‘Pagpangisdag mga Tawo’ sa Belize
ANG Belize maoy usa ka gamay sub-tropikal nga nasod nga nasabak sa tunga sa Mexico ug sa Guatemala. Sa mga lawod niini, ang berdehong-pagkaasul nga Caribeano gituldokan ug mga pulo ug mga takot nga naporma nga labing taas nga katakotan sa Kasadpang Hemisperyo. Ang kadaghanan sa yuta sa daplin sa baybay uga ug patag. Apan paingon sa sulod sa habagatan, ang Maya Mountains moabot sa gitas-ong 1,120 ka metros. Kining dasok sa mga kahoy niadto nga bukiron nga dapit adunay mga dal-og, mga suba, mga lugot, ug matahom nga mga busay.
Ang nasod sa sinugdan gipuy-an sa mga Maya, sumala sa gipamatud-an sa daghang kagun-oban ug mga gamit sa karaan. Sa katuigan sa 1600, kini gisugdan sa pagpuyo sa mga pirata niadto sa dagat kinsa nahimong tigpamutol ug logwood ug kamagong sa ulahi. Unya, kini nahimong koloniya sa British Honduras. Ang independensiya ug pagkahimong nasod miabot sa 1981.
Karon, ang Belize adunay populasyon nga duolan sa 175,000. Kini matuod gayod nga nagakasagol nga panon sa katawhan, nga gilangkoban sa Apro-Belizeano (Creoles), Mestizo, Maya, Garinagus (Caribs), taga Asia, Uropa, ug uban pa. Tungod kay nakasinati uban sa Britaniko ang Belize, ang Ingles mao ang opisyal nga pinulongan, ang Kinatsila mao ang ikaduhang kusganong pinulongan. Ang Creole kaylap usab nga sinultihan, sama sa Maya, Garifuna, ug ubang mga pinulongan.
Ang 280 ka kilometro nga takot, uban sa iyang mahayag ug kolor nga mga korales, samag-kastilyo nga mga panting, ug mga langob, nagpapuyo ug nagkalainlaing mga mananap sa dagat nga makalipay sa mata ug sa gana sa pagkaon. Kining lawod nga panagat mao ang usa sa labing dakong kinaiyanhong kahinguhaan. Sa susama, uban sa daghang nagkalainlaing mga tawo ug kultura, ang Belize nakita nga usa ka mabungahong dapit sa ‘pangisda’ sa mga mosanong sa imbitasyon ni Jesus: “Sumunod kamo kanako, ug himoon ko kamong mga mangingisdag tawo.”—Mateo 4:19.
‘Pagpangisda’ Gisugdan
Sa 1923 nga si James Gordon, usa ka Saksi nga gibawtismohan sa 1918 sa Jamica, mibalhin ngadto sa Belize. Siya misugod sa pagtaktak sa iyang pukot, pagaingnon pa, diha sa iyang mga silingan ug sa palibot sa baryo sa Bomba sa Distrito sa Belize. Ang iyang ‘gamit sa pangisda’ nag-apil sa dako kaayong kamagong nga kaban nga gisudlan ug mga libro, nga gibitbit sa usa ka kamot, ug ang iyang ponograpo gibitbit sa pikas kamot.
Sa mga 1931 si Freida Johnson, usa ka bug-os panahong ministro nga gikan sa Texas, miabot sa Belize gikan sa pagpanaw sa pagpakaylap sa maayong balita sa mga nasod sa Sentral Amerika. Sulod sa iyang unom ka bulan nga pag-estar, nakakontak siya ug usa ka panadero nga ginganlag Thaddius Hodgeson, kinsa sa baylo mipailaila sa kamatuoran ngadto sa kaubang panadero, si Arthur Randall. Gipadayon ni Brader Hodgeson ang buluhaton hangtod miabot sa 1945 ang unang mga misyonero nga binansay sa Gilead, si Charles Heyen ug Elmer Ihring.
Sa pagkasunod tuig, sa panahon sa pagduaw ni N. H. Knorr ug F. W. Franz, ang presidente niadto ug bise-presidente sa Watch Tower Society, usa ka sangang buhatan ang natukod didto. Sukad niadto ang “pukot” nataktak sa tanang bahin sa Belize, ug ang buluhaton anam-anam nga mitubo. Ang gidaghanon niadtong nakigbahin sa ‘pagpangisdag mga tawo’ miabot sa labing taas nga numero nga 844 sa 1989.
‘Nagtaktak sa Pukot’ sa Halayo
Karon, ang Belize ug ang ubang mga lungsod regular nga ginakobre niadtong nagasangyaw sa maayong balita sa Gingharian, apan ang kadaghanan maoy sa halayong mga balangay ug ang (cays) mga isla panagsa ra. Mao kana ang kahimtang sa San Pedro, sa Ambergris Cay, hangtod sa pipila ka tuig sa miagi. Sulod sa daghang mga tuig, nakontak ang mga molupyo sa San Pedro sa kamatuoran sa panahon lamang nga ang mga Saksi nga gikan sa dakong isla mihimog lakbit nga mga pagduaw. Ang mga Saksi nagbilin ug mga basahon sa Bibliya sa mga tawong interesado, apan dili masundan ang ilang interes tungod kay kinahanglang mobalik man sila sa dako nga isla. Sa ulahi, usa ka pamilya sa upat miabot sa Belize aron sa pag-alagad sa dapit nga dako ug panginahanglan. Sila miboluntaryo sa pagbalhin ngadto sa isla bisag ang ilang puy-anan maoy kalingawanan nga sakyanan hangtod nga makatukod sila ug balay. Hinunoa maayo ang “pagpangisda.” Sila nakasugod ug daghang mga pagtuon sa Bibliya, ug karon adunay kapin sa 20 ka “mangingisdag mga tawo” diha sa isla. Sa Septiyembre 1986, uban sa tabang sa mga Saksi gikan sa tibuok nasod, sila nakatukod sa ilang kaugalingong Kingdom Hall sa usa lamang ka hinapos sa semana.
Ang teritoryo sa sanga nag-apil sa daghang hilit nga mga baryo sa Maya sa habagatan sa Distrito sa Toledo, diin ang Ketchi ug Maya Mopan nga mga pinulongan maoy gigamit. Kausa sa usa ka tuig, sa panahon sa ting-init sa dihang ang mga suba ug mga bukid matabok, moduaw ang grupo sa mga Saksi niining mga baryoha. Pas-anon ang tanang butang nga ilang gikinahanglan diha sa ilang likod, mobaktas sila paingon sa baryo, magpamatuod sa mga molupyo, ug mohimog mga pagbalik duaw sa mga tawong nagapakitag interes.
Diha sa usa nianang tinuig nga ‘biyahe sa kalugotan’ niadtong 1968, miduaw ang mga igsoon sa baryo sa Crique Sarco. Ang usa ka batan-ong babaye nakakitag usa ka kopya sa librong Ang Kamatuoran nga Motultol sa Kinabuhing Dayon, nga wala mahibalo ang igsoon nga nahulog. Siya miasoy kon unsay nahitabo.
“Kadtong libroha bililhon kaayo alang kanako, apan mga hulagway lang ang akong tan-awon, ug wala gayod mobasa niana. Ang tinuig nga mga pagduaw sa mga igsoon sa akong amahan nakapasilsil sa ngalan ni Jehova sa akong kaisipan, ug midangat ako sa pagkahibalo nga Siya adunay usa ka organisasyon. Sa dihang misugod ako sa hayskol sa lungsod sa Punta Gorda, ang pangutana mibangon diha sa klase usa ka adlaw: Unsay ngalan sa Diyos? Sa dihang mitubag ako, ‘Si Jehova,’ gihatagan ako ug ‘awtomatikong jug’ (lima ka demerits ug asaynment buluhaton ingong pagdisiplina, sama sa paglimpiyo sa kasilyas). Dayon gitawag ako sa pari ug gisultihan ako nga kinahanglang dili nako gamiton kanang ngalana pag-usab kay kon dili palagpoton ako sa eskwelahan. Gikan niadto buluntaryong miundang ako sa eskwelahan ug wala na gayod mobalik.
