Ang Hagit sa Pagpugas ug Binhi sa Gingharian sa Habagatang Chile
MAKAPAHIMUOT kaayo ang paglakaw subay sa hilom nga dalan sa banika sa habagatang Chile! Ang mga baka malinawong nanibsib diha sa gilinyahan ug kahoyng mga kaumahan diin ang luyo niana makita ang maambong nga mga bolkan nga natabonag niyebe ang tayoktok. Imong madungog ang mga pagtuwit-tuwit sa mga langgam ug ang mga kinanaas sa mga dahon duyog sa paghuyohoy sa hangin. Bisan pa sa katahom sa palibot sa banika, dunay mga hagit dinhi alang niadtong nagapugas ug mga binhi sa kamatuoran sa Gingharian.
Gusto ba nimong mahimamat ang pipila sa among mga payunir, o bug-os panahong mga magmamantala sa Gingharian? Nganong dili mogugol ug usa o duha ka adlaw uban kanila samtang magsangyaw sila sa maayong balita? Una sa tanan, atong paminawon si Jaime ug Oscar samtang ilang hubiton ang mga kalipayan ug mga hagit sa usa sa maong adlaw sa habagatang Chile.
Usa ka Adlaw sa Buluhatong Pagsangyaw
“Misugod kamig gimok ug nabatyagan ang katugnaw nga mituhop sa among gamayng puy-anan. Nagsul-ob ug de-lanang medyas ug nagkalo pa gihapon, si Oscar mibangon. Iyang gihalingan ang sug-ang, gipasiga ang gamayng pang-init sa hangin aron moinit ang lawak, ug unya mibalik pagkatulog. Ngitngit pa sa gawas, ug among madungog ang ulan nga tibuok gabii mibundak. Mitan-aw kami sa bentana ug unya sa usag-usa. Oh, pagkaanindot unta nga magligidligid sa tibuok adlaw! Unya nahinumdom kami sa among plano alang sa tibuok adlaw ug sa gikinahanglang pagsangyaw diha sa usa ka hilit nga teritoryo nga wala maabot sa miaging tuig. Napukaw kami sa pagsugod.
“Sa among paggikan sa wala pay alas otso, paspas ang among paglakaw ug nanghinaot nga adunay mopasakay kanamo o dunay moagi nga trak, aron dali kaming makaabot sa hilit nga mga dalan padulong sa mga nalain nga mga balay ug mga balangay sa among teritoryo. Aniay nagpadulong nga traktor nga nagguyod ug bagon nga dunay pipila ka trabahante ang nagsakay. Mihunong ang drayber ug gipasakay kami. Malipayon kami nga, tungod sa ulan gabii, dili abogon ang among biyahe karon. Samtang nag-untol-untol kami sa dalan, among gipaambit ang maayong balita sa mga trabahante sa uma. Sa nanganaog na kami, gihatagan namo sila ug pipila ka magasin. Pagkadako sa among pasalamt nga tungod sa among pagsakay kami nakamenos ug 12 kilometros nga paglakaw!
“Dugay unya kini nga adlaw samtang among tadlas-tadlason ang kabanikanhan sa pagpangita sa mga takos. Sa bag-o pa kaming nagsugod sa among buluhaton dinhi, dili mi makasabot nganong mouyon ang mga tawo sa among isulti apan daw nagpanuko sa pagdawat ug mga literatura sa Bibliya. Among nasayran nga dili diay sila makamaong mobasa. Busa among nakaplagang mapuslanon kon sultihan sila nga ang among mga literatura maoy maanindot nga gasa alang sa ilang mga anak ug mga paryente, nga maoy mopaambit kanila sa sulod sa maong mga basahon. Ang kadaghanan sa among nakaestorya wala kaayoy kalibotanong mga kabtangan. Apan sanglit malipay silang mopaambit sa ilang nabatonan, kon madawat na nila ang mga literatura sa Bibliya, kasagarang hatagan nila kami ug mga itlog, patatas, beets, sibuyas, beans, balatong, ug garbanzos.”
