Kon Nganong ang Uban Gianak Pag-usab

“GAWAS kon ang tawo igaanak pag-usab, siya dili makakita sa gingharian sa Diyos.” (Juan 3:3) Kadtong mga pulonga nakalipay ug nakalibog sa daghang tawo sukad nga gisulti ni Jesu-Kristo kini kapin sa 1,900 ka tuig kanhi.

Alang sa hustong pagsabot sa mga pulong ni Jesus bahin sa pagkahimong gianak pag-usab, kinahanglang ato unang tubagon kining mga pangutanaha: Unsay katuyoan sa Diyos alang sa katawhan? Unsay mahitabo sa kalag inigkamatay? Unsay katuyoan nga himoon sa Gingharian sa Diyos?

Ang Katuyoan sa Diyos Alang sa Katawhan

Ang unang tawo, si Adan, gilalang nga usa ka hingpit tawhanong anak sa Diyos. (Lucas 3:38) Dili maoy katuyoan ni Jehova nga Diyos nga mamatay si Adan. Si Adan ug ang iyang asawa, si Eva, may palaabuton sa pagpatunghag walay sala tawhanong pamilya nga mahimong mabuhi sa walay kataposan ug pun-on ang paraisong yuta. (Genesis 1:28) Ang kamatayon dili maoy bahin sa orihinal nga katuyoan sa Diyos alang sa lalaki ug babaye. Kini mientra lamang sa esena sa tawo ingong sangpotanan sa pag-alsa batok sa kasugoan sa Diyos.​—Genesis 2:15-17; 3:17-19.

Kini nga pag-alsa nagbangon ug dakong moral nga mga isyu, sama sa pagkamatarong sa pagkasoberano sa Diyos ug sa katakos sa katawhan sa pagpabiling matinumanon sa iyang mga kasugoan. Panahon ang gikinahanglan aron mahusay kining mga isyuha. Apan ang katuyoan ni Jehova nga Diyos alang sa katawhan wala mausab, ug dili siya makapakyas sa iya nang giplanong buhaton. Maoy iyang bug-os nga katuyoan nga pun-on ang yuta sa hingpit tawhanong panimalay nga magatagamtam sa walay kataposang kinabuhi diha sa Paraiso. (Salmo 37:29; 104:5; Isaias 45:18; Lucas 23:43) Kinahanglang atong ibutang diha sa hunahuna kining pasikaranang kamatuoran dihang maghisgot kita sa mga pulong ni Jesus bahin sa pagkagianak pag-usab.

Unsay Mahitabo sa Kalag Inigkamatay?

Wala mahibalo kon unsay gipadayag sa balaang espiritu sa Diyos ngadto sa mga magsusulat sa Bibliya, ang mga pilosopo sa Gresya naningkamot sa pagkaplag sa kahulogan sa kinabuhi. Sila dili makatuo nga ang tawo gilalang aron mabuhi sa pipila lamang ka tuig, sa kasagaran sa makaluluoy pa nga mga kahimtang, ug unya mohunong na sa paglungtad. Husto sila niining bahina. Apan sa ilang mga paghinapos bahin sa palaabuton sa tawo inigkamatay, sila nasayop. Sila mihinapos nga ang paglungtad sa tawo magpadayon diha sa ubang porma inigkamatay, nga diha sa sulod sa tanang tawo adunay usa ka kalag nga dili-mamatay.

Ang mga Hudiyo ug ang nagaangkong mga Kristohanon naimpluwensiyahan sa maong mga hunahuna. Nag-ingon ang librong Heaven​—A History: “Sa matag higayong ang lalin nga mga Hudiyo magkahibalag sa makinaadmanong mga Grego, ang ideya bahin sa usa ka kalag nga dili-mamatay motungha.” Ang libro midugang: “Ang Gregong mga doktrina bahin sa kalag naghatag ug madukoton nga impluwensiya diha sa Hudiyohanon ug sa ulahi sa Kristohanong mga pagtulon-an. . . . Pinaagi sa pagmugnag usa ka tagsaong kalangkoban sa pilosopiya ni Plato ug sa biblikanhong tradisyon, gibuksan ni Philo [unang siglo Hudiyohanong pilosopo sa Alexandria] ang dalan alang sa ulahing Kristohanong mga tighunahuna.”

Unsay gituohan ni Philo? Ang mao gihapong libro nagpadayon: “Alang kaniya, ang kamatayon mopasig-uli sa kalag sa iyang orihinal, una-pa-matawo nga kahimtang. Sanglit ang kalag iya man sa espirituwal nga kalibotan, ang kinabuhi sa lawas mubo lamang, sa kasagaran alaot, nga yugto.” Ugaling, ang “una-pa-matawo nga kahimtang” ni Adan wala maglungtad. Sumala sa asoy sa Bibliya, dili maoy katuyoan sa Diyos ang awtomatikong pagbalhin ngadto sa laing kalibotan inigkamatay, ingon nga daw ang yuta maoy dapit nga tigomanan lamang alang sa mas hataas o mas ubos nga paglungtad.