“Ang sunod nakong kontak sa kamatuoran nahitabo sa daghang mga tuig sa ulahi sa dihang minyo na ako ug nagpuyo sa Lungsod sa Corozal sa amihanan. Nakakita ako ug papel nga gihuyop sa hangin, gipunit kini, ug nakakita nga kadto mao ang hapin sa pulyetong Jehovah’s Witnesses and the Question of Blood. Mipahayag ako sa akong komento sa usa ka higala nga usa kini sa pagtulon-an sa mga Saksi nga dili ako mouyon. Sa pagkasunod adlaw, usa ka brader miduaw ug miingon nga siya nakadungog nga interesado ako sa pagtuon sa Bibliya uban sa mga Saksi. Bisan tuod gisultihan ko siya nga dili ako interesado, siya miingon nga dili kini magkinahanglan ug daghang panahon, busa midawat ako. Sa kataposan, kadtong librong Kamatuoran nga gipakamahal ko sa walo ka tuig nagamit!
“Wala magdugay, gisulsulan sa akong mga bayaw nga babaye ang akong bana sa pagpahunong sa akong pagtuon. Unya mibalhin kami sa usa ka hilit nga baryo, ug wala na ako makahimamat ug mga Saksi. Sa kataposan, giduaw ako sa usa ka sister diha sa balay-ug-balay nga ministeryo, ug mibalik ako sa pagtuon. Naningkamot pag-ayo ang akong bana aron mabalda ang pagtuon. Siya naghubog, magsabasaba, giabog pa ako sa balay, ug nanghulga nga mamabaye. Apan malig-on akong mibarog ug misalig kang Jehova diha sa pag-ampo. Sa miaging duha ka tuig gitubag ni Jehova ang akong mga pag-ampo nga wala nako damha.
“Usa ka adlaw ang akong bana miabot nga nasamad ang iyang nawong, ug midiretso siya sa pagkatulog. Ulahi niadtong adlawa siya miingon, ‘Gusto ko usab nga magtuon sa Bibliya!’ Kadto nga kausaban nakahatag kanako ug dakong kalipay ug kasuko usab sa iyang pamilya. ‘Ang pagbag-o ug relihiyon kaamgid ra nga nagabag-o ug mga ginikanan,’ ilang gisultihan siya, ‘busa ikaw dili na among anak!’ Karon nga ako ug ang akong bana nagkahiusa, kusog ang among pag-uswag. Niadtong Disyembre 5, 1987, kami gibawtismohan diha sa among unang Special Assembly Day.”
Busa kana nga “isda” ang nakuha bisan sa halayong mga lugar sa Belize. Ang brosyur nga Tagamtama ang Kinabuhi sa Yuta sa Walay Kataposan! nahubad sa Ketchi nga pinulongan uban sa paglaom nga daghan pa sa mga baryohanon ang matabangan sa pagdawat sa maayong balita. Kadtong natipigang luwas gikan sa hugaw nga mga tubig sa sistema ni Satanas nagatagamtam sa tin-awng mga tubig sa kamatuoran sa espirituwal nga paraiso ni Jehova.
Pananglitan, usa ka batan-ong lalaki sa Siyudad sa Belize nakahibalo sa mahinlong mga sukdanan ni Jehova sa moral gikan sa Bibliya. Miundang siya sa iyang pagkagiyanon sa marijuana ug sa ubang mga droga ug gibawtismohan. Wala magdugay, siya nahimong bug-os panahong “mangingisdag mga tawo.” Siya nakapribilehiyo usab sa pag-alagad ingong ministeryal nga alagad sa iyang kongregasyon. Ginatos pang uban ang natabangan sa paghinlo sa ilang mga kinabuhi pinaagi sa paghimong legal sa ilang mga kaminyoon ug sa pagparehistro kanila sa mga awtoridad. Daghan pang uban ang natudloan sa pagbasa ug pagsulat aron makatuon sa Pulong sa Diyos sa ilang kaugalingon. Busa ang edukasyonal nga buluhaton sa mga Saksi ni Jehova sa Belize maoy dili lamang sa pagtagbaw sa espirituwal nga mga panginahanglan sa mga tawo kondili sa pagdala usab ug maayong mga resulta sa komunidad.
