Ang Kamatuoran Nakatuhop sa Balangay sa Daghang Katubigan
PAGKAKATINGALAHAN! Usa ka yuta nga ilado sa iyang daghang katubigan giuhaw! Usa ka maayong-pagkatubig nga rehiyon nakaplagang uga ug namad-an! Kini maoy usa ka kauhaw nga matagbaw lamang pinaagi sa mga tubig sa kamatuoran gikan sa Pulong sa Diyos, ang Bibliya. Kini mao ang sugilanon sa Rahbeh, usa ka gamayng balangay sa 2,200 ka molupyo, nga nasabak diha sa kabukiran sa habagatang Lebanon, nga mga 130 kilometros gikan sa Beirut.
Ang ngalang Rahbeh nagkahulogang “usa ka luag nga dapit” sa Arabiko, ug kini nagagikan sa usa ka Semitiko nga gamot nga nagkahulogang “sangkad, katap.” Sa tukma, ang balangay nakatap sa duha ka dagkong bungtod nga dunay mga 600 ka metros ibabaw sa lebel sa dagat. Sa tingtugnaw ug sa tingpamulak, ang niyebe makita sa itaas sa kabukiran ngadto sa silangan, nakahatag dugang kaanindot. Apan, labaw sa tanan, ang Rahbeh maoy usa ka balangay sa daghang katubigan. Dunay 360 ka tubod, dagko ug gagmay, diha sa dapit, nagataganag bililhong tubig alang sa tabunok nga kaumahan sa trigo, apricots, peras, peaches, ug mga parras diha sa mga walog sa palibot.
Miagi ug Presente Nag-abot sa Rahbeh
Sa daghang bahin ang mga butang sa Rahbeh nagpabiling wala mausab sukad sa kapanahonan sa Bibliya. Ang mga balay sa balangay nagdikit-dikit. Ang karsada hiktin, naglikoliko, ug puno sa trapiko—sa mga asno ug mga baka. Bisag dunay pipila ka sakyanang demakina, ang mga hayop ang may katungod sa dalan dinhi. Sagad kargahan sila sa ilang mga tag-iya ug mga gamit sa uma ug papaulion sila nga silasila ra. Ilang subayon ang hiktin nga mga karsada, liot-lioton ang hiktin kaayong mga lugar, ug mopauli ngadto sa ilang pinuy-anan. Sama ba kaha kini sa anaa sa hunahuna ni Isaias sa dihang siya miingon: “Ang baka nakaila sa iyang tag-iya, ug ang asno sa pasungan sa iyang agalon”?—Isaias 1:3.
Ang Rahbeh maoy dapit usab sa panagkadaiya. Dinhi makakaplag ka ug mga graduwado sa unibersidad ingon man sa yanong mga magbabaol nga wala gayod makataak ug siyudad. Dunay mga villa nga napalibotan sa mga tanaman, ug dunay mga payag nga may binuhing mga hayop nga nagdagan-dagan sa palibot. Ang de-koryenteng mga gamit sa balay makita halos sa tanang balay, apan walay koryente kanunay. Tungod niini, daghang mga balay ang adunay mga generitor. Ang dagkong mga karsada sa balangay aspaltado, apan ang kadaghanan sa mga dalan paingon sa kaumahan diaspaltado ug batoon. Busa, ang bugtong paagi sa paghatod sa abot sa kaumahan maoy pinaagi sa binuhing mga hayop. Hayan ikaw makakita pa gani ug asno nga dunay karga nga de-koryenteng generitor paingon sa uma aron sa pagpaandar sa mga makina sa uma, nga gamiton duyog sa nagdaro nga mga hayop diha sa kaumahan.
