Ang Ipasabot sa mga Balita

“Pagpirata sa mga Fossil”

Ubos niana nga ulohan, ang Pranses nga mantalaang Le Monde mitaho sa kaso sa usa ka paleontolohista sa India kinsa “sulod sa 20 ka tuig . . . nanglimbong sa iyang mga kauban mahitungod sa sinugdan sa mga fossil nga iyang gipresentar kanila aron ilang masubli.” Gituohan nga apil sa “pagpirata” mao ang pagpadala kanila ug mga fossil nga nakuha sa Tinipong Bansa, Aprika, Czechoslovakia, ug sa mga Isla sa Britanya, nga nag-ingon nga ilang nakit-an kini diha sa Kabukiran sa Himalaya. Gipatik niini nga siyentipiko ang iyang nadiskobrehan diha sa kapin sa 300 ka artikulo. Ang panglimbong giyagyag sa usa ka Australianong siyentipiko diha sa Britanikong basahon sa siyensiya nga Nature. Siya nahihulong ‘kon nganong ang sama niini kadakoa nga kaduhaduhaang mga pagtuki nagpabilin man nga wala kuwestiyona sa taas nga panahon.’

Ang usa ka posibleng katarongan, sumala sa Le Monde, mao ang balaod sa pagpakahilom nga gisunod sa daghang mga membro sa siyentipikanhon nga komunidad. Ang artikulo nag-ingon nga kining “pagpirata” sa fossil “nakapawalay-bili halos sa tanang mga kamatuoran nga natigom [sulod sa mga 20 ka tuig] maylabot sa geolohiya sa Himalaya.”

Matin-aw, kining bag-ong kaso sa panglimbong diha sa siyensiya wala makahatag ug pagduhaduha sa tibuok nga siyentipikanhong kalibotan. Kini, hinunoa, naghatag ­dugang pamatuod nga ang mga katarongan sa paleontolohiya kon iparang diha sa dili-mapakyas nga pagkatukma sa rekord sa Bibliya sama ra sa gitawag ni apostol Pablo nga “mga kontradiksiyon sa ginaingon nga ‘kahibalo’ apan dili tinuod nga kahibalo.”—1 Timoteo 6:20, The New Jerusalem Bible.

“Puno sa Dugo”

Sa Colombia, sa Habagatang Amerika, ang mabangis nga mga hari sa droga nakigkontrata sa batan-ong mga lalaki sa pagpatay sa mga kakompetensiya o sa pagsabod ug kalisang diha sa mga politiko ug sa populasyon sa katibuk-an. Ang usa niining sicario, o binayran nga tigpatay, miingon sa mga reporter sa Tiempo, usa ka Kinatsila nga magasin sa balita, nga ang ‘pagpatay nga walay kaluoy malisod.’ Giunsa niya sa paghupay sa iyang tanlag? Siya miasoy: “Ako nahibalo nga ang usa sa mga kasugoan sa Diyos mao nga ikaw dili magpatay, apan sa akong kaso kini maoy usa ka gumonhap bahin sa usa ka tawo nga kinahanglang mopatay aron mabuhi. Ako nagapamatay nga walay pagtulisok sa konsensiya tungod kay nagkinahanglan akog kuwarta. Wala ba nimo makita nga nagtrabaho ako tungod kay kinahanglan man nga mabuhi ako sa usa ka paagi? . . . Sa dili pa molakaw aron mopatay ug tawo, moampo ako sa Diyos ug sa Birhen nga ako ilang panalipdan.”

Bisan tuod kining matanga sa pangatarongan sa walay duhaduha isalikway gilayon sa Katolikong mga teologo, gipakamatarong sa mga lider sa simbahan ang armadong pag-awayay “ingong kataposang paagi sa pagtapos sa usa ka dayag ug napadayon nga panglupig.” Kon ginapalabay sa mga teologo ang kabangisan tungod sa politikanhong inhustisya, ikatingala ba nga ang ubang mga Katoliko, sama niining sicario, magpakamatarong sa pagpatay tungod sa ekonomikanhon nga inhustisya? Pagkadakong kapeligrohan ang pagdaot sa Pulong sa Diyos!

Sa gabii sa dihang ang labing dakong inhustisya sa tibuok panahon hapit nang himoon—nga nag-apil sa pagdakop, paghusay, ug pagpatay kang Jesu-Kristo—si Jesus mismo midumili sa pagpalandong sa kabangisan sa bisan unsang matang. Iyang gisultihan si Pedro: “Ang tanang magagamit sa espada mamatay sa espada.” (Mateo 26:52, Revised Standard Version, Katolikong edisyon) Sa makataronganon, unsaon sa mga tawo nga modangop sa kabangisan sa paglaom nga mamati kanila ang Diyos nga Labing Makagagahom ilalom sa bisan unsang mga sirkumstansiya, sanglit ang tagna ni Isaias yanong nag-ingon: “Bisag kamo magahimo ug daghang mga pag-ampo, ako dili mamati; ang inyong mga kamot puno sa dugo”?—Isaias 1:15, RS, Katolikong edisyon.

“Mga Butang nga Iya ni Cesar Ihatag Kang Cesar”

Ang paglikay sa pagbayad ug buhis maoy nagadakong suliran diha sa kadaghanang mga nasod. Sa Espanya, pananglitan, ang peryodikong El Diario Vasco mitaho nga ang pumapalit ug tigbaligya adunay kustombre sa tinuyo nga pagtago sa aktuwal nga kantidad sa gipalit nga propidad. Samtang ang pumapalit ug ang tigbaligya tingalig magkauyon sa usa ka prisyo alang sa aktuwal nga pagpalit, ang ubos nga kantidad ang irekord diha sa kasabotan. Sa dihang matapos ang maong transaksiyon, bayran ang buhis sumala sa narekord nga kantidad sa propidad. Gitaho sa El Diario Vasco ang pangangkon ni José María Segura Zurbano nga samtang ang mga abogado dili sa aktuwal moapil sa panikas, sila nahibalo nga ang bili sa propidad nga ilang girekord dili mao ang tinuod nga kantidad. Gihisgotan ang usa ka eksipsiyon niining batasan sa panikas, si Zurbano miingon: “Niining nasora ang tanan ug ang iyang mga silingan nagapamakak, ang eksipsiyon lamang mao ang mga Saksi ni Jehova. Kon sila mamalit o mamaligya, ang kantidad sa [propidad] nga ilang ideklarar mao gayod ang tinuod.”

Ang mga Saksi ni Jehova ilado sa ilang pagkamatinud-anon ug pagkamatinuoron. Sila nahibalo nga si Jehova nga Diyos nagalaom sa iyang mga alagad nga magpasundayag sa maong mga hiyas diha sa tanan nilang mga kasabotan. Ang Diyos nagadumot sa “bakakon nga dila” ug “bakakon nga saksi nga nagapamulong ug mga bakak.” Mahitungod sa laing butang bahin sa pagbayad ug buhis, si Jesu-Kristo mihatag ug sukdanan alang sa iyang mga tinuod nga mga sumusunod sa dihang siya miingon: “Bayri ninyo si Cesar sa mga butang nga iya ni Cesar, ug ang Diyos sa mga butang nga iya sa Diyos.”—Proverbio 6:6-19; Marcos 12:17.