Kini ba Gayod Pagpangawat?

SI Abiodun usa ka pangulong silbidor sa usa ka dakong hotel sa Nigeria. Samtang nanira sa lawak nga salosalohan usa ka gabii niana, nakakita siya ug usa ka bag nga adunay sulod nga kuwarta nga balor ug $1,827, T.B. Sa walay langan giuli niya ang kuwarta, nga sa ulahi gikuha sa tag-iya niini, nga usa ka bisita sa hotel. Gigantihan sa tagdumala sa hotel si Abiodun ug dobleng promosyon ug gihatagan siya sa ilang pahalipay nga “labing maayong trabahante sa tuig.” Gigantihan usab siya sa tag-iya sa salapi.

Giasoy sa Quality, nga usa ka lokal nga mantalaan, ang hitabo, nga gitawag si Abiodun nga usa ka “Maayong Samaritano.” Sa dihang gipangutana sa Quality kon siya natintal ba sa pagtago sa salapi alang sa iyang kaugalingon, si Abiodun miingon: ‘Ako usa sa mga Saksi ni Jehova. Busa kon makakita ako ug bisan unsa nga dili akoa, ako kanang iuli sa tag-iya.’

Daghan sa katilingban ang natingala sa pagpasundayag ni Abiodun sa pagkamatinud-anon. Ang isigka-Saksi ni Abiodun nalipay sa nahitabo, apan wala sila matingala. Sa tibuok yuta ang mga Saksi ni Jehova nailhan sa ilang hataas nga mga prinsipyo. Taliwala kanila ang pagkamatinud-anon dili eksepsiyon; kana mao ang lagda, usa ka hinungdanong bahin sa tinuod nga Kristiyanidad.

Hinuon, usahay ang mga sirkumstansiya daw magpalisod sa pag-ila tali sa kon unsay matinud-anon ug unsay dili. Tagda kining kahimtanga. Si Festus, nga maoy nag-atiman sa mga kontribusyon ug kuwenta sa usa ka kongregasyon sa mga Saksi ni Jehova sa Kasadpang Aprika, nagkinahanglan kaayo ug salapi.a Ang iyang asawa nagkinahanglan ug seryosong operasyon nga giingon sa iyang mga doktor nga dili gayod langanon. Ang ospital nangayog abanteng bayad nga katunga sa kantidad.

Walay kuwarta si Festus. Sa dihang miduol siyag daghang tawo aron mangutang, gibalibaran siya. Unya iyang nahunahunaan ang salapi nga iyang giatiman ug nangatarongan, ‘Matarong ba nga akong pasagdan ang akong asawa nga mag-ungaw sa kamatayon nga may mahimo man unta ako sa pagsanta niana? Nganong dili “manghulam” gikan sa kuwarta sa kongregasyon? Akong iuli kana kon bayran na ako sa mga tawo sa ilang nautang kanako.’

Gigamit ni Festus ang maong salapi nga dili iya aron ibayad sa ospital. Husto ba ang iyang pangatarongan? Ang iya bang mga lihok makataronganon tungod sa malisod nga kahimtang nga iyang giatubang?

Kang Kinsang Salapi Kadto?

Sa pag-analisar niining mga pangutanaha, lakbit natong repasohon ang pila ka punto maylabot sa gigikanan ug katuyoan sa salapi sama nianang gikuha ni Festus. Ang salapi nagagikan sa boluntaryong mga kontribusyon nga gihatag sa mga membro sa kongregasyon kinsa buot magpauswag sa putling pagsimba ni Jehova. (2 Corinto 9:7) Dili kana gamiton sa pagpanuweldo, sanglit walay usa ang gisuholan sa ilang ginabuhat diha sa kongregasyon. Sa kasukwahi, ang giamot nga salapi gamiton sa panguna aron sa pagbaton ug pag-atiman ug usa ka tigomanan, nga kasagaran sa usa ka Kingdom Hall. Kini nagtagana ug kombenyente ug komportableng dapit diin ang mga tawo​—bata ug tigulang, adunahan ug kabos​—magtigom alang sa pagtuon sa Bibliya.

