Si Jehova Dili Mao ang Mabasol

“Sama sa usa ka amahan nga nagpakitag kaluoy sa iyang mga anak, sa mao nga paagi si Jehova nagpakitag kaluoy kanila nga may kahadlok kaniya. Kay siya nahibalo sa pagkaumol kanato, nahinumdom nga kita mga abog lamang.”​—SALMO 103:13, 14.

1, 2. Kinsa si Abraham, ug sa unsang paagi ang iyang pag-umangkong si Lot nakadangat sa pagpuyo sa daotang siyudad sa Sodoma?

SI Jehova dili mao ang responsable sa mga kalisod nga tingalig atong maagoman tungod sa atong mga kasaypanan. Niining bahina palandonga kon unsay nahitabo sa mga 3,900 ka tuig kanhi. Ang higala sa Diyos nga si Abraham (Abram) ug ang iyang pag-umangkong si Lot nahimong bahandianon kaayo. (Santiago 2:23) Gani, ang ilang mga kabtangan ug mga binuhi hilabihan kaayo ka daghan nga tungod niana ‘ang yuta dili makapaigo sa pagbuhi kanila kon mag-uban sila sa pagpuyo.’ Dugang pa, dihay panag-away sa mga magbalantay sa hayop sa duha ka tawo. (Genesis 13:5-7) Unsay gihimo alang niini?

² Aron matapos ang away, si Abraham misugyot nga kinahanglang magbulag sila, ug iyang gipapilig una si Lot. Bisan tuod mas tigulang si Abraham ug mas angay unta nga ipalabi na lang sa iyang pag-ugmangkon ang paghatag kaniya sa labing maayong lugar, gipili ni Lot ang labing maayong rehiyon​—ang tibuok maayong pagkatubig nga distrito sa Ubos nga Jordan. Ang panagway sa gawas malimbongon, kay diha sa duol mao ang malaw-ay kaayog moral nga mga siyudad sa Sodoma ug Gomorra. Si Lot ug ang iyang pamilya sa kataposan mibalhin ngadto sa Sodoma, ug kini nagbutang kanila sa espirituwal nga kapeligrohan. Dugang pa, gibihag sila sa dihang gipildi ni Haring Chedorlaomer ug sa iyang mga kaanib ang hari sa Sodoma. Giluwas sila ni Abraham ug sa iyang mga tawo, apan si Lot ug ang iyang pamilya mibalik sa Sodoma.​—Genesis 13:8-13; 14:4-16.

3, 4. Unsay nahitabo kang Lot ug sa mga membro sa iyang pamilya sa dihang gilaglag sa Diyos ang Sodoma ug Gomorra?

³ Tungod sa seksuwal nga kahiwian ug pagkadunot sa moral sa Sodoma ug Gomorra, mihukom si Jehova sa paglaglag niadtong mga siyudara. Siya sa pagkamaluloy-on nagpadalag duha ka manulonda nga nag-agak kang Lot, iyang asawa, ug sa ilang duha ka anak gawas sa Sodoma. Sila gisugo sa dili paglingi, apan ang asawa ni Lot milingi, tingali gianugonan sa mga butang nga nabilin. Niana, siya nahimong haligi nga asin.​—Genesis 19:1-26.

⁴ Pagkadako sa kapildihan ang naagoman ni Lot ug sa iyang anak nga mga babaye! Ang mga dalaga napugos sa pagbiya sa mga lalaki nga ilang pakaslan unta. Si Lot karon wala nay asawa ug materyal nga bahandi. Sa pagkatinuod, siya sa kataposan nagpuyo na lang diha sa usa ka langob uban sa iyang anak nga mga babaye. (Genesis 19:30-38) Ang gitan-aw niya nga maayo kaayo napamatud-an nga dili diay maayo. Bisag siya dayag nga nakahimog bug-at nga mga kasaypanan, siya sa ulahi gitawag nga “matarong nga Lot.” (2 Pedro 2:7, 8) Ug siyempre si Jehova nga Diyos dili mao ang mabasol sa mga sayop ni Lot.

“Sa mga Sayop​—Kinsay Makaila?”