Sa susama, ang kinabuhi sa balangay wala kaayoy kausaban. Kon matulog kag usa ka gabii sa balangay, hayan pukawon ka sa mga pagtilaok sa mga manok sa alas-dos o alas-tres sa kadlawon. Ang adlaw-adlaw nga rotina magsugod ug sayo, busa ayaw katingala kon makadungog kag kabanha sa mga tawo nga nagsinggitay sa usag usa diha sa kangitngit samtang nag-andam sa mga hayop. Sa pagkabuntag, makita nimo ang daghang taga-balangay, uban sa ilang mga hayop nga kinargahan na, paingon sa kaumahan o sa mga tiyanggi aron ibaligya ang ilang mga produkto.
Samtang nagakaadlaw, ang gagmayng mga batang lalaki ug babaye manggula sa pagdula diha sa mga dalan ug sa publikong mga dapit. Ang ilang pagsininggitay ug katawa madungog, sama gayod sa karaang Jerusalem sumala sa gihubit ni propetang Zacarias: “Ang plasa sa siyudad mangapuno sa mga batang lalaki ug babaye nga nagdula sa plasa.” (Zacarias 8:5) Imong makita usab nga ang mga taga-balangay mahigalaon kaayo ug masukitsukiton. Ginalaoman nga imong timbayaon ang matag tawo sa balangay nga imong mahibalag, kay gusto silang makaila kon kinsa ka, diin ka gikan, nganong atua ka didto, ug asa ka paingon. Ang mga tawo suod kaayong nagkailhanay sa usag usa.
Mga Tubig sa Kamatuoran Nakaabot sa Rahbeh
Sa ingon niini ka suod nga komunidad, ang mga balita dali kaayong mokaylap. Kini ang nahitabo sa dihang si Asaad Younis nakabalik sa Rahbeh gikan sa Tinipong Bansa niadtong 1923. Gustong masayod kon si Asaad nadato ba sa Amerika, ang iyang higala nga si Abdallah Blal nakigkita kaniya. Imbes hisgotan ang mahitungod sa salapi, gihatag ni Asaad kaniya ang usa ka kopya sa librong The Harp of God ug gisultihan siya: “Ania ang matuod nga bahandi.” Gibasa ni Abdallah, nga Protestante kanhi, kining pinasukad-sa-Bibliya nga publikasyon ug naikag kaayo. Bisag si Asaad wala kaayoy gihimo bahin sa impormasyon, si Abdallah nalipay sa iyang nakat-onan ug prangkang miangkon nga nakaplagan niya ang kamatuoran.
Sa milabay ang pipila ka panahon, si Abdallah mibalhin sa Tripoli, ang labing dakong siyudad sa amihanang Lebanon. Didto, siya nakakontak ug daghang mga Estudyante sa Bibliya, ingon sa pagkaila sa mga Saksi ni Jehova niadtong panahona, ug siya dugang nga miuswag diha sa iyang mga pagtuon sa Bibliya. Siya sa ulahi mibalik sa Rahbeh aron ipakaylap ang maayong balita nga iyang nakat-onan. Siya nakighisgot sa iyang isigkabalangay bahin sa mga ulohan sa Trinidad, kon ang tawo ba dunay dili-mamatay nga kalag, impiyerno, ang pagkapari, Misa, ug ang paggamit ug mga imahen, nakig-ambit kanila kon unsa gayod ang gitudlo sa Bibliya.
Daghan sa mga taga-balangay ang nagpakitag interes. Tulo o upat kanila miuban kang Abdallah sa buluhatong pagsangyaw. Unya sila misugod sa paghimog mga tigom sa adlawng Dominggo. Kini naglakip sa pagpamati sa narekord nga sermon gikan sa ponograpo o sa pagbasa gikan sa Bibliya, nga sundan sa usa ka panaghisgot mahitungod sa ilang bag-o pang nadunggan. Sa ulahi, gigamit ang pipila ka tabang sa pagtuon sa Bibliya, lakip na ang mga librong The Harp of God, Riches, ug “Let God Be True.” Ang mga nanambong dili molabaw sa napulo ka tawo, diin ang kadaghanan maukiton lamang kay sa interesado. Ang pipila daw mitambong lamang tungod sa pagkaon nga idulot inigkahuman sa matag tigom.
