Hinabang nga Pagkaon ug Gamit Nagsumbalik-silaw sa Gugmang Kristohanon

“MAGBATON ug gugma alang sa tibuok kapunongan sa mga igsoon,” si apostol Pedro miawhag sa iyang isigka-Kristohanon. (1 Pedro 2:17) Kanang gugmaha kinahanglang molapas sa rasanhon, sosyal, ug nasodnong mga utlanan, nga hugpongon ang mga katawhan sa matuod nga panag-igsoonay. Sa dihang mitungha ang materyal nga panginahanglan taliwala sa unang mga Kristohanon, gugma ang midasig sa daghan sa paghatag ug amot ngadto sa mga apostoles aron ipanghatag ngadto niadtong nanginahanglan. Ang talaan nag-ingon nga “gipanag-usahan nila sa pag-ambit ang tanang butang.”​—Buhat 2:41-45; 4:32.

Ang maong gugma napasundayag sa dihang ang Nagamandong Lawas sa mga Saksi ni Jehova, pagkatapos sa 1991, nagdapit sa ubay-ubayng sanga sa Watch Tower Society sa Kasadpang Uropa sa paghatag pagkaon ug biste alang sa ilang mga igsoong nanginahanglan sa Sidlakang Uropa, apil ang mga bahin sa kaniadto Unyon Sobyet. Gipadayag namo dinhi ang sunodsunod nga mga taho gikan sa pipila sa mga sanga nga nalangkit.

Sweden

Niadtong Disyembre 5, 1991, usa ka sulat nga nagsaysay sa panginahanglan gipadala sa koreyo ngadto sa tanang 348 ka kongregasyon sa Sweden. Ang tubag maoy dihadiha. Sa pila ra ka adlaw, ang unang semitrailer nagpadulong na sa St. Petersburg, Russia, nga kargado ug 15 ka toneladang harina, manteka, delatang karnenorte, pinolbos nga gatas, ug susamang mga butang. Ang lokal nga mga Saksi ni Jehova naghabwa sa karga sa trak ug nag-apod-apod dayon sa 750 ka pakete ngadto niadtong nanginahanglan. Sa ulahi, duha pa ka semitrailer nagdalag pagkaon ngadto sa Russia. Tanantanan, kapig 51.5 ka tonelada ang napadala gikan sa Sweden.

Ang kaandam nga modonar sa sinina ug sapatos milabaw sa tanang panahom. Ang mga tumpi sa mga putos sa sinina daling natigom diha sa mga Kingdom Hall. Daghang Kristohanon mingdonar ug mga sinina gikan sa ilang mga aparador. Ang uban namalit ug bag-ong mga sinina. Usa ka igsoong lalaki mipalit ug lima ka amerkana. Sa dihang nahibaloan sa natingalang tindero ang katuyoan, siya midonar ug lima pa ka amerkana. Ang laing igsoong lalaki mipalit ug usa ka kahon nga medyas, guwantis, ug mga baliog. Sa gisaysay niya ang katuyoan, ang tag-iya mitanyag kaniyag 30 ka bag-ong amerkana sa prisyo sa duha. Usa ka namaligyag bisteng pangdula midonar ug 100 ka paris sa bag-ong sapatos ug mga botas.

Unya kining tanang butang gidala ngadto sa sangang-buhatan aron mapihigpihig, maotro pag-impake, ug makarga. Ang mga biste​—nga tumbas sa masulod ug 40 ka semitrailer—​miokupar sa luag kaayong mga luna sa sangang-buhatan! Ang mga igsoong lalaki ug babaye nagtrabaho ug daghang semana nga nagpihigpihig niana ngadto sa mga tapok alang sa mga lalaki, mga babaye, ug mga bata ug nagsulod niana sa mga karton. Napulog-lima ka lainlaing semitrailer ang gigamit sa pagdala nga luwas sa biste ngadto sa Russia, Ukraine, ug Estonia.

Usa ka igsoong lalaki nga nagmaneho sa usa sa mga trak sa Sosyedad sa walo ka beses ngadto sa kaniadto Unyon Sobyet miingon: “Ang pagdawat nga gipaabot kanamo sa atong mga igsoon diha sa mga destinasyon maoy usa ka dakong balos. Kami ilang gigakos ug gihalokan, ug bisan pa sa ilang kanihit, gihatagan nila kamig maayong pagtulon-an sa Kristohanong kamahinatagon.”

