Mga Pangutana Gikan sa mga Magbabasa

◼ Uyon ba sa mga prinsipyo sa Bibliya alang sa usa ka Kristohanong magtiayon sa paggamit ug mga pildoras sa pagpugong sa pagpanganak?

Ang Kasulatan wala sa klaro mag-ingon nga ang Kristohanong mga magtiayon obligado sa pagpanganak o, kon sila manganak man, pila ka buok. Ang matag magtiayon angay sa pribado ug sa mapangakohon magtino sa pagsulay sa pagkontrolar sa gidak-on sa ilang pamilya. Kon sila magkauyon sa pagpugong sa pagpanganak, ang ilang gipiling mga kontraseptibo maoy personal nga butang usab. Apan, angay nilang tagdon sumala sa ilang pagsabot sa Bibliya ug sa ilang tanlag​—kon ang paggamit ug usa ka paagi nagapakita bag pagtahod sa pagkabalaan sa kinabuhi.

Ang Bibliya nagpaila nga ang kinabuhi sa usa ka tawo magsugod diha sa pagsamkon; ang Maghahatag-Kinabuhi nakakita sa kinabuhi nga gisamkon, “bisan sa binhi pa” nga sa ulahi mougmad diha sa matris. (Salmo 139:16; Exodo 21:22, 23a; Jeremias 1:5) Busa, walay paningkamot ang himoon sa pagtapos sa gisamkon nga kinabuhi. Ang pagbuhat niini maoy paghulog sa gisabak.

Ang mga pildoras sa pagpugong sa pagpanganak kaylap nga gigamit sa tibuok kalibotan. Sa unsang paagi nagpugong kini sa pagpanganak? Dunay duha ka dagkong matang sa mga pildoras​—ang combination pill ug ang progestin-only pill (mini-pill). Napatin-aw sa pagdukiduki ang ilang pangunang mga mekanismo sa pagpugong sa mga pagpanganak.

Ang combination pill dunay mga hormones nga estrogen ug progestin. Sumala sa U.S. Food and Drug Administration, “ang pangunang mekanismo” sa combination pill mao ang “pagbalda sa paggawas sa binhi.” Mopatim-aw nga kon regular nga tomaron, kining matanga sa pildoras halos sa tanang panahon makapugong sa paggawas sa usa ka binhi gikan sa tagoangkan. Kon walay binhi o ovum ang ipagawas, walay mahitabong pagsamkon diha sa Fallopian tubes. Samtang kining matanga sa pildoras mahimong mopahinabog kausaban diha sa “endometrium [hanig sa tagoangkan] (nga mopakunhod sa kalagmitan sa pagtapot sa tumotubong-binhi diha sa matris),” kini giisip nga ikaduhang mekanismo.

Aron mamenosan ang dili-maayong mga epekto, ang combination pills nga dunay gamayng dosis sa estrogen ang naugmad. Hayan, kining gamayng-dosis nga combination pills nagtugot ug dugang kalihokan diha sa mga matris. Si Dr. Gabriel Bialy, hepe sa Contraceptive Development Branch of the National Institutes of Health, nag-ingon: “Ang daghang siyentipikong ebidensiya nagpaila nga bisan sa gamayg-estrogen nga pildoras, ang paggawas sa binhi mababagan, dili 100 porsiento, kondili mga 95 porsiento. Apan ang yanong kamatuoran nga ang paggawas sa binhi mahitabo dili sama sa pag-ingon nga ang pertilisasyon nahitabo.”

Kon mosipyat ang babaye sa pagtomar sa combination pill sumala sa gidesinyong iskedyol, dunay nagdugang nga posibilidad nga ang ikaduhang mekanismo modula sa papel sa pagpugong sa mga pagpanganak. Ang pagtuon diha sa mga babaye kinsa misipyat ug pagtomar ug duha ka gamayng-dosis sa mga pildoras nakakaplag nga 36 porsiento “wala” makapatungha ug mga binhi. Ang basahong Contraception nagtaho nga sa maong mga kaso ang “mga epekto sa pildoras diha sa endometrium ug sa cervical mucus lagmit magpadayon sa paghatag . . . kontraseptibong panalipod.

Unsay ikasulti bahin sa usang matang sa pildoras​—ang progestin-only pill (mini-pill)? Ang Drug Evaluation (1986) nagtaho: “Ang pagbalda sa paggawas sa binhi dili mao ang dakong bahin sa pagpugong sa panganak pinaagi sa progestin-only minipills. Kining mga elementoha mopagawas ug espisong cervical mucus nga dili-malutsan sa binhi sa lalaki; kini makadugang sa oras sa pagpanaw diha sa tubo ug mopahinabo usab ug endometrial involution [nga makabalda sa pag-ugmad sa bisan unsang pertilisadong binhi].”

Ang ubang mga tigdukiduki nag-ingon nga uban sa progestin-only pill, “ang normal nga paggawas sa binhi mahitabo diha sa kapin sa 40% sa mga gumagamit.” Busa kining maong pildoras kanunayng nagapagawas ug binhi. Ang espisong mucus diha sa cervix makababag sa pag-agi sa binhi sa lalaki ug busa makapugong sa pagsamkon; kon dili, ang dili-maayong palibot nga gipahinabo sa pildoras diha sa tagoangkan mahimong magpugong sa pertilisadong binhi gikan sa pagturok ug sa pag-ugmad nga mahimong bata.

Nan, masabtan, nga kon gamiton sa regular ingong paagi sa pagpugong sa pagpanganak, ang duha ka dakong matang sa pildoras mopatim-aw nga makapugong sa mga pagsamkon nga mahitabo diha sa kadaghanang kaso ug busa dili paghulog-sa-bata. Apan, sanglit ang progestin-only pill (minipill) nagatugot sa paggawas kanunay ug binhi, dunay dakong posibilidad nga kini usahay mopugong sa pagpanganak pinaagi sa pagbalda sa pagturok sa binhi diha sa matris sa gipanamkon nga kinabuhi nga nagsugod. Ang siyentipikong mga pagtuon nagpakita nga sa normal (uban sa matris nga wala-maapektohi sa mga pildoras sa pagpugong sa pagpanganak) “sayesinta por siento sa pertilisadong mga binhi sa babaye . . . mangawala sa unang dili-pagregla.” Nga kini mahitabo, hinunoa, lahi kaayo gikan sa pagpili sa paggamit ug usa ka paagi sa pagpugong sa pagpanganak nga dakog kalagmitan nga mobalda sa pagturok sa usa ka pertilisadong binhi diha sa tagoangkan.

Busa, dunay piho moral nga bahin nga palandongon kon makigsulti ang magtiayon uban sa usa ka mananambal bahin sa butang sa paggamit ug mga pildoras sa pagpugong sa pagpanganak. Kinahanglang iresolbar sa mga Kristohanon bisan ang pribado ug personal nga mga pangutana aron mahuptan ang “hingpit mahinlong tanlag” atubangan sa atong Diyos ug Maghahatag-Kinabuhi.​—Buhat 23:1; Galacia 6:5.

[Mga Footnote]