“Mag-ampo Kamo Alang sa Usag Usa”

SI Jehova maoy “Tigpatalinghog sa pag-ampo.” (Salmo 65:2) Siya kanunay nga nagapatalinghog sa mga pag-ampo sa mga tawong bug-os-kasingkasing nga debotado kaniya, ug kita makatino nga siya nagapatalinghog kon sila mag-ampo alang sa usag usa.

Apan nganong mag-ampo alang sa usag usa? Mahitungod sa unsa itanyag ang maong mga pag-ampo? Ug unsang diyosnong mga hiyas ang mapalambo kon kita mag-ampo alang sa usag usa?

Nganong Mag-ampo Alang sa Usag Usa?

Ang Kasulatan nagdasig sa katawhan ni Jehova sa pag-ampo alang sa usag usa. Ang mga pag-ampo alang sa uban maoy bahin sa mga pangamuyo ni apostol Pablo sa Diyos. (Colosas 1:3; 2 Tesalonica 1:11) Dugang pa, ang tinun-ang si Santiago misulat: “Mag-ampo kamo alang sa usag usa.”—Santiago 5:16.

Ang mga pag-ampo alang sa ubang mga alagad sa Diyos epektibo. Kini gipakita sa Santiago 5:13-18, diin ang usa ka nagmasakiton nga Kristohanon sa espirituwal giagda nga tugotan ang mga ansiano sa kongregasyon nga “mag-ampo alang kaniya, maghaplas kaniya ug lana pinaagi sa ngalan ni Jehova.” Ang pagpamati sa ilang pag-ampo hayan makapalig-on sa tawong naguol ug makapakombinsir kaniya nga ang Diyos motubag usab sa iyang kaugalingong mga pag-ampo. (Salmo 23:5; 34:18) Gawas pa sa pag-ampo uban sa indibiduwal, ang mga ansiano maningkamot nga mahibalik ang iyang espirituwal nga kahimsog pinaagi sa pagpahayag sa Kasulatanhong mga hunahuna nga sama sa makapahupay nga lana.

Si Santiago midugang: “Ang pag-ampo nga inubanag pagtuo makaayo sa masakiton, ug si Jehova magabangon kaniya.” Oo, ang tawong nagmasakiton sa espirituwal malagmit matabangan sa “pag-ampo nga inubanag pagtuo” sa mga ansiano. Dugang pa, ang Diyos “magabangon kaniya” ngadto sa espirituwal nga kahimsog kon buot niyang matabangan pinaagi sa Kasulatan. Apan komosta kon ang sakit sa espirituwal maoy tungod sa seryosong sala? Buweno, kon ang indibiduwal mahinulsolon, si Jehova mopasaylo kaniya.

“Busa,” matud ni Santiago, “isugid ninyo ang inyong mga sala ngadto sa usag usa ug mag-ampo alang sa usag usa, aron nga kamo mamaayo. Ang pangamuyo sa tawong matarong, dakog kahimoan inig-ampo niya. Si Elias . . . nag-ampo nga dili moulan; ug wala tuod moulan sa yuta sulod sa tulo ka tuig ug unom ka bulan. Unya siya nag-ampo pag-usab, ug ang langit nagpaulan ug ang yuta mipaani sa iyang abot.” (1 Hari 17:1-7; 18:1, 42-45) Adunay gahom ang pag-ampo sa tawong matarong nga nahiuyon sa kabubut-on sa Diyos.—1 Juan 5:14, 15.

Unsay Iampo?

Ang bisan unsang butang mahimong ulohan sa atong mga pag-ampo alang sa isigkamagtutuo. Pananglitan, giawhag ni Pablo ang uban sa pag-ampo nga siya unta makabaton sa katakos sa pagsulti sa maayong balita. (Efeso 6:17-20) Komosta kon may nahibaloan kita nga adunay usa nga ginasulayan? Kita makaampo nga ‘siya dili unta makasala’ ug nga ang Diyos dili magtugot kaniyang madaog sa pagsulay kondili luwason siya gikan sa daotang usa, si Satanas nga Yawa. (2 Corinto 13:7; Mateo 6:13) Ug kon adunay usa ka tawo nga nagmasakiton sa pisikal, kita makahangyo kang Jehova nga hatagan siyag gikinahanglang kalig-on aron makaantos sa iyang balatian.—Salmo 41:1-3.

Husto gayod ang pag-ampo alang sa ginalutos nga mga isigkamagsisimba ni Jehova. Si Pablo ug ang iyang mga kauban nag-antos sa grabeng paglutos ug iyang gisultihan ang mga Kristohanon sa Corinto: “Kamo usab makatabang kanamo pinaagi sa inyong pagpangaliyopo alang kanamo, aron daghan ang magahatag ug pagpasalamat alang kanamo tungod sa malulutong panalangin nga igahatag kanamo ingon nga tubag sa daghang mga pag-ampo.” (2 Corinto 1:8-11; 11:23-27) Bisan kon kita nabilanggo, kita makaampo alang sa ubang ginalutos nga mga igsoon, nga kanunayng hinumdoman nga si Jehova nagapatalinghog sa “mga pag-ampo sa mga tawong matarong.”—Proverbio 15:29.

Ilabinang angay natong iampo ang mga igsoon nga nangabaga sa dagkong mga kaakohan sulod sa organisasyon ni Jehova. Kini naglakip niadtong kinsa nanguna sa organisasyon ug nag-andam sa espirituwal nga pagkaon nga giapod-apod pinaagi “sa matinumanon ug maalamong ulipon.” (Mateo 24:45-47) Pananglitan, ang mga membro sa Nagamandong Lawas sa mga Saksi ni Jehova takos sa atong mga pag-ampo, ug kita makaampo nga ang Diyos magahatag kanilag “espiritu sa kaalam.”—Efeso 1:16, 17.

Mapalambo ang Kristohanong mga Hiyas

Pinaagi sa pag-ampo alang sa mga isigkamagtutuo, atong gipakita nga kita mabalak-on, dili-hakog, ug mahigugmaon. Ang dili-hakog, mahigugmaong kabalaka alang sa atong espirituwal nga mga igsoong lalaki ug babaye nahauyon sa punto ni Pablo nga ang gugma “wala mangita sa kaugalingong kaayohan.” (1 Corinto 13:4, 5) Ang pag-ampo alang sa uban maoy usa ka paagi sa “pagtagad, dili lamang sa kaugalingong kaayohan, kondili sa kaayohan usab sa uban.” (Filipos 2:4) Kon maoy atong hatagag pagtagad ang espirituwal nga kaayohan sa uban diha sa atong pag-ampo, atong makita usab ang atong kaugalingon nga labi pang masuod kanila diha sa inigsoong gugma nga nagpaila sa mga tinun-an ni Jesus.—Juan 13:34, 35.

Ang hiyas nga pagbati alang sa isigkatawo maugmad diha sa mga tawo nga atong giampo. (1 Pedro 3:8) Kita adunay simpatiya kanila, makig-ambit sa ilang mga intereses ug mga kagul-anan. Diha sa tawhanong lawas, kon ang usa ka kamot masamdan, atimanon kini sa lain ug maningkamot sa pag-alibyo sa kasakit nga gipahinabo sa samad. (Itandi ang 1 Corinto 12:12, 26.) Sa susama, ang pag-ampo sa nag-antos nga mga igsoong lalaki ug babaye makaugmad sa atong simpatiya alang kanila ug motabang kanato sa paghinumdom kanila. Atong kapildihan kon atong kalimtan ang matinumanong kaubang mga Kristohanon diha sa atong mga pag-ampo, tungod kay ang Diyos ug si Kristo wala magsalikway kanila.—1 Pedro 5:6, 7.

Ang nagkalainlaing diyosnong mga hiyas mapalambo kon kita magaampo alang sa uban. Kita mahimong mas masinabtanon ug mapailobon kanila. Ang posibleng kayugot maluka, nga nagahatag ug luna alang sa makapalig-ong mga hunahuna nga mopahimo kanatong mahigugmaon ug mangayaon. Ang pag-ampo alang sa uban usab mopauswag sa kalinaw ug panaghiusa taliwala sa katawhan ni Jehova.—2 Corinto 9:13, 14.

Padayon sa Pag-ampo Alang sa Usag Usa

Sama kang Pablo, kita makahangyo sa uban nga mag-ampo alang kanato. Gawas sa pag-ampo uban kanato, ang atong mga higala makahimo sa pribado sa pag-ampo sa Diyos alang kanato, litokon ang atong ngalan, hisgotan ang atong suliran, ug mangamuyo nga kita iyang tabangan. Ug ang tabang moabot, kay “si Jehova nahibalo kon unsaon sa pagluwas sa mga tawo nga may diyosnong debosyon gikan sa pagsulay.”—2 Pedro 2:9.

Ang mga Saksi ni Jehova kinsa nagahisgot kanato diha sa ilang mga pag-ampo may mga pagsulay usab—tingali mas makapaguol pa kay sa atoa. Apan, ilang gipadangat ang atong mga suliran atubangan sa Haring Walay Kataposan, tingali nagpatulo pag luha alang kanato. (Itandi ang 2 Corinto 2:4; 2 Timoteo 1:3, 4.) Pagkadako sa atong pasalamat alang niini! Ingong pag-apresyar ug alang sa ubang mga katarongan nga ato nang nahisgotan, nan, mag-ampo kita alang sa usag usa.