Pagdala sa Kahayag Ngadto sa Hilit nga mga Dapit sa Bolivia
SA AMIHANAN ug sidlakan sa hatag-as nga mga bukid sa Bolivia nahimutang ang lapad tropikal nga kapatagan, nga puno sa mga pananom. Kini nabahin sa alingisngis nga mga suba nga miikis latas sa kalasangan ug kabungtoran. Unsa kaha ang pagsangyaw sa maayong balita diha sa maong hilit nga mga dapit?
Handurawa ang imong kaugalingon diha sa usa ka dakong bangka, giporma gikan sa usa ka gibangagan nga punoan sa kahoy ug gipadagan sa usa ka motor sa ulin. Kini mao ang kasinatian sa unom ka bug-os panahong mga ministro gikan sa Trinidad, usa ka siyudad diha sa El Beni nga seksiyon sa Bolivia. Ilang giplano kini nga biyahe aron sila makasangyaw sa mga nanimuyo sa suba nga wala pa maabot uban sa “maayong balita sa gingharian.” (Mateo 24:14) Human nga mitadlas sa usa ka halapad nagapangidlap nga katubigan, ang ilang sakayan misugod sa pagnabigar sa usa ka hiktin nga suba paingon sa Mamoré River.
Ang usa sa grupo miasoy: “Kami halos miabot na sa Mamoré sa dihang among nadiskobrehan nga uga ang tumoy sa suba. Mihaw-as kami sa sakayan, kami milubong sa lapok nga miabot sa among paa! Nawad-ag sapatos ang akong asawa sa paninguhang makabunlot. Apan uban sa tabang sa mga dumadaan, among naalsa ang bangka gikan sa lapok ug ngadto sa mas mamala nga yuta. Human sa duha ka hagong mga oras, kami nakaabot sa Mamoré.
“Kami unya hinayhinay nga mipadayon sa paglawig diha sa suba, nga gitamboan sa hatag-as nga mga pangpang uban sa abundang tropikal nga mga pananom. Sa kabanha sa motor, ang mga pawikan mapuklid gikan sa ilang giabayang mga troso, samtang ang mahagwaong mga dolphin usahay manlukso gikan sa mga tubig. Sa unang pagdunggo namo naghaling kami ug kalayo sa daplin sa pagbugaw sa mga insekto. Human nga nahigot ang among bangka diha sa hugpong sa mga sanga, kami nakigkabildohay uban sa mahigalaong mga tawo bahin sa umaabot nga mga panalangin sa Gingharian. Sa mapabilhon sila nagluwan kanamo uban sa prutas ug mga itlog.
“Samtang ang adlaw nanglabay, kami midunggo pa aron makapugas ug dugang mga binhi sa kamatuoran. Ngitngit na sa dihang kami nakaabot sa San Antonio. Nangatulog na ang mga taga balangay. Apan, samtang gipahibalo nga isalida ang usa ka pelikula, misugod pagdan-ag ang mga suga. Usa ka karomata ang gisakyan aron sa pagdala sa among mga gamit ngadto sa lungsod. Daghang mga tawo ang nasinati uban sa mga Saksi ni Jehova diha sa pelikula ug sa tinagsatagsa.
“Sa misunod nga adlaw kami nagpadayon sa pagduaw sa bag-ong mga dapit. Diha sa hataas nga pangpang, ang mga babaye nanaglaba sa ilang mga bisti, ug bisan ang usa ka bata, diha sa dagkong mga sisik. Sila wala pa gayod makadungog sa among mensahe sa Bibliya. Sa usa ka dapit ang gagmayng isda nanlukso sa kilid sa among bangka, ug daghan ang nanlundag sulod sa among bangka. Busa human nga gisalida ang pelikula, kami dihay piniritong isda sa dili pa matulog. Human sa among biyahe, daghang mga literatura ang among napahimutang niining hilit nga dapit, ug kami natagbaw nga nakatabang sa daghan nga makadungog sa maayong balita sa unang higayon.”—Itandi ang Roma 15:20, 21.
Pamatuod sa Manulondaong Pagtultol
Ihulagway karon ang imong kaugalingon diha sa usa ka misyon sa pagpangita sa usa ka tawo diha sa usa ka lungsod sa 12,000, nga imong giduaw sa unang higayon. Diyutay ka rag nahibaloan kaniya gawas sa iyang ngalan. Kana ang hagit nga giatubang sa duha ka bug-os panahong ministro nga miabot sa Guayaramerín nagalaom nga makita ang usa ka tawo nga sa miagi nagtuon sa Bibliya ug nagtambongan sa mga tigom sa laing lungsod apan mibalhin niini nga lungsod. Human nga nakapahimutang, ang payunir nga mag-asawa mihukom nga mamaseyo ngadto sa plasa, diin adunay nagpanon nga mga tawo nga nangaon kaha diha sa mga lamesa o nagkabildohay lamang. Halos dihadiha dayon ang usa ka tawo miduol sa mag-asawa ug misugod sa pagpakig-estoryahay. Sila nangutana kon siya nahibalo sa babaye nga ilang gipangita. “Wala,” matud niya, “apan ang akong ugangan nga babaye maoy usa sa mga Saksi ni Jehova.” Sanglit walay Saksi ang nailhan nga anaa sa maong lungsod, sila nagtuo nga siya hayan nalibog lang.
