Pagtigom “sa Tilinguhaong mga Butang” sa Polandia

ANG Polandiya ginaingon nga usa ka Katolikong nasod. Sumala sa opisyal nga estadistika, 93 porsiento sa populasyon iya sa Katolikong Simbahan. Ugaling, ang bag-o pang politikal ug sosyal nga mga kausaban nga nahitabo didto, may dakong epekto sa katawhan ug sa ilang relihiyosong kinabuhi. Ang mga surbi nagpaila nga mga 50 porsiento lamang niadtong gisukna nag-isip sa ilang kaugalingon nga matinumanong mga Katoliko.

Sa Mayo 1989, ang mga Saksi ni Jehova legal nga giila ingong usa ka relihiyosong organisasyon sa Polandiya. Sukad niadto, mga 11,000 ka bag-ohan mikuyog kanila ingong mga magmamantala sa maayong balita sa Gingharian. Karon kapin sa 106,000 ka magmamantala sa Gingharian ang nakig-uban sa kapin 1,300 ka kongregasyon, ug 200,422 ka tawo ang mitambong sa 1991 nga pagsaulog sa Memoryal sa kamatayon ni Kristo. Mao nga, ang gitagna nga pagtigom ‘sa tilinguhaong mga butang sa kanasoran’ nagakahitabo diha sa Polandiya. (Haggeo 2:7) Ning bag-o pa, ang nahimong-ulohan-sa-balita nga internasyonal nga mga kombensiyon sa mga Saksi ni Jehova gihimo sa Polandiya. Apan ang pagtan-aw sa gagmayng mga lungsod nianang nasora ilabinang magpakita kon sa unsang paagi ang pagtigom nga buluhaton nagakahitabo nianang yutaa.

Mga Payunir Nagbukas sa Dalan

Ang Sztum usa ka lungsod sa mga 10,000 ka molupyo nga nahimutang duol sa bukana diin ang Subang Vistula naghaw-as ngadto sa Dagat Baltic. Kining lungsora dugay nang giisip nga lisod nga teritoryo kon bahin sa pagwali nga buluhaton. Niadtong 1987 dihay walo lamang ka magmamantala sa maong dapit. Ugaling, ang mga butang nagsugod pagkausab sa dihang ang mga payunir, o bug-os panahon nga mga magmamantala sa Gingharian, nangabot. Sa ikalimang tigom, nga gihimo sa usa ka sinehan, 100 ka interesadong tawo ang mitambong! Usa ka kongregasyon ang naporma pagkatapos sa duha ka tuig nga pagkugi. Karon ang 90 ka magmamantala may kaugalingon nang Kingdom Hall, ug 150 ka tawo ang nagatambongan sa ilang mga tigom sa regular.

Sama sa gidahom, ang pagsupak sa wala madugay miabot gikan sa Katolikong Simbahan. Usa ka “espesyalista” nga madre mihatag ug pila ka makadaot nga mga pakigpulong bahin sa mga Saksi, nag-akusar kanila nga nagtudlo ug bakak nga mga doktrina. Apan ingon sa subsob mahitabo, kini misumbalik. Ang iyang mga pakigpulong nakapaikag lamang sa mga tawo sa pagsusi sa mga butang. Daghan kanila nakakat-on sa kamatuoran ug sa pagkakaron mga regular payunir na! Sila miingon: ‘Samtang nagtuon sa kamatuoran, kami naghunahuna nga ang tanan nga gustong mahimong Saksi kinahanglang mahisama sa iyang magtutudlo, nga nagkahulogan nga mahimong payunir.’ Busa ang espiritu sa pagpayunir mituhop sa tibuok kongregasyon.

