Asa Nimo Makaplagan ang Kasaligang Giya?
“NASAYOD ako, Oh Jehova, nga dili iya sa tawo ang iyang dalan. Dili iya sa tawo nga nagalakaw ang pagtultol bisan sa iyang lakang. Tul-ira ako, Oh Jehova.”—Jeremias 10:23, 24.
Ang magsusulat sa Bibliya nga si Jeremias misulat nianang mga pulonga mga 25 ka siglo kanhi. Ang alaot nga kahimtang sa katawhan tapos sa libolibong katuigan sa pagpadapat sa tawhanong giya nagpamatuod sa dili-malalis nga kamatuoran niining pahayaga. Apan tingali mangutana ka, ‘Asa man makaplagan ang kasaligang giya?’
Ang kasulatan nga gikutlo sa ibabaw nagpunting sa usa ka tuboran sa kasaligang giya ug pagtultol nga labaw kaayo sa tawo—ang Maglalalang sa tawo, si Jehova nga Diyos. Tino nga walay labawng nasayod sa pagkagama sa tawo ug sa iyang mga panginahanglan kay sa atong Maglalalang. Bisan pa, ang Diyos ba interesadong motagana kanato sa maong giya ug pagtultol? Giunsa niya pagbuhat kana? Kana ba praktikal alang sa atong panahon?
Gidesinyo sa Pagdawat sa Diyosnong Giya
Nasayran na pag-ayo nga ang usa ka dakong kalainan nga nagpalahi sa tawo gikan sa mga mananap nahasentro diha sa gambalay, katakos, ug mga obra sa utok sa tawo. Diha sa mga mananap halos tanang obra sa utok naprograma diha sa gitawag nga kinaiyanhong kaalam. Dili ingon niini ang mga tawo.—Proverbio 30:24-28.
Lahi sa mga utok sa mga mananap, ang dakong bahin sa utok sa tawo walay tinong mga programa. Gihatagan sa Diyos ang mga tawo ug kagawasan sa pagpili, nga nagpaarang kanila sa paghimog maalamong mga desisyon ug sa pagpasundayag sa labawng mga hiyas, sama sa gugma, kamanggihatagon, kadili-mahakogon, hustisya, ug kaalam.
Makataronganon ba ang paghunahuna nga ang Diyos maglalang sa tawo nga may ingon nga katakos sa utok nga dili magtaganag usa ka matang sa giya kon sa unsang paagi labing maayong magamit kana? Ang Diyos naghatag ug direktang giya ngadto sa unang mga tawo. (Genesis 2:15-17, 19; 3:8, 9) Bisan human nakasala ang tawo, si Jehova nagpadayon sa paggiya sa matinumanong mga lalaki ug mga babaye, nga ilabina pinaagi sa iyang kaugalingong dinasig nga Pulong, ang Bibliya. (Salmo 119:105) Kini nagtugot sa mga tawo sa malamposong pag-atubang sa adlaw-adlawng mga suliran sa kinabuhi samtang maalamon nilang gigamit ang ilang kagawasan sa pagpili.
Ang Diyos Mao ang Awtor sa Bibliya
Unsay nagpahimo sa Bibliya nga usa ka kasaligang tuboran sa giya? Sa usa ka butang, kini nagpresentar ug impormasyon nga ang Maglalalang lamang ang makatagana. Kini naglaraw sa kasaysayan sa mga hitabo nga nahitabo kaniadto una pa nagsugod ang tawhanong kinabuhi. Pananglitan, kini nagtagana sa kasaysayan kon sa unsang paagi ang yuta giandam sa sunod-sunod nga mga ang-ang hangtod kini nahimong takos kapuy-an sa tawhanong kinabuhi. (Genesis, mga kapitulo 1, 2) Bisan tuod kini gitala sa Bibliya kapin sa 3,000 ka tuig kanhi, kini nahiuyon sa modernong siyentipikanhong mga hunahuna.
Dugay na kaayo una pa gidawat sa kadaghanan sa katawhan nga ang yuta lingin, ang Bibliya nagpahayag: “Gibuklad [sa Diyos] ang amihanan ibabaw sa dapit nga walay sulod, nga nagbitay sa yuta sa wala.” (Job 26:7) Dugang pa, ang Bibliya nagbutyag nga “adunay Usa nga nagapuyo ibabaw sa sirkulo sa yuta, nga ang mga molupyo niini sama sa mga dulon.” (Isaias 40:22) Ang Diyos lamang, ang Maglalalang, ang makatagana niining detalyeha.