Pinlandia

Bisan pa sa grabeng resesyon, lapnag nga kawalay-trabaho, ug mga suliran sa ekonomiya sa Pinlandia, ang kaandam taliwala sa mga 18,000 ka igsoon sa Pinlandia sa pagtabang sa ilang mga igsoon sa kaniadto Unyon Sobyet maoy dako. Sila nagpadalag kapin sa 58 ka toneladang pagkaon sulod sa 4,850 ka karton ngadto sa St. Petersburg, Estonia, Latvia, Lithuania, ug Kaliningrad. Gipuno usab nilag 12 ka metro kubikong biste ang bakanteng luna sa mga trak. Mga 25 ka segunda-manong mga kotse ug van gidonar usab aron magamit sa buluhaton sa Gingharian.

Pipila sa mga kahon sa pagkaon nakaabot sa usa ka kongregasyon nga may 14 ka magmamantala sa Slanti sa dapit sa St. Petersburg. Gipadayag nila ang dakong pasalamat diha sa usa ka sulat. “Kami may napulo ka tigulang igsoong babaye sa among kongregasyon. Daghan kanila may grabeng sakit ug dili makatindog sa mga linya sulod sa daghang oras aron makakuhag pagkaon. Bisan pa niana, ang atong langitnong Amahan wala maghatag kanamo sa hinungdan nga maluya niining lisod nga kapanahonan apan nagpuno sa among mga kasingkasing sa kalipay. Kami nagadumalag 43 ka pagtuon sa Bibliya sa balay.” Sa dihang nadawat sa usa ka igsoong babaye sa St. Petersburg ang iyang putos nga hinabang, siya natandog pag-ayo nga mihilak siyag duha ka oras una niya buksi kana.

Denmark

Niining gamayng nasod sa entrada sa Dagat Baltic, mga 16,000 ka Saksi ni Jehova nagkatigom ug nagpadala ngadto sa Ukraine ug 19 ka trak nga nasudlan ug 64 ka toneladang pagkaon sulod sa 4,200 ka kahon; 4,600 ka kahon sa deprimera-klaseng biste; ug 2,269 ka paris sa bag-ong sapatos. Usa ka igsoong lalaki sa Alemanya nagpagamit sa sangang-buhatan ug lima ka trak, nga unya iyang gidonar ngadto sa mga igsoon sa Ukraine. Sa pagpauli, usa sa mga drayber miingon: “Among nadiskobrehan nga mas daghan ang among nadala sa pagpauli kay sa among gihatod. Ang gugma ug espiritu sa pagsakripisyo nga gipakita sa atong mga igsoon sa Ukraine nakapalig-on pag-ayo sa among pagtuo.”

Ang mga drayber kinahanglang magbantay sa mga tulisan ubay sa mga karsada sa kaniadto Unyon Sobyet. Pila ka adlaw una pa moagi ang usa sa mga trak nga Danish, nahitabo ang usa ka tulis nianang rutaha. Usa ka komboy sa lima ka trak nga may pagkaon gikan sa laing organisasyon sa panghinabang gibanhigan sa mga tulisan nga minggamit ug mga helikopter ug mga masinggan. Gikuha nila ang tanang lima ka trak, nga gibilin ang mga drayber sa daplin sa karsada. Bisan pa sa maong kapeligrohan, ang tanang suplay gikan sa Danish nga sangang-buhatan nakaabot nga luwas sa mga igsoon. Sa pagbalik, gipadala nila sa usa ka drayber ang mosunod nga sulat, nga gisulat uban ang dakong kalisod sa Ingles nga sa Cebuano nag-ingon: “Minahal nga Danish nga kaigsoonan: Nadawat namo ang inyong tabang. Si Jehova magaganti kaninyo.”