Pagbutad sa Pukot
Ang mga disipulo misunod sa sugo ni Jesus ug gitaktak ang ilang pukot sa pikas kilid sa ilang sakayan. Ingong resulta, “sila wala makadaog sa pagbutad niini tungod sa kadaghan sa isda.” (Juan 21:6) Sa susama, ang pagsanong sa maayong balita dako kaayo nga tungod niana nakita sa mga Saksi sa Belize nga usa ka hagit ang pag-atiman sa panon sa katawhan nga nagasulod sa orgnisasyon.
Adunay dakong panginahanglan alang sa hamtong nga mga igsoon aron sa pagpanguna sa mga kongregasyon. Sa aberids, aduna lamay usa o duha ka ansiano sa kada kongregasyon. Unya, anaa pa ang hagit sa pag-abot sa tanang bahin sa nasod sa maayong balita sa regular nga paagi. Daghang mga lugar maabot sa mga dalan, apan tungod sa kakulang sa transportasyon sa publiko, malisod alang sa mga Saksi ang pag-ugmad sa interes nga makita o sa pagdala sa mga tawong interesado sa mga tigom sa regular. Ang pagbaktas o paggamit ug baroto mao gihapon ang praktikal nga paagi sa pag-abot sa pipila ka hilit nga mga lugar.
Ang mga Saksi sa Belize nakaeksperyensiya usab ug kalisod sa pagpangitag mga pasilidad alang sa ilang senemanang mga tigom sa kongregasyon ug sa tinuig nga mga kombensiyon ug mga asembliya. Ang total nga tumatambong sa 1987 nga “Salig Kang Jehova” Distritong Kombensiyon maoy kapin sa 2,200, hapit tulo ka pilo sa gidaghanon sa mga magmamantala sa nasod. Alang niadtong mga kombensiyona, ang mga igsoon nagtukod ug temporaryong tinukod sa propidad duol sa Ladyville. Karon, sila nagtan-aw sa posibilidad sa pagtukod ug permanenteng Assembly Hall sa maong lugar.
Samtang dako kaayo ang hagit, ang mga Saksi madasigong nagasanong niana. Ilang gipakita kini pinaagi sa pagpauswag sa ilang bahin sa pag-alagad sa kanataran. Sa 1979 ang mga magmamantala nakagugol, sa aberids, ug 8.3 ka oras kada bulan sa pagsangyaw nga buluhaton. Karon nagagugol sila sa aberids ug 11.3 ka oras kada bulan. Adunay dugang maayong pag-uswag usab sa gidaghanon sa mga payunir. Sa 1979 dihay aberids nga 10 ka auxiliary payunir ug 12 ka regular payunir sa usa ka bulan. Karon adunay 51 ka auxiliary payunir ug 42 ka regular payunir kada bulan, nga gikan sa 14 ngadto sa 74 anyos ang edad.
Ang mga palaabuton sa pagpalapad dako, kon hukman sa daghang tumatambong sa Memoryal sa Panihapon sa Ginoo nga gihimo sa Marso 22, 1989. Ang mga igsoon kuging nagtrabaho sa pagdapit sa mga interesado. Ang resulta? Ang total nga tumatambong nga 3,834—maoy kapin sa upat ka pilo sa labing taas nga gidaghanon sa mga magmamantala! Makaiikag kaayo ang pagtan-aw sa daghang etnikong mga grupo—Creole, Mestizo, Maya, Uropanhon, Intsik, taga Lebanon, ug uban—nga nagkaipon niining paagiha.
Dugang pa, ang 844 ka magmamantala sa nasod nagadumalag kapin sa usa ka libong mga pagtuon sa Bibliya. Pinaagi sa pagpadayon sa paglantaw sa Ulo sa kongregasyon, si Jesu-Kristo, alang sa pagtultol, daghan pa sa Belize sa walay duhaduha mosanong sa pagdapit aron mahimong “mga mangingisdag mga tawo.”
[Mapa sa panid 22]
(Alang sa aktuwal nga pagkahan-ay, tan-awa ang publikasyon)
GULF OF MEXICO
MEXICO
BELIZE
Belize City
Punta Gorda
GUATEMALA
GULF OF HONDURAS
[Mga hulagway sa panid 24, 25]
Pagtukod sa Kingdom Hall sa San Pedro, Ambergris Cay