Ang Ipasabot sa mga Balita
Nganong Magsangyaw?
Ang kakulang sa pagsangyaw sa bahin sa mga tigsimba gikutlo sa ubang mga awtoridad nga nalangkit sa pag-us-os sa membro sa iglesya diha sa dagkong mga relihiyon. Ang kabalaka bahin niining problemaha sa 1988 maoy nagpukaw sa United Church of Christ sa pagsagop ug upat-ka-tuig nga pangunang butang unahon ang isyu bahin sa “ebanghelismo ug pagtubo sa pagkamembro.”
Ang St. Petersburg Times mitaho nga ang ubang dagkong mga denominasyon sa Tinipong Bansa, apil ang Presbyterian Church ug ang Episcopal Church, milihok ug sama. Apan, ang dili pa dugay nga surbi diha sa kapin sa 200 ka kongregasyon sa United Church of Christ nagbutyag nga kadaghanan sa 1.6 ka milyong mga membro niini nagpakitag diyutayng interes sa pakigsulti sa uban bahin sa ilang pagtuo. Ang usa ka membro nangutana: “Nganong kinahanglang makigsulti pa kami sa uban kon nagabuhat kita ug maayo?” Lain ang miingon: “Kon magkinabuhi ka subay sa imong pagtuo, dili na kinahanglang makigsulti ka pa bahin niini.”
Bisan pa niana, diha sa iyang librong American Mainline Religion, ang kaubang awtor nga si Wade Clark Roof miadmiter nga “ang paagi sa pagpakigsulti sa mga tawo bahin sa ilang relihiyoso ug espirituwal nga kinabuhi nalangkit sa kalungtaran sa pagtuo mismo.”
Kon ang “pagbuhat ug maayo” ug ang pagbaton ug “pagtuo” igo na aron mapahimut-an ang Diyos, nganong misulat si apostol Pablo: “Alaot ako kon dili ko iwali ang maayong balita”? Siya nagpatin-aw sa kaubang mga magtutuo sa Roma: “Kon imong iwali sa katilingban kana nga ‘pulong diha sa imong kaugalingong baba,’ nga si Jesus mao ang Ginoo, ug magatuo sulod sa imong kasingkasing nga siya gibanhaw sa Diyos gikan sa mga patay, maluwas ka. Kay ang tawo magatuo diha sa iyang kasingkasing alang sa pagkamatarong, apan magasugid siya pinaagi sa iyang baba aron maluwas siya.”—1 Corinto 9:16; Roma 10:9, 10.
Nagapahimulos sa Sekso
Kapin sa tunga sa duolan sa 1,100 ka estorya sa komiks nga mitungha diha sa nagkalainlaing mga publikasyong Hapones, apil ang sa mga bata, naglarawan ug seksuwal nga mga buhat, miingon si Propesor Mamoru Fukutomi. Nangulo siya sa usa ka surbi sa Tokyo sa kapin sa 390 ka magasin ug ubang mga publikasyon nga gipalit sa usa ka bulan.
‘Ang kadaghanan sa mga paglarawan sa seksuwal nga buhat,’ miingon si Propesor Fukutomi, ‘nagsunod ug sumbanan sa mga lalaki nga nanglugos sa nagpanukong mga babaye [sa seksuwal nga pakigsiping] ug ang babaye sa kataposan aktibong nagasanong.’ Halos 80 porsiento sa 6,861 ka hulagway diha sa popular nga mga magasing Hapones nga gisusi “naglarawan ug mga babaye sa paagi nga makapukaw sa sekso,” nagtaho ang The Daily Yomiuri. Samtang ang kadaghanan sa mga hulagway sa mga babaye nagsul-ob ug “sapot nga pang-ilalom, sapot sa pangaligo o kaha naghubo” ug 40 porsiento lamang ang nagbesti, 75 porsiento sa mga larawan sa lalaki nga gisurbi adunay sapot.
Sa unsang paagi ang pagpahimulos makaapekto sa mga batan-on? Ang basahon sa Bibliya sa Proverbio tin-awng nagbatbat bahin sa usa ka batan-ong lalaki nga “walay maayong tinguha” nga nadani sa balay sa usa ka pampam. (Proverbio 7:7, Reference Bible, potnot) Ug ang pampam? “Karon siya anaa sa kadalanan, unya diha sa mga plasa, ug diha sa tanang mga eskina siya maglingkod ug maghulat. Ug iyang sakmiton siya.” (Proverbio 7:8-13) Sa modernong mga panahon bisan ang pinatik nga panid ‘naghulat sa pagsakmit’ sa batan-on. Apan, ang Bibliya nagtambag: “Hinaot ang imong kasingkasing dili mosunod sa iyang mga dalan. Ayaw paglaaglaag sa iyang mga alagianan.”—Proverbio 7:25.
Kinsa ang “Mas Maayo” nga mga Kristohanon?
“Bisan unsa pay desisyon nga himoon sa usa ka Kristohanon, kon magsundalo ba o tigsupak tungod sa konsensiya, sayop nga mangangkon siya nga mas nagasunod sa Kristiyanidad kay sa uban, o bisan sa pagkuwestiyon, sa pagpaluyog usa ka baroganan nga lahi sa iyaha, sa pagkahimong Kristohanon sa uban.”
Kining pahayaga giluwat sa Evangelical Lutheran Church Council sa Alemanya sa Hulyo 1989. Ngano? Ang mga opisyal miingon nga kadto maoy sa pagsupak sa baroganan nga gihuptan sa uban diha sa iglesya nga ang pagtutol tungod sa konsensiya maoy usa ka dugang “positibong timaan” sa pagkahimong Kristohanon kay sa pagserbisyo sa militar. Samtang miuyon nga ang mga Kristohanon makawala sa gubat pinaagi sa “personal nga pagpahilayo gikan sa kabangisan,” ang Konsilyo sa Simbahan nangatarongan nga mahimong buhaton usab kini pinaagi sa pakig-away sa kabangisan uban sa gahom sa militar aron maseguro ang kalinaw.
Diha sa iyang librong History of Christianity, si Edward Gibbon misulat nga ang unang-siglong mga Kristohanon “midumili sa pakigbahing aktibo sa sibil nga administrasyon o sa pagkasundalo sa imperyo,” ug nga “imposible nga ang mga Kristohanon, sa walay pagsalikway sa mas balaanong katungdanan, makapangabaga sa kinaiyahan sa pagkasundalo, sa mga mahistrado, o sa prinsipe.”
Busa, ang pangutana dili mao kon kinsa ang “mas maayo” nga Kristohanon kondili tinuod ba gayod nga usa ka Kristohanon ang usa ka tawo nga nagasubay ug usa ka dalan nga lahi sa unang Kristiyanidad. “Bisan tuod kami nagalakaw diha sa unod, kami wala magpakiggubat sumala sa kon unsa kami sa unod. Kay ang mga hinagiban sa among pakiggubat dili man unodnon.”—2 Corinto 10:3, 4.