Ang Netherlands

Ang sangang-buhatan sa Netherlands nagpadalag 52 ka toneladang pagkaon sulod sa 2,600 ka putos. Gihatod kadto ngadto sa Ukraine sa duha ka magkalain nga komboy. Sa matag panahon ang unom ka trak gibilin, kay sila gidonar sa mga igsoon sa Alemanya alang sa buluhaton sa Gingharian sa Sidlakan. Ang mga igsoon sa Ukraine nagpadala sa kadaghanan sa pagkaon ngadto sa Moscow, Siberia, ug ubang mga dapit diin may dakong panginahanglan. Dugang pa, 736 ka metro kubikong biste ug sapatos gidonar sa Olandes nga kaigsoonan. Gidala kadto sa Lviv sa Ukraine nga nagkomboy ang 11 ka trak nga giubanan sa usa ka pribadong kotse.

Human sa dugay nga biyahe agi sa Alemanya ug Polandia, ang komboy miagi nga hapsay sa adwana sa Ukraine, ug nakaabot sa kanait sa Lviv sa 3:00 s.b. Ang mga drayber mitaho: “Sa kadiyut nga panahon, ang pundok sa 140 ka igsoon diha na sa pagdiskarga sa mga trak. Una sugdi ang trabaho, kining mapaubsanong mga igsoon nagpakita sa ilang pagsalig kang Jehova, nga mitanyag ug nahiusang pag-ampo. Sa pagkahuman sa trabaho, sila nagtigom na usab alang sa usa ka pag-ampo sa pagpasalamat kang Jehova. Tapos makapahimulos sa kamaabiabihon sa lokal nga mga igsoon, kinsa mihatag nga madagayaon sa diyutay nga ilang nabatonan, kami giubanan ngadto sa dakong karsada, diin sila mitanyag ug pag-ampo sa daplin sa karsada una pa sila mobiya kanamo.

“Panahon sa dugay namong biyahe pauli, daghan kaayo ang mapamalandong​—ang kamaabiabihon sa mga igsoon sa Alemanya ug Polandia, ug sa iya sa among mga igsoon sa Lviv; ilang lig-ong pagtuo ug pagkamainampoong tinamdan; ilang kamaabiabihon sa pagtaganag mga sak-anan ug pagkaon samtang sila anaa sa kawalad-on mismo; ilang pasundayag sa panaghiusa ug panagsuod; ug ilang pagkamapasalamaton. Kami naghunahuna usab sa among mga igsoong lalaki ug babaye sa among dapit, nga mihatag ug daghan kaayo.”

Switzerland

Ang Swisong sangang-buhatan nagsugod sa iyang taho pinaagi sa pagkutlo gikan sa Santiago 2:15, 16: “Kon ang usa ka igsoong lalaki o igsoong babaye anaa sa hubo nga kahimtang ug walay pagkaon nga igo alang sa adlaw, apan usa kaninyo magaingon kanila: ‘Lumakaw kamo nga malinawon, painiti ug busga ang inyong kaugalingon,’ apan dili nimo hatagan sila sa mga kinahanglanon sa ilang lawas, unsay kapuslanan niana?” Unya ang taho nagpadayon: “Kining Kasulatana misantop sa hunahuna sa dihang ang Nagamandong Lawas sa mga Saksi ni Jehova nagdapit kanamo sa pagtaganag materyal nga tabang ngadto sa atong mga igsoong anaa sa kawalad-on.

“Dihadiha ang tanan napuliki! Sa duha ra ka adlaw, 12 ka toneladang pagkaon diha sa 600 ka putos gipadala ngadto sa Ukraine pinaagi sa tulo ka trak gikan sa Alemanya, nga igadonar alang sa buluhaton didto. Ang balita nga ang tanan nakaabot nga luwas nakapahinabog dakong kalipay taliwala sa among mga igsoon dinhi. Kasamtangan, ang mga kongregasyon nangolektag biste, ug sa wala madugay ang among sangang-buhatan gilunopan ug mga karton, mga maleta, ug mga bag! Kadtong may biste sa mga bata nag-apil sa pila ka dulaan gikan sa Swisong mga bata alang sa dili-kailang mga higala sa halayong Amihanan. Daghang bareta nga tsokolate ang gibutang tali sa mga hut-ong sa biste usab.”

Giunsa ba paghatod kining tanan? Ang taho nag-ingon: “Ang sangang-buhatan sa Pransiya miayuda kanamo pinaagi sa pagpagamit sa duha ka semitrailer ug upat ka drayber. Dugang pa, usa ka trak gikan sa among sangang-buhatan ug upat pa nga iya sa lokal nga mga igsoon gikinahanglan sa paghakot sa 72 ka tonelada paingon sa Ukraine.” Ang komboy, 150 ka metros sa gitas-on, luwas nga nakaabot sa pondohanan sa Lviv, diin mga usa ka gatos ka lokal nga igsoon nagpaabot sa paghaw-as sa karga sa mga trak. Ang mga drayber mitaho nga ang pinulongan wala makababag tungod kay ang ilang mga nawong misumbalik-silaw sa halalom nga apresasyon.