Ang pagtulon-an nga ang tawhanong kalag dili-mamatay wala itudlo diha sa dinasig-sa-espiritu nga Pulong sa Diyos, ang Bibliya. Bisag kausa kini wala gayod mogamit sa terminong “dili-mamatay nga kalag.” Kini nag-ingon nga si Adan gilalang ingong kalag, dili nga may kalag. Ang Genesis 2:7 nag-ingon: “Giumol ni Jehova nga Diyos ang tawo gikan sa abog sa yuta ug gihuypan niya sa mga buho sa iyang ilong sa gininhawa sa kinabuhi, ug ang tawo nahimong kalag nga may kinabuhi.” Wala gayod hatagig kipilian ang katawhan ug palaabuton nga kinabuhing walay kataposan didto sa langit kun walay kataposang kasakit diha sa impiyerno. Ang Bibliya nagpakita nga ang kalag, o tawo, nga mamatay wala nay paglungtad diin siya may panimuot. (Salmo 146:3, 4; Ecclesiastes 9:5, 10; Ezekiel 18:4) Busa, ang mga pilosopo nagtuo sa dili-kasulatanhong mga hunahuna bahin sa kalag. Kinahanglang magbantay kita batok sa sayop nga mga ideya nga mopahanap sa atong pagsabot sa mga pulong ni Jesus bahin sa pagkagianak pag-usab.

Gianak Pag-usab Aron Magmando Ingong mga Hari

Gisultihan ni Jesus si Nicodemo nga kadtong “gianak pag-usab . . . makasulod sa gingharian sa Diyos.” (Juan 3:3-5) Unsa kana nga Gingharian? Diha sa simboliko nga pinulongan, sayo sa tawhanong kasaysayan, gipahibalo ni Jehova nga Diyos ang iyang katuyoan sa paggamit ug linain nga “binhi”​—usa ka umaabot nga magmamando—​nga modugmok sa ulo sa orihinal nga Bitin, si Satanas nga Yawa. (Genesis 3:15; Pinadayag 12:9) Sumala sa anam-anam nga gipadayag diha sa Kasulatan, kini nga “binhi” nailhan nga mao si Jesu-Kristo, nga maghari uban sa isigkamagmamando diha sa talagsaong kapahayagan sa pagkasoberano sa Diyos, ang Mesiyanikong Gingharian. (Salmo 2:8, 9; Isaias 9:6, 7; Daniel 2:44; 7:13, 14) Kini mao ang Gingharian sa langit, usa ka kagamhanan sa kalangitan nga mobayaw sa pagkasoberano ni Jehova ug moluwas sa katawhan gikan sa pagkaulipon sa sala ug kamatayon.​—Mateo 6:9, 10.

Uban ni Jesus ingong isigkamagmamando mao ang 144,000 nga gipalit gikan sa katawhan. (Pinadayag 5:9, 10; 14:1-4) Ang Diyos nagpili ug pipila gikan sa dili-hingpit nga tawhanong pamilya ni Adan aron mahimo silang “mga balaan sa Usa nga Supremo,” kinsa magmando uban ni Kristo diha sa Mesiyanikong Gingharian. (Daniel 7:27; 1 Corinto 6:2; Pinadayag 3:21; 20:6) Kining maong mga lalaki ug mga babaye may pagtuo kang Jesu-Kristo, kinsa miingon nga sila “igaanak pag-usab.” (Juan 3:5-7) Sa unsang paagi ug nganong mahitabo kining pag-anak pag-usab?

Kining mga indibiduwala gibawtismohan sa tubig ingong mga sumusunod ni Kristo. Gipasaylo sa Diyos ang ilang mga sala pinasukad sa halad lukat ni Jesus, gideklarar sila nga matarong, ug gisagop sila ingong espirituwal nga mga anak. (Roma 3:23-26; 5:12-21; Colosas 1:13, 14) Ngadto kanila si apostol Pablo miingon: “Nadawat ninyo ang espiritu sa pagkagianak, nga sa maong espiritu kita managtuwaw: ‘Abba, Amahan!’ Ang espiritu mismo nagapamatuod uban sa atong espiritu nga kita mga anak sa Diyos. Nan, kon kita mga anak, kita mga manununod usab: mga manununod gayod sa Diyos, ug isigkamanununod uban kang Kristo, kon kita moantos uban kaniya aron kita pagahimayaon uban kaniya.”​—Roma 8:15-17.

