Ikaw ba Sama sa Usa Niini?
‘MAS maayo pang mahimong liyon sa usa ka adlaw kay sa karnero sa gatosan ka tuig.’ Kadtong mga pulonga gisulti ni Benito Mussolini, diktador kaniadto sa Italya.
Sama kang Mussolini daghang tawo ang mosupak nga iklasipikar ingong mga kordero ug karnero. Bisan pa, ang karaang salmista-hari nga si David sa Israel miingon: “Si Jehova ang akong Magbalantay. . . . Gitultolan niya ako sa daghag-tubig nga dapit-pahulayan.” (Salmo 23:1, 2) Oo, si Jehova nga Diyos mao ang Dakong Magbalantay, nga nagahatag sa iyang katawhan ug malumo nga pag-atiman nga daw sama sila sa buotan nga mga karnero.
Ang katawhan sa Diyos gihisgotan ingong mahulagwayong mga karnero diha sa Salmo 95:7, diin atong mabasa: “Kay [si Jehova] mao ang atong Diyos, ug kita ang katawhan sa iyang sibsibanan ug ang mga karnero sa iyang kamot.” Ang uban tingali naghunahuna nga naghisgot ang salmista bahin “sa mga karnero sa iyang sibsibanan” ug “ang katawhan sa iyang kamot.” Apan gibali dinhi ang mga butang, ug ang katawhan ni Jehova mismo ang naila nga iyang mga karnero. Ilang ginatagamtam ang mga kaayohan sa sibsibanan sa Diyos ug gitultolan sa iyang mahigugmaong kamot.
Ang Anak ni Jehova, si Jesu-Kristo, mao ang Maayong Magbalantay. Kanunay niyang ipunting ang mga tawo ingong mga karnero. Pananglitan, si Jesus naghisgot bahin sa “gamayng panon” ug sa iyang “ubang karnero.” (Lucas 12:32; Juan 10:14-16) Mahitungod sa iyang mapainubsanong samag-karnero nga mga tinun-an, si Jesus miingon: “Ang akong karnero magpatalinghog sa akong tingog, ug ako nakaila kanila, ug sila mosunod kanako. Ug hatagan ko sila ug kinabuhing walay kataposan, ug sila dili gayod malaglag, ug walay makaagaw kanila gikan sa akong kamot.” (Juan 10:27, 28) Diha sa kamot sa usa ka mabinationg magmamando, ang mga sakop makabatog kaayohan sa iyang gahom, pabor, pagtultol, ug proteksiyon.—Pinadayag 1:16, 20; 2:1.
Wala gayoy makaagaw sa samag-karnero nga mga tawo gikan sa mapanalipdanong kamot ni Jesus. Karong adlawa, siya nagalainlain sa mga tawo kon kaha ingong “mga kanding” nga wala siyay pag-uyon o ingong “mga karnero” nga makatagamtam ug kinabuhing walay kataposan ubos sa pagmando sa langitnong Gingharian sa Diyos. (Mateo 25:31-46) Pamatud-an mo ba nga usa ikaw niadtong gipanalanginan nga mga karnero?
[Picture Credit Line sa panid 32]
Garo Nalbandian