Sa mga tuig sa 1940, si Abdallah Blal gihatagag kaakohan sa pag-atiman sa grupo sa Rahbeh. Siya namatud-ang usa ka masiboton ug maunongong alagad ni Jehova, naghatag ug usa ka maayong sumbanan alang sa uban. Ang usa kanila, si Igsoong Mattar, nahinumdom sa gihimo nila sa ilang buluhatong pagsangyaw: “Sanglit walay sakyanan niadtong mga adlawa, si Igsoong Blal ug ako nagbaktas sa pagwali sa kasikbit nga mga balangay. Ako ang nagdala sa ponograpo, samtang si Igsoong Blal ang nanguna sa pagpahayag. Kasagaran moadto kami sa duha o tulo ka adlaw sa dili pa mopauli.” Si Igsoong Blal nag-alagad kang Jehova nga matinumanon hangtod sa iyang kamatayon niadtong 1979 sa panuigong 98.
Ang Pag-uswag Nakapatunghag Pagsupak
Samtang miuswag ang buluhaton, ang mga igsoon misugod sa pagkasinatig pagsupak. Sa 1950, tungod sa paghulhog sa pari sa balangay, usa ka kampaniya sa paglutos gisugdan batok sa mga igsoon sa Rahbeh. Giakusar sa pari ang mga igsoon nga nagpasipala sa simbahan ug sa mga butang giisip nila nga sagrado. Ang pipila sa mga taga-balangay nasuko kaayo nga ilang gibato ang mga igsoon, ug ang pipila ka igsoon gidakop ug gipriso. Apan, napamatud-an sa imbestigasyong misunod nga bakak ang mga sumbong. Bisan pa, ang mga igsoon gibilanggo gihapon sa daghang mga adlaw.
Ang laing magsusupak misulay sa pagdahig sa mga taga-balangay, nga ang uban gani dili kaayo makamaong mobasa, sa pagpirma sa sulat nga nagsumbong sa mga igsoon sa daghang mga butang, lakip sa pagsamok sa mga tawo kanunay pinaagi sa pagduaw sa ilang mga balay. Aron daghang tawo ang makapirma sa sulat, iyang giingnan sila nga kadto maoy hangyo sa usa ka trabahante nga ibalhin ug balik sa balangay. Sa dihang nadiskobrehan sa mga tawo nga kadto maoy usa ka sumbong diay batok sa mga Saksi, ilang gipala ang ilang mga pirma. Ang mga hitabong sama niini nakatabang sa paghatag ug usa ka maayong pamatuod ngadto sa daghang mga opisyal sa maong dapit.
Gawas sa pagpakiglabot sa maong bug-os nga pagsupak, ang mga igsoon miatubang ug laing kababagan. Diha sa usa ka gamayng balangay diin ang matag usa nakaila sa tanan, “ang pagkahadlok sa tawo nagadalag usa ka lit-ag,” sama sa gihisgotan sa Bibliya diha sa Proverbio 29:25. Nagkinahanglag kaisog alang sa mga igsoon ang pagsangyaw ngadto sa mga silingan, higala, ug mga paryente, nga kanunay nga nagsaway ug nagyubit kanila. Ang tinuod nga kahulogan sa ingon nahatag ngadto sa mga pulong ni Jesus diha sa Mateo 10:36: “Ang mga kaaway sa tawo anaa ra sa sulod sa iyang kaugalingong panimalay.” Apan, sama sa padayong gipamulong sa sanglitanan, “siya nga nagasalig kang Jehova mapanalipdan.” Ang pagtuo ug paglahutay sa mga igsoon nakapatunghag talagsaong mga sangpotanan.