Ingong mga sumusunod ni Kristo, kini sila adunay bag-ong pagkatawo, o bag-ong pagsugod, sa kinabuhi. Kini maoy misangpot sa pagtuo nga sila magapakig-ambit sa langitnong panulondon ni Jesus. (Lucas 12:32; 22:28-30; 1 Pedro 1:23) Gihubit ni apostol Pedro kining pagkatawo pag-usab niining paagiha: “Tungod sa dakong kaluoy [sa Diyos] gihatagan kita niya ug bag-ong pagkatawo ngadto sa usa ka buhing paglaom pinaagi sa pagkabanhaw ni Jesu-Kristo gikan sa mga patay, ngadto sa usa ka panulondon nga dili madunot ug dili mabulingan ug dili malawos. Kini gitagana didto sa mga langit alang kaninyo.” (1 Pedro 1:3, 4) Kining bag-o nga kinabuhi didto sa langit nahimong posible alang sa maong mga indibiduwal tungod kay gibanhaw sila sa Diyos sama sa iyang pagbanhaw kang Jesus.​—1 Corinto 15:42-49.

Unsay Ikasulti Bahin sa Yuta?

Kini wala magkahulogan nga ang tanang mga tawong masinugtanon sa ulahi igaanak pag-usab aron moadto gikan sa yuta ngadto sa langit. Kining sayop nga ideya kaamgid sa gituohan sa mga pilosopong sama ni Philo, kinsa nagtuo nga ang “kinabuhi sa lawas [maoy] mubo lamang, sa kasagaran alaot, nga yugto.” Apan walay deperensiya ang orihinal yutan-ong kalalangan ni Jehova nga Diyos.​—Genesis 1:31; Deuteronomio 32:4.

Ang tawhanong kinabuhi wala gayod gimbut-i nga mahimong mubo ug masakit. Si Jesu-Kristo ug kadtong gianak pag-usab nga mag-alagad ingong mga hari ug mga saserdote uban kaniya sa langit magwala sa tanang makadaot nga mga sangpotanan sa pag-alsa ni Satanas. (Efeso 1:8-10) Pinaagi kanila ingong gisaad nga ‘binhi ni Abraham,’ “ang tanang nasod sa yuta tino nga pagapanalanginan.” (Galacia 3:29; Genesis 22:18) Alang sa katawhang masinugtanon kini nagkahulogan ug kinabuhi diha sa paraisong yuta, nga lahi kaayo gikan sa mubo, puno-sa-kasakit nga paglungtad karong adlawa.​—Salmo 37:11, 29; Pinadayag 21:1-4.

Kinsay Makapahimulos?

Lakip niadtong makapahimulos gikan sa tagana sa Diyos alang sa pagpanalangin sa katawhan mao ang binanhaw nga mga patay nga nagtuo sa halad lukat ni Jesus. (Juan 5:28, 29; Buhat 24:15) Ang kadaghanan kanila wala pa gayod makahibalo bahin sa Diyos ug ni Kristo ug busa dili makapakitag pagtuo kang Jesus. Kadto nga mga binanhaw maglakip sa matinumanong mga tawo sama kang Juan Bawtista, kinsa namatay ug una sa wala pa buksi ni Jesus ang dalan ngadto sa langitnong kinabuhi. (Mateo 11:11) Gawas kanila, ‘usa ka dakong panon nga gikan sa tanang kanasoran nakalaba ug nakapaputi sa ilang mga besti pinaagi sa dugo sa Kordero,’ si Jesu-Kristo. Sila midawat nga mauyonon sa buluhatong pagsangyaw sa Gingharian nga karon gipangunahan sa gianak pag-usab nga “mga igsoon” ni Jesus ug makalabang-buhi sa gubat sa Diyos sa Armageddon aron mabuhi diha sa usa ka nahinloang yuta. (Pinadayag 7:9-14; 16:14-16; Mateo 24:14; 25:31-46) Busa, diha sa kahikayan sa Diyos, milyon-milyon karon ang maluwas, bisag sila wala gianak pag-usab aron momando uban kang Kristo didto sa kalangitan.​—1 Juan 2:1, 2.

Ikaw malakip kaha niadtong makapanunod sa kinabuhi diha sa paraiso sa yuta? Mahimong malakip ka kon magpakita kag pagtuo sa halad ni Jesu-Kristo ug aktibong makig-uban sa matuod nga Kristohanong kongregasyon. Kini wala mahugawi sa mga pilosopiya kondili nagpabiling “usa ka haligi ug kalig-on sa kamatuoran.” (1 Timoteo 3:15; itandi ang Juan 4:24; 8:31, 32.) Unya ikaw makalantaw sa unahan sa usa ka kahibulongang palaabuton sa dihang ang mga gianak sa espiritu nga mga anak sa Diyos magmando sa langit ug ang tanang yutan-ong mga anak sa Diyos mapasig-uli ngadto sa kahingpitan diha sa usa ka katingalahang paraisong yuta. Busa pahimusli ang imong higayon alang sa kinabuhi diha nianang bag-ong kalibotan sa walay kataposang mga panalangin.​—Roma 8:19-21; 2 Pedro 3:13.

[Hulagway sa panid 6]

Wala gayod hatagig kapilian si Adan ug palaabuton nga kinabuhi didto sa langit o walay kataposang kasakit diha sa impiyerno