Bisan pa niana, pagkaugma ilang giduaw kining edarang babaye, kinsa naghigda tungod sa nabali nga batiis. “Ako usa sa mga Saksi ni Jehova apan wala pa ako ka bawtismohi,” siya miingon. Gisukna kon kinsay nagtudlo kaniya sa kamatuoran, iyang gitudlo ang hulagway sa iyang apo nga babaye diha sa dingding ug miingon: “Siya ang nagtudlo.” Halos dili sila makatuo! Kini mao ang batan-ong babaye nga ilang gipangita! “Nganong wala motug-an ang imong umagad nga lalaki?” sila nangutana. “Oh, minyo na siya, ug nahibalo lamang siya sa minyo niyang ngalan,” siya mitubag. Ang apo niya wala diha sa maong panahon, apan ang usa ka pagtuon sa Bibliya gidumala human niadto pinaagi ug sulat. Ang resulta? Siya ug ang iyang apohan nga babaye miuswag ngadto sa pagpabawtismo. Ang ilang balay gihimong Kingdom Hall alang sa usa ka nagauswag nga kongregasyon, ug ingong usa ka bug-os panahong ministro, ang batan-ong babaye nagatultol sa daghan ngadto sa organisasyon ni Jehova.
Pagsangyaw Diha sa Kinatung-ang Tropiko
Sunod, handurawa ang inyong eruplano nga mitugpa diha sa usa ka sagbotong tugpanahan sa San Joaquín, diha sa kinatung-an gayod nga tropiko sa Bolivia. Mobati kag kahigwaos kon hunahunaon mo ang misteryosong hampak nga, sa duha ka tuig nga miagi, nagpapha sa ikalimang bahin sa populasyon niining lungsora.
Ang payunir nga mag-asawa nga miabot gikan sa Trinidad pinaagig eruplano nakasulay na sa pagkamaabiabihon sa mga tawo. Ang bana miasoy: “Ang usa ka panaghisgot sa Bibliya nga gihimo samtang kami nagabiyahe mitultol sa usa ka pagdapit nga mopuyo sa usa ka pribadong balay, nga walay bayad. Ang nagdapit kanamo nagtagana pa ug pagkaon kanamo sa kubos nga bili, nagpaarang kanamo nga igugol ang among tanang panahon sa among pagsangyaw nga buluhaton. Sa wala magdugay sa among pag-abot, kami giingnan nga moadto sa baraks sa militar dihadiha dayon. Sa dihang ang opisyal nahibalo nga kami dili mga rebolusyonaryo kondili mga Saksi ni Jehova, siya nagpakita ug talagsaong interes ug mikuhag Bibliya, ingon man usab sa mga literatura sa Bibliya ug mga suskripsiyon sa mga magasing Watchtower ug Awake! Human niadto, halos ang matag usa sa lungsod namati nga maikagon sa saad sa Bibliya alang sa hingpit nga panglawas sa umaabot.”—Pinadayag 21:4.
Upat ka bug-os panahong mga ministro ang buot nga moadto gikan sa San Joaquín ngadto sa San Ramón, apan ang bugtong mabatonang transportasyon maoy karomata sa baka. Ilang gigamit ang mga karton sa literatura nga mga lingkoranan. Kini sa wala magdugay nangadaot tungod sa pag-untol-untol ug kusog nga mga pagbundak sa may tabong karomata, uban sa habog kahoy nga mga ligid niini. Bisan ang gikargang mga manok katulgong tan-awon tungod sa kalihokan.
Human sa napulo ka oras nga pagsuotsuot sa kasagbotan, sila nakaabot sa lugar nga wala na gayoy dalan, ug kadto nagakangitngit na. Ang drayber nagpaalarma sa grupo sa pag-ingong, “Seguro nawala kita!” Sila misugod na sa pagkabalaka, ‘Sa unsang paagi kita makagawas niini nga kasagbotang puno sa mga halas ug peligrosong ihalas nga mga hayop?’ Sa dihang midugang ang drayber, “Apan ayaw kamo kabalaka. Ang mga hayop nakabiyahe na kaniadto.” Busa sige lang. Sulod sa usa ka oras sila migula gikan sa kasagbotan diha mismo sa San Ramón!
Dinhi, usab, gigugol ang daghang mga adlaw sa pagmantala sa umaabot nga Paraiso ngadto sa mga dalunggang wala pa gayod makapatalinghog niini kaniadto. Walay Saksi ang nagpuyo dinhi; apan may butang nahitabo nga nag-usab niana.
