Nagasangyaw nga Malahutayon Diha sa Yuta sa Yelo ug Kalayo
ANG Iceland nahimutang sa Amihanang Atlantiko mga tunga-tunga sa Amihanang Amerika ug sa Uropa. Bisan pag nasabak kini nga ubos ug diyutay sa Arctic Circle, ang klima niini dili-kaayo bugnaw kay sa gidahom, tungod sa nagapainit nga mga epekto sa Gulf Stream. Ang Iceland gitawag nga yuta sa yelo ug kalayo tungod kay kini ang may labing dakong bukid nga yelo sa Uropa ug usa usab ka dapit sa kalibotan nga aktibo kaayo ang mga bolkan. Ilado kini sa daghang mainit nga mga tuboran sa tubig ug mga solfataras, mga lugar nga daghag bolkan nga nagabuga ug mainit nga mga alisngaw ug mga gas nga asupri.
Ang 260,000 ka molupyo niining ikaduha sa labing dako nga isla sa Uropa maoy mga kaliwat sa mga Viking, nga namuyo dinhi kapin sa 1,100 ka tuig sa miagi. Ang Islandiko sama ra sa Old Norse, ang pinulongan sa Scandinavia sa panahon sa mga Viking. Kining pinulongana halos wala mausab tungod kay ang mga taga-Iceland malingaw man kaayong mobasa sa ilang karaang mga sugilanon, nga ang kadaghanan gisulat sa ika-13ng siglo.
Sa ika-16 nga siglo, ang Bibliya gisugdan sa paghubad sa Islandiko. Ang “Bag-ong Tugon” migula sa 1540 ug ang usa ka kompletong Bibliya sa 1584. Kapin sa 90 porsiento sa mga tawo sakop sa Evangelical Lutheran Church, ang opisyal nga relihiyon sa Nasod. Bisag makita ang Bibliya halos diha sa tanang panimalay, pipila lamang ang nagtuo nga kini Pulong sa Diyos. Ang kadaghanan sa mga taga-Iceland haluag ug hunahuna bahin sa relihiyon ug, sa kasagaran, independente ug mga kaisipan.
Ang Maayong Balita Nakaabot sa Iceland
Ang unang mga taga-Iceland nga nakadungog sa maayong balita sa Gingharian sa maong panahon nagpuyo sa Canada. Ang usa kanila mao si Georg Fjölnir Lindal. Taga-Iceland ang iyang mga ginikanan, ug Islandiko ang iyang sinultihan. Wala magdugay human nga nakapahinungod sa iyang kinabuhi kang Jehova nga Diyos, siya nahimong bug-os panahong magwawali sa maayong balita. Sa 1929, sa nag-edad siya ug 40, iyang gidala ang maayong balita ngadto sa mga tawo nianang yuta sa yelo ug kalayo.
Pagkadako nga buluhaton alang sa usa ka tawo! Ang Iceland maoy duolan sa 320 ka kilometros gikan sa amihanan pahabagatan ug mga 500 ka kilometros gikan sa silangan pakasadpan. Ang kadaplinan sa dagat, apil ang mga isla ug mga pulo, maoy duolan sa 6,400 ka kilometrong gitas-on. Niadtong panahona, wala gayoy tinuod nga mga dalan ug halos walay mga sakyanan o bisan unsang ubang modernong paagi sa pagbiyahe. Bisan pa, gikobrehan ni Igsoong Lindal ang tibuok isla sulod sa napulo ka tuig ug nakaapod-apod ug libolibong mga libro. Iyang gibiyahe ang kadaplinan sa dagat pinaagig mga barko, ug sa dihang moduaw siya sa kaumahan sa interyor, duha ka kabayo ang iyang gigamit, ang usa aron iyang kasakyan ug ang lain sa pagkarga sa iyang literatura ug sa iyang mga gamit.
