Malipayong Pag-antos sa Tungang Sidlakan
Kining makapaukyab nga taho naggikan sa mga Saksi ni Jehova sa Lebanon
ANG among 1990 tuig sa pag-alagad nagsugod uban sa bangis nga mga pagluthangay sa Beirut. Dayon may kalinaw nga milungtad gikan sa kataposan sa Septiyembre 1989 hangtod Enero 1990.
Sulod nianang mga bulana ang bag-ong kinatas-ang ihap sa 2,659 ka magmamantala gitaho (sa Nobyembre), kon itandi sa 2,467 sa 1989 tuig sa pag-alagad. Kap-atag-upat ka tawo ang nabawtismohan, ug kada bulan ang aberids nga 65 nakig-ambit sa auxiliary payunir nga pag-alagad. Sa unang panahon, kapin sa 2,000 ka pagtuon sa Bibliya ang gitaho, ug nagsugod kami sa pagdahom kon unsay mahimo sa umaabot.
Apan misilaob na usab ang gubat sa Silangang Beirut, diin nahimutang ang kadaghanang kongregasyon, ug dinosena sa atong mga igsoon kinahanglang mokalagiw ngadto sa ubang mga bahin sa nasod. Sa daghang adlaw wala kamiy kontak sa mga kongregasyon sa apektadong mga dapit, ug dili kompleto ang mga taho sa pagsangyaw sa kanataran. Bisan pa niana, ang mga igsoon nga natibulaag mianib sa mga kongregasyon diha sa mga dapit nga gidangpan, ug ang balay-balayng buluhaton nagpadayon uban ang maayong mga resulta sa tibuok nga nasod. Kasamtangan, daghan sa kabalayan sa atong mga igsoon ang nasunog o naguba tungod sa mga bomba. Usa ka igsoong babaye ang namatay.
Uban ang kompiyansa kami misalig kang Jehova alang sa tabang ug giya. Ang maisogong mga payunir miboluntaryo sa pagdalag espirituwal nga mga tagana, uban ang pagkaon ug tubig, ngadto sa atong mga igsoon sa mga rehiyon nga giatake. Kay natukmod sa gugma alang kang Jehova ug sa mga igsoon, giatubang nila ang mga riyesgo sa pagtabok sa mga dalan nga may mga mina. Usa ka maayong pamatuod ang nahatag samtang nakita sa mga tawo ang hinabang nga nangabot sa mga pamilya sa atong mga igsoon. Nakita nila unsay mahimo sa tinuod nga gugma sa dihang ang tanan nahiusa diha sa pagsimba sa usa ka bugtong matuod nga Diyos, si Jehova.—Juan 13:34, 35; 15:13.
Sulod sa tuig sa pag-alagad, wala masayloi sa mga igsoon ang usa ka isyu sa atong mga magasin. Sama sa kahimtang sa Ang Bantayanang Torre, ang magasing Pagmata! sa Arabe nasugdan sa pagkapatik nga dungan sa Iningles, sugod sa isyung Enero 8, 1990. Nalipay kaayo ang mga Saksi ug mga tawong interesado. Nakalipay usab ang pagkakitag bag-ong mga basahong giluwatan diha sa Arabe, sama sa brosyur nga Angay ba Nimong Tuohan ang Trinidad? ug ang mga librong Ang Bibliya—Pulong sa Diyos o sa Tawo? ug Akong Basahon sa mga Estorya sa Bibliya.
Kining espirituwal nga mga gasa gitagana bisan pa sa pagsira sa daghang pabrika ug ubang katukoran sa Beirut. Ang kahimtang ekonomiko daotan sa tibuok nga nasod. Daghang dapit ang walay koryente, walay tubig, walay serbisyo sa telepono. Karon, ipaasoy nato sa pipila sa atong mga igsoon sa unsang paagi sila nagkalipay bisan pag nakigbisog sa mga kadaot sa usa ka gubat nga nagpadayon sulod na sa 15 ka tuig.
