Mga Batan-on—Kang Kansang Pagtulon-an ang Inyong Ginasunod?
“Adunay pipila nga mahulog gikan sa pagtuo, nga managtagad sa . . . mga pagtulon-an sa mga demonyo.”—1 TIMOTEO 4:1.
1. (a) Unsa ang mga kapilian sa mga batan-on? (b) Sa unsang paagi si Jehova nagatudlo?
ANG pangutana dinhi nga gitumong sa mga batan-on mao, Kang kansang pagtulon-an ang inyong ginasunod? Kini nagpasabot nga kamong mga batan-on may kapilian. Ang kapilian maoy tali sa pag-uyon sa diyosnong pagtulon-an ug pagsunod sa mga pagtulon-an sa mga demonyo. Si Jehova nagatudlo pinaagi sa iyang Pulong, ang Bibliya, ingon man pinaagi sa pag-alagad sa mga tawo nga iyang gigamit ingong iyang mga hawas sa yuta. (Isaias 54:13; Buhat 8:26-39; Mateo 24:45-47) Apan matingala ka ba nga ang mga demonyo nagatudlo usab?
2. Nganong hinungdanon nga magbantay batok sa mga pagtulon-an sa mga demonyo niining panahona?
2 Si apostol Pablo misulat: “Sa ulahing mga yugto sa panahon adunay pipila nga mahulog gikan sa pagtuo, nga managtagad sa nagapahisalaag nga inspiradong mga pamulong ug mga pagtulon-an sa mga demonyo.” (1 Timoteo 4:1) Sanglit kita nagkinabuhi na sa “kataposang mga adlaw” sa dihang si Satanas ug ang iyang mga demonyo aktibo kaayo, nasabtan ba nimo kon nganong gisukna namo ang pangutanang, Kang kansang pagtulon-an ang imong ginasunod? (2 Timoteo 3:1-5; Pinadayag 12:7-12) Sanglit si Satanas ug ang iyang mga demonyo alisto kaayo, makatintal kaayo ang ilang mga paagi, hinungdanon nga hatagan nimog pagtagad kining pangutanaha.—2 Corinto 11:14, 15.
Ang mga Demonyo ug ang Ilang mga Pagtulon-an
3. Kinsa ang mga demonyo, unsay ilang katuyoan, ug sa unsang paagi naningkamot sila sa paghimo niini?
3 Ang mga demonyo sa usa ka panahon mga manulonda ni Jehova, apan sila mialsa batok sa ilang Maglalalang ug busa nahimong mga dumadapig ni Satanas. (Mateo 12:24) Ang ilang katuyoan mao ang pagdaot sa mga tawo ug ipahilayo sila gikan sa pag-alagad sa Diyos. Sa pagpalampos niini, migamit ang mga demonyo ug tawhanong mga magtutudlo sa pagpasiugda sa mahakogon, imoral nga paagi sa pagkinabuhi nga gihukman ni Jehova. (Itandi ang 2 Pedro 2:1, 12-15.) Ang pagrepaso kon sa unsang paagi ang kanhi matinumanong mga manulonda nahimong mga demonyo makatabang kanimo sa pag-ila sa ilang mga pagtulon-an ug sa paagi sa pagkinabuhi nga gipasiugda niining pagtulon-ana.
4. (a) Nganong ang dili matinumanong mga manulonda mianhi sa yuta sa mga adlaw ni Noe? (b) Unsay nahitabo sa daotang mga manulonda ug sa ilang mga kaliwat panahon sa Lunop?
4 Sa mga adlaw ni Noe, naibog ang pipila ka manulonda sa matahom nga mga anak nga babaye sa mga tawo nga kining maong espirituhanong mga linalang mibiya sa ilang mga posisyon sa langit ug mianhi sa yuta. Ang ilang pagpakigsekso uban sa mga babaye miresultag mestiso nga mga anak nga gitawag ug Nephilim. Sanglit dili kinaiyanhon alang sa espirituhanong mga linalang nga makigsekso sa mga tawo, ang gihimo sa masukihong mga manulonda sa maong mga babaye sama ka sayop sa homoseksuwal nga mga buhat nga sa ulahi gihimo sa mga lalaki ug mga batang lalaki sa Sodoma. (Genesis 6:1-4; 19:4-11; Judas 6, 7) Bisan tuod ang mga kapikas sa mga manulonda nangamatay sa lunop uban sa ilang mestisong mga anak, gihukas sa daotang mga manulonda ang ilang materyalisado unodnong mga lawas ug namalik sa langit diin sila nahimong demonyong mga kauban ni Satanas nga Yawa.—2 Pedro 2:4.
5. Unsang matanga sa mga linalang ang mga demonyo, ug sa unsang paagi naningkamot sila sa pagdaot sa mga balaod sa Diyos?
5 Labot niining makasaysayanhong kaagi, nasabtan ba nimo kon unsang matanga gayod sa mga linalang kining mga demonyo? Sila maoy mga mahilayon sa sekso nga mao ang dili makitang mga tigmaneobra niining nabuang-sa-sekso nga kalibotan. Bisan tuod dili na sila makamateryalisar pag-usab ingong mga tawo, sila malipay sa seksuwal nga mga kahilayan niadtong ilang madaot sa yuta. (Efeso 6:11, 12) Ang mga demonyo naningkamot sa pagpukan sa mga balaod ni Jehova labot sa kaputli ug moralidad pinaagi sa paghimo niana nga daw sobra ra ka mapig-oton. Gipasiugda niining daotang mga manulonda ang seksuwal nga imoralidad ingong normal, makalilipay nga paagi sa pagkinabuhi.
Nagaduso sa mga Pagtulon-an sa mga Demonyo
6. Nganong angayng dili kita matingala nga giduso sa mga demonyo ang ilang mga pagtulon-an sa malalangong paagi?
6 Dili makapatingala kanato nga iduso sa mga demonyo ang ilang mga pagtulon-an sa malalangong paagi, sanglit mao kini ang paagi nga gigamit sa ilang lider, si Satanas nga Yawa, sa paglimbong kang Eva. Hinumdomi nga siya nakigsulti kaniya nga daw siya gustong makatabang. “Diay nag-ingon ang Diyos nga dili kamo makakaon sa tanan nga mga kahoy sa tanaman?” nangutana si Satanas. Unya malipoton siyang misulay sa pagdaot sa pagtulon-an sa Diyos pinaagi sa pagsulti kang Eva nga siya makakuha pag kaayohan gikan sa pagkaon sa gidiling kahoy. “Sa mismong adlaw nga mokaon ka niana,” misaad ang Yawa, “mangabuka ang inyong mga mata ug mahimo kamo nga sama sa Diyos, nga mahibalo sa maayo ug sa daotan.” (Genesis 3:1-5) Mao nga si Eva nadani, oo nahaylo, sa pagsupak sa Diyos.—2 Corinto 11:3; 1 Timoteo 2:13, 14.
7. Unsay epekto sa malalangong mga pagtulon-an sa mga demonyo, ug unsay gipasidaan niini?
7 Sa mga panahong dili pa dugay, usab, daghan ang nahaylo. Malalangong gipasiugda sa mga demonyo ang seksuwal nga imoralidad nga kini nahimong dinawat sa daghan nga kas-a nagsaway niana. Pananglitan, sa dihang gitubag sa ilado-kaayong mananambag nga kolumnista sa Tinipong Bansa ang usa ka sulat may kalabotