Mga Pangutana Gikan sa mga Magbabasa

Unsay buhaton sa Kristohanon kon siya dili makakitag takos nga kapikas sa kaminyoon?

Bisag debotadong mga Kristohanon, kita maguol gihapon kon kita masingkamotong nagapaabot ug butang nga dili mahitabo. Ang atong mga pagbati maayong pagkapahayag diha sa Proverbio 13:12, nga nagaingon: “Ang nalangan nga paglaom nagapasakit sa kasingkasing.” Mao kini ang gibati sa ubang mga Kristohanon sa dihang sila gusto nang magminyo apan wala makakitag takos nga kapikas. Tinuod usab kini ngadto sa mga tawo nga gihubit ni apostol Pablo nga “nagasilaob sa pagbati.”​—1 Corinto 7:9.

Gibutang ni Jehova diha sa tawo ang tinguha sa pagpangitag tinuod nga katabang sa kaatbang nga sekso. Busa, dili ikatingala nga ang maong mga emosyon kusganong bation sa daghang dili-minyong mga Kristohanon. (Genesis 2:18) Kining normal nga pagbati mosamot diha sa mga kultura nga naghatag ug dakong pasiugda sa pagminyo (o magminyo sa tino nga edad) o kon gilibotan ang dili-minyong Kristohanon ug malipayon minyong mga magtiayon sa kongregasyon. Apan, dili maayong tugotang mabalaka sa taas-taas nga panahon. Busa sa unsang paagi atubangon sa sinserong mga Kristohanon ang kahimtang nga dili sobrang mabalaka?

Kana dili sayon, ug dili angay lantawon sa uban kini nga kabalaka nga sobra ra o gamay lamang nga butang. Apan sa dakong bahin, ang katakos sa pagsagubang o pagsulbad sa kahimtang nagadepende sa mga lakang nga himoon sa dili-minyo.

Makakaplag kitag yawi niining praktikal nga prinsipyo sa Bibliya: “Adunay dakong kalipay ang paghatag kay sa pagdawat.” (Buhat 20:35) Kana ang giingon sa dili-minyong tawong si Jesu-Kristo, ug siya nahibalo sa iyang gisulti. Ang pagbuhat ug mga butang alang sa uban nga walay hakog nga motibo maoy usa ka maayong solusyon sa pagtabang kang bisan kinsa kanato sa pagbuntog sa mga pagbati nga moresulta tungod sa nalangang paglaom. Unsay kahulogan niini alang sa dili-minyong Kristohanon?

Paningkamot nga makahimog mga buhat sa kalulot alang sa imong kaugalingong pamilya ug alang sa uban diha sa kongregasyon, ug pauswaga ang imong kalihokan sa ministeryo. Kining tambaga dili lang basta nag-ingon, ‘Magmaokupado, ug imong makalimtan ang imong tinguhang magminyo.’ Dili. Ang pagkahimong okupado niining mabungahon Kristohanong mga kalihokan, makita mo nga ‘malinawon ang imong kasingkasing, nga makagahom sa imong kaugalingong kabubut-on’ ug makagamit sa imong mga sirkumstansiya karon diha sa mapuslanon nga paagi.​—1 Corinto 7:37.

Gitugotan sa uban nga gusto na gayod magminyo kining tinguhaa nga nahimong ilang labing gikabalak-an. Sila gani mihimog sobra pa niana, sama sa pagpaanunsiyo diha sa mga mantalaan nga nangitag kapikas. Apan, pagkamaayo ang paghatag ug dugang pagpabili sa mga kaayohang makuha sa panahon sa pagkadili-minyo.​—Palihog tan-awa ang mga artikulong “Dili-Minyo Apan Bug-os sa Pag-alagad sa Diyos” ug “Pagkatagsaanon—​Usa ka Magantihong Paagi sa Kinabuhi” diha sa Ang Bantayanang Torre sa Nobyembre 15, 1987, ug “Ang Kaminyoon Mao ba Lamang ang Yawi sa Kalipay?” diha sa Ang Bantayanang Torre sa Mayo 15, 1992.

Pangayog tabang kang Jehova diha sa pag-ampo nga maantos ang dili-minyo nga kahimtang. (Filipos 4:6, 7, 13) Nakita sa daghang dili-minyong mga Kristohanon nga pinaagi sa paggamit sa ilang panahon sa pagtuon ug sa pagpamalandong sa Pulong sa Diyos ug sa pagtambong ug sa pagpakig-ambit sa Kristohanong mga tigom, ilang natagamtam ang dugang ‘kapahulayan sa ilang kalag,’ ingon sa gisaad ni Jesus sa mosunod kaniya. (Mateo 11:28-30) Kini nakatabang kanila sa pag-ugmad sa espirituwalidad, aron sila mahimong mas maayong mga bana o mga asawa kon sila sa ulahi makakita nag takos nga kapikas.

Ayawg kalimot nga si Jehova nakasabot sa kahimtang sa tanang dili-minyo nga nag-alagad kaniya. Siya nahibalo nga tingali gibati mo nga ang imong kahimtang karon dili mao ang imong gusto. Ang atong mahigugmaon langitnong Amahan nahibalo usab kon unsa ang mohatag ug malungtarong kaayohan kanimo, sa espirituwal ug sa emosyonal. Sa baylo ikaw mahibalo niini sa tino: Pinaagi sa mapailobong paghulat kang Jehova ug pagpadapat sa mga prinsipyo sa iyang Pulong sa adlaw-adlaw nga kinabuhi, makatino ka nga siya motagbaw sa imong labing hinungdanong mga panginahanglan sa paagi nga mohatag ug walay kataposang kaayohan kanimo.​—Itandi ang Salmo 145:16.