“Ang Positibong Bahin”
Usa ka igsoong lalaki sa Beirut misulat: “Una sa tanan gihatag ko ang kinasingkasing nga pasalamat kang Jehova tungod kay siya nagtipig kanamo nga luwas sulod sa iyang organisasyon sa maputling pagsimba bisan pa sa tanang lisod nga mga kahimtang nga among giatubang. Panahon sa bag-o pang mga hitabo, ako may pila ka kasinatian nga nakahatag nakog kalipay, ug giisip ko kini nga positibong bahin sa gubat.
“Panahon sa kusog nga pamomba, nanglingkod kami kauban sa mga silingan diha sa hagdanan, sanglit kana ang labing luwas nga dapit panahon sa luthangay. Kanunay namong sultihan sila bahin sa Gingharian sa Diyos ingong bugtong solusyon sa mga suliran sa katawhan, ug kanunay kami nga moampo sa atong Diyos, si Jehova. Kini nasayran sa tanan.
“May panahong ang pagluthangay molungtad sa daghang adlaw, ug kami dili makatambong sa mga tigom. Busa dad-on ko ang magasing Bantayanang Torre ug tun-an kana samtang maglingkod sa hagdanan. Kana nakapukaw sa interes sa among mga silingan. Ang pipila kanila dili makigsulti kanamo kay kami mga Saksi ni Jehova. Apan sa dihang ang among balay naigo sa usa ka bala sa kanyon, sila natingala sa gugma nga gipakita sa among mga igsoon. Karon gusto na nilang makigsulti kanamo. Tungod niana kami nakapahimutang ug pila ka suskrisyon sa Pagmata! uban kanila.
“Tungod sa maong mga kasinatian ako determinado sa pagpadayon sa pagsulti bahin sa kamatuoran. Si Jehova takos sa bug-os natong pagsimba ug bug-os natong pagtamod ug bug-os nga himaya.”
“Ang Ngalan ni Jehova Nagluwas sa Akong Kinabuhi”
Usa ka igsoong lalaki gikan sa Ras Beirut nga Kongregasyon miasoy: “Ang akong asawa, ang among duha ka batang lalaki, ug ako nagsugod sa among adlaw diha sa balay-balayng ministeryo sa kasadpang bahin sa Beirut. Sa hapon kami may Iningles-pinulongan nga tigom sa akong balay. Sa pagka 6:30 s.g. ngitngit na. Ang mga tawo lamang nga anaa sa karsada mao ang armadong mga tawo. Nag-ulan ug mga bomba. Ang kadaghanang nagpuyo sa among tinukod nanghawa na. Walay tubig o koryente. Dayon nakadungog kamig tuktok sa pultahan.
“Kay naghunahunang basin kadto usa sa among mga silingan nga nagkinahanglag tubig o tinapay, gibuksan sa akong asawa ang pultahan. Nagbarog didto mao ang upat ka armadong lalaki. Gitionan nila sa ilang mga pusil ang akong asawa ug nangutana kon hain ako pinaagi sa ngalan. Niadtong semanaha siyam ka lalaki ang gikuha gikan sa ilang mga balay sa maong paagi ug gipatay dihadiha. Sa dihang nakit-an ako sa armadong mga lalaki, gition nila ang ilang mga awtomatikong riple sa akong ulo ug gimandoan ako nga mokuyog nila. Gisultihan ko sila: ‘Mokuyog ako kaninyo. Apan pailisi una ako.’ Miampo ako kang Jehova uban sa bug-os kong kasingkaisng, nga nangayo sa iyang tabang. Sa pagkahuman nako sa pag-ampo, gibati kong kalmado kaayo ug gisugdan ko ang pagtan-aw sa maong armado ug makahahadlok nga mga lalaki ingong ordinaryong mga tawo. Ako nakigsulti kanila nga walay kahadlok.
