Ting-ani!

NGANONG ang kasaysayan sa “Kristiyanidad” dili gayod Kristohanon? Daghang naghunahuna nga katawhan ang misukna niining pangutanaha, apan gitubag kini ni Jesus mga 2,000 ka tuig kanhi diha sa usa ka sambingay. Nag-asoy siya sa “usa ka tawo nga nagpugas ug maayong binhi sa iyang uma.” Unya, “ang iyang kaaway miabot ug nagpugas ug bunglayon taliwala sa mga trigo.” Sa dihang miturok ang mga binhi, ang mga mamumuo nakamatikod sa bunglayon ug buot nga pangibton sila. Apan ang tawo miingon: “Pasagding magdungan silag tubo hangtod sa ting-ani.” Sa ting-ani, ang trigo pagalainon gikan sa bunglayon.​—Mateo 13:24-30.

Si Jesus, nga nagsaysay sa sambingay, nag-ingon nga siya mismo mao ang nagpugas sa “maayong binhi”​—matuod nga mga Kristohanon. Ang kaaway mao si Satanas, kinsa maoy nagpugas ug mga “bunglayon”​—ang miyuhot sa kongregasyon nga mining mga Kristohanon. Gitugtan ni Jesus ang bakak ug matuod nga mga Kristohanon nga magkauban​—apan hangtod lamang sa ting-ani. Unya sila kinahanglang pagalainon.​—Mateo 24:36-44.

Nan, dili kita mahibulong sa dihang makat-onan nato nga ang “Kristohanon” nga mga organisasyon latas sa kasiglohan nagpasipala sa Diyos pinaagig pagsagop sa paganong mga doktrina, pagtugot sa imoralidad, pagpaluyo sa mga gubat sa pagpanakop, ug paghimog pintas nga mga inkwisisyon. Mailhan nato dinhi ang daotang binhi nga gipugas ni Satanas. Apan, sa dihang makabasa kita bahin sa mga tawo nga nag-antos sa pagkabilanggo o kamatayon inay nga mokompromiso sa mga prinsipyo sa Bibliya, atong makita nga ang maayong binhi wala mapuo.

Si Jesus miingon nga ang pagpangani maoy “konklusyon sa sistema sa mga butang.” Sanglit kita nagkinabuhi sa konklusyon niining presenteng sistema sa mga butang, kini na gayod ang ting-ani! Busa ang pagbahinbahin nahitabo na tali sa matuod ug bakak nga mga Kristohanon. Karong adlawa, kinahanglang may katawhang molungtad, dili nagkatag nga mga indibiduwal, kinsa mohaom sa pagbatbat ni Jesus sa matuod nga mga Kristohanon​—kinsa mga sakop sa Gingharian sa Diyos ug magwali sa maayong balita bahin niana, kinsa nagpasiugda sa gipasikad-sa-Bibliya nga moralidad ug nagsalikway sa paganong mga doktrina tungod sa kamatuoran sa Bibliya, kinsa nagpadayag sa ngalan sa Diyos ug dili bahin sa kalibotan.​—Mateo 6:33; 24:14; Juan 3:20; 8:32; 17:6, 16.

Kami nagpasalig kaninyo, nga ang maong katawhan naglungtad! Buot ba nimong mag-alagad sa Diyos nga dalawaton? Nan pangitaa ang maong katawhan, ug pag-alagad sa Diyos uban kanila.