Kang kinsang salapi kadto? Kadto iya sa kongregasyon sa kinatibuk-an. Walay usa ka membro ang maghukom kon unsaon paggasto ang salapi. Bisan tuod nga ang mga ansiano maoy magdumala sa pagbayad sa naandang mga galastohan sa kongregasyon, kon ang wala-maanding balayranan gikinahanglan, ipresentar sa mga ansiano ang butang ngadto sa tibuok kongregasyon aron uyonan.

Pagpanghulam o Pagpangawat?

Gumikan sa iyang plano nga ilisan dayon ang salapi, giisip ni Festus ang iyang gibuhat ingong pagpanghulam. Hinunoa, ang Webster’s New Dictionary of Synonyms nagagamit ug ubang mga pulong maylabot sa “pagkuha sa kabtangan sa uban nga kasagaran sa tago o nga wala siyay kasayoran ug kanunay nga wala siyay pag-uyon.” Ang mga pulong mao ang “pagpangawat” ug “kawatan.” Walay pagtugot o awtorisasyon, gikuha ni Festus ang salapi nga iya sa kongregasyon. Busa, sa pagkatinuod, siya sad-an sa pagpangawat. Siya usa ka kawatan.

Siyempre, adunay gidak-on sa sala sa pagkasalawayon diha sa motibo sa pagpangawat. Makita nato kana gikan sa pananglitan ni Judas Iscariote, kinsa maoy gisaligan sa salapi nga gihuptan ni Jesus ug sa matinumanong mga apostoles. Ang Bibliya nag-ingon: “[Si Judas] usa ka kawatan ug nagbaton sa kaha sa salapi ug nagkuhaan sa mga salapi nga gibutang niini.” (Juan 12:6) Napalihok sa daotang kasingkasing ug sa tumang kadalo, misamot pa kadaotan si Judas. Sa kataposan gipakaulawan niya ang iyang kaugalingon pinaagi sa pagbudhi sa Anak sa Diyos​—sa 30 ka buok salapi.​—Mateo 26:14-16.

Si Festus, hinuon, napalihok sa kahangawa sa iyang masakitong asawa. Kini ba nagpasabot nga siya walay sala? Dili gayod. Tagda ang giingon sa Bibliya mahitungod sa pagpangawat diha sa daw laing malisod nga kahimtang: “Ang mga tawo dili motamay sa usa ka kawatan kon siya mangawat aron sa pagtagbaw sa iyang kalag kon siya gigutom. Apan, kon masakpan, magabayad siya ug pito ka pilo; ang tanang kabtangan sa iyang balay iyang ihatag.” (Proverbio 6:30, 31) Sa laing pagkasulti, kon masakpan, ang kawatan kinahanglang moatubang sa bug-os nga silot sa kasugoan. Sumala sa Moisesnong Kasugoan, ang usa ka kawatan kinahanglang mobayad sa iyang krimen. Busa inay dasigon o pakamatarongon ang kawatan, ang Bibliya nagpasidaan nga bisan sa emerhensiya nga mga kahimtang, ang pagpangawat mahimong mosangpot ug kapildihan sa salapi, kaulawan, ug labi pang seryoso, pagkawala sa pag-uyon sa Diyos.

Ingong mga Saksi ni Jehova, ang tanang tinuod nga mga Kristohanon, ilabina kadtong gisaligan ug mga responsabilidad sulod sa kongregasyon, kinahanglang mahimong panig-ingnan, “walay ikasumbong.” (1 Timoteo 3:10) Si Festus wala makadawat sa salapi nga iyang gidahom, ug busa siya wala makailis sa salapi nga iyang gikuha. Ang iyang nahimo nabutyag. Unsay nahitabo kaniya? Kon dili pa siya mahinulsolong kawatan, mapalagpot unta siya gikan sa hinlong Kristohanong kongregasyon. (1 Pedro 4:15) Apan siya nagbasol ug naghinulsol. Sa ingon, nakapabilin siya sa kongregasyon, apan nawad-an siya sa iyang mga pribilehiyo sa pag-alagad.