5. Unsay gibati ni David bahin sa mga kasaypanan ug pagkamapangahason?

⁵ Sanglit dili-hingpit ug makasasala, kitang tanan makahimog mga sayop. (Roma 5:12; Santiago 3:2) Sama kang Lot, tingali kita malimbongan sa panagway sa gawas ug tingali masayop sa paghukom. Busa, ang salmistang David nangaliyupo: “Sa mga sayop​—kinsay makaila? Gikan sa mga sala nga natago ipahayag ako nga walay sala. Ingon man usab pugngan mo ang imong ulipon gikan sa mapangahasong mga buhat; ayaw itugot nga sila magagahom kanako. Sa ingon niana magmahingpit na ako, ug magpabiling walay sala gikan sa daghang kalapasan.” (Salmo 19:12, 13) Si David nahibalo nga siya mahimong makasala nga bisan siya dili makaamgo. Busa, siya nangayog pasaylo sa mga kalapasan nga tingali natago bisan gikan kaniya. Sa dihang nakahimo siya ug bug-at nga sayop tungod kay giagda siya sa iyang dili-hingpit nga unod sa pagsubay ug sayop nga lakang, gitinguha niyag dako ang tabang ni Jehova. Buot niya nga pugngan siya sa Diyos gikan sa mapangahasong mga buhat. Si David dili buot nga ang pagkamapangahason mahimong iyang nangibabaw nga tinamdan. Hinunoa, siya nagtinguha nga mahimong hingpit ang iyang debosyon kang Jehova nga Diyos.

6. Unsang kahupayan ang makuha gikan sa Salmo 103:10-14?

⁶ Ingong presenteng-adlaw dedikadong mga alagad ni Jehova, kita usab dili-hingpit ug busa makahimog mga kasaypanan. Sama kang Lot, pananglitan, malagmit kita makahimog dili maayong pagpili sa dapit nga atong puy-an. Tingali atong gipalabay ang higayon sa pagpalapad sa atong balaang pag-alagad sa Diyos. Bisan tuod si Jehova nakakita sa maong mga kasaypanan, siya nahibalo sa mga tawong may kasingkasing nga kiling sa pagkamatarong. Bisan pa kon kita makahimog sala nga mabug-at apan maghinulsol, si Jehova motaganag kapasayloan ug tabang ug magpadayon sa paglantaw kanato ingong diyosnong mga indibiduwal. “Wala niya buhata kanato ang angay sa atong mga sala; ni baslan kita niya sa angay sa atong mga kalapasan,” miingon si David. “Kay ingon nga ang kalangitan mas taas kay sa yuta, ingon man ka dako ang iyang mahigugmaong-kalulot ngadto kanila nga nahadlok kaniya. Ingon ka layo sa silangan gikan sa kasadpan, sa maong gilay-on iyang gipahilayo kanato ang atong mga sala. Sama sa usa ka amahan nga nagpakitag kaluoy sa iyang mga anak, sa mao nga paagi si Jehova nagpakitag kaluoy kanila nga may kahadlok kaniya. Kay siya nahibalo sa pagkaumol kanato, nahinumdom nga kita mga abog lamang.” (Salmo 103:10-14) Ang atong maluloy-on langitnong Amahan mopalihok usab kanato sa pagtul-id sa atong kalapasan o tingali hatagan kita ug laing higayon sa pagpalapad sa atong balaang pag-alagad, alang sa iyang kahimayaan.

Ang Sayop sa Pagbasol sa Diyos

7. Nganong kita mag-antos man sa mga kalisdanan?

⁷ Kon may mahitabong dili maayo, ang tendensiya sa tawo mao ang pagbasol sa usa ka tawo o sa usa ka butang alang sa nahitabo. Basolon pa gani sa uban ang Diyos. Apan si Jehova dili mohatag ug kalisod sa mga tawo. Siya nagabuhat ug maayo, dili makadaot nga mga butang. Ngani, “gipasubang niya ang iyang adlaw ibabaw sa mga daotan ug sa mga maayo ug nagpadalag ulan ibabaw sa mga matarong ug sa dili matarong”! (Mateo 5:45) Ang pangunang katarongan kon nganong atong ginaantos ang mga kalisdanan mao nga kita nagkinabuhi diha sa usa ka kalibotan nga nagalihok sa hakog nga mga prinsipyo ug nga nahisandig ang gahom diha kang Satanas nga Yawa.​—1 Juan 5:19.

8. Unsay gihimo ni Adan sa dihang nagkadaotdaot ang mga butang alang kaniya?

⁸ Ang pagbasol kang Jehova nga Diyos alang sa kalisdanan nga mosangpot sa atong mga kasaypanan maoy dili-maalamon ug peligroso. Ang paghimo niini makapildi pa sa atong kinabuhi mismo. Ang unang tawo, si Adan, angay mohatag pasidungog sa Diyos alang sa tanang maayong mga butang nga iyang nadawat. Oo, angay unta nga magmapasalamaton kaayo si Adan kang Jehova alang sa kinabuhi mismo ug sa mga panalangin nga iyang gitagamtam diha sa samag-parke nga puloy-anan, ang tanaman sa Eden. (Genesis 2:7-9) Unsay gihimo ni Adan sa dihang nagkadaotdaot ang mga butang tungod kay iyang gisupak si Jehova ug mikaon sa gidili nga bunga? Si Adan mireklamo sa Diyos: “Ang babaye nga imong gihatag kanako nga akong ikauban, iya akong gihatagan ug bunga gikan sa kahoy ug mikaon ako.” (Genesis 2:15-17; 3:1-12) Sa pagkatinuod, dili gayod nato basolon si Jehova, sama sa gihimo ni Adan.

9. (a) Kon kita makaatubang ug mga kalisod tungod sa atong dili-maalamong mga buhat, gikan sa unsa nga kita makakuhag kahupayan? (b) Sumala sa Proverbio 19:3, unsay gihimo sa uban kon makahatag sila ug kalisdanan sa ilang kaugalingon?

⁹ Kon makaatubang kita ug mga kalisod tungod kay ang atong mga lihok dili-maalamon, kita makabaton ug kahupayan gikan sa pagkahibalo nga si Jehova mas nakasabot sa atong mga kahuyangan kay kanato ug luwason kita gikan sa atong kahimtang kon atong hatagan siya sa eksklusibong debosyon. Kinahanglang atong pabilhan ang balaang tabang nga atong madawat, dili gayod basolon ang Diyos sa mga kapit-os ug mga kalisod nga ipaagom nato sa atong kaugalingon. Niining bahina ang maalamong sanglitanan nag-ingon: “Ang binuang sa tawo nagapabaliko sa iyang dalan, ug busa ang iyang kasingkasing masuko batok kang Jehova mismo.” (Proverbio 19:3) Ang laing hubad nag-ingon: “Daoton sa ubang mga tawo ang ilang kaugalingon pinaagi sa ilang binuang nga mga buhat ug unya basolon ang GINOO.” (Todays’ English Version) Lain pa gayod nga hubad nagkanayon: “Ang pagkaignorante sa tawo makadaot sa iyang mga kalihokan ug masuko siya batok kang Jehova.”​—Byington.

10. Sa unsang paagi ang binuang ni Adan ‘nagpabaliko sa iyang dalan’?

¹⁰ Nahiuyon sa prinsipyo niini nga sanglitanan, si Adan mahakogong milihok ug ang iyang binuang nga panghunahuna ‘nagpabaliko sa iyang dalan.’ Ang iyang kasingkasing mitalikod gikan kang Jehova nga Diyos, ug iyang gisubay ang iyang kaugalingong hakog, independenteng dalan. Gani, ingon niana ka ingrato si Adan nga iyang gibasol ang iyang Maglalalang ug busa naghimo sa iyang kaugalingon nga kaaway sa Labing Hataas! Ang sala ni Adan naghatod sa iyang kaugalingong dalan ug nianang sa iyang pamilya ngadto sa kadaot. Pagkabug-at niini nga pasidaan! Kadtong kiling sa pagbasol kang Jehova tungod sa dili-maayong mga kahimtang maayong mangutana sa ilang kaugalingon: Gipasidunggan ko ba ang Diyos alang sa maayong mga butang nga akong gipahimuslan? Mapasalamaton ba ako nga ako may kinabuhi ingong usa sa iyang mga linalang? Dili ba kaha ang akong mga kalapasan maoy naghatag kanakog kalisod? Takos ba ako sa pabor o tabang ni Jehova tungod sa pagsunod sa iyang pagtultol, sumala sa gipadayag diha sa iyang dinasig nga Pulong, ang Bibliya?

Usa ka Kapeligrohan Bisan sa mga Alagad sa Diyos

11. Mahitungod sa Diyos, sad-an sa unsa ang unang-siglong Hudiyohanong mga lider sa relihiyon?

¹¹ Ang Hudiyohanong mga lider sa relihiyon sa unang siglo K.P. nag-angkon nga nag-alagad sa Diyos apan nagsalikway sa iyang pulong sa kamatuoran ug misalig sa ilang kaugalingong pagsabot. (Mateo 15:8, 9) Sanglit giyagyag ni Jesu-Kristo ang ilang sayop nga panghunahuna, ilang gipapatay siya. Sa ulahi, ilang gipakita ang ilang dakong kasuko batok sa iyang mga tinun-an. (Buhat 7:54-60) Hilabihan ka hiwi ang dalan niadtong mga tawhana nga sila sa aktuwal nasuko batok kang Jehova mismo.​—Itandi ang Buhat 5:34, 38, 39.

12. Unsang mga pananglitan ang nagpakita nga bisan ang pipila ka indibiduwal nga membro sa Kristohanong kongregasyon misulay sa pagbasol kang Jehova tungod sa ilang mga kalisdanan?

¹² Bisan ang pipila ka indibiduwal sa Kristohanong kongregasyon nakaugmad ug peligrosong panghunahuna, naningkamot sa pagpasangil sa Diyos sa mga kalisdanan nga ilang naatubang. Pananglitan, nakita sa tinudlong mga ansiano sa usa ka kongregasyon ang panginahanglan sa usa ka batan-ong babayeng minyo ug maluluton apan hugot nga tambag sa Kasulatan batok sa pagkuyog-kuyog sa usa ka tagagawas nga lalaki. Sa panahon sa usa ka panaghisgot, iyang gibasol ang Diyos kay wala siya tabangi sa pagsukol sa tintasyon nga misangpot sa iyang padayong pagkuyog-kuyog sa lalaki. Siya aktuwal nga miingon nga siya nasuko sa Diyos! Ang mga pangatarongan sa Kasulatan ug masubsob nga mga paningkamot sa pagtabang kaniya wala magpulos, ug usa ka imoral nga dalan sa ulahi mitultol kaniya sa pagkapalagpot gikan sa Kristohanong kongregasyon.

13. Nganong likayan ang bagolbolan nga tinamdan?

¹³ Ang bagolbolan nga espiritu motultol sa usa ka tawo sa pagbasol kang Jehova. Ang “mga tawong dili-diyosnon” nga nakasulod sa unang-siglong kongregasyon may ingon niana nga daotang espiritu, ug kadto giduyogan sa ubang mga matang sa makadaot sa espirituwal nga panghunahuna. Sama sa giingon sa tinun-ang si Judas, kining mga tawhana “naghimo sa dili-takos nga kalulot sa atong Diyos ingong pasangil sa haluag nga paggawi ug nagpanghimakak sa atong bugtong Agalon ug Ginoo, si Jesu-Kristo.” Si Judas miingon usab: “Kining mga tawhana reklamador, bagolbolan sa ilang kahimtang sa kinabuhi.” (Judas 3, 4, 16) Ang maunongong mga alagad ni Jehova maalamong moampo nga unta makabaton sila ug usa ka mapabilhong espiritu, dili bagolbolan nga tinamdan nga basig sa ulahi madaot ang ilang buut hangtod sa punto nga sila mawad-ag pagtuo sa Diyos ug ipameligro ang ilang relasyon uban kaniya.