Ingong sangpotanan, mga 180 ka pagtuon sa Bibliya sa balay ang gidumala diha sa dapit. Pinaagi sa librong Ikaw Mabuhing Walay Kataposan sa Paraiso sa Yuta, ang pila gitudloan ngani sa pagbasa. Sa samang panahon, sila nakakat-on sa kamatuoran. Ang regular napulo-ka-minutos nga pagtuon sa Bibliya ginadumala uban sa usa ka pundok sa mga bilanggo sa lokal nga prisohan sa dihang sila manggawas sa paghinlo sa mga karsada. Usa kanila milaban sa usa ka Saksi sa dihang usa ka lumalabay nga babaye nagsugod sa pag-insulto kaniya. Siya midagan ngadto sa igsoong babaye, gikuha ang librong Ikaw Mabuhi gikan sa iyang kamot, giisa kini, ug nangutana sa babayeng nanginsulto: “Dili ka ba makabasa? Unsay nasulat dinhi? Ikaw mabuhing walay kataposan sa Paraiso sa yuta! Nakadungog ka ba sukad niining butanga? Nan ngano man nga giinsulto mo ang Diyos ug ang iyang mga magsisimba?”

Gihisgotan sa Lungsod

Ang Kruszwica, kanhi iladong kabisera sa Polandiya, maoy kota sa Katoliko. Bisan sa tungatunga sa 1990, pipila lamang ang mga Saksi sa iyang 9,300 ka molupyo. Apan ang dagayang panalangin ni Jehova midangat sa mga paningkamot sa mga magmamantala sa Gingharian.

Kay nakamatikod sa pagkasalingkapaw sa ilang espirituwal nga mga pangulo, dugang ug dugang mga tawo​—ilabina mga batan-on—​miliso ngadto sa mga Saksi alang sa mga tubag. Sulod sa mubo kaayong panahon, 20 ka pagtuon sa Bibliya sa balay ang nasugdan. Ang kura paroko naghatag ug pila ka dili maayong mga sermon mahitungod sa mga Saksi ni Jehova, apan kini wala makapugong sa sinserong mga tawo sa pagtambong sa ilang mga tigom. Ang mga Saksi nahimong pangunang topiko sa mga estoryahay diha sa mga tindahan ug mga parke ug ngani diha sa simbahan. Unom ka bulan sa ulahi, duha ka dagkong grupo sa pagtuon-sa-libro ang naporma. Ang Kruszwica karon may aktibo kaayo nga kongregasyon sa mga 35 ka magsisimba kang Jehova. Sila nagadumala ug 75 ka pagtuon sa Bibliya sa balay ug puliki sa paghakot “sa tilinguhaong mga butang” nga kas-a gibilanggo sa bakak nga relihiyon.

Usa kanila mao ang 23-anyos nga si Bogdan, usa ka membro sa sarado Katoliko nga pamilya. Siya nahinumdom: “Kanhi ako tig-inom, tigtabako, ug may imoral nga kinabuhi. Ako nailhang usa ka punk ug usa ka gubtanon, ug daw walay usa ang nagtagad. Hinuon, sa dihang nagsugod ako pagtuon sa Bibliya, ang akong inahan naghulga sa paghilo sa iyang kaugalingon. Kay dili makasagubang sa pagpiut, akong giputol ang tanang pakigkontak sa mga Saksi. Sa ulahi, tungod sa mahigugmaong tabang sa espesyal nga mga payunir, ako nakaarang sa pagbiya gikan sa tanang daotang mga batasan. Kay nabawtismohan sa 1991 ‘Mga Mahigugmaon sa Kagawasan’ Distritong Kombensiyon, ako nakapili sa bug-os panahong ministeryo ingong akong tumong sa kinabuhi ug nag-oksilyare payunir sukad niadto.”

Ang bayente-uno anyos nga si Slawomir nalangkit sa espiritismo ug Satanismo, nga iyang gisalikway sa dihang iyang nakita nga ang Bibliya nagsaway sa maong mga buhat. “Apan si Satanas dili mohunong,” matud niya. “Usa ka gabii ang record player nagsugod sa pagtokar nga wala patokara, ug ako nakadungog sa satanikong musika, bisan tuod ako nang gikuha gikan sa balay ang tanang butang may kalabotan sa pagsimba sa Yawa. Ako miampo kang Jehova, ug iya akong gitabangan nga makabaton pag-usab ug espirituwal nga pagkatimbang. Usa ka sikyatrista nga akong ginakunsolta sa aghat sa akong mga ginikanan nakasabot sa dakong pag-uswag sa akong kahimtang ug nakahinapos nga ako himsog. Siya misulat sa akong talaan: ‘Giayo sa mga Saksi ni Jehova.’”