Austria

Ang Austrianong mga igsoon nagpadalag 48.5 ka toneladang pagkaon, 5,114 ka kartong biste, ug 6,700 ka parisang sapatos ngadto sa Lviv ug Uzhgorod sa Ukraine. Sila nagpadala usab ug 7 ka toneladang pagkaon, 1,418 ka kahong biste, ug 465 ka parisang sapatos ngadto sa Belgrade, Mostar, Osijeck, Sarajevo, ug Zagreb sa kaniadto Yugoslavia. Ang taho sa sangang-buhatan nag-ingon: “Kami may 12 ka semitrailers nga kargado, nga mibiyaheg 34,000 ka kilometros. Kadaghanan sa pagpanghatod gihimo sa usa ka igsoong lalaki ug sa iyang anak lalaki nga may negosyo sa paghakot pinaagig trak.”

Mahitungod sa gidonar nga biste, ang taho nagpadayon: “Gigamit namo ang usa ka Assembly Hall ingong sentral nga pondohanan. Tinaraktarak ang nagpadayon nga gibubo, hangtod nga wala nay lugar. Sama sa mga adlaw ni Moises, ang mga tawo kinahanglang pugngan sa pagdalag dugang. (Exodo 36:6) Bisan ang pila ka tawo nga dili mga Saksi ni Jehova midonar ug kuwarta, ‘kay,’ sumala pa nila, ‘niining paagiha nahibalo kami nga ang mga tawong nagkinahanglan makadawat niana.’ Nabatonan usab namo ang gikinahanglan kaayong mga basiyong karton gikan sa mga kompaniya sa taga-kalibotan nga walay bayad.” Ang mga igsoong lalaki ug mga babaye nga nagpihigpihig ug nag-impake sa tanan maoy gikan sa 9 ngadto 80 anyos sa edad. Gisulayan pa gani nila ang pagpabagay sa angay nga korbata ug kamisadentro sa matag amerkana.

Ang taho nag-ingon: “Ang mga awtoridad sa Austria ug sa mga utlanan matinabangon kaayo sa pagpaposible sa lainlaing mga sakyanan sa hinabang ug sa paghatag sa gikinahanglang papeles aron ang mga paghatod mahimo nga walay dakong suliran.”

Italya

Gikan sa Roma abot ug 188 ka toneladang pagkaon ang gipadala diha sa duha ka dagkong komboy sa mga trak latas sa Austria, Czechoslovakia, ug Polandia ngadto sa kaniadto Unyon Sobyet. Ang matag komboy nag-apil sa unom ka drayber, usa ka mekaniko, usa ka elektrisyan ug awto, usa ka maghuhubad, usa ka ahente sa forwarder, usa ka kusinero, usa ka doktor, usa ka lider sa komboy diha sa dyip, ug usa ka igsoong may camper.

Ang pagkaon nakuha gikan sa pito ka kompaniya nga tigsuplay ug pagkaon o kasangkapan. Ang sangang-buhatan nagtaho: “Sa dihang nadunggan sa among mga tigsuplay ang hinungdan sa proyekto, pipila kanila buot mosalmot. Ginatos ka kilong pasta ug bugas humay, ingon man mga kahon sa pag-impake, gidonar sa kalibotanong mga tigsuplay. Ang uban pa midonar ug mga ligid sa niyebe alang sa mga trak o mitanyag sa pag-amot ug kuwarta.