14. Unsa tingali ang mahimong reaksiyon sa usa kon masilo sa isigka-Kristohanon, apan nganong dili kini angay nga dalan?

¹⁴ Tingali mobati ka nga dili kini mahitabo kanimo. Bisan pa, ang mahitabong dili maayo tungod sa atong mga kasaypanan o sa uban tingalig sa ulahi mopahinabo kanato sa pagbasol sa Diyos. Pananglitan, tingali masilo ang usa ka tawo sa isulti o sa lihok sa isigkamagtutuo. Ang nasilo nga indibiduwal​—tingali usa nga nag-alagad kang Jehova nga maunongon sa daghang mga tuig—​basig moingon: ‘Kon anaa pa kanang tawhana sa kongregasyon, dili ako motambong sa mga tigom.’ Ang usa ka indibiduwal tingali masuko kaayo nga siya moingon diha sa iyang kasingkasing: ‘Kon magpadayon kining mga butanga, dili ako gustong mahimong bahin sa kongregasyon.’ Apan angay ba nga magbaton ang Kristohanon nianang tinamdana? Kon masilo sa laing dili-hingpit nga tawo, nganong masuko man sa tibuok kongregasyon sa mga tawo nga gikahimut-an sa Diyos ug maunongong nagaalagad kaniya? Nganong ang usa nga nakapahinungod na kang Jehova mohunong sa pagbuhat sa balaang kabubut-on ug masuko sa Diyos? Unsa ba ka maalamon ang pagtugot sa usa ka indibiduwal o mga panghitabo nga modaot sa imong maayong relasyon kang Jehova? Sa pagkatinuod, binuang ug daotan ang paghunong sa pagsimba kang Jehova nga Diyos sa bisan unsa nga katarongan.​—Santiago 4:17.

15, 16. Si Diotrepes sad-an sa unsa, apan unsay paggawi ni Gayo?

¹⁵ Handurawa nga magkauban kamo ug kongregasyon sa mahigugmaon nga Kristohanong Gayo. Siya “nagahimog matarong nga buhat” sa pag-abiabi sa nagaduaw nga kaubang mga magsisimba​—ug dili pa niya kaila! Apan dayag nga nianang kongregasyona gihapon, dihay tawong hambogiro nga si Diotrepes. Siya dili gayod modawat ug bisan unsa maylabot kang Juan, ang usa sa mga apostol ni Jesu-Kristo. Gani, nagtabi si Diotrepes bahin kang Juan ug dili maayong mga pulong. Ang apostol miingon: “Wala matagbaw niini, si [Diotrepes] nagdumili sa pagdawat sa mga igsoon nga matinahuron, ug iyang gibabagan kadtong buot modawat kanila ug iyang gipapahawa sila sa kongregasyon.”​—3 Juan 1, 5-10.

¹⁶ Kon makaanha na si Juan sa kongregasyon, hinumdoman ra niya ang gibuhat ni Diotrepes. Kasamtangan, unsay reaksiyon ni Gayo ug sa ubang maabiabihong mga Kristohanon niadtong kongregasyona? Walay gipaila sa Kasulatan nga adunay miingon kanila: ‘Basta anaa pa si Diotrepes sa kongregasyon, dili ako gustong mahimong bahin niana. Dili ninyo ako makita diha sa mga tigom.’ Sa walay duhaduha si Gayo ug ang uban nga sama kaniya mibarog nga malig-on. Sila wala magpababag sa pagpahunong kanila sa pagbuhat sa balaang kabubut-on, ug sila sa dayag wala masuko kang Jehova. Wala, gayod, ug sila wala magpadaog sa malalangong mga laraw ni Satanas nga Yawa, nga malipay unta kon sila pa wala nagmatinumanon kang Jehova ug gibasol ang Diyos.​—Efeso 6:10-18.

Ayaw Gayod Kasuko Batok Kang Jehova!

17. Unsa ang angay natong reaksiyon kon may indibiduwal o kahimtang nga nakasilo o nakapasuko kanato?

¹⁷ Bisan pa kon may indibiduwal o kahimtang diha sa kongregasyon nga nakapasuko o nakapasilo sa usa ka alagad sa Diyos, gidaot sa usa nga nasilo sa pagkatinuod ang iyang kaugalingong dalan kon siya mohunong sa pagpakig-uban sa katawhan ni Jehova. Ang maong tawo wala mogamit sa iyang salabotan sa hustong paagi. (Hebreohanon 5:14) Busa magmahugoton sa pag-atubang sa tanang mga kalisdanan ingong maghuhupot sa integridad. Ampingi ang pagkamaunongon kang Jehova nga Diyos, kang Jesu-Kristo, ug sa Kristohanong kongregasyon. (Hebreohanon 10:24, 25) Ang kamatuoran nga motultol sa kinabuhing dayon dili makaplagan sa ubang dapit.

