya nagatimaan sa tanang dalan sa Diyos!
Unsaon Nimo Pagtubag?
◻ Nganong ang Moisesnong Kasugoan magalig-on sa atong pagtuo sa hustisya sa Diyos?
◻ Unsay magatukmod kanato sa pagsanong ngadto sa matarong nga mga dalan sa Diyos?
◻ Sa unsang paagi mahimaya si Jehova?
◻ Karong adlawa, diin lamang hikaplagan ang matuod nga kalipay?
[Hulagway sa panid 25]
“Sa pagkamatuod akong naila nga ang Diyos walay pinalabi, apan sa matag nasod ang tawo nga nahadlok kaniya ug nagabuhat sa pagkamatarong dalawaton kaniya.”—Buhat 10:34, 35
[Hulagway sa panid 28]
Ipahinabo sa Diyos nga ihatag ang hustisya ngadto sa iyang mga pinili nga nagatuwaw kaniya