“Nangutana ako kanila: ‘Unsay gusto ninyo gikan kanako? Mag-estorya una kitag kadiyut diha sa balay una ta manglakaw.’ Sa didto na sa sala, ang ilang hepe nangutana kanako: ‘Unsa may imong katungod sa pagsulod sa kabalayan ug pagsangyaw ngadto sa katawhan?’ Mitubag ako: ‘Kamo nagadalag pusil sa pagpatuman sa inyong kabubut-on, ug walay makababag kaninyo. Ako nagadala sa maayong balita sa pakigdait nga gisugo ni Jesus nga among isangyaw.’ Dayon gisaysay ko ang mga pagtuo ug buluhaton sa mga Saksi ni Jehova. Sa dihang nahisgotan ko ang ngalang Jehova, sila miingon: ‘Igo na nga ikaw gisukitsukit dinhi. Dili na kinahanglang iuban ka namo.’ Lagmit, usa kanila nakaila sa usa ka igsoon. Siya miingon: ‘Kini siya pareho ni Jarjoura.’
“Gisangyawan namo kadtong mga lalaking armado ug gitubag ang ilang mga pangutana sulod sa usa ka oras ug tunga. Dayon, inay nga dad-on ako sulod sa kargahanan sa ilang sakyanan sama sa ilang gibuhat sa uban, sila nangayog pasensiya, naghalok kanako, nagtanyag sa ilang tabang kon ugaling kinahanglanon ko kana, ug nanglakaw. Sukad sa sinugdan, gibati ko ang panalipod ni Jehova. Ang pagpakig-ambit sa balay-balayng buluhaton niadtong buntaga ug pagtambong sa usa ka tigom sa hapon nakapalig-on nako sa pagbarog nga malig-on. Sa pagkamatuod, ang ngalan ni Jehova nagluwas sa akong kinabuhi.”—Proverbio 18:10.
“Gilibotan Kami sa Pag-amoma ni Jehova”
Ang laing igsoong lalaki misulat gikan sa Beirut: “Miyerkoles kadto, ika-31 sa Enero, 1990. Samtang nagtrabaho kauban sa akong igsoong lalaki didto sa balay sa usa ka sister, ang away misugod na usab. Ang mga bomba mibuto sa bisan diin. Tungod sa mabangis nga bugno, kami dili makapauli. Ang sister maabiabihon kaayo bisan pag siya may pila ra ka pirasong tinapay.
“Ako nabalaka kaayo bahin sa akong asawa kay siya Pilipina ug wala maanad sa kabangis sa gubat. Hinuon, sa ikaduhang adlaw ako nakalakaw aron mopauli sa akong balay. Ang mga tinapok sa muwebles nagbabag sa kadalanan, apan salamat kang Jehova, ang akong pamilya luwas. Human sa kadiyut nga kalinaw, misugod na usab ang kusog nga luthangay. Mitago kami sa balay sa usa ka igsoon duol sa amoa. Lima kami—akong asawa, akong dos-anyos nga batang lalaki, ako, akong igsoon, ug iyang asawa. Ang mga bomba, mga bala sa kanyon, ug mga roket nangahulog sa among palibot, apan gilibotan kami sa pag-amoma ni Jehova. Duha ka adlaw sa kusog nga luthangay miagi, samtang kami nagpadayon sa paghapa sa yuta uban sa aso sa mga bomba diha sa mga bangag sa among ilong.
“Samtang namati sa mga buto, kami nahinumdom sa mga pulong ni David sa Salmo 18:1-9, 16-22, 29, 30. Niadtong lisod nga mga gutlo, ug bisan pa sa tanan nga nagkahitabo, kami malipayon ug nakapahiyom pa. Kami miampo kang Jehova nga kon ugaling kami mamatay, kami mamatay dayon, nga dili mag-antos. Lig-on ang among paglaom sa pagkabanhaw.
“Ang sunod nga adlaw dili katuohan. Mga 25 ka bomba nahulog duol sa balay nga among gitagoan, apan walay mausa kanamo ang nasamdan. Mahanduraw ba ninyo ang among mga gibati samtang among nabatyagan ang panalipod ni Jehova? Sa sunod buntag, kami mihukom dayon sa pagpahawa. Ang akong sakyanan mao lamang ang diha sa dalan nga wala masunog. Ako mimaneho taliwala sa mga mina ug sa mga bomba, ug salamat kang Jehova, kami nakaikyas ngadto sa usa ka dapit nga mas malinawon kay sa amoa. Didto, ang among mga igsoon mahigugmaong nagtagana kanamog sinina, pagkaon, ug kuwarta.