Ang katakos sa pagtagna sa umaabot dili usa ka gasa nga gihatag sa tawo. Hinunoa, ang Maglalalang nagtagna sa umaabot pinaagi sa mga panid sa Bibliya. Gidasig sa Diyos ang manalagnang Isaias sa pagsulat bahin Kaniya: “Ako mao ang Balaang Usa ug wala nay laing Diyos, ni may lain pa nga sama kanako; ang Usa nga nagapahayag sa kataposan gikan sa sinugdan, ug gikan sa karaang mga panahon sa mga butang nga wala pa mahimo.”—Isaias 46:9, 10.
Ang Bibliya nagpasundayag nga kini makatagna sa kataposan gikan sa sinugdan nga may katingalahang katukma. Pananglitan, kini nagtagna sa pagmando, pagkapukan, ug sa mga kinaiya sa dagkong mga gahom sa kalibotan sulod sa libolibong katuigan sa tawhanong kasaysayan. Kining talagsaong mga tagna gisulat kasiglohan una pa sa ilang katumanan, sa pila ka kahimtang libolibo ka tuig nga una pa. Busa ang Bibliya tukmang nagtagna sa modernong-adlawng mga hitabo, maingon man sa ilang sangpotanan. Ang Bibliya talagsaon usab tungod kay kini nagpunting ngadto sa dalan sa kaluwasan sa panahon sa kalaglagan sa dili-hingpit nga hinimog-tawong mga gobyerno sa Armageddon, “ang gubat sa dakong adlaw sa Diyos nga Labing-Gamhanan.” Ang Gingharian sa Diyos diha sa mga kamot sa iyang Anak, si Jesu-Kristo, maoy mohimo nianang dakong buhat.—Pinadayag 16:14, 16; 17:9-18; Daniel, mga kapitulo 2, 8.
Kanunayng Mapuslanon—Dili Gayod Makadaot
Ang yanong tawhanong kaalam dili-hingpit; busa, ang tawhanong tambag dili kanunayng mapuslanon, bisan pag kini tingali ihatag nga adunay maayong katuyoan. Dili ingon niini ang tambag sa Bibliya. Ang Diyos mismo nag-ingon: “Ako, si Jehova, mao . . . ang Usa nga nagatudlo kanimo sa pagpahimulos sa imong kaugalingon, ang Usa nga nagapalakaw kanimo sa dalan nga imong pagalaktan. Oh kon mosunod ka pa lang unta sa akong mga sugo! Nan ang imong kalinaw mahisama sa usa ka suba, ug ang imong pagkamatarong sama sa mga balod sa dagat.”—Isaias 48:17, 18.
Ang diyosnong paggiya motabang kanato sa pagtagad sa mas hinungdanong butang ug sa pagsunod sa hataas nga mga prinsipyo sa kinabuhi. Samtang gipasiugda sa modernong katilingban ang materyal nga mga kalamposan ug mga tumong, gipasiugda sa Bibliya kon unsa ka bililhon ang “pagpunting sa atong mga mata, dili sa mga butang makita, kondili sa mga butang nga dili-makita. Kay ang mga butang nga makita lumalabay, apan ang mga butang nga dili-makita walay-kataposan.” (2 Corinto 4:18) Niining paagiha kita madasig sa pagbaton sa kinamaayohang mga tumong sa kinabuhi, sa ato pa, espirituwal nga mga tumong may kalabotan sa pagbuhat sa kabubut-on sa Diyos, nga ang kataposang tumong mao ang kinabuhing walay kataposan sa usa ka matarong bag-ong sistema.
Samtang ang Kristohanon mismo manglimbasog sa pagtinguha niining hataas nga mga tumong, ang tambag sa Bibliya motabang kaniya sa pagkinabuhi sa kinamaayohang matang sa kinabuhi nga posible niining daotang sistema sa mga butang. Ang modernong tawhanong kaalam mahiligon sa pagdasig sa pilosopiya sa pagtrabaho ug gamay ug mokita ug dako. Sa laing bahin, ang Bibliya nagtug-an kanato nga “ang usa nga magabuhat uban ang usa ka kamot nga tapolan mahimong kabos, apan ang kamot sa kugihan makapadato.” Si apostol Pablo misulat sa Hebreohanong mga Kristohanon: “Kami nagasalig nga kami may matinud-anong tanlag, sanglit buot man namong managgawi mismo nga matinud-anon sa tanang butang.”—Proverbio 10:4; Hebreohanon 13:18.
