Ang Panaglalis sa Kamatayon ni Jesus

SA ADLAW sa Paskwa 33 K.P., ang tulo ka pagsilot nahitabo. Ang tulo ka hinukman nga mga tawo gidala ngadto sa dapit gawas sa mga paril sa Jerusalem ug gipatay diha sa usa ka labing masakit, makauulaw nga mga paagi: paglansang diha sa nagbarog nga mga kahoy. Ang maong pagsilot maoy komun sa Romanong kapanahonan, busa kana ang laoman nga hangtod karon ang mga pagpatay sa Paskwa dili gayod hikalimtan. Usa sa gipatay nga mga tawo, hinunoa, mao si Jesu-Kristo. Ang iyang kamatayon nagbukas sa talagsaon relihiyosong kausaban ug panaglalis.

Duolag duha ka libo na ka tuig ang miagi sukad nianang hitaboa, basin ikaw makiling sa pagtagad niini ingong usa ka karaang kasaysayan na lamang. Apan, nahibalo ka ba nga ang panaglalis nga mitungha wala pa masulbad?

Sa imong kasayoran, minilyon ang nagtuo nga si Jesus namatay tungod kanila. Sila tim-os nga nagtuo nga ang kamatayon ni Kristo mao ang yawi alang sa kapasig-ulian ug kapasayloan sa mga sala, nga ang pagtuo sa iyang kamatayon maoy paagi alang sa kaluwasan. Ikahibulong, hinunoa, ang usa ka artikulo diha sa Anglican Theological Review nagtaho nga kining gitamod nga pagtulon-an “nasamok.” Ug ang “kasamok” naggikan sa relihiyosong mga lider.

Nagbatbat ang Anglican Theological Review: “Ang doktrina sa lukat diha sa Kristohanong hunahuna nasamok tungod kay ang pasikaranan niini sa Bibliya giduhaduhaan, ang pagkaugmad niini nasapawan sa lumalabay [dili-magdugay] nga mga ideya . . . , ug ang ekspresyon niini sa popular nga espirituwalidad nahimong porma na lamang sa paaging emosyon sa kaugalingon ug dili-kritikal nga pagpakamatarong sa kaugalingon.” Sa pagkatinuod, ang mga teologong Protestante ug Katoliko wala magkauyon sa kahulogan sa kamatayon ni Jesu-Kristo.

Malagmit bation nimo nga kini maoy panaglantugi lamang sa pipila ka teolohikanhong mga espesyalista, nga kini walay kalabotan sa imong kinabuhi. Apan palandonga kini: Kon ang kamatayon ni Jesus naglangkit sa imong baroganan ngadto sa Diyos ug ang imong palaaboton sa walay kataposang kinabuhi (sa langit o bisan diin), nan kini nga panaglalis nagkinahanglan sa imong pagtagad.

Nganong ang mga teologo sa gihapon naglalisay niining butanga? Palandonga, pananglitan, ang Iglesia Romana Katolika. Kini adunay maayong pagkasaysay nga pagtulon-an sa dili mamatay nga kalag ug sa Trinidad. Apan, ang iglesia dili gayod makahukom bahin sa katubosan pinaagi sa kamatayon ni Kristo. Ang New Catholic Encyclopedia miangkon: “Daghan ug nagkadaiya ang mga sistema nga naugmad sa pagbatbat kon sa unsang paagi ang tawo naluwas gikan sa kadaotan sa sala ug ipasig-uli ngadto sa kabulahanan . . . Apan walay usa niini nga mga sistema sa bug-os nagmalamposon. . . . Ang teolohiya sa Katubosan maoy sa pila ka bahin wala molampos ug nagpadayon sa pagpatungha mismo ug suliran sa teolohiya.”

Nan, kini angay nga dili makapatingala kanimo, nga sa minilyong kinsa tim-os nga nagpahayag nga ‘si Jesus namatay alang kanato,’ ang ubay-ubay naglibog kon unsay kahulogan gayod niini. Sumala sa giingon niini sa Anglican Theological Review: “Sa dihang iduot . . . ang nagtuong Kristohanon sa subsob dili makasitar sa biblikanhong tinubdan sa doktrina, o sa pagpatin-aw kon sa unsang paagi kini naglihok.” Nabug-atan sa pagtulon-an nga dili nila hisabtan ug ikapatin-aw, ang mga magsisimba sa mga simbahan naglisod sa pagtino kon sa unsang paagi ang kamatayon ni Jesus maoy kinahanglanon sa ilang mga kinabuhi.

Ang kapakyasan sa Kakristiyanohan sa pagbatbat sa usa ka tin-aw nga doktrina sa katubosan nakababag usab sa iyang mga paningkamot sa pag-abot sa mga Hudiyo, Hindu, Buddhista, ug sa uban pa bahin sa Kristohanong mensahe. Samtang daghan sa maong mga tawo nakadayeg ug mitahod sa daghang mga pagtulon-an ni Jesus, ang kalibog nga nagalibot sa kamatayon ni Kristo ug kon unsay kahulogan niini nagbarog ingong usa ka babag sa pagtuo.

Ang kabililhon ba sa kamatayon ni Kristo sa yano usa ka misteryo​—nga dili masabtan sa tawo? O aduna bay usa ka makataronganon, pinasukad sa Bibliya nga katin-awan niini? Kini nga mga pangutana takos sa imong pagtagad, kay ang Bibliya mihimo niining makapahibulong nga pangangkon mahitungod kang Kristo: ‘Ang tanang magatuo kaniya dili malaglag kondili makabaton sa kinabuhing dayon.’​—Juan 3:16.