Sila Nakakaplag sa Matuod nga Kalipay Diha sa “Paraiso”

PARAISO! Kanang pulonga ang sagad mosantop sa hunahuna sa dihang mamalandong ang mga tawo sa Hawaii​—ug tungod sa maayong mga katarongan. Abundang suplay dinhi ang kasarangan nga klima, asul nga kalangitan, nagalubaylubay nga mga kahoyng palma, makapahayahay nga mga huyohoy, ug balasong kabaybayonan​—mga elemento nga tingali isipon sa kadaghanan nga sama sa paraiso.

Kining mga butanga nakapadani sa mga tawo gikan sa halayo ug sa duol. Sila nagagikan sa Asia, sa Pasipiko, sa mga nasod sa Amerika, ug bisan sa mga dapit sama sa mga isla sa Caribbeano ug sa Uropa. Daghan ang mibalhin dinhi tungod sa kasarangang klima sa tibuok tuig. Ang uban nagapangita sa kasegurohan sa ekonomiya​—ug kalipay, siyempre. Ang resulta mao ang nagakasagol nga mga nasyonalidad ug etnikong mga grupo, uban ang usa ka mabulokong panagkadaiya sa mga kultura ug mga ideya sa relihiyon.

Apan, dunay laing bahin ang maong kahimtang. Sama sa daghang nindot nga mga dapit sa yuta, ang Hawaii ginahampak sa krimen, mga droga, delinkuwensiya, polusyon, ug daghang ubang mga suliran nga midangat sa tawhanong pamilya bisag diin pa nagpuyo ang usa. Tungod sa kadanghag ug kahakog sa tawo, ang mga isla sa Hawaii anam-anam nga nawad-an sa ilang kinaiyanhong katahom. Gusto ang mga tawo ug paraiso, apan dili ang tanang nagpuyo dinhi may igong pagtagad sa paghimo o sa labing menos sa paghupot niining mga islaha nga usa ka paraiso. Labaw pa ang gikinahanglan kay sa maanindot nga talan-awon ug hayahay nga klima sa paghimog usa ka paraiso.

Hinunoa, adunay usa ka nagtubong grupo sa mga tawo nga nagpuyo dinhi nga nagtagamtam sa matuod nga kalipay niining samag paraiso nga kahimtang. Sila maoy mga indibiduwal nga midawat sa kamatuoran sa Bibliya ug dulot nga mibati sa kahibulongang saad sa Diyos: “Ako nagahimo ug bag-ong mga langit ug usa ka bag-ong yuta; ug ang unang mga butang dili na pagahinumdoman, ni sila motungha pa sa kasingkasing.” Kining mga tawhana malipayong nagalantaw sa umaabot uban niining mga pulonga ni apostol Pedro diha sa hunahuna: “Apan sumala sa iyang saad kita nagapaabot sa bag-ong mga langit ug usa ka bag-ong yuta, ug diha niini magapuyo ang pagkamatarong.” (Isaias 65:17; 2 Pedro 3:13) Kinsa kining mga tawhana? Sa unsang paagi sila nakadangat sa pagkakat-on sa kahibulongang paglaom nga gitanyag sa Bibliya? Ug unsang mga kausaban ang nahatag niini diha sa ilang mga kinabuhi?

Kahadlok sa Kamatayon Nabuntog

Si Isabel ug iyang bana, si George, maoy Pilipino ug kagikan. Siya gipadako sa pagsunod sa Romano Katolikong relihiyon sa iyang mga ginikanan, bisag siya wala gayod makasusi sa Bibliya. Si Isabel gitudloan nga ang tawhanong kalag dili-mamatay. Unsay iyang reaksiyon niining bakak nga doktrina? Aw, nahadlok siyang maghunahuna sa kamatayon tungod kay maoy iyang pagtuo nga malubong nga buhi sa lungon sa walay kataposan, ang iyang kalag ginaingong dili na makaikyas. Sa 1973, hinunoa, si Isabel misugod sa pagtuon sa Bibliya uban sa mga Saksi ni Jehova. Sa dihang iyang nahibaloan nga ang tawhanong kalag mamatay ug nga ang Diyos magwagtang sa kamatayon pinaagi sa pagkabanhaw, siya nalipay kaayo ug nahupayan ug dako. (Ezekiel 18:4, 20; Juan 5:28, 29) Ang kamatuoran sa Bibliya dako kaayo ug epekto kaniya nga siya kusog nga miuswag.

Komosta si George? Siya usab miapil sa mga panaghisgot sa Bibliya apan uban lang sa tinguha nga pamatud-ang sayop ang mga Saksi. Apan, wala siyay nakitang sayop sa ginatudlo kaniya ug sa iyang asawa. Ngani, wala magdugay human nga misugod sila sa pagtuon, ang ulohan bahin sa dugo gihisgotan. Hangtod niadtong panahona, kinaham kaayo ni George ang pagkaong may dugo. Apan sa dihang iyang nakita nga ang Bibliya sa tin-aw nagdili sa pagkaon ug dugo, siya mihunong sa pagkaon. (Genesis 9:3, 4; Levitico 17:10-12; Buhat 15:28, 29) Siya nagpadayon sa pagpakigbahin sa pagtuon sa Bibliya ug nalipay nga siya sa kataposan nakakaplag sa kamatuoran. Karon, si George, ug si Isabel ang ilang upat ka anak nagatagamtam sa matuod nga kalipay sa pagkinabuhi sumala sa mga sukdanan sa Diyos.

Nadani sa Matuod nga Kristiyanidad

Usa ka tawong Hapones nga ginganlag George ug iyang Portuges nga asawa, si Lillian, anaa na sa ilang mga panuigong 60. Silang duha natawo ug gipadako sa Hawaii. Sanglit si George wala matudloi ug bisan unsang relihiyon sa iyang mga ginikanan, siya wala kaayoy interes sa relihiyon. Apan, siya may pagtuo kanunay sa Diyos. Sa laing bahin, gipadako si Lillian sa iyang mga ginikanan sa ilang relihiyon, nga usa ka Romano Katoliko.

Bisag si George dili kaayo maikagong tigbasa ug Bibliya, siya tigbasa sa mga magasing Bantayanang Torre ug Pagmata! sulod sa 30 ka tuig. Sa ingon siya daghag nakat-onan mahitungod sa Bibliya. Kay kusog motabako ug moinom, hinunoa, hinay ang iyang paghimog mga kausaban sa iyang kinabuhi. Samtang milabay ang mga tuig si George nagpadayon sa pagbasa sa mga magasin ug usahay motambong sa Kristohanong mga tigom diha sa Kingdom Hall. Ngano? Tungod kay, matud pa niya, “ang ubang mga relihiyon maot kaayo” sa pagtugot sa daghan daotang mga butang nga gihukman sa Bibliya. Iyang nakita nga lahi ang mga Saksi ni Jehova.

Unsay nakadani sa maunongong asawa ni George, si Lillian, sa kamatuoran sa Pulong sa Diyos bisan tuod nga siya naimpluwensiyahan kaayo sa relihiyon sa iyang mga ginikanan? Aw, gidapit siya sa iyang igsoong babaye sa unod sa mga miting sa Kingdom Hall. “Ako nalipay sa mangayaong atmospera sa pamilya ug sa mahigalaong mga pahiyom,” nahinumdom si Lillian. Ang tinuod nga gugma nga iyang nakita nga gipasundayag taliwala sa katawhan ni Jehova nagpakombinsir kaniya nga mao kini ang kamatuoran. (Juan 13:34, 35) Gidawat niya ang pagtuon sa Bibliya, sa kataposan iyang gipahinungod ang iyang kinabuhi kang Jehova nga Diyos, ug gibawtismohan sa pipila ka bulan sa ulahi human nga gibawtismohan ang iyang bana.

Si George mihunong na sa pagtabako o wala na maghubog, ug gilabay ni Lillian ang tanan niyang relihiyosong mga imahen. Uban ang kasingkasing nga puno sa gugma, ilang gipakig-ambit ang ilang nakat-onan ngadto sa uban, lakip sa 25 nila ka apo ug 4 ka apo sa tuhod. Sud-onga lang ang ilang mga nawong, ug tan-awa kon unsa ka malipayon ni George ug ni Lillian!

Kalinaw ug Kalipay Nabatonan

Si Patrick, usa ka hamtong nga taga Irlandiya, ug ang iyang Hudiyohanong asawa, si Nina, milalin sa Hawaii gikan sa habagatan-kasadpang bahin sa Tinipong Bansa. Sa miagi, sila nagkinabuhi nga mapatuyangon sa mga droga, pagbalhin-balhin ug relihiyon, ug haluag ug moral. Sila usab membro sa daghang tuig sa usa ka kulto, naningkamot nga makab-ot ang mas labaw nga kaamgohan pinaagi sa paggamit ug mga droga, pamalandong, ug sa ilang pribadong guru. Sa ulahi, si Patrick gilaayan na sa kasina, pag-awayay, ug paglalisay kanunay taliwala sa mga membro sa kulto kinsa miangkon nga nakakab-ot ug ‘mas labaw nga sukod sa kaamgohan.’ Siya mibulag sa grupo ug mibalik sa Hawaii, nga maoy iyang gipuy-an niadto, naglaom nga makakaplag ug kalinaw sa hunahuna. Human niadto, nakombinsir ni Patrick si Nina, nga iyang trato sa maong panahon, sa pagduaw. Sa kataposan, sila nagminyo ug mipuyo sa Hawaii.