Ang Bibliya naghatag usab ug praktikal nga tambag bahin sa kahikayan sa pamilya. Ilabinang gitukod niini ang papel sa bana ug sa asawa diha sa kahikayan sa kaminyoon, maingon man sa hustong paagi sa pagmatuto ug pag-edukar sa kabataan. Kini nag-ingon: “Ang mga bana angay nga magahigugma sa ilang mga asawa sama sa ilang kaugalingong lawas. . . . Sa laing bahin, ang asawa angayng adunay halalom nga pagtahod alang sa iyang bana. Mga anak, magmasinugtanon sa inyong mga ginikanan . . . Kamong mga amahan, ayawg palagota ang inyong mga anak, kondili padayong matutoa sila diha sa disiplina ug mapasiboong pagdumala-sa-kaisipan ni Jehova.” Ang pagsunod sa labawng tambag sa Maglalalang makaamot ug dako sa kalig-on ug sa kalipay sa mga pamilya.—Efeso 5:21–6:4.
Usa ka Seguradong Kaugmaon Alang Niadtong Mosunod sa Giya sa Diyos
Ang sinulat nga Pulong sa Diyos nagpunting sa kasulbaran sa Diyos alang sa tanang suliran sa katawhan. Sa dili madugay si Jehova nga Diyos magwagtang sa presenteng sistema sa mga butang, uban sa tanang kasakit niini, inhustisya ug mga pag-antos, ug pulihan kini sa iyang matarong nga bag-ong sistema. Ang Bibliya nagbatbat niini diha sa 2 Pedro 3:7-10, nga nagdugang diha sa bersikulo 13: “Adunay bag-ong mga langit ug usa ka bag-ong yuta nga atong ginapaabot sumala sa iyang saad, ug niini magapuyo ang pagkamatarong.” Kini sa pagkakaron mao ang labing maayong balita nga ikahatag sa tawhanong pamilya. Kini mao gayod ang mensahe nga gipahayag sa Bibliya ug gisangyaw sa mga Saksi ni Jehova sa kapin sa 200 ka kayutaan ug kaislahan sa dagat.
Sa dihang ang kabubut-on sa Diyos pagabuhaton sa tibuok yuta, ang tibuok tawhanong pamilya makabatog kaayohan pinaagi sa pagsunod sa ekselenteng giya sa Maglalalang niini, si Jehova. Wala na unyay mga suliran sa kakabos, krimen, ug mga droga. Dili na unya mag-antos ang katawhan sa sakit, pagkatigulang, ug kamatayon. Ang tawhanong pamilya ituboy ngadto sa kahingpitan nga nabatonan sa atong unang mga ginikanan sa wala pa sila mialsa batok sa giya sa Diyos.
Pagkamaayong pagkasumarya sa kataposang basahon sa Bibliya ang malipayong kahimtang niadtong nagbutang sa ilang pagsalig diha sa diyosnong giya! Ang Pinadayag 21:4, 5 nag-ingon: “Pahiran [sa Diyos] ang matag luha sa ilang mga mata, ug wala na unyay kamatayon, ni pagbangotan ni pagtiyabaw ni may kasakit pa. Ang kanhing mga butang miagi na.” Ang atong Maglalalang nagpasalig niana, nga nagaingon: “Tan-awa! Ginabag-o ko ang tanang butang.” Siya midugang: “Kining mga pulonga kasaligan ug matuod.”
Aron kita makadawat niini nga mga panalangin, unsay gidahom sa Diyos kanato? Si apostol Pablo misaysay nga ang kabubut-on sa Diyos mao nga “ang tanang matang sa mga tawo maluwas ug makadangat sa tukmang kahibalo sa kamatuoran.” (1 Timoteo 2:4) Ang mga Saksi ni Jehova kinasingkasing nga nagadapit kanimo sa pagbaton nianang tukmang kahibalo sa kamatuoran pinaagi sa bug-os nga pagtuon sa Bibliya. Pinaagi sa makugihong pagkat-on mahitungod sa kabubut-on sa Diyos, ikaw usab makakaplag pinaagi sa kasinatian nga ang diyosnong kaalam mao lamang ang kasaligang giya niining peligrosong panahon. Hinungdanong sundon gayod kana tungod sa pagkadinalian sa panahon!