Mga Magmamantala sa Gingharian Nagtaho

Si Jehova Nagataganag Kahupayan

KARONG BAG-O, nadawat sa mga Saksi ni Jehova sa South Africa ang balita sa makaluluoyng kahimtang sa ilang mga igsoon sa espiritu sa usa ka duol nga nasod diin gidili ang ilang buluhaton sa pagsangyaw. Gitaho kanila nga tungod sa grabeng paghulaw, nabuhi ang ilang mga igsoon pinaagi sa pagkaog pila ka gamot. Kulang usab silag tukmang biste, mao nga ang pila ka Saksi nagpanuko sa pagpakigbahin sa ministeryo sa kanataran.

Misanong dihadiha ang mga igsoon sa South Africa. Gipahayag ang usa ka pag-awhag sa lokal nga mga kongregasyon sa dapit sa Johannesburg bahin sa panginahanglan sa biste. Sa pila ra ka adlaw, gidonar ang tulo ka toneladang biste. Dayon giklasipikar ang mga biste sa boluntaryong mga trabahante. Gihimo ang kahikayan sa pagpadalag 3 ka toneladang bitsuwelas, 1 ka toneladang mantika, 1 ka toneladang sabon, ug 17 ka toneladang bugas mais. Sa dihang ang kompaniya nga nagsuplay sa bugas mais nakadungog sa kahimtang sa mga Saksi sa gihulaw nga nasod, midonar silag kapin sa tonelada sa maong gikinahanglan pag-ayong pagkaon.

Sa Lunes, Abril 16, 1990, ang usa ka trak nga may 25-toneladang karga sa hinabang migikan sa South Africa sa iyang 5,500 kilometros nga biyahe. Apan karon kinahanglang makuha ang permiso gikan sa mga awtoridad aron madala ang mga suplay ngadto sa ilang gidaot-sa-gubat nga nasod.

Ang mga awtoridad didto sa konsulada miingon nga bisan tuod ang mga Saksi ni Jehova wala ilha diha sa ilang nasod, sila nahibalo kaayo sa ilang presensiya. Walay pagtutol sa pagpadalag hinabang nga suplay ngadto sa atong mga igsoon. Gihatag ang permiso. Giisyu ang kinahanglanong mga dokumento, ug sa Biyernes, Abril 20, gitabok sa mga Saksi ang utlanan nga walay suliran. Bisan pa niana, nasugata nila ang kapig 30 ka ali sa dalan, diin sila kasagarang gipangayoan nga ipakita ang ilang papeles. Niadto lang sila nakaamgo unsa ka kinahanglanon kadtong mga papelesa.

Tapos makabiyahe sa mga 140 kilometros pasulod sa nasod, ang ilang pagpadayon gibabagan sa usa ka dakong suba nga nagbaha. Naguba ang orihinal nga taytayan, ug ang temporaryong gambalay nga gipahimutang dili angayan nga gamiton sa usa ka dakong trak. Hinuon, ilang nadiskobrehang ang gamay nga sakyanang nag-uban sa convoy makatabok nga luwas sa gibahaang taytayan. Gihukom nga magbahin sila sa duha ka grupo. Ang usa ka kampo gitukod sa gibahaang suba alang sa usa ka grupo, samtang ang laing grupo nagpa­dayon sa ilang biyahe aron ma­kigtagbo sa mga igsoon mga 260 kilometros paamihanan pa. Pagkamalipayon nila sa dihang sa kataposan ilang nakontak ang mga igsoon! Dili sila makahunong sa pagpahiyom, paghalogay, ug paglamanohay! Sa wala madugay duha ka lokal nga trak milarga aron sa pagtagbo sa laing grupo sa mga igsoon nga nagpaabot sa daplin sa suba. Didto, ang suplay nga hinabang gibalhin gikan sa dakong trak ngadto sa duha ka gagmayng trak.

Ang mga taho nga nadawat nagpaila sa dulot nga pasalamat sa tagana ni Jehova sa materyal nga tabang. Apan, bisan pa sa ilang pisikal nga kahimtang, ang pagtuwaw sa mga igsoon alang sa espirituwal nga pagkaon labi pang grabe. Usa ka kongregasyon nakabatog usa ra ka kopya sa Bantayanang Torre, nga kinahanglang kopyahon alang sa matag pamilya. Salamat kang Jehova, nagapadayon karon ang kahikayan sa pagtaganag mapadayonong agos sa espirituwal nga pagkaon ngadto sa mga igsoon nianang nasora.