Nakat-on si Jaime sa pagsugyot sa tagbalay dihang gustong moamot siya alang sa mga basahon sa Bibliya nga gihatag kaniya. Ngano? Usa ka higayon, ang mga payunir namauli nga nagdalang 15 kilos nga mga utanon, ug ang iyang kauban nagdaladalag buhi nga manok sa iyang bag sa mga basahon halos sa tibuok adlaw! Sagad mosugyot si Jaime ug merquén, usa ka palami nga sinagolan ug sili ug mga panakot. Ang asoy nagpadayon:
“Mitabok ug kaumahan, nakaabot kami sa pipila ka rucas [mga balay] sa lumad nga mga Mapuche [nagpasabot, “Mga tawo niining yutaa”]. Lisod makig-estorya sa gulang nga mga Mapuche, sanglit ang kadaghanan kanila makasulti lamang sa ilang lumad nga pinulongan. Kon dunay mga batan-on sa duol, sagad sila ang magsilbing mga maghuhubad. Sa among pagsuot sa kabanikanhan, among nahibalag ang mga tawo nga wala pa sukad makakita ug Bibliya ni makaadto ug dakong siyudad sama sa Temuco, ang kaulohan sa maong rehiyon. Usa ka hagit ang pagtabang kanila sa pagsabot kon sa unsang paagi ang mga kahimtang sa tibuok kalibotan nagakagrabe. Kinahanglang himoon namo kini nga lakang por lakang, nga nagapakita kanila kon sa unsang paagi ang lokal nga mga kahimtang nagabanaag sa mga hitabo sa ubang mga dapit.
“Sa nagkaupos ang adlaw, ang among gikapoy nga mga tiil nangayog pahulay. Ang panahon nag-usab-usab tali sa masanag nga adlaw ug kusog nga ulan nga dili magamit ang payong. Ang bag-ong gidaro nga mga umahan nagpabulit ug lapok sa among mga botas. Dihang among madunggan ang mga pulong nga Pase no más (Sulod), mapasalamaton kaming mosulod sa kosina ug tagamtamon ang kainit sa sug-ang, usa ka tasa nga ‘kape’ nga linaga gikan sa lugas, keso, ug bag-ong luto sa balay nga tinapay. Ah, kahumot sa bag-ong tinapay!
“Sa naulian sa kabaskog, mipadayon kami hangtod sa sayong kagabhion, gitabok ang mga kaumahan nga sagad walay koral, bisan tuod ug dunay panagsang mga uma sa trigo nga gikoralan ug mga tanom nga gitawag pica-pica, nga dalag ang bulak. Sanglit hapit nang mawala ang adlaw ug kinahanglan kaming makaabot sa laing dakong dalan aron makasakay sa kataposang biyahe sa bus balik sa lungsod, ang among 20 kilometros nga pagbaklay hapit nang matapos.
“Mipauli kami nga luwas ug walay kabilinggan, gikapoy apan malipayon, kay daghan kaming makalingaw nga kolokabildo uban sa mga samag-karnero. Human nakakaon, among gihisgotan ang tibuok adlaw ug unya giguyod ang among lapoy nga mga lawas paingon sa katre.”
Ang Pagbisita sa Chiloé
Ang kapupud-an sa Chiloé dunay pipila ka gagmayng mga isla. Ang kinadak-ang isla maoy 180 kilometros ang gitas-on ug lunhaw ang mga bungtod nga giulangan ug mga gagmayng mga lanaw. Pagkanindot sa mga talan-awon sa daplin sa dagat ug katahom sa mga balangay sa pangisda nga makita bisan asa ka moadto!