“Giapresyar sa mga igsoon sa Italya ang maong higayon sa pagtabang. Ang mga bata buot nga moamot usab. Usa ka singko-anyos nga batang lalaki nagpadalag gamayng amot nga iyang gilaomang makapalit ug ‘usa ka delatang tuna nga abot sa langit alang sa mga igsoon sa Russia.’ Tungod sa tag-as niyang mga grado sa eskuylahan, usa ka gamayng batang babaye nakadawat ug kuwarta gikan sa iyang mga apohan aron ipalit ug gasa alang sa iyang mga ginikanan. ‘Apan,’ siya misulat, ‘sa nakaamgo ako nga daghan sa akong mga igsoon wala makabaton sa tanang maayong butang akong ginakaon, gihunahuna ko nga ang labing maayong gasa nga akong ikapalit sa akong mga ginikanan mao ang pagtabang sa maong mga igsoon.’ Siya mihulog ug dakodakong kuwarta sa kahon sa amot. ‘Naglaom ako nga makapadayon sa pagbatog maayong mga grado, aron makapadala akog dugang kuwarta,’ matud niya.” Ang taho sa sangang-buhatan mitapos sa pag-ingon nga ang mga sulat sa mabinationg apresasyon gikan sa mga igsoon sa Ukraine, ang daghang pulong sa apresasyon sa Italyanong mga igsoon, ug ang nindot nga mga kasinatian sa pag-andam ug paghatod sa mga suplay maoy makapatandog, makapadasig, ug makapahiusa.

Pagkaon Alang sa Linibong Delegado

Ang unang internasyonal nga kombensiyon sa mga Saksi ni Jehova sa kaniadto Unyon Sobyet gihimo sa Kirov Stadium sa St. Petersburg sa Russia, sa Hunyo 28-30, 1992. Ang maong panimaan nga kombensiyon, nga may temang “Mga Tigdala sa Kahayag,” gitambongan ug kapig 46,200 ka delegado gikan sa 28 ka nasod. Kadto mihatag ug laing higayon sa pagpasundayag sa Kristohanong gugma “alang sa tibuok kapunongan sa mga igsoon.”​—1 Pedro 2:17.

Tonetoneladang pagkaon gikan sa Denmark, Pinlandia, Sweden, ug ubang kayutaan sa Kasadpang Uropa gipanghatag nga libre ngadto sa libolibong delegado sa kombensiyon gikan sa kaniadto U.S.S.R., nga kan-on panahon sa kombensiyon. Sa ilang pagbiya sa kombensiyon tapos sa kataposang sesyon, sila gihatagan usab ug putos sa pagkaon ingong balon alang sa ilang biyahe pauli.

Ang mga taho nga gihisgotan dinhi nagapakita nga ang paghatag dili lamang paingon sa usa ka dalan​—pasilangan​—lamang. May bayloanay sa paghatag. Pagkaon ug biste pasilangan, oo, apan pakasadpan ang di-maihap makapalipay nga mga pahayag sa gugma ug makapadasig-sa-pagtuo nga mga kasinatian nga nagsumbalik-silaw sa pagkamalahutayon ug kamatinumanon sa linibong magsisimba ni Jehova sulod sa tinagpulo ka katuigang kapit-osan ug kalisdanan. Sa ingon, ang duha ka kiliran nakasinati sa kamatuoran sa mga pulong ni Jesus: “Adunay labaw nga kalipay sa paghatag kay sa pagdawat.”​—Buhat 20:35.

[Diagram/​Hulagway sa panid 21]

1. Gikan sa Pinlandia: St. Petersburg, Russia; Tallinn ug Tartu, Estonia; Riga, Latvia; Vilnius ug Kaunas, Lithuania; Kaliningrad, Russia; Petrozavodsk, Karelia

2. Gikan sa Netherlands: Lviv, Ukraine

3. Gikan sa Sweden: St. Petersburg, Russia; Lviv, Ukraine; Nevinnomyssk, Russia

4. Gikan sa Denmark: St. Petersburg, Russia; Lviv, Ukraine

5. Gikan sa Austria: Lviv, Ukraine; Belgrade, Mostar, Osijek, Sarajevo, Zagreb (sa kaniadto Yugoslavia)

6. Gikan sa Switzerland: Lviv, Ukraine

7. Gikan sa Italya: Lviv, Ukraine

[Mga hulagway sa panid 23]

Kinarton nga sinina sa sangang-buhatan sa Sweden

Pagkarga sa mga hinabang

Mga pagkaon sa usa ka putos

Bacon ug hamon gikan sa Denmark

Komboy sa 11 ka trak ug 1 ka kotse

Mga putos ug mga maleta sa sangang-buhatan sa Austria

Pagdiskarga sa trak sa Lviv, Ukraine