Pagsukol sa Kalibotanong Espiritu

Sa habagatan-kasadpan sa Kruszwica mao ang Środa Śląska. “Ang tilinguhaong mga butang” nanungha usab diha sa gamay nga lungsod sa 9,000 ka tawo. Upat ka tuig sa miagi, may usa lamang sa atong espirituwal nga igsoong babaye ang nagpuyo didto. Karon, hinuon, ang gidaghanon sa mga magmamantala sa Gingharian misaka sa 47. Daghan sa mga Saksi nahulog kas-a sa lit-ag sa espiritismo, pagkagiyan sa droga, ug imoralidad. Sila mibati nga ang hinungdan niini mao gayod ang espirituwal nga kahaw-ang nga naglungtad diha sa simbahan nga makahimo lamang sa pagsaway sa espirituwalidad sa katawhan, dili sa pagtabang kanila. Ang mga Saksi nagahatag sa mga tawo ug tinuod nga tabang.

Gihimo sa mga batan-on sa kongregasyon ang tunghaan nga ilang personal nga teritoryo sa pagwali nga buluhaton. “Ang akong mga kaeskuyla nagsigeg ingon nako: ‘Giusikan nimo ang imong pagkabatan-on,’” matud pa sa 18-anyos nga si Kasia. “Apan ako nakalikay sa daghang mga kasamok, ug ang akong kinabuhi may kahulogan. Ako nagdumala ug daghang pagtuon sa Bibliya sa eskuylahan ug wala magpasagad sa akong mga homwork ni sa akong personal nga pagtuon. Ang mga babaye nga nag-ingon nga ‘giusikan ko ang akong pagkabatan-on’ mga inahan na, nakigbugno sa patong-patong nga suliran.”

Ang mga publikasyon sa Watch Tower nahimong popular kaayo diha sa lokal nga mga eskuylahan. Pananglitan, usa ka magtutudlog Polako miingon sa iyang mga estudyante sa pagsunod sa yanong pinulongan sa atong basahon nga Pagmata! ingong modelo diha sa pagsulat ug mugbong mga sulat. Ang oksilyare payunir nga si Ewa nakakaplag sa brosyur nga School and Jehovah’s Witnesses nga mapuslanon kaayo. “Nakaapresyar gayod ako niining publikasyona. Ang akong mga magtutudlo sinati kaayo niana. Wala gayod akoy bisag unsang suliran sa pagpananghid sa dili pagtambong sa klase aron makatambong sa dagkong mga kombensiyon.” Ang maong maayong tinamdan sa bahin sa mga batan-on nakapalipay sa kasingkasing ni Jehova.​—Proverbio 27:11.

Banggiitang mga Kriminal Nagbag-o

Sa sidlakan sa Środa Śląska mao ang Strzelce Opolskie, dunay duha ka prisohan. Ang usa maoy binantayan-pag-ayo nga prisohan alang sa banggiitang mga kriminal. Ang mga Saksi sa regular nagabisita niining duha ka silotanan nga mga institusyon sa pagdala sa kamatuoran ngadto sa mga bilanggo, diin daghan kanila binilanggo usab sa Babilonyang Bantogan, ang tibuok kalibotan nga imperyo sa bakak nga relihiyon.​—Pinadayag 18:1-5.

Ang mga Saksi nagtuon sa Bibliya uban sa indibiduwal nga mga bilanggo ug sa gamayng mga grupo sa bilanggo, ang pila kanila nabawtismohan. Bisan tuod sila magpabilin sa bilanggoan hangtod sa tagal sa ilang silot, sila aktibong nagasangyaw sa maayong balita ngadto sa ubang mga bilanggo. Ang usa ka bilanggo nga nagapangandam alang sa bawtismo nakahimo sa tagsaong kausaban nga ang mga tinugyanan sa bilanggoan nagtugot kaniya sa pagpauli makausa sa usa ka semana. Ang uban nagsulat ngadto sa ilang mga pamilya nga nagpahayag sa ilang determinasyon sa paggula sa bilanggoan, dili ingong mga kriminal, kondili ingong mga Saksi ni Jehova.

