Kon Nganong Kinahanglan Motambong Ka
IMONG madawat ang espirituwal nga pagtulon-an sa upat ka mapuslanong adlaw panahon sa “Diyosnong Pagtulon-an” Distritong Kombensiyon, nga himoon sa mga bulan sa Disyembre ug sayo sa Enero sa mga siyudad sa Pilipinas. Sa Tinipong Bansa lamang, kapin sa 150 niining mga tigoma gihimo sayosayo ning tuiga. Sa kasagaran, ang programa magsugod sa Huwebes sa 1:20 s.h. ug matapos sa Dominggo sa 4:10 s.h. Usa ka talagsaong bahin sa pipila ka kombensiyon mao ang mga taho sa mga misyonaryo, kinsa gitabangan aron makapauli sa kaugalingon nilang nasod alang niining masadyaong okasyon.
Kon ikaw tigulang o bata—usa ka bana, asawa, amahan, inahan, tin-edyer, o bata—imong madawat ang pagtulon-an nga ipahayag sa tin-aw, makapadaning paagi nga makabenepisyo kanimo. Pananglitan, daghan ang mangutana karong adlawa, Unsa ang katuyoan sa kinabuhi? Sa Biyernes sa buntag, malipay ka nga makadungog nga hisgotan kining pangutanaha ug mahimuot sa imong madawat aron tabangan ang uban nga makasabot sa ulohan.
Sa Biyernes sa hapon ang programa maglakip sa mga bahin nga “Paghimo sa Kaminyoon nga Malungtarong Panag-ipon,” “Pagkugi Alang sa Kaluwasan sa Inyong Panimalay,” ug “Mga Ginikanan—Ang Inyong mga Anak Nagkinahanglan ug Linaing Pagtagad.” Pagkahuman dayon niini, ang linaing pagtagad itumong sa mga suliran nga giatubang sa mga batan-on ug kon unsaon nila pagsagubang sila. Angay silang madasig sa modernong-adlawng drama nga nag-ulohang Mga Batan-on nga Nahinumdom sa Ilang Maglalalang Karon.
Sa Sabado ang programa maglakip sa tagna ni Jesus mahitungod sa kataposang mga adlaw ug ilabina sa iyang mga pulong: “Dihadiha pagkatapos sa kasakitan niadtong mga adlawa ang adlaw mongitngit.” (Mateo 24:29) Buot nimong madunggan ang paghisgot kon kanus-a mahitabo ang maong kasakitan. Ang programa sa Sabado magsubli usab sa rekord sa mga Saksi ni Jehova sa modernong kapanahonan ug magpakita kon unsay ilang nalampos na.
Sa Dominggo ang laing drama, nga nag-ulohang Ayaw Palimbong o Biaybiaya ang Diyos, maghisgot sa hagit sa Kristohanong integridad sa usa tungod sa popular nga mga video ug musika karong adlawa. Ang pakigpulong publiko sa hapon maghisgot sa temang “Mapuslanong Pagtulon-an Alang sa Atong Lisod nga Kapanahonan.” Ang programa pagatiklopan sa tambag nga “Ipadayon ang Pagpangupot nga Hugot sa Diyosnong Pagtulon-an.”
Sa pagkatinuod, mabenepisyohan ka pinaagi sa pagtambong sa tanang upat ka adlaw! Sa tim-os gidapit ka sa pagtambong. Sa pagkaplag sa dapit nga kinaduolan sa inyong balay, kontaka ang lokal nga Kingdom Hall sa mga Saksi ni Jehova o pagsulat sa mga magpapatik niining magasina o tan-awa ang Disyembre 8 nga isyu sa Pagmata!, nga maundan sa mga adres sa tanang dapit sa kombensiyon sa Pilipinas.