Sa lungsod sa Achao, tabok lang sa kinadak-ang isla, among mahibalag si Rubén ug Cecilia. Sa pag-abot nila sa Marso 1988, gipasidan-an sa lokal nga pari ang mga tawo nga ‘ayaw kamo paminaw sa magtiayong nagalibot sa tibuok isla nga nagahisgot mahitungod sa Bibliya.’ Ang iyang negatibong hunahuna nagpasira sa hunahuna sa uban apan nakapukaw ug kaikag sa pipila. Sa ulahi si Rubén ug Cecilia nagdumala ug 28 ka panagtuon sa Bibliya. Ang kadaghanan sa ilang gitun-an maoy mga magtutudlo, diin gigamit sa upat kanila ang mga basahon sa Watch Tower nga “All Scriptures Is Inspired of God and Beneficial” ug ang Akong Basahon sa mga Estorya sa Bibliya sa pagtudlo ug relihiyon sa ilang mga eskuylahan.
Giatiman ni Jehova kining kugihang mga payunir, nga nagabaktas ug hangtod 34 kilometros sa usa ka adlaw sa pagsangyaw sa Gingharian ug sa paghimog mga tinun-an. (Mateo 24:14; 18:19, 20) Usa ka adlaw, si Rubén ug Cecilia naglakaw duol sa baybayon sa dihang ilang namatikdan nga kon maghunas daghang choritos (usa ka matang sa amahong) nga sayon kuhaon. Nagsugod sa pagpanginhas si Rubén, apan unsaon nila sa pagdala niini sa balay? Nasulbad ni Cecilia ang problema. Ang iyang medyas nahimong mga bag. Duna karoy lutoon ang mga payunir alang sa lamiang panihapon!
Sa may amihanan sa Achao, duha ka bug-os panahong magmamantala sa Gingharian nga gitawag espesyal payunir nakig-uban sa gamayng kongregasyon sa Linao. Ang buluhatong pagsangyaw nagsugod didto sa tuig 1968, ug ang unang Saksi ni Jehova sa Linao nabawtismohan sa tuig 1970. Sulod sa upat ka tuig kining maong igsoong lalaki nag-inusara sa pagsangyaw ug giantos ang mga pagbiaybiay sa mga membro sa pamilya ug mga kaila. Sa kataposan, sa tuig 1974, ang iyang asawa misanong sa kamatuoran sa Bibliya ug nabawtismohan. Nasundan kini sa pagbawtismo sa upat niya ka igsoong lalaki sa unod, upat ka igsoong babaye, upat ka uyoan, unom ka pag-umangkong lalaki, ug usa ka bayaw ug iyang asawa. Ang kongregasyon nga naporma didto maoy usa ka dakong pamilya. Sa ulahi, tulo sa lima ka mga igsoon nagsugod pag-alagad ingong mga ansiano ug usa ingong ministeryal nga alagad.
Si Luis ug Juan maoy bug-os panahong mga magsasangyaw nga naghatag ug bug-os nga pagtagad sa ilang mga pagpugas ug binhi sa Gingharian sa Quemchi, usa ka gamayng lungsod nga 30 kilometros gikan sa Linao. Adlaw-adlaw, mokatkat silag mga koral, motabok ug mga patag nga baga ug mga tanom, ug motungas ug molugsong sa mga bungtod, nga kanunayng duyogan ug kusog nga hangin ug ulan. Aron maabot ang kasikbit nga mga isla, mogamit silag gagmayng mga baroto nga mobiyahe paingon sa isla sa Chiloé duha o tulo ka beses matag semana. Magpabilin sila sa isla sa pipila ka adlaw. Ang pagbiyahe gikan sa usa ka isla ngadto sa lain magpahimo sa usang anad sa yuta nga dagaton, apan ang pagkamapinadayonon ug kalulot sa mga islahanon makabawi gayod niini. Si Luis ug Juan gikuyogan ug laing magmamantala sa Gingharian, ug naningkamot sila nga maabot ang 11,500 ka molupyo sa ilang teritoryo. Bisag hinay ang pag-uswag, nalipay kaayo si Luis ug Juan nga 36 ang mitambong sa 1989 nga pagsaulog sa Memoryal.