Sulod sa mga 18 ka tuig, si Igsoong Lindal mao lamang ang Saksi sa Iceland. Bisan pa sa iyang kugi nga pagtrabaho, wala gayod siya makakita ug usa nga mibarog alang sa Gingharian niadtong panahona. Ang iyang dugay, mingaw nga pagpuyo natapos sa Marso 25, 1947, sa dihang ang unang graduwado sa Watchtower Bible School of Gilead miabot. Imong mahanduraw ang iyang kalipay sa dihang sa kataposan gitubag ni Jehova ang iyang mga pag-ampo alang sa dugang mga mamumuo sa pagpangani. (Mateo 9:37, 38) Si Igsoong Lindal nagpadayon sa iyang pag-alagad sa Iceland hangtod nga siya mibalik sa Canada sa 1953.
Dugang mga Mamumuo Alang sa Pagpangani
Ang mga misyonero nga miabot sa 1947 mao ang duha ka taga-Denmark nga mga igsoong lalaki. Dugang mga misyonero miabot duha ka tuig sa ulahi. Samtang nagpadayon sila sa buluhatong pagsangyaw uban sa pipila ka higala nga mibalhin sa Iceland, libolibong mga publikasyon ang naapod-apod. Ang kadaghanan sa taga-Iceland himasa kaayo, apan dili daghan ang misanong sa maayong balita. Human sa 27 ka tuig sa pagpananom ug pagbisbis, ang mapailobong mga igsoon misugod sa pagkakita sa mga bunga sa ilang kahago. Sa 1956 pito ka bag-ohan ang mibarog alang sa Gingharian ug nagpahinungod sa ilang mga kinabuhi kang Jehova.
Sulod sa napulo ka tuig, ang gidaghanon sa mga magmamantala sa Gingharian midaghan. Karon, adunay pito ka kongregasyon ug usa ka nahilain nga grupo, nga adunay total nga 280 ka magmamantala sa maayong balita. Mobiyahe kita sa isla aron sa pagduaw niining mga kongregasyona.
Palibot sa Kaulohan
Ang mga igsoong lalaki ug mga babaye nga milahutay niadtong mga tuiga dagayang gipanalanginan. Karon aduna nay duha ka mauswagong kongregasyon sa Reykjavík, ang kaulohan nga siyudad. Sila nagtigom diha sa usa ka maanindot nga Kingdom Hall nga nahimutang sa mao ra nga tinukod sa sangang buhatan, nga gipahinungod sa 1975.
Si Friðrik ug Ada maoy lakip sa pito nga gibawtismohan balik sa 1956. “Nahinumdom ko nga kaniadto himoon namo ang mga miting diha sa gamay nga lawak sa lawting nga gipuy-an sa mga misyonaryo,” miingon si Friðrik. “May lugar alang sa 12 ka lingkoranan, apan usahay, kon mosobra sa naandang gidaghanon ang motambong, among buksan ang pultahan sa sunod nga lawak nga gamay. Pagkalahi na kaayo karon diin duha ka kongregasyon ang mapahiluna sa Kingdom Hall!”
Si Friðrik mao ang nagdumala sa Food Service Department sa gihimo ang unang mga asembliya. “Ako ang tanang trabaho, ug sa samang higayon, sagad aduna akoy tulo o upat ka bahin sa programa matag adlaw. Samtang nagtrabaho sa kusina, magsul-ob ako ug ipron. Kon panahon ko na sa paghatag ug pakigpulong, isul-ob nako ang akong amerikana ug magdalidali sa pag-adto sa tigomanan. Daghang higayon nga gipahinumdoman ako sa mga igsoon sa pagkuha sa ipron. Karon kami aduna nay 400 ngadto sa 500 ka tumatambong sa mga asembliya, apil ang maayong mga ansiano nga nagapakig-ambit sa pagdumala sa mga bahin sa programa. Adunay daghang mainandamong mga kamot usab nga nagatabang diha sa Food Service Department.”
Ang labing duol nga kongregasyon sa Reykjavík mao ang Keflavík, mga 50 ka kilometros sa kasadpan. Nagmaneho kami latas sa kanataran sa lapok sa bolkan. Diyes porsiento sa Iceland naputos sa lapok sa bolkan. Ang unang talamnon nga nanubo niining natara maoy mga lichen ug mga lumot, apan sa karaan nang mga natad sa lapok sa bolkan, imong makitang nanubo ang mga ihalas nga mga berry ug mga kahoy-kahoyng gagmay.
Ang kongregasyon sa Keflavík adunay 19 ka magmamantala ug naporma niadtong 1965. Sa duol mao ang internasyonal nga tugpahanan, ug dinhi usab nahimutang ang base militar sa T.B. Bisag ang mga Saksi wala gayod makasangyaw mismo sa balay ug balay diha sa base, daghang pagtuon sa Bibliya ang ginadumala didto, ug may pipila ka indibiduwal ang nakakat-on sa kamatuoran.
Ang laing kongregasyon mao ang Selfoss, 55 ka kilometros sa silangan sa Reykjavík. Dinhi makita ang nasod sa lunhawng kaumahan nga may mga baka ug karnero, apil sa labing dakong gatasan sa Iceland. Sa pagpaingon didto, miagi kami sa Hveragerði, usa ka gamayng lungsod diha sa matahom kaayong walog. Gikan sa halayo among namatikdan ang mga haligi sa alisngaw gikan sa mainit nga mga tuboran sa tubig nga nagkatag sa tibuok walog. Kini ang usa sa labing daghang mainit nga tuboran nga lugar sa nasod, ug adunay daghang balay sa tanaman nga gitukod aron kapahimuslan kining kahinguhaana nga nagataganag mga tamates, pepino, ug nagkalainlaing klase sa mga bulak nga gikan sa mainit nga balay-balay sa tanaman.
Niining dapita adunay gamay apan aktibong kongregasyon sa 19 ka magmamantala sa Gingharian. Si Sigurður ug Guðrún Svava mibalhin gikan sa Reykjavík sa pagtabang niining gamayng grupo sa panahong naporma ang kongregasyon niadtong 1988. Si Sigurður lamang ang ansiano dinhi. Sa wala pa siya nahimong usa sa mga Saksi ni Jehova hapit napulo ka tuig kanhi, siya maoy usa ka iladong musikero, diin tambol ang iyang ginatugtog diha sa nagkalainlaing banda. Karong adlawa, ang iyang pangabuhi mao ang paghinlog bintana, ug nagtudlo usab siya ug musika. Ang iyang paagi sa kinabuhi ingong maglilingaw naghatag kaniya ug daghang suliran, sama sa pag-abuso sa droga, sobrang pag-inom, ug bungkag nga kaminyoon. Pagkadako sa iyang katagbawan karon, nga may katuyoan na sa kinabuhi ug nagaalagad kang Jehova!
Paingon sa Tumoy sa Sidlakan
Migikan sa Selfoss, gisugdan namo ang 680 ka kilometros nga biyahe, kasagaran diha sa hiktin ug libaongon nga dalan. Kami nagpaingon sa sunod nga kongregasyon, sa lungsod sa Reyðarfjörður, sa kadaplinan sa dagat sa sidlakan. Sulod sa tunga sa oras, nakita namo ang Hekla, ang labing iladong bolkan sa Iceland. Upat na ka higayon nga mibuto kini niining sigloha.
Niadtong 1973 usa ka maukyabong pagbuto sa bolkan ang nahitabo sa Vestmannaeyjar (Westmann Islands). Ang tanang molupyo nga duolan sa 5,300 gibalhin sa luwas nga dapit sa kinadak-ang isla sa pipila lamang ka oras. Human nga napasig-uli ang lungsod, ang kadaghanan sa mga molupyo anam-anam nga mibalik. Duha ka Saksi karon ang nagpuyo didto ug nagasangyaw sa maayong balita sa mga tawo niining gamay nga komunidad. Nagmaneho ug laing duha ka oras, giabiabi kami sa usa ka maanindot nga talan-awon sa matahom nga Vatnajökull, nga mao ang labing dako sa mga bukid nga yelo sa Iceland, nga may luna nga 8,300 kilometro kuwadrado. Sa pagpaingon didto, nakaagi usab kami ug daghang maanindot nga mga busay ug mga suba.
Sa napulo ka oras namong pagbiyahe, nakaabot kami sa among destinasyon. Diha sa Reyðarfjörður nahimamat namo ang 12 ka magmamantala sa labing bag-o nga kongregasyon sa Iceland. Walay mga Saksi ang nagpuyo niining lugaraha hangtod nga natukod ang usa ka balay sa misyonaryo sa ulahing bahin sa 1988. Si Kjell ug Iiris, taga-Sweden nga magtiayong misyonaryo nga nakaalagad sa Iceland sukad sa 1963, gitudlo sa pagtrabaho diha sa 15,000 ka tawo niining baryoha. Daghan ang nagpuyo sa mga balangay sa pangisda sa daplin sa dagat, nga moabot ug 500 ka kilometros.
Si Kjell miasoy: “Tino nga gipanalanginan ni Jehova ang buluhaton sa Gingharian niining bahina sa Iceland. Sa Enero 1, 1993, usa ka kongregasyon ang naporma, ug nagadumala kami ug daghang maayong mga pagtuon sa Bibliya sa mga tawo nga nagahimog maayong kauswagan. Bisan tuod nausab na ang paagi sa transportasyon sukad nga gikabayo kining lugaraha ni Igsoong Lindal, dili masayon ang pagmaneho diha sa mga kimba sa bukid sa nagyelo nga dalan sa panahon sa mangitngit nga mga adlaw sa tingtugnaw, bisan sa four-wheel-drive nga dyip. Kas-a, mibuto kini diha sa nagyelo nga dalan ug miligid sa duha o tulo ka higayon diha sa bakilid. Pagkadako sa among kalipay nga nakaikyas nga wala maunsa!”
Human nakagugol ug 30 ka tuig sa Iceland, si Iiris miingon: “Sa katuigang nanglabay daghan ang nangabot gikan sa ubang mga nasod aron sa pagtabang. Bisag ang uban mibiya tungod sa nagkalainlaing mga katarongan, sila sa pagkatinuod nakahimog dakong bahin sa buluhatong pagpananom ug pagpamisbis. Nalipay kami nga kami nakapabilin, sanglit nakapribilehiyo kami karon sa pagkakita sa ani nga nagapangabot. Gipadali ni Jehova ang iyang buluhaton usab dinhi.”
Adunay dako nga pag-uswag tungod kay ang mga bag-ohan nagapamatuod sa ilang kaubanan sa trabaho. Si Atli nakakat-on sa kamatuoran gikan sa mga misyonaryo ug misugod sa pagsulti ngadto sa uban diha sa kompaniya sa konstruksiyon nga iyang gitrabahoan. Duha sa iyang kauban sa trabaho karon nagapakig-ambit na sa buluhatong pagsangyaw, ang usa gibawtismohan uban sa iyang asawa sa Nobyembre 1992. Ang ikatulong kauban sa trabaho nagtuon sa Bibliya uban sa mga Saksi.
Miagi sa Amihanang Dalan
Migikan sa Reyðarfjörður, kami mipaingon sa kasadpan. Ang sunod nga kongregasyon maoy 300 ka kilometros ang gilay-on, sa lungsod sa Akureyri. Ang espesyal bug-os panahong mga magwawali ang gitudlo sa pagtrabaho didto sa unang mga tuig sa 1950. Sukad pa sa sinugdan, ang trabaho gisugat ug dako nga pagsupak sa pipila ka klerigo. Dihay mga artikulong gipatik sa lokal nga mantalaan nga nagpasidaan sa mga tawo batok sa mga Saksi ni Jehova. Daghang tagalungsod nalangkit usab sa espiritismo. Apan tungod sa paglahutay ug pailob sa nagkalainlaing mga payunir ug mga misyonaryo, karon adunay aktibo ug mahigugmaong kongregasyon sa 35 ka magwawali sa Gingharian.
Si Friðrik, usa sa mga ansiano dinhi, maoy usa ka mangingisda. Human mitambong sa distritong kombensiyon sa 1982, siya nakombinsir nga ang iyang natun-an mao ang kamatuoran. Siya mipauli sa Akureyri nga determinado sa pagpamatuod sa iyang pamilya, mga higala, ug mga kauban sa trabaho. Si Friðrik nagplano sa paghunong sa iyang trabaho ingong mangingisda aron duna siyay dugang panahon sa kongregasyon. Iyang gisultihan ang iyang trato, si Helga, nga dili na sila mahimong magpuyopuyo hangtod nga makasal sila, sanglit mahimo na unya siyang usa sa mga Saksi ni Jehova. Buot usab ni Friðrik nga magtuon siya sa Bibliya tungod kay dili siya ‘makigminyo ug dili magtutuo.’ (1 Corinto 7:39) Sa iyang kakurat nagsugod si Helga sa pagtuon. Sila nagpakasal sa Pebrero 1983 ug gibawtismohan wala magdugay human niadto. Sa ulahi ang inahan ug igsoong babaye ni Friðrik midawat usab sa kamatuoran.
Ang among kataposang biyahe mao ang Akranes, 350 ka kilometros gikan sa Akureyri, diha sa ibabaw sa tulo ka bukid ug sa daghang matahom nga mga walog. Dinhi ang dalan espaltado, nga nagpasayon sa pagbiyahe kon itandi sa libaongon ug hiktin nga mga dalan nga maoy among kasagarang giagian. Ang Akranes mao ang kinagamyang kongregasyon sa Iceland—lima ka magmamantala, duha kanila nag-alagad ingong mga ansiano. Gilangkoban kini sa duha ka pamilya nga misanong sa panawag sa Macedonia, nga mibiya sa usa sa dagkong mga kongregasyon sa Reykjavík, ug mipuyo niining gamayng lungsod aron sa pag-alagad sa dapit nga mas dako ang panginahanglan. (Buhat 16:9, 10) Duolan na sa duha ka tuig karon, sila mapailobong nagawali sa maayong balita niining teritoryoha, masaligon nga si Jehova magapatubo sa mga butang.—1 Corinto 3:6.
Masanag nga mga Palaabuton Alang sa Pag-uswag
Uban ang mga balay sa tanaman nga gipainit sa enerhiya sa alisngaw ug artipisyal nga kahayag, ang mga mag-uuma sa Iceland nakapatubo ug nagkalainlaing klase sa mga prutas, utanon, ug ubang mga tanom. Sa susama, ang mga Saksi, nga nasangkapan sa espirituwal nga kamatuoran, sa kainit sa malumo nga pagtuo, ug sa panalangin sa balaang espiritu ni Jehova, nagasinati ug katingalahang mga resulta sa natad sa Iceland.
Niining tuiga 542 ka tawo ang mitambong sa Memoryal sa kamatayon ni Kristo, ug duolan sa 200 ka pagtuon sa Bibliya ang ginadumala karon. Dugang pa, ang positibong pagsanong sa pagdasig sa pag-alagad sa mga teritoryo nga wala ikatudlo naghatag kanamo ug pagsalig nga ang tanang tawo nga samag-karnero niining dakong isla makadungog sa tingog sa Maayong Magbalantay, si Jesu-Kristo. (Juan 10:14-16) Pagkamalipayong resulta alang niadtong matinumanong mga magwawali sa Gingharian nga nagpakitag dakong pailob ug pagkamalahutayon sa pagsangyaw sa maayong balita diha sa yuta sa yelo ug kalayo sulod sa nangaging 64 ka tuig!
[Mapa sa panid 24]
(Alang sa aktuwal nga pagkahan-ay, tan-awa ang publikasyon)
Akureyri
Akranes
Keflavík
Selfoss
Vestmannaeyjar
Reyðarfjörður
Hekla
Geysir
VATNAJÖKULL
REYKJAVÍK
[Credit Line]
Gibase sa mapa ni Jean-Pierre Biard