Ang warden sa usa ka prisohan nagreklamo nga ang Katolikong mga pari tigduawan apan walay nalampos. Siya nangutana sa mga Saksi: “Unsay nakapaarang kaninyo sa pagpabag-o ug pagpasugod ug bag-ong kinabuhi niining mga tawhana?” Usa ka sulat gikan sa usa ka bilanggo ngadto sa iyang pamilya nagatubag: “Dinhi sa bilanggoan, gipadayag sa mga Saksi ni Jehova kanako ang mahitungod sa kahibulongang saad sa Diyos labot sa bag-ong kagamhanan, sa Gingharian ni Jehova, nga sa dili madugay magamando sa yuta. Dinhi ako nakapanahon sa pag-analisar sa akong kanhing paagi sa kinabuhi sumala sa kahayag sa Bibliya. Nakahimo ug mapait nga mga paghinapos, ako natugob sa kusganong tinguha nga mahimong tawong may kagawasan ug mahimong sakop sa Gingharian sa Diyos. Karong adlawa ako usa na ka bawtismadong Saksi ni Jehova.”

Diha sa laing bilanggoan, daghan ang nagasilbi ug 25-ka tuig nga silot tungod sa pagpatay. Usa ka regular nga pagtuon sa Bibliya ang gidumala uban sa 12 ka lalaki. Usa kanila nagdedikar sa iyang kinabuhi kang Jehova ug gibawtismohan, ug ang uban nagplano sa paghimo nianang mga lakanga. Kay nakaapresyar sa maayong resulta sa edukasyonal nga mga paagi sa mga Saksi ni Jehova, ang warden miingon: “Dili 12 ang akong mga kriminal. Ako may 600. Palihog tabangi ako sa pagpasugod kanila sa bag-ong kinabuhi. Hatagan ko kamo sa tanan nga inyong gikinahanglan, apan palihog iandam ang programa. Atimana sila!”

Mao gayod kadto ang gihimo sa mga igsoon. Ilang gipresentar ang programa sa Bibliya nga naghisgot sa katuyoan sa kinabuhi, sa paglaom alang sa umaabot, ug sa kahinungdanon sa pagbiya sa daotang mga buhat. Nag-asoy usab sila ug mga kasinatian bahin sa usa ka bilanggo kanhi nga nahimong usa ka Saksi ni Jehova ug sa ulahi natudlo ingong ansiano sa kongregasyon. Gipasiugda usab sa mga Saksi ang mga kaagi sa kinabuhi sa usa ka kawatan ug brilyante ug usa ka tig-abuso sa droga nga nakakat-on sa kamatuoran.a Ang 20 ka bilanggo nga naminaw nakakaplag sa programa nga makaiikag kaayo ug nagbangon ug daghang pangutana, ngani ang pila naghangyo ug pagtuon sa Bibliya.

Pagtuo ug Pag-antos Nasulayan

Ang Lubaczów maoy usa ka gamay nga lungsod sa 12,000 ka tawo duol sa utlanan sa Ukraine. Ang buluhatong pagsangyaw didto miuswag niadtong 1988 sa dihang ang mga payunir namalhin didto sa pagtabang sa 12 ka lokal nga mga magmamantala. Karon aduna nay 72 ka aktibong mga magmamantala sa gingharian, ug 150 ka tawo ang mitambong sa 1991 nga pagsaulog sa Memoryal sa bag-ong gitukod nga Kingdom Hall.

Niadtong Hunyo 1991, si Papa Juan Paulo II mibisita sa Lubaczów. Apan kana walay nahimo sa pag-abag sa tinuod nga pagtuo diha sa katawhan. Daghan kanila nasamok sa mga pagduhaduha ug mga pangutana mahitungod sa katuyoan sa kinabuhi ug sa paglaom sa umaabot. Sa dihang sila dili matagbaw sa tubag gikan sa klero, sila moliso ngadto sa mga Saksi ni Jehova. Bisan tuod ang mga tawo tingali sa sinugdan tulisokon sa konsensiya tungod sa pagtalikod sa ilang relihiyon, ang kamatuoran sa Bibliya nga ilang nakat-onan nakatabang kanila sa pagkakita nga sila nakahimo sa hustong desisyon.