Si Patrick ug Nina wala magdahom nga ang ilang pagpangitag kalinaw ug kalipay sa kataposan motultol ngadto sa pagtuon sa Bibliya uban sa mga Saksi ni Jehova. Usa ka tinuod nga ateyista sa iyang tibuok kinabuhi, si Nina misugod sa pagkakaplag ug makapatagbaw nga mga tubag sa Bibliya alang sa mga makalibog nga mga pangutana bahin sa kon nganong adunay mga demonyo ug nganong ang daotang mga panghitabo mahitabo diha sa maayong mga tawo. Ang napulo-ka-tuig nga pagsusi ni Patrick sa kamatuoran sa ingon dihay malipayong sangpotanan. Wala magdugay, ang nakat-onan niya ug ni Nina gikan sa Bibliya misugod sa pagpausab sa ilang moral nga tinamdan. Human sa hataas ug malisod nga pakigbisog, nabuntog ni Patrick ang iyang grabe nga pagkagiyan sa tabako. Halos napulo na ka tuig karon, siya ug ang iyang asawa nagkinabuhi na sa mahinlo, maayog moral nga kinabuhi sumala sa mga sukdanan sa Diyos. Uban ang putling mga kasingkasing ug hinlong mga konsensiya, ilang ginatagamtam ang kalinaw nga ilang ginapangita.

Mga Sakripisyo ug mga Ganti

“Panlimbasogi ninyo ang pagsulod agi sa pultahan nga masigpit, kay suginlan ko kamo, nga daghan ang maninguha sa pagsulod apan dili makahimo.” (Lucas 13:24) Kadtong mga pulonga ni Jesu-Kristo tin-awng nagpakita nga dili sayon ang pag-alagad sa Diyos ug ang pagkinabuhi sumala sa mga sukdanan sa Kasulatan. Ang matag usa nga nagtinguha sa pagbuhat niana kinahanglang dili lamang maningkamot kondili mohimo usab sa gikinahanglang mga pagsakripisyo. Kini mao gayod ang kahimtang sa mga indibiduwal nga gihisgotan niining asoya. Apan pagkakatingalahan sa paagi nga sila gigantihan!

Pananglitan, palandonga si Patrick ug Nina, nga bag-o pang gihisgotan. Sila mihimog kalit nga kausaban gikan sa usa ka estilo-sa-kinabuhi diin sila mokita ug dakong kantidad nga salapi ngadto sa usa ka bug-os panahon Kristohanong ministeryo nga gisuportahan sa partaym nga sekular nga trabaho. Bisan pa, sila kombinsido nga ang espirituwal nga mga ganansiya mas dako kay sa bisan unsang materyal nga mga pagsakripisyo nga ilang nahimo. Ug sila tinuod gayod nga malipayon.

Tungod sa ilang edad, ang mga kausaban dili madali alang kang George ug Lillian. Ang pakig-ambit sa Kristohanong mga tigom ug sa ministeryo nagkinahanglag panahon, atensiyon, ug pisikal nga paningkamot. Sa ilang dakong kalipay, hinunoa, ang ilang panglawas miarang-arang, ug ang ilang kinabuhi karon mahimong ikahubit lamang nga usa ka lagsik, matagbawon, ug malipayon.

Alang kang George ug Isabel, ang ilang dakong hagit mao ang pagbansay sa ilang mga anak ug sa pagtabang kanila ngadto sa dalan sa kinabuhi. Dakong panahon ug paningkamot ang gikinahanglan aron maandam ang upat ka batan-on sa Kristohanong mga tigom o pakuyogon sila sa Kristohanong ministeryo. Sa usa ka panahon tungod sa kanunay nga kapit-os napasagdan ni George ug Isabel ang ilang mga kaakohan isip ginikanan. Apan ang pakigpulong sa Bibliya nga nag-ulohang “Ipasig-uli ang Espiritu sa Pagsakripisyo-sa-Kaugalingon” nagpalihok kanila nga doblehon pa ang ilang mga paningkamot nga hatagan ang ilang upat ka anak sa tanang atensiyon ug pagbansay nga gikinahanglan ‘sa pag-agak kanila sa disiplina ug sa pahamatngon ni Jehova.’ Siyempre, ang maong mga paningkamot dagayang gigantihan.​—Efeso 6:4.

Dili ang matahom nga talan-awon, ang hayahay nga klima, o ang relaks nga paagi sa kinabuhi ang nakahatag ug tinuod nga kalipay niini nga mga indibiduwala ug sa daghan pang uban. Kondili, ang pagkasayod nga ilang gigamit ang ilang kinabuhi sumala sa kabubut-on sa Diyos ug nagkinabuhi sumala sa mga sukdanan sa iyang Pulong, ang Bibliya. (Ecclesiastes 12:13) Dugang pa, ang matuod nga kalipay motubod diha sa ilang mga kasingkasing samtang magapamalandong sila sa malipayong panahon sa dihang ang yutan-ong paraiso ipasig-uli na sa tibuok yuta.​—Lucas 23:43.

[Hulagway sa panid 25]

Si George, Isabel, ug ang ilang mga anak nakakaplag ug kalipay diha sa pagbasa sa Bibliya

[Hulagway sa panid 26]

Si George ug Lillian nakakaplag ug kalipay diha sa Kristohanong ministeryo

[Hulagway sa panid 27]

Gitagamtam ni Patrick ug Nina ang tinuod nga kalinaw diha sa pag-alagad kang Jehova