Gikan sa Among mga Magbabasa
Napakyas nga Panagtratohay Ako nagpanuigon ug 17 anyos ug nakakaplag sa artikulong “Mga Batan-on Nangutana . . . Sa Unsang Paagi Ako Makasagubang sa Napakyas nga Panagtratohay?” (Mayo 8, 1993) nga makatabang kaayo. Ako kanunayng naguol bahin sa pagkawalay nagmahal nga usa ka lalaki. Karon ako nang gihunahuna ang ubang mga butang ug wala na mabalaka mahitungod sa pagminyo dayon.
S. M., Australia
Ako nalangkit sa usa ka lalaki nga dili Kristohanon ug nahigugma ako kaniya. Naamgohan nako ang nahitabo ug nakigbulag niya, apan buot kong maghikog. Akong gibati nga dili ako mabuhi kon wala siya ug naguol sulod sa mga semana. Ang artikulo nakatabang kanako sa paghunahunang positibo ug sa pagkahibalo nga kining masakit nga yugto molabay ra.
A. H., Tinipong Bansa
Mga Resipe Ang inyong artikulong “Ang Balhiboon Gamayng Prutas sa New Zealand” (Oktubre 22, 1992) naghatag ug resipe nga naggamit sa bino sa kahel ingong sagol. Ang inyong mga magbabasa kinahanglang mapahinumdoman nga dili sila magdrayb dihadiha human sa pagkaon ug bisan unsang adunay alkohol.
J. S., Tinipong Bansa
Tinuod angayang pahibaloon ang mga bisita kon ang usa ka matang sa pagkaon adunay alkohol. Ang resipe nga gihisgotan nagkinahanglan ug usa ka kutsara nga bino sa kahel sa salad nga prutas para sa unom ka tawo—nga dili makapahubog nga sukod. Ang kapeligrohang mahubog mas menos pa gani sa mga resipe nga nagkinahanglag pagluto sa mga sagol. Sanglit ang alkohol mobukal dayon, kadaghanan, kon dili man ang tanan, mawala.—ED.
Ang Pangandoy ni Joshua Salamat sa pagpatik sa artikulong “Ang Pangandoy ni Joshua.” (Hunyo 22, 1993) Nakapadasig kadto kanako. Kon ingon siya niana ka matinumanon nga adunay makamatay nga sakit [leukemia], pagkasayon lang alang kanako nga magmatinumanon usab! Ako nuybe anyos.
M. M., Tinipong Bansa
Natandog kaayo ako sa “Ang Pangandoy ni Joshua.” Ang iyang kaisog, pagtuo, ug gugma kang Jehova nakatandog kaayo kanako.
K. M., Tinipong Bansa
Modernong-Adlaw nga mga Martir Bag-o pa lang nakong natapos pagbasa ang serye sa mga artikulo nga nag-ulohang “Nagmadaogon Bisan pa sa Kamatayon.” (Mayo 8, 1993) Natandog ako sa dili-makataronganong kabangisan nga giantos sa atong Kristohanong mga igsoon. Sa pagpalandong nako sa ilang pagkamalahutayon, ako nakahilak. Ang nakapatandog kanako mao ang ilang pagtuo ug pagkamaunongon bisan pa sa kamatayon. Hinaot si Jehova maghatag kanatog kusog ug paglahutay aron makapabiling maunongon, sama kanila.
B. D., Italya
Sa akong pagtuon sa Bibliya, sa dihang una nakong nahibalag ang isyu sa paghupot sa pagtuo ilalom sa pagsulay, dili ako makadawat nga aduna gayod ing mga kahimtang diin kita mag-atubang ug grabeng mga pagsulay sa pagtuo. Apan sa dihang nakabasa sa makapatandog nga mga kasinatian sa mga Kristohanon kinsa naghupot sa ilang integridad bisan pa sa kamatayon, dili ko kapugngan ang paghilak. Lalom ang akong pagpabili niining seryeha sa mga artikulo.
J. P., Pilipinas
Pagplano sa Pamilya Ang inyong serye sa mga artikulong “Pagplano sa Pamilya—Usa ka Tibuok-Kalibotang Isyu” (Pebrero 22, 1993) nag-ingon nga sa dihang ang progestin-only inserts ang gigamit [ingong paagi sa pagpugong sa pagpanganak], adunay posibilidad nga kini makapataktak. Ang akong doktor nag-ingon nga dili kini tinuod.
M. D., Tinipong Bansa
Ang mga tigdukiduki wala masayod sa tukma kon sa unsang paagi ang progestin-only nga mga implant makapugong sa pagsabak. Ang pipila nagtuo nga kini sila mohimo niana pinaagi sa pagpugong sa paghimog itlog. Ang uban nag-ingon nga adunay pamatuod nga sila usahay mopugong sa pertilisadong binhi sa pagtisok sa tagoangkan—sa ingon, nagtaktak sa gisabak. Sanglit kining paagiha sa pagpugong sa pagpanganak dili dayag nga magtaktak, ang Kristohanong mga magtiayon kinahanglang mohukom sa ilang kaugalingon kon sila matanlagong mogamit niana o dili. (Galacia 6:5)—ED.