Pagsalig sa Diyos

Si apostol Pablo nagpasidaan nga ang pagpangawat sa usa ka tawo nga nag-angkong nag-alagad kang Jehova makapasipala sa ngalan sa Diyos ug sa katawhan nga ginganlan sa Iyang ngalan. Si Pablo misulat: “Ikaw ba, . . . ang usa nga nagatudlo sa uban, dili magtudlo sa imong kaugalingon? Ikaw, ang usa nga nagawali ‘Ayaw pangawat,’ nagapangawat ka ba? Kay ‘ang ngalan sa Diyos ginapasipalahan tungod kaninyo.’”​—Roma 2:21, 24.

Si Agur, nga usa ka maalamong tawo sa karaang panahon, mipahayag ug samang punto. Diha sa iyang pag-ampo siya mihangyo nga unta “dili siya mahimong kabos ug . . . mangawat ug magapasipala sa ngalan sa [iyang] Diyos.” (Proverbio 30:9) Matikdi nga ang maalamong tawo miila nga ang kakabos mopatunghag mga kahimtang nga makatintal bisan sa tawong matarong sa pagpangawat. Oo, ang malisod nga mga panahon makasulay sa pagtuo sa usa ka Kristohanon sa katakos ni Jehova sa pag-atiman sa mga panginahanglan sa iyang katawhan.

Bisan pa niana, ang maunongong mga Saksi ni Jehova, lakip niadtong mga kabos, adunay pagtuo nga ang Diyos “maoy tigganti sa mga matinuorong nagapangita kaniya.” (Hebreohanon 11:6) Sila nasayod nga si Jehova moganti sa iyang mga matinumanon pinaagi sa pagtabang kanila sa pag-atiman sa ilang mga panginahanglan. Gipatin-aw kana ni Jesus diha sa iyang Wali sa Bukid, nga nag-ingon: “Ayaw gayod pagkabalaka ug moingon, ‘Unsa may among kan-on?’ o, ‘Unsa may among imnon?’ o, ‘Unsa may among isul-ob?’ . . . Kay nahibalo ang inyong langitnong Amahan nga gikinahanglan ninyo kining tanang butanga. Nan, padayong pangitaa nga una ang gingharian ug ang iyang pagkamatarong, ug kining tanang ubang mga butang idugang kaninyo.”​—Mateo 6:31-33.

Sa unsang paagi ang Diyos magtagana alang sa mga kabos diha sa Kristohanong kongregasyon? Sa daghang paagi. Ang usa maoy pinaagi sa isigka-magtutuo. Ang katawhan sa Diyos nagpasundayag ug tinuod nga gugma alang sa usag usa. Seryoso nilang gitagad ang tambag sa Bibliya: “Ang bisan kinsa nga adunay kahinguhaan sa kinabuhi niining kalibotana ug makakita sa iyang igsoon nga may panginahanglan ug bisan pa magasira sa pultahan sa iyang malumong pagkamabination nganha kaniya, sa unsang paagi ang gugma sa Diyos magpabilin diha kaniya? Mga kabataan, managhigugma kita, dili pinaagi sa pulong ni sa dila, apan sa buhat ug sa kamatuoran.”​—1 Juan 3:17, 18.

Sa tibuok kalibotan, sa kapin sa 73,000 ka kongregasyon, kapin sa upat ka milyon ug tunga ka mga Saksi ni Jehova ang makugihong naningkamot sa pag-alagad sa Diyos sumala sa iyang matarong nga mga prinsipyo. Sila nasayod nga ang Diyos dili gayod mobiya sa iyang mga matinumanon. Kadtong nakaalagad kang Jehova sulod sa daghang katuigan mopatugbaw sa ilang mga tingog sa pag-uyon kang Haring David, kinsa misulat: “Nabata ako kaniadto, ug karon ako tigulang na, apan wala ako makakita sa mga matarong nga gibiyaan, ni nagpakilimos ug tinapay ang iyang kaliwat.”​—Salmo 37:25.

Pagkalabing maayo nga mosalig sa Diyos nga maoy nagdasig nianang mga pulonga, inay magpatintal sa pagpangawat ug hayan mawad-an sa pag-uyon sa Diyos sa walay kataposan!​—1 Corinto 6:9, 10.

[Footnote]