Naghulagway mao ang kasinatian ni Honorata, karon usa ka regular payunir. Mga usa ka tuig sa miagi, iyang gipangutana ang pari sa dihang nagkumpisal kon unsay ngalan sa Diyos. “Ang Diyos gugma​—mao kana ang iyang labing matahom nga ngalan,” tubag sa pari. Dayon, siya midugang: “Ikaw sama sa usa ka timba sa samag-kristal ka tin-aw nga tubig nga gipatuloan sa uban ug tinta. Ang mga epekto dili-mabali.” Siya sa ingon nakadawat ug tubag. “Ako nakahukom niadto nga ako mahimong Saksi ni Jehova,” matud ni Honorata. “Kana usab dili-mabali.”

Hapit tanan nga nakakat-on ug kamatuoran sa Lubaczów kinahanglang moantos sa kusganon, ngani panatikong, pagsupak. Apan kana wala makapugong kanila gikan sa pagdawat sa kamatuoran sa Bibliya ug sa pagbarog alang kang Jehova.

Si Elżbieta miasoy: “Sa sinugdan ila akong gibunalan diha sa balay. Unya ang akong pamilya mokalit lang ug tungha sa Kingdom Hall. . . . Ila akong gidala pauli ug gisugdan sa ‘pagpahamtang sa hustisya’ pinaagi sa bukohon nga bunal. Ako gibunalan ug gipatiran gikan sa ulo hangtod sa lapalapa tungod lamang sa pagpakig-uban sa mga Saksi. Ako gibunalan pag-ayo nga ako nagkinahanglan ug dihadihang medikal nga pagtambal ug gidala sa ospital. Gitabangan ako ni Jehova, ug ako naayo. Gisalikway ako sa akong pamilya. Sa dihang akong gisulti kini sa pari, iya akong giyubit, nga nag-ingon: ‘Mianhi ka sa pagreklamo tungod lamang sa pipila ka sagpa?’”

Laing igsoong babaye nahinumdom: “Kada tuig ako moadto sa Częstochowa sa paglakaw nga nagluhod agi sa mga Estasyon, nga akong giisip usa ka obligasyon alang sa tanang sinserong Katoliko. Ako may mga uwat pa sa akong mga tuhod.” Sa edad 18 siya nakakat-on sa kamatuoran ug giingnan ang pari ug iyang pamilya nga siya dili na mobalik sa simbahan. Siya grabeng gibunalan​—“grabe kaayo nga ako may garas sa utok,” matud pa niya. “Apan sa ospital ako igong naulian aron sa pagtambong sa ‘Mga Mahigugmaon sa Kagawasan’ Distritong Kombensiyon. Ako nakahilak sa kalipay sa dihang akong nakita ang tinuod nga panaghiusa ug gugma taliwala sa katawhan nga walay pagkapanatiko​—mga butang nga wala gayod nako makita sa Częstochowa. Pagkadako sa akong kalipay nga ako nakasinati sa kaayo ni Jehova ug nakakat-on sa pagsalig kaniya.” Si Jehova nagpalig-on ug nagpaluyo niadtong nagtugyan sa ilang mga palas-anon ngadto kaniya.​—Salmo 55:22.

Daghan sa mga bilanggo sa Babilonyang Bantogan sa pagkakaron nagpatalinghog sa tawag sa “paggula gikan kaniya” niining Katoliko nga nasod, maingon nga sila nanggula sa ubang dapit. Kon kabubut-on ni Jehova, ang iyang walay kahadlok nga mga katawhan magpadayon sa pagtigom sa daghan pang “tilinguhaong mga butang” nga nagkatag sa tibuok Polandiya. Walay duhaduha, daghan ang mosanong pa sa tawag: “‘Umari kamo!’ Ug tugoti ang bisan kinsa nga giuhaw sa pag-ari; tugoti ang bisan kinsa nga buot mokuha sa tubig sa kinabuhi nga walay bayad.”​—Pinadayag 18:4; 22:17.

[Footnote]

[Mapa sa panid 24]

(Alang sa aktuwal nga pagkahan-ay, tan-awa ang publikasyon.)

POLAND

Sztum

Kruszwica

Poznan

Warsaw

Środa Śląska

Częstochowa

Strzelce Opolskie

Lubaczów

[Hulagway sa panid 26]

Nagwali sa mensahe sa Gingharian sa Kruszwica, Polandiya