Kamatuoran Nakatuhop sa Rahbeh
Sa daghang katuigan ang mga taga-balangay nakadangat sa pagpabili sa maayong paggawi sa mga Saksi ni Jehova, ug daghan ang midawat sa kamatuoran. Ang mga igsoon nalipay pag-ayo niadtong 1969 dihang ang ikaduhang kongregasyon naporma sa Rahbeh. Sila nagpadayon sa pagkugi ug maayo. Daghan ang mikuha sa bug-os panahong ministeryo, ang uban gani mibalhin sa pag-alagad ngadto sa ubang mga teritoryo, lakip na ang siyudad sa Beirut. Gipanalanginan ni Jehova ang ilang kuging trabaho, ug ang ikatulong kongregasyon natukod sa Rahbeh sa 1983. Kasamtangan, daghang mga igsoon ang milalin o mibalhin sa pagpuyo diha sa mga siyudad. Sa gihapon, ang pag-uswag nagpadayon, ug ang ikaupat nga kongregasyon naporma sa Rahbeh niadtong 1989, nga gisundan sa ikalima niadtong 1990.
Niining panahona halos ang matag pamilya diha sa balangay dunay paryente o higala nga usa ka Saksi. Ang kasuko nga naglungtad niadto nawala na. Mas nasinati na ang mga tawo sa mga Saksi. Sa pagkamatuod, ang mga pulong “ansiano,” “payunir,” “magtatan-aw sa sirkito,” “asembliya,” ug “Armageddon” nahimong bahin sa bokabularyo sa mga taga-balangay. Sa espesyal nga mga okasyon, sama sa pagduaw sa magtatan-aw sa sirkito o sa Memoryal, ang mga dalan walay tawo ug ang mga Kingdom Hall puno. Ang ubang mga kongregasyon nagbutang pa gani ug mga trompa sa balkonahe alang sa kasayon sa mga silingan.
Karon may kapin na sa 250 ka magmamantala sa Gingharian sa Rahbeh. Kana nagpasabot nga adunay 1 ka Saksi sa halos matag 8 ka tawo sa balangay! Usa ka kongregasyon sa 51 ka magmamantala dunay usa ka teritoryo sa 76 ka balay, ug ilang kobrehan kini kada semana. Handurawa kon unsay nahitabo sa mga bulan sa Marso ug Abril sa miaging tuig dihang 98 sa 250 ka magmamantala misulod sa buluhatong auxiliary payunir, duyog sa 13 ka regular nga payunir sa Rahbeh. Ang teritoryo kobrehan sa daghang higayon sa usa ka semana. Komun alang sa usa ka balay nga duawon sa duha o tulo ka parisan sa mga magmamantala sa samang adlaw o bisan sa samang oras. Ang kadaghanan sa mga taga balangay naanad na sa mga pagduaw. Apan sa dihang ang usa ka tawo mireklamo, ang magmamantala mitubag: “Kon dawaton mo ang among tanyag nga magtuon sa Bibliya, nan ikaw duawon lamang kas-a sa usa ka semana.” Makigsulti usab sila sa tanan nga ilang ikahibalag sa kaumahan—sa mga tawong nagdaro, nananom, namubo, o nagsakay sa asno.
Sa pagkamatuod, ang kamatuoran sa Bibliya nakatuhop sa Rahbeh, ang balangay sa daghang katubigan. Apan dili ra kana. Sama nga ang Rahbeh mao ang tuboran sa preskong tubig alang sa daghang mga balangay sa palibot, kini usab nagatagana kanila ug nagahatag-kinabuhing mga tubig sa kamatuoran sa Bibliya. Ang mga magmamantala gikan sa Rahbeh nagaduaw sa mga tawo sa kasikbit nga mga balangay nga magbaktas ug nagahikay ug mga grupo sa sakyanan ug nagabiyahe sa tibuok adlaw aron sa pagsangyaw sa halayong mga balangay. Ang ubang mga magmamantala mibalhin sa pag-alagad sa ubang mga siyudad. Uban sa panalangin ni Jehova, aduna pa unyay dugang pag-uswag nga mohatag ug dugang pang pagdayeg sa langitnong Amahan, si Jehova nga Diyos.
[Hulagway sa panid 26]
Usa ka talan-awon sa dalan sa Rahbeh