“Bisan pa sa tanang kalisdanan, kami nalipay kay si Jehova nag-uban kanamo. Kadto nahisamag iyang gipadala ang iyang mga manulonda aron ipahilayo ang mga bomba gikan kanamo. (Salmo 34:7) Oo, dako ang among kalipay. Apan ang among kalipay modako pa inigkalabang sa Armageddon.”
Hinabang sa Emerhensiya Milihok!
Ang dagway sa pila ka dapit sa Beirut nahisamag giagian sa usa ka linog. Daghan sa kabalayan sa atong mga igsoon ang nadaot o naguba. Sa mitungha ang bag-o pang krisis, giorganisar sa Komite sa Sanga ang komite sa hinabang sa emerhensiya aron sa pag-atiman sa mga panginahanglan sa mga igsoon. Nagsugod kadto paglihok sa Pebrero 16, 1990, sa maomaong panahon nga kami sa kataposan nakabalhin ngadto sa giatakeng mga dapit. Tulo ka pilo ang tuyo sa maong komite: paghatag ug espirituwal nga pagdasig sa mga igsoon; pag-atiman sa ilang mga panginahanglan sa kuwarta, pagkaon, ug tubig; ug pagtabang kanila sa pag-ayo o pagtukod pag-usab sa ilang kabalayan.
Wala kinahanglana ang pag-awhag ug mga boluntaryo. Sa kada adlaw daghan ang motungha sayo sa buntag aron motabang. Aniay pila ka komento niadtong gitabangan:
Usa ka sister, samtang gihinloan ug giayo ang iyang balay, miingon: “Ako nakadungog bahin sa tabang nga ihatag sa mga igsoon panahon sa katalagman. Karon kini akong nakita ug gibati.” Bisan ang iyang silingan, usa ka babayeng Muslim, nagsulti sa maong sister: “Tinuod nga kamo naghigugmaay sa usag usa. Ang inyoha mao ang hustong relihiyon. Karon ako moadto ngadto sa akong balangay ug suginlan ang tanan kon unsay inyong ginabuhat dinhi.” Kining maong silingan nagdalag diyutayng pagkaon alang sa boluntaryong mga trabahante.
Usa ka tigulang nga sister mikomento: “Gidahom ko nga kamo moanhi aron sa pagduaw kanako, apan wala ako magdahom nga ang Sosyedad may sugoon sa pagdala kanakog tubig.” Siya naghilak samtang gihalokan niya ang igsoong lalaki nga miabot sa pagtabang kaniya.
Usa ka pamilya sa tulo—usa ka bana ug asawa nga dili-bawtismadong mga magmamantala ug ilang batang lalaki—giduaw ug gihatagag dakong kahon nga may gatas, pila ka tinapay, tubig nga ilimnon, ug kuwarta. Sa giingnan sila nga gihimo sa mga Saksi ni Jehova ang maong kahikayan, ang bana miingon: “Ako sakop sa Evangelical Church sulod sa 11 anyos ug aktibo kaayo. Apan sulod niining 15 anyos nga gubat sa Lebanon, sila wala gayod maghunahuna nga buhaton ang sama niini alang sa ilang mga membro.” Siya mipadayon: “Kini mao gayod ang bugtong organisasyon sa Diyos.” Ang bana ug iyang asawa nabawtismohan sa usa ka asembliya sa Mayo 1990.