Balik sa Kinadak-ang Isla
Mipadayon sa amihanan, among gitabok ang hiktin nga agianan sa dagat nga gitawag Chacao ug nakaabot sa kinadak-ang isla. Dinhing dapita, ang mga payunir nga si Ramón ug Irene nagsangyaw sa dakong teritoryo nga nag-apil sa nalain nga mga grupo sa Maullín, Carelmapu, ug Pargua. Ang mga Saksi sa isla sa Chiloé mobaktas ug usa ka oras ug unya mosakay ug transbordador (lantsa) sa pagtabok sa dagat ug motambong sa Kristohanong mga tigom sa Pargua. Si Ramón mobiyahe ug usa ka oras ug 20 minutos pinaagig bus gikan sa Maullín aron magdumala sa mga tigom nga kasagarang tambongan ug dobleng gidaghanon sa mga tawo kay sa mga magmamantala. Nganong dugay man kaayong biyaheon ang 38 kilometros? Tungod kay sigig hunong ang bus aron mopasakay sa mga pasahero nga daghag kargamentong mga prutas ug mga utanon, mga sinakong patatas ug sibuyas, ug usahay bisan buhi nga mga baboy ug manok. Ang bisan unsang dili makarga sa atop ikarga sa sulod sa bus. Ang resulta maoy usa ka dugay nga biyahe nga puno ug baho, mga talan-awon, ug mga kagahub.
Sanglit diyutay lang kaayo sa mga payunir ang dunay sakyanan, kon mabiyaan ka sa bus nga tigbiyahe sa mga lungsod mopahinabog dugay nga pagbaklay, gawas kon dunay mopasakay. Samtang misakay si Ramón ug ang usa ka estudyante sa Bibliya uban sa usa ka drayber, siya nangutana: “Komusta man ang pagsanong sa mga tawo sa inyong buluhaton?” Nakaalinggat sa ilang mausisaong mga siplat, siya miingon: “Ako ang pari niining lungsora, ug kamo mga Saksi ni Jehova. Sinati ko kaayo sa inyong buluhaton ug nakaangay ako sa inyong mga magasin.” Dihay igoigong mga pangutanag tubag sa wala pa kami manaog sa Pargua sa hustong panahon alang sa tigom. Daghan pa gayod ang mga pangutana sa pari nga matubag sa iyang pagpadayon ug basa sa atong mga basahon.
Dili masayon alang kang Ramón ug Irene ang pag-abot sa 20 ka balay aron magdumala ug pagtuon sa Bibliya. Ang uban atua sa tabok sa Maullín River o diha sa hilit nga mga baryo sa pangisda ug kinahanglang abton pinaagi sa gamayng sakayan. Bisag makalaay ang kusog nga mga ulan, dayag nga ang pag-antos nga ilang gipakita ug sa 18 pa ka magmamantala sa Gingharian nga nakatag diha niining teritoryo sa banika mibunga sa dihang 77 ang mitambong sa Memoryal.
Diha sa Los Muermos, ang bug-os panahong mga magmamantala sa Gingharian nga si Juan ug Gladys nagdumalag 23 ka pagtuon sa Bibliya. Ang dugayng mga pagbaktas sa lapokong mga dalan magantihan dihang ang binhi sa Gingharian mogamot sa mga kasingkasing sa mga tawong andam magpatudlo. Diha sa usa ka hilit nga dapit sa kabukiran duol sa dagat sa may Estaquilla, si Juan ug Gladys misangyaw sa usa ka dapit nga wala pa sukad maduaw. Ilang gihangyo ang usa ka estudyante sa Bibliya kon mahimo bang hulaman ang iyang kabayo sulod sa maong adlaw. “Oo,” siya mitubag. “Puwede bang mouban ako ninyo?” Naamgohan ni Juan nga pagtultol kadto ni Jehova. Dali kang masaag sa baga nga lasang, apan ang interesadong mga tawo sinati kaayo sa maong dapit ug gitultolan sila ngadto sa mga balay nga dili makita gikan sa mga dalan-dalan sa bukid. Gikapoy human sa siyam ka oras nga pagbaktas ug pagkabayo, ang usa sa mga espesyal payunir nangutana sa estudyante sa Bibliya kon unsay iyang gibati. Ang tawo mitubag: “Ang hangyo lamang nako ninyo mao nga iuban ninyo ako sa sunod higayon.” Kining mapabilhong tawo padayon sa espirituwal nga pag-uswag ug gibawtismohan sa Enero 1988. Ang iyang asawa gibawtismohan sa ulahi sa sirkitong asembliya.
Sa panahon sa pagduaw sa magtatan-aw sa sirkito, ang 11 ka mga magmamantala sa Estaquilla nalipay nga 110 ang mitambong sa pakigpulong sa publiko. Diha sa gamayng lungsod nga 1,000 ang molupyo duol sa Los Muermos, 66 ang mitambong sa Memoryal. Busa dako pa ang buluhaton niining dakong natad.—Mateo 9:37, 38.
Paamihanan, atong mahibalag ang mga payunir nga si Alan ug Fernando. Samtang naglakaw sila sa usa ka abogong dalan usa ka adlaw niana, ang usa ka drayber mipasakay kanila sa luyo sa iyang trak. Sa mikawas, nangatawa sila kay natabonan sila ug baga nga abog gikan sa ulo hangtod tiil. Ang pagpakatawa ug ang kalipay sa pagdumalag 20 ka pagtuon sa Bibliya sa mga balay nakatabang sa pagsagubang sa mga kalisod. Ug handurawa ang ilang kalipay dihang 65 ang mitambong sa Memoryal ug ang unang duha ka lumad miuban sa pagsangyaw sa pagkasunod bulan!
Mitabok sa Bío-Bío
Aron maabot ang mga samag-karnero duol sa Andes Mountains, kinahanglang tabokon ang usa ka pangpang diin nagdaguok ang tubig sa Subang Bío-Bío nga 50 metros sa ubos. Himoon kini diha sa dili-lig-ong kahoyng pundasyon nga nagbitay sa usa ka kable nga nagatabok sa pangpang. Uban ang panagana, mosaka ka ug imong birahon ang usa ka kambiyo aron moariya ang tungtunganan ug moligid paubos sa kable. Manggunit kag maayo sa kaptanan sa tungtunganan samtang kusog nga moagi ka sa tunga sa pangpang, diin malabyoglabyog ka hangtod nga mohunong. Human moginhawag lawom, usa pa ka kambiyo ang imong iduso-duso ug birabirahon, nga mopaaginod nimog hinay tabok sa pikas daplin. Dayag nga dili kini alang sa mga hadlokan! Apan, ginahimo kini sa usa ka igsoong babaye kada semana aron maabot ang mga samag-karnero sa usa ka layo nga balangay sa bukid!
Ang maayong panig-ingnan sa mga payunir ug mga magmamantala sa Ginghrian nagadasig sa mga interesado nga dunay mapabilhong mga kasingkasing sa paghimog samang paningkamot aron makatambong sa Kristohanong mga tigom. (Hebreohanon 10:24, 25) Mobiyahe ang usa ka pamilya ug 40 kilometros nga magkabayo paingon sa Subang Bío-Bío ug unya molakaw ug laing 12 kilometros ngadto Kingdom Hall.
Unsa ang mahinumdoman sa mga payunir kon ilang handomon ang nangaging mga katuigan? Ang mga bolkano ba nga naputos sa niyebe ang taluktok, maanindot nga kaumahan, ang dinaguok sa mga suba? Ang abog, ulan, lapok, ug layong mga pagbaktas? Oo, apan ang ilang mahinumdoman ilabina mao ang mahigalaong mga tawo nga misanong nga paborable sa maayong balita. Kining mga samag-karnero tino nga naghimo sa ilang mga kahago nga dili kawang. Pagkadakong kalipay ang pagpugas sa binhi sa Gingharian sa habagatang Chile!