Ang usa ka misyonaryong Katoliko nagsunod-sunod sa mga Saksi samtang sila nagabalay ug balay. Usahay sila magkabalios ug makita siya sa sunod balay nga ila na nga nasak-an. Natingala sa iyang pagkamahigalaon, sila nagbilin kaniya ug librong Ang Kamatuoran nga Motultol sa Kinabuhing Walay Kataposan. Tungod kay dili gayod tinuod nga interesado, iyang gihatag ang libro sa iyang bayaw nga babaye, kinsa nagbasa gayod sa unod niini, nagtuon pag-ayo, ug sa ulahi nahimong usa ka bawtismadong Saksi.
Kapeligrohan sa Tropikal nga mga Suba
Karon ihulagway ang imong kaugalingon nga nagtimon sa usa ka lantsa diha sa usa ka suba, naglawig sa peligro, masamok nga katubigan. Ang dili makitang mga bato, lapokong mga daplin, ug mga batang, duyog sa kalit nga paglutaw sa mga lilo, maoy pipila lamang sa kapeligrohan. Ang mga piranha, mga walowalo, ug mga pagi daghan niini nga katubigan. Kana mao ang mga hagit nga giatubang sa mga igsoon sa Riberalta kinsa nagsangyaw sa mga nanimuyo diha sa dapit sa suba.
Aron maabot kining ilayang mga dapit, sila naghimog lantsa nga ginganlag Luz de los Ríos (Kahayag sa mga Suba). Sa panahong miduaw ang mga magtatan-aw sa distrito ug sa sirkito, gidesider nga sulayan ang lantsa sa pagpadagan. Ang tanan maayo ra hangtod nga ang atop nasangit sa nagbitay nga kahoy. Ang kusog nga sulog nag-anod sa lantsa ngadto sa usa ka nahulog nga kahoy. Samag usa ka espada, ang usa ka talinis nabaling sanga mitusok sa kilid sa lantsa—halos magtuhog sa asawa sa magtatan-aw sa distrito! Nakasulod ang tubig, ug ang lantsa nataob, nagyabo sa iyang mga pasahero ngadto sa naglilong katubigan. Ug ang magtatan-aw sa distrito ug ang iyang asawa dili mahibalo molangoy! Uban sa tabang niadtong makamao, sila naluwas. Apan ang lantsa bug-os nga nawala. Mga adlaw sa ulahi kini nakit-an sa lima ka kilometros ang layo ubos sa suba. Ang tanang karga, apil ang 20 ka karton sa mga literatura, nawala.
Ang Bolivian Navy mitabang sa pagpalutaw niini pag-usab, ug human sa daghang semana sa pag-ayo, ang lantsa andam na usab sa pagtapos sa unang paglawig niini. Ang kalisod sa pagbiyahe nagsugod uban sa daotang panahon ug pagkadaot sa makina.
Ang unang dapit nga gidunggoan sa mga igsoon, ilang gikasugat ang usa ka grupo sa mga Evangelist, kinsa nagyubit: “Ang inyong gamay nga lantsa dili maayo niining subaa!” Ang tinguha nga magsalida ug slides didto napakyas tungod sa usa ka depektosong generitor. Balik na usab sa suba, ang mga Saksi nahibalo nga ang laing mga lantsa moabot uban ang mga trompang nagpasidaan sa umaabot “bakak nga mga propeta.” Dayag, kini maoy buhat sa mga Evangelist. Bisan pa niana, kini nagdugang lamang sa pagkamausisahon sa mga tawo.
Bisag kini nga pagduaw nagtapos sa bakak nga propaganda gikan sa tinuod bakak nga mga propeta, ang mga igsoon mibatig kakulba, kay sila adunay 21 pa ka adlaw nga biyahe sa pag-abot sa Fortaleza.
Sa maong biyahe, sila misangyaw ngadto sa usa ka hepe sa usa ka hilit nga tribo; siya naminaw pag-ayo. Pinaagig pakigpulong sa Bibliya nga gihatag sa usa ka payunir, ang usa ka grupo sa mga tigbalata diha sa usa ka nalain nga lugar gilipay uban sa matuod nga paglaom sa mga patay. Usa ka edarang lalaki nga may hatag-as puting bigote nagpahayag sa iyang kinasingkasing nga pagpabili, ug siya nangutana kon unsaon niya pagsuskriber sa atong mga magasin alang sa napulo ka tuig! Sa Fortaleza, 120 ka tawo ang nakabenepisyo gikan sa programa sa slide sa Sosyedad.
Pagkadako sa katagbawan nga gibati niini nga mga payunir nga nagdala sa kahayag sa kamatuoran sa hilit nga mga dapit! Sa pagkatinuod, walay laing segurado ug matagbawong paagi sa paggamit sa kinabuhi sa usa kay sa pag-alagad sa Maglalalang sa kinabuhi mismo, si Jehova nga Diyos.—Salmo 63:3, 4.
[Mapa/Mga hulagway sa panid 26]
(Alang sa aktuwal nga pagkahan-ay, tan-awa ang publikasyon)
BOLIVIA
Guayaramerín
Riberalta
Fortaleza
San Joaquín
San Ramón
Trinidad
San Antonio