Nakigtigom Uban sa mga Mahigugmaon sa Hinatag-sa-Diyos nga Kagawasan

ANG mga Saksi ni Jehova maoy tagsaon sa daghang paagi. Sila lamang ang nagasultig “putling pinulongan.” (Sofonias 3:9) Sila lamang ang nahiusa, nga nakabaton sa ilhanang timaan sa gugma nga gihubit ni Jesu-Kristo. (Juan 13:35) Ug sila lamang ang nagatagamtam sa kagawasan nga gipamulong ni Jesu-Kristo nga ipatungha sa kamatuoran, ingon sa natala diha sa Juan 8:32: “Kamo mahibalo sa kamatuoran, ug ang kamatuoran magahatag kaninyo ug kagawasan.”

Kadtong mga pulonga nga gitumong ni Jesu-Kristo, ang Anak sa Diyos, sa iyang mga tinun-an, napamatud-ang tinuod. Ug kini karon labi pang gipabilhan sukad masukad sa tanang mga Saksi ni Jehova nga mitambong sa “Mga Mahigugmaon sa Kagawasan” nga mga Distritong Kombensiyon. Napasilsil kanila sa programa sa kombensiyon ang nagkalainlaing bahin sa ilang kagawasan, kon unsaon nila sa paggamit niini, sa tulobagon nga nagauban sa ilang kagawasan, ug pagkabulahan nila nga nahimong mga tawong may kagawasan.

Kining tukma sa panahon ug praktikal nga mga kombensiyon nagsugod sa Amihanang Hemisperyo niadtong Hunyo 7, 1991, sa Los Angeles, California, U.S.A. Ang programa gibuksan sa 10:20 s.b. pinaagi sa presentasyon sa musika, gisundan ug usa ka awit ug pag-ampo. Ang pangbukas nga pakigpulong maoy puwersado nga presentasyon nga gipasukad sa Santiago 1:25. Sumala sa The Jerusalem Bible, kining bersikuloha mabasa: “Ang tawo nga motutok kanunay sa hingpit nga kasugoan sa kagawasan ug nagabatasan niana​—dili kay maminaw ra ug unya makalimot, kondili aktibong nagabuhat niana​—malipay sa tanan niyang pagbuhat.” Sama sa dihang manamin kita sa pagsuta kon unsay atong gikinahanglan aron mapaanyag pa ang atong panagway, sa ingon kita kinahanglan magpadayon sa pagtuki sa hingpit nga kasugoan sa Diyos nga iya sa kagawasan sa pagkat-on kon unsa nga kausaban ang atong kinahanglang himoon sa atong pagkatawo. Ug kita kinahanglang magpadayon sa pagpanamin.

Misunod ang pakigpulong sa tsirman, “Maayong Pag-abot, Kamong Tanan nga mga Mahigugmaon sa Kagawasan.” Ang mga Saksi ni Jehova nahigugma sa kagawasan, ug sila buot magpabiling may kagawasan. Gikutlo sa mamumulong ang legal nga mga awtoridad kinsa nagpakita nga wala gayoy kagawasan nga walay balaod. Oo, ang mga Kristohanon walay kagawasan sa pagbuhat sa ilang gusto apan may kagawasan sa pagbuhat sa kabubut-on ni Jehova. Buot nilang mapahimuslan sa bug-os ang ilang kagawasan apan dili sa pag-abuso niana. Ilabina sukad sa 1919 nga natagamtam sa mga Saksi ni Jehova ang nagakadakong kagawasan. Gisubay sa mamumulong ang mga pagpasiugda sa kagawasan diha sa mga tema sa kombensiyon ug Kristohanong mga publikasyon. Ang tanang mga kombensiyonista masayod ug dugang pa bahin sa hinatag-sa-Diyos nga kagawasan ug kon unsaon paggamit niana.

Kadtong tukma sa panahon nga mga pulong gisundan ug mga interbiyo sa mga mahigugmaon sa kagawasan kinsa nalipay nga nakatambong sa kombensiyon. Ang ingon niini nga mga kombensiyon maoy mga panahon sa pagmaya, sama sa tulo ka tinuig nga mga piyesta sa karaang Israel nga gitiman-an sa dagkong kasadya. Ang daghang interbiyo nagpamatuod nga ang mga kombensiyon maoy makapalig-on sa espirituwal nga panahon sa kalipay.

Unya miabot ang keynote nga pakigpulong, “Ang Katuyoan ug ang Paggamit sa Atong Hinatag-sa-Diyos nga Kagawasan.” Gikan niining pakigpulonga natun-an sa mga kombensiyonista nga si Jehova lamang ang may bug-os nga kagawasan tungod kay siya mao ang Supremong Awtoridad ug labing gamhanan. Hinunoa, alang sa iyang ngalan ug alang sa kaayohan sa iyang mga linalang, iya usahay kutohan ang iyang kagawasan pinaagi sa pagkahimong mahinay sa kasuko ug nagapugong-sa-kaugalingon. Ang tanan sa iyang may pangisip nga mga linalang may relatibong kagawasan, tungod kay sila nailalom kang Jehova ug gilimitihan sa iyang pisikal ug moral nga mga balaod. Gihatagan sila ni Jehova ug kagawasan alang sa ilang kalipay apan labina aron makahatag sila ug pasidungog ug kalipay kaniya pinaagi sa pagsimba kaniya. Tungod sa pagpahimulos sa ilang kagawasan, ang mga Saksi ni Jehova nakabaton ug tibuok kalibotang dungog tungod sa ilang maayong pamatasan ug kasibot sa ilang ministeryo.

Biyernes sa Hapon

“Okupado​—Sa Patayng mga Buhat o sa Pag-alagad Kang Jehova?” mao ang makapukaw sa hunahuna nga ulohan sa pakigpulong nga nagbukas sa sesyon sa Biyernes sa hapon. Ang patay nga mga buhat naglakip dili lamang unodnon kondili sa uban usab nga sa espirituwal patay, kawang, ug walay-bunga​—sama sa mga laraw sa pagpanapi. Niining bahina, ang matinud-anong pagsusi-sa-kaugalingon gikinahanglan sa pagtino kon ato bang giuna ang Gingharian diha sa atong kinabuhi.

May samang tumong mao ang misunod nga pakigpulong, “Pagtuman sa Atong Buluhaton Ingong mga Ministro sa Diyos.” Gipakita sa mamumulong nga dili angay magmakontento ang mga Kristohanon sa basta na lamang nakaalagad o sa pagkab-ot lamang sa kalab-otong mga oras. Buot nilang mahimong epektibo sa tanang bahin sa ilang Kristohanong ministeryo. Kining mga puntoha makusganong napasilsil sa mga hunahuna sa mga mamiminaw pinaagi sa mga demonstrasyon ug mga interbiyo. Ang tanan giawhag sa pagtuman sa ilang ministeryo kutob sa maarangan.

Sa pakigpulong “Usa ka Katawhang May Kagawasan Apan May Tulobagon,” gipasiugda sa mamumulong nga bisan tuod gimahal sa katawhan ni Jehova ang kagawasan nga nahatag sa kamatuoran kanila, angay nilang hinumdoman nga may nagauban kana nga tulobagon. Angay nilang gamiton ang ilang kagawasan, dili ingong pasangil alang sa daotang pamatasan, kondili sa kadayeganan kang Jehova. Ingong mga Kristohanon, sila may tulobagon “sa labawng mga awtoridad” ug angay mokooperar usab sa mga ansiano sa kongregasyon. (Roma 13:1) Dugang pa, sila may tulobagon usab pinaagi sa ilang pamiste, pamostura, ug pamatasan. Dili gayod nila hikalimtan nga “ang matag usa kanato magahatag unyag husay mahitungod sa iyang kaugalingon ngadto sa Diyos.”​—Roma 14:12; 1 Pedro 2:16.

Unya misunod ang paghisgot sa panginahanglan alang sa tanang Kristohanon nga “Magmaisogon Samtang ang Kataposan Niining Kalibotana Haduol Na.” Samtang ang katawhan mahadlokon sa kon unsay moabot, ang mga Kristohanon kinahanglang magmaisogon sa pagtuman sa ilang ministeryo. Ang pagkamaisogon maoy resulta sa pagsalig kang Jehova, kay kon labaw nga mahadlok ang usa ka Kristohanon nga dili-makapahimuot sa Diyos, labaw na siya nga dili-mahadlok sa mga linalang. Ang pagsag-ulo ug makahatag kalipay nga mga teksto makalig-on sa usa ka tawo nga magmaisogon. Aron mahimong malig-on sa espirituwal ug maisogon, kinahanglang pahimuslan usab pag-ayo sa mga alagad sa Diyos ang tanang kahigayonan sa pagpakig-uban sa isigkamagtutuo. Ang matag usa usab kinahanglan mahinumdom sa bahin nga ginadula sa pag-ampo diha sa pagkahimong maisogon. Pinaagi sa pagpabiling walay-kahadlok, maampingan sa mga Kristohanon ang maayong relasyon uban ni Jehova nga Diyos.

Ang programa sa unang adlaw gitiklopan pinaagi sa matudloon kaayong drama Gihatagan ug Kagawsan sa Pagtuboy sa Matuod nga Pagsimba. Gipakita niini kon sa unsang paagi ang usa ka modernong-adlaw nga pamilya nakakat-on ug leksiyon gikan kang Esdras ug sa iyang grupo sa mga 7,000 nga mihimog pagsakripisyo aron makabalik sa Jerusalem. Kini nagapaarang sa matag usa sa kombensiyonista sa pagsusi kon unsang mga butanga ang iyang pagaunahon ug sa pagtan-aw kon unsaon niya sa pagpauswag sa iyang pribilehiyo sa pag-alagad. Kining dramaha may pagtulon-an alang sa mga tigulang ug sa mga batan-on.

Sabado sa Buntag

Human sa musikal nga programa, awit, pag-ampo, ug paghisgot sa inadlaw nga teksto, apil sa programa sa Sabado sa buntag mao ang usa ka simposyom nga nag-ulohan “Kagawasan nga May Tulobagon Diha sa Pamilya.” Diha sa unang bahin, “Kon sa Unsang Paagi ang mga Amahan Makasundog Kang Jehova,” ang mga amahan gitambagan sa daghang paagi diin ilang masundog ang atong langitnong Amahan. Ang 1 Timoteo 5:8 nagsugo nga sila motagana dili lamang sa materyal kondili sa espirituwal usab. Ilang ginasundog si Jehova pinaagi sa pagkahimong maayong mga magtutudlo sa ilang pamilya ug sa mahigugmaong pagpadapat sa disiplina kon gikinahanglan. Kining mga puntoha gipasundayag pinaagi sa pipila ka interbiyo.

“Ang Nagapaluyong Papel sa Asawa” maoy sunod nga bahin niining simposyom. Kini gisugdan pinaagi sa pagpasiugda nga ang asawa adunay dungganong posisyon diha sa Kristohanong pamilya, ang pagkahimong mapaluyohon. Unsay gikinahanglan niini kaniya? Nga siya tukmang magpasakop, dili pugson ang iyang bana sa pagbuhat ug usa ka butang nga siya lamang ang may gusto. Kinahanglan niyang atimanon ug maayo ang iyang mga obligasyon sa iyang bana ug mga anak, ug siya makabaton ug tinuod nga katagbawan gikan sa paghupot sa iyang balay nga mahinlo ug hapsay. Ug ingong usa ka Kristohanong ministro, hayan siya may mga kahigayonan sa pagpakigbahin sa pag-alagad sa kanataran. Ang interbiyo sa usa ka pamilya nagapasiugda sa kaalam niining maong tambag sa Kasulatan.

Ang mga batan-on nakadawat ug pagtagad diha sa bahin sa “Mga Kabataan nga Nagapamati ug Nakakat-on.” Pinaagi sa pagbansay sa ilang mga anak sa pagpamati ug pagkat-on, ang mga ginikanan nagahatag ug pasidungog kang Jehova ug nagapakitag gugma sa ilang espirituwal nga mga igsoon ug sa ilang kaugalingong mga anak. Ang usa ka malig-ong bugkos maglungtad tali sa mga ginikanan ug mga anak kon de-kalidad nga panahon ang ilang dungang ginagugol. Ang mga ginikanan angay masangkapan sa pagtubag sa mga pangutana sa ilang mga anak ug sa pagpukaw sa ilang kauhaw alang sa kahibalo. Sa makausa pa, gipakita sa mga interbiyo kon unsaon kini sa paghimo.

Sunod mao ang maayong tambag “Hupti ang Inyong Kaugalingon nga Walay Sabod sa Pag-alagad Kang Jehova.” Sa unsang paagi kini mahimo? Pinaagi sa paghupot nga libre gikan sa pagpangagpas ug kalibotanong mga karera, makahurot-sa-panahong mga pasatiempo, ug materyalistikong mga tumong. Si Jesus ug si apostol Pablo nagbilin kanato ug maayong mga pananglitan pinaagi sa pagkamasakripisyohon-sa-kaugalingon. Ang katawhan ni Jehova kinahanglan magbaton ug usa ka yanong mata, nagatutok diha sa intereses sa Gingharian. Kon bahin sa pagbaton ug mga materyal nga butang, mas maalamong magtigom karon ug mamalit unya kay sa pagpalit karon ug bayad unya. Ang mga batan-on kinahanglang magbantay batok sa paghanduraw labot sa seksuwal nga kalipay ug kalibotanong mga karera. Ang interbiyo sa usa ka dili-minyo nga payunir nagpakita sa mga panalangin nga moabot kon ang usa magpabiling walay sabod sa pag-alagad ni Jehova.

Ang programa sa Sabado sa buntag gitapos sa pakigpulong “Sulod Ngadto sa Kagawasan Pinaagi sa Pagpahinungod ug Bawtismo.” Ang mga kandidato sa bawtismo gipahinumdoman nga samtang ang kalalangan nabalhog ngadto sa kaulipnan tungod sa pagrebelde ni Adan, ang dakong Manluluwas, si Jesu-Kristo, nagbukas sa dalan sa kagawasan pinaagi sa iyang paghalad. Gipakita sa mamumulong kon unsay nalangkit sa paglingkawas aron may kagawasan sa pagtuman sa kabubut-on sa Diyos ug gipasiugda ang mga kaakohan ug mga panalangin nga mahimong mabatonan sa mga gipangbawtismohan.

Sabado sa Hapon

Gisugdan ang programa sa hapon sa Sabado pinaagi sa matukion sa kalag nga pangutana “Kang Kinsang Kaayohan ang Imong Ginapangita?” Gipabanaag sa kalibotan ang nagatinguha-sa-kaugalingon nga espiritu sa Yawa. Apan, angay sundogon sa mga Kristohanon ang masakripisyohon-sa-kaugalingon nga espiritu ni Jesu-Kristo. Pagkamaayong panig-ingnan ang iyang gipakita! Iyang gibiyaan ang langitnong himaya ug unya gisakripisyo ang iyang tawhanong kinabuhi alang sa atong kaayohan. Ang mga hagit kon kang kinsang kaayohan ang atong ginatinguha mogimaw kon may mga dili pagsinabtanay sa mga Kristohanon bahin sa negosyo o mga butang sa panalapi, kon may mga kasungian sa personalidad, ug uban pa. Kining mga butanga makasulay sa Kristohanong gugma. Apan pinaagi sa pagtinguha sa kaayohan sa uban, tino nga maamgohan sa usa ka tawo ang dakong panalangin sa paghatag, ug siya makabaton sa pag-uyon ni Jehova.

Unya misunod ang suod nga nalangkit nga tema “Pag-ila ug Pagbuntog sa Espirituwal nga mga Kahuyangan.” Gipasiugda niining pakigpulonga ang panginahanglan sa pag-ila sa mga simtoma sa espirituwal nga mga kahuyangan ug unya madaogong molihok sa pagpakigbugno aron mabuntog si Satanas ug ang iyang mga lit-ag. Kinahanglang ugmaron sa mga alagad ni Jehova ang halalom nga gugma alang kaniya ug dumtan ang daotan. Kini nagkinahanglan nga sila makaila kang Jehova pinaagi sa regular, matumonganong pagtuon sa Bibliya sa personal ug sa pamilya. Kinahanglan nilang likayan ang tanang porma sa kalingawan nga nagahimaya sa kapintasan ug seksuwal nga imoralidad. (Efeso 5:3-5) Ang regular nga pag-ampo ug pagtambong sa mga tigom usab maoy sukaranan sa kalamposan sa pagbuntog sa espirituwal nga kahuyangan.

Tingali nahimong tema sa mga kolokabildo kay sa ubang nahatag na nga pakigpulong sa kombensiyon mao kanang nag-ulohan “Ang Kaminyoon ba Mao ang Yawi sa Kalipay?” Mao gayod kanay gihunahuna sa mga batan-on! Apan gipatin-aw sa mamumulong nga dunay dili-maihap matinumanon espirituhanong mga linalang nga malipayon bisan tuod sila dili-minyo, sama sa daghang dedikadong mga Kristohanon nga malipayon kaayo bisag sila wala mabugkos diha sa kaminyoon. Dugang pa, daghang minyong mga magtiayon ang dili malipayon, ingon sa gipakita sa hataas nga porsiento sa diborsiyo. Ang himoon lang sa usa mao ang pagpalandong sa daghang panalangin nga ginatagamtam sa tanang dedikadong mga Kristohanon sa pagkaamgo nga ang kaminyoon, bisag usa ka panalangin, dili mao ang yawi sa kalipay.

Gisundan kini sa usa ka simposyom nga “Kristohanong Kagawasan sa Atong Panahon.” Gihisgotan sa unang mamumulong ang bahin sa “Pagtimbangtimbang sa mga Bahin sa Atong Kristohanong Kagawasan.” Kini naglakip sa kagawasan gikan sa bakak relihiyosong mga pagtulon-an sama sa Trinidad, pagkadili-mamatay sa kalag, ug walay kataposang pagsakit. Unya anaa ang kagawasan gikan sa pagkaulipon sa sala. Bisan tuod ang mga Kristohanon dili-hingpit, sila nahigawas gikan sa daotang bisyo sama sa pagpanabako, pagsugal, paghuboghubog, ug pagpatakag pakigsekso. May kagawasan usab sa pagkawalay-paglaom, tungod kay sila dunay paglaom sa Paraiso nga nagatukmod kanila sa pagsulti ngadto sa uban mahitungod niini.

Gibangon sa misunod nga mamumulong ang pangutana “Kamo ba sa Personal Nagamahal Niini nga Kagawasan?” Ang pagmahal nagkahulogan ug pagpangga, paggalam nga maampingon. Sa pagbuhat niana, ang alagad sa Diyos angay magbantay nga matintal sa paglapas sa mga utlanan sa Kristohanong kagawasan. Ang kagawasan sa kalibotan maoy malimbongon nga kabakakan, tungod kay kini mosangpot sa pagkaulipon sa sala ug pagkadunot.

Ang kataposang mamumulong niini nga simposyom mihisgot bahin sa ulohang “Mga Mahigugmaon sa Kagawasan Nagabarog nga Malig-on.” Sa paghimo niana, ang mga Kristohanon kinahanglang magpabiling suod sa ilang langitnong mga ginikanan, si Jehova ug iyang samag-asawa nga organisayon. Ang katawhan ni Jehova dili makatugot sa ilang kaugalingon nga madala sa propaganda sa apostata; kinahanglang ilang isalikway kadtong moduol sa pagtanyag ug imoral nga mga sugyot. Aron makabarog sa diyosnong kagawasan, ang mga Kristohanon kinahanglang “magkinabuhi diha sa espiritu.”​—Galacia 5:25.

Ang pangataposang pakigpulong sa adlaw maoy tinuod nga makapalipay. Kini nag-ulohan “Ang Labing Bantogang Tawo nga Nabuhi Sukad.” Si Jesu-Kristo mao ang labing bantogang tawo, tungod kay siya nakaapektar sa kinabuhi sa katawhan nga mas kusganon kay sa tanang mga kasundalohan, kusog sa kadagatan, parliamento, ug mga hari kon tiponon. Siya mao ang anak sa Diyos, kinsa naglungtad sa langit una pa mianhi sa yuta. Pagkamaayo ang pagsundog ni Jesus sa iyang langitnong Amahan diha sa iyang gisulti ug gipanudlo ug sa iyang pagkinabuhi nga siya nakaingon: “Ang nakakita kanako nakakita usab sa Amahan.” (Juan 14:9) Pagkamaayo ang pagpasundayag ni Jesus nga ang “Diyos gugma”! (1 Juan 4:8) Human sa paghisgot bahin sa mga hiyas ni Jesus, ang mamumulong miingon nga usa ka seryal sa mga artikulo nga nag-ulohang “Kinabuhi ug Ministeryo ni Jesus” nga gipatik sa Ang Bantayanang Torre gisugdan niadtong Abril 1985. Sa pagtubag sa daghang mga hangyo, ang Sosyedad karon nagluwat ug bag-ong libro Ang Labing Bantogang Tawo nga Nabuhi Sukad. Kini dunay 133 ka kapitulo ug gipatik sa bug-os nga kolor. Ang materyal diha sa seryal giedit, ug ang tanan niini giipon diha sa 448 ka panid nga libro. Sa pagkamatuod, kining adlawa sa kombensiyon gitapos sa dakong kalipay!

Sa Buntag sa Dominggo

Sayo sa sesyon sa buntag-sa-Domingo gihimo ang simposyom “Nagaalagad Ingong Mangingisda sa mga Tawo.” Ang pakigpulong “Pagdakop ug Isda​—Literal ug Simbolikal” nahimong pasikaranan alang sa nagsunod nga mga pakigpulong. Gipakita sa mamumulong nga human gipahinabo ni Jesus ang milagrosong pagdakop ug isda, iyang gidapit ang mga mangingisda nga nalangkit sa pagkahimong mangingisdag mga tawo. Sa taas-taas nga panahon, gibansay ni Jesus ang iyang mga tinun-an nga mahimong mga mangingisda sa mga tawo, ug sugod sa Pentekostes 33 K.P., sila malamposon sa pagtabang sa panon-panon nga mga lalaki ug babaye sa pagkahimong mga tinun-an.

Gihisgotan sa misunod nga mamumulong ang bahin sa sambingay sa pukot nga narekord sa Mateo 13:47-50. Iyang gipatin-aw nga ang simbolikong pukot naglakip sa dinihogang mga Kristohanon ug Kakristiyanohan, ang ulahi tungod sa nahimong paghubad, pagpatik, ug pag-apod-apod sa mga Bibliya, apan kini nga mga paningkamot nakatigom ug daghan kaayong dili-maayong isda. Ilabina sukad sa 1919 nga dihay buluhaton sa paglain, diin ang dili-maayong isda ginalabay, samtang ang mga maayo ginatigom ngadto sa samag-panudlanan nga mga kongregasyon nga nakatabang sa pagpanalipod ug pagpatunhay sa matuod nga mga Kristohanon alang sa balaang pag-alagad.

Gipasiugda sa ikatulong diskurso, “Pagpangisdag mga Tawo Diha sa Katubigan sa Kalibotan,” ang kaakohan sa tanang dedikadong mga Kristohanon sa pagpakig-ambit sa tibuok kalibotang pagpangisda. Karon kapin sa 4,000,000 ang nagapakig-ambit niining buluhatona diha sa kapin sa 200 ka kayutaan, ug ning ulahing katuigan kapin sa 230,000 ang ginabawtismohan matag tuig. Ang tanang katawhan ni Jehova giaghat sa pagpauswag sa ilang kahanas sa pagpangisda, ug ubay-ubayng malamposong mga “mangingisda” ang giinterbiyo.

Sa misunod nga pakigpulong, nga nag-ulohan “Nagpabiling Nagatukaw Niining ‘Panahon sa Kataposan,’” usa-usang gibatbat sa mamumulong ang pito ka giya aron matabangan ang katawhan sa Diyos nga makapabiling nagatukaw: pakigbugno sa mga kalinga, pag-ampo, pagpalanog sa pasidaan bahin sa kataposan niining sistema nga magpabilin sa organisasyon ni Jehova, pagsusi-sa-kaugalingon, pagpalandong sa natuman nga mga tagna, ug sa paghinumdom nga ang ilang kaluwasan duol na kaayo kay sa panahon nga nahimo silang mga magtutuo.

Ang programa sa buntag gitapos sa paghisgot bahin sa “Kinsa ang Makalingkawas sa ‘Panahon sa Kalisdanan’?” Gipakita sa mamumulong kon sa unsang paagi ang tagna ni Joel may diyutayng katumanan sa panahon sa mga apostoles, may dugang katumanan karon, ug may bug-os katumanan sa duol nga umaabot.

Dominggo sa Hapon

Ang programa sa hapon gisugdan ug pakigpulong publiko, “Paghimaya sa Bag-ong Kalibotan sa Kagawasan sa Diyos!” gipadayon niini nga pakigpulong ang tema sa kombensiyon nga kagawasan. Gipatin-aw nga ang Pulong sa Diyos nagatagna ug usa ka bag-ong kalibotan diin may kagawasan gikan sa pagdaogdaog pinaagi sa bakak relihiyoso, politikanhon, ekonomikanhon, ug rasanhong mga elemento. May kagawasan usab gikan sa sala ug kamatayon. Ang hingpit nga panglawas ipasig-uli aron ang katawhan makaarang sa pagkinabuhi sa walay kataposan sa kalipay diha sa paraiso sa yuta. Busa, ang mga mahigugmaon sa pagkamatarong may katarongan sa pagbayaw sa Magbubuhat sa bag-ong kalibotan pinaagi sa paghugyaw: “Salamat kanimo, Jehova, tungod sa kagawasan sa kataposan!”

Ang publikong pakigpulong gisundan ug usa ka butang bag-o alang sa Distritong kombensiyon​—usa ka panaghisgot sa tun-anan sa semana sa Ang Bantayanang Torre. Unya ang kombensiyon gitapos pinaagi sa makapukaw nga pakigpulong ug tambag “Mga Mahigugmaon sa Kagawasan, Padayon sa Pag-uswag.” Lakbit nga gihisgotan sa mamumulong ang dagkong mga punto sa tema sa kombensiyon nga kagawasan. Iyang gipasiugda kon unsa ka malipayon ang katawhan ni Jehova tungod sa ilang kagawasan, usa-usang gibatbat ang mga paagi sa nahimong mga pag-uswag sa mga Kristohanon, ug giaghat sila sa pagpadayon sa pag-uswag nga nahiusa aron makaani ug dugang mga panalangin. Siya mitapos uban sa mga pulong: “Samtang atong ginahimo kini, hinaot si Jehova padayong magapanalangin sa tanan aron kita padayong magmauswagon ingong mga mahigugmaon sa kagawasan.”

“Ang kalalangan nailalom sa kakawangan, dili sa kaugalingong pagbuot niini kondili sa pagbuot niya nga nagpailalom niana, uban sa pasikaranan sa paglaom kay ang kalalangan ipagawas ra gikan sa kaulipnan sa pagkadunot ug makabatog mahimayaong kagawasan sa mga anak sa Diyos.”​—Roma 8:20, 21.

[Hulagway sa panid 25]

Usa ka batan-ong delegado sa kombensiyon sa Prague, Czechoslovakia

[Hulagway sa panid 26]

2. Gibawtismohan ingong usa sa mga Saksi ni Jehova sa Tallinn, Estonia

3. Ang bag-ong publikasyon nakahatag kalipay sa mga kombensiyonista sa Usolye-Sibirskoye, Siberia

4. Nagluwat sa “New World Translation of the Holy Scriptures” sa Czech ug Slovak diha sa kombensiyon sa Prague