Usa ka ansiano mikomento: “Ang mga pulong dili makabatbat sa among mga pasalamat alang sa mga buhat sa gugma nga inyong gihimo ngadto sa natimawang mga igsoon. Ako nakadayeg kaayo nga ako mihilak sa pagkakita nako sa usa ka grupo sa mga batan-ong lalaki, mga boluntaryo, nga nagtukod pag-usab sa balay sa akong mga ginikanan. Bisan ang among mga silingan nga dili mga Saksi nagpahayag sa ilang apresasyon. Kami tinuod nga mapasalamaton kang Jehova ug sa iyang organisasyon tungod sa praktikal nga suportar nga ginahatag. Pagkatinuod ang mga pulong sa salmista sa Salmo 144:15: ‘Malipayon ang katawhan kansang Diyos mao si Jehova.’”
“Unsa ba Kamong Matanga sa Katawhan?”
Usa ka sister nga may pamilya misulat: “Buot kong ipahayag ang akong lalom nga apresasyon sa gugma ni Jehova ug sa iyang organisasyon. Ang akong balay naigo sa daghang bala sa kanyon ug nasunog. Daghan ang nagsulti kanamo nga kini dili na makomponer. Bisan pa niana, ania nagabarog kini nga bug-os naayo nga daw walay nahitabo niini, nga gilibotan sa ginatos ka balay sa among kalye nga nangasunog ug nangaguba.
“Bisan ang among mga silingan, nga dili mga Saksi ni Jehova, nangutana: ‘Diin ba magagikan kining gugmaha? Unsa ba kamong matanga sa katawhan? Kinsa ba kining mga tawhana nga nagatrabaho nga makugihon kaayo ug hilom kaayo ug maayog gawi? Bulahan ang Diyos nga naghatag kaninyo niining gugmaha ug nagasakripisyo-sa-kaugalingon nga espiritu.’ Pagkahaom ang mga pulong sa Salmo 84:11, 12: ‘Kay si Jehova nga Diyos maoy usa ka adlaw ug usa ka taming; siya nagahatag sa kaluoy ug himaya. Si Jehova mismo dili magpugong sa bisan unsang maayo gikan niadtong nagalakaw nga walay ikasaway. Oh Jehova sa mga panon, malipayon ang tawo nga nagasalig diha kanimo.’”
Ang usa ka lalaki kansang asawa ug mga anak nga mga Saksi ni Jehova misulat: “Buot kong pasalamatan kamo tungod sa inyong tabang sa pag-ayo sa among balay. Ang inyong trabaho nagpadayag sa sinsero Kristohanong gugma nga talagsaon kaayo niining mga adlawa. Hinaot panalanginan sa Diyos ang inyong mga paghago.”
Human mamaayo ang balay sa usa ka ansiano, siya miingon: “Ang among mga baba dili makapahayag kon unsay ania sa among mga kasingkasing. Dili kami makakaplag ug mga pulong sa pagsulti kaninyo sa among apresasyon alang kang Jehova ug sa iyang organisasyon. Gibati namo ang pagkasuod ni Jehova tungod sa among katalagman. Ang inyong gugma nagdasig sa tanang sakop sa akong pamilya sa pag-ambit sa pagtabang sa uban nga anaa sa kawalad-on.”
Niadtong Abril, 194 ka tawo sa Lebanon ang nagpahimulos sa buluhatong auxiliary payunir. Ang gabii sa Memoryal mas malinawon kay sa ubang mga gabii, ug ang Memoryal gihimo nga may bug-os nga tumatambong nga 5,034. Ang tanang asembliya nga giplano nahimo, ug ang bug-os nga gidaghanon sa mga tawong nabawtismohan alang sa tuig maoy 121 bisan pa sa kagubot sa nasod. Daghang pamilya sa mga kongregasyon mipahawa sa nasod hangtod sa hangtod. Apan ang bag-ong mga interesado nagauswag padulong sa bawtismo, ug ang 2,726 ka magmamantala sa Gingharian nagapadayon sa pag-uswag. Panahon sa 1990 tuig sa pag-alagad, ang tanang katawhan ni Jehova sa Lebanon nakasinati sa pagkamatinumanon ni Jehova samtang siya nag-atiman kanamo ug naggiya kanamo latas sa gubot nga kapanahonan.”—Salmo 33:4, 5; 34:1-5.