18. Bisag dili nato masabtan kanunay ang balaang mga pagpakiglabot, bahin sa unsa nga kita makatino labot kang Jehova nga Diyos?

¹⁸ Hinumdomi, usab, nga si Jehova dili gayod mosulay kang bisan kinsa ug daotang mga butang. (Santiago 1:13) Ang Diyos, nga mao gayod ang larawan sa gugma, nagabuhat ug maayo, ilabina alang kanila nga nahigugma kaniya. (1 Juan 4:8) Bisan tuod dili nato masabtan kanunay ang balaan nga mga pagpakiglabot, kita makasalig nga si Jehova nga Diyos dili gayod mopakyas sa pagbuhat sa labing maayo alang sa iyang mga alagad. Sama sa giingon ni Pedro: “Busa, ipaubos ninyo ang inyong kaugalingon ilalom sa gamhanang kamot sa Diyos, aron kamo iyang igatuboy sa gitagal nga panahon; samtang itugyan ninyo ngadto kaniya ang inyong tanang kabalaka, tungod kay siya may kahangawa man alang kaninyo.” (1 Pedro 5:6, 7) Oo, si Jehova tinuod gayod nga may kahangawa sa iyang katawhan.​—Salmo 94:14.

19, 20. Unsa ang angay natong reaksiyon, bisan kon ang atong mga pagsulay makahatag usahay kanatog kaguol?

¹⁹ Busa, ayaw itugot nga adunay bisan unsang butang o bisan kinsa nga makapandol kanimo. Sama sa maayong pagkapahayag sa salmista, “adunay dakong kalinaw kadtong nahigugma sa kasugoan [ni Jehova nga Diyos], ug walay makapandol kanila.” (Salmo 119:165) Kitang tanan makaagi ug mga pagsulay, ug hayan kini mohatag kanatog kaguol ug makawala usahay sa kadasig. Apan ayaw gayod itugot nga moturok sa imong kasingkasing ang daotang buut, ilabina batok kang Jehova. (Proverbio 4:23) Pinaagi sa iyang tabang ug pinasukad sa Kasulatan, atimana ang mga suliran nga imong masulbad ug antosa kadtong nagapabilin.​—Mateo 18:15-17; Efeso 4:26, 27.

²⁰ Ayaw gayod padala sa imong emosyon pinaagi sa pagreaksiyon sa binuang nga paagi ug busa nagadaot sa imong dalan. Sulti ug lihok sa paagi nga makahatag kalipay sa kasingkasing sa Diyos. (Proverbio 27:11) Sangpita si Jehova diha sa kinasingkasing nga pag-ampo, sa kasayoran nga siya tinuod nga may kahangawa kanimo ingong usa sa iyang mga alagad ug mohatag kanimo sa pagsabot nga gikinahanglan aron makapabilin diha sa dalan sa kinabuhi uban sa iyang katawhan. (Proverbio 3:5, 6) Labaw sa tanan, ayaw gayod kasuko batok sa Diyos. Kon may mahitabong dili maayo, hinumdomi kanunay nga si Jehova dili mao ang mabasol.

Unsaon Nimo Pagtubag?

◻ Unsang sayop ang nahimo ni Lot, apan unsay paglantaw kaniya sa Diyos?

◻ Unsay gibati ni David bahin sa mga kasaypanan ug pagkamapangahason?

◻ Kon may mahitabong dili maayo, nganong dili nato angay basolon ang Diyos?

◻ Unsay makatabang kanato sa paglikay sa pagkasuko batok kang Jehova?

[Hulagway sa panid 15]

Dihang mibulag kang Abraham, si Lot mihimo ug dili maayong pagpili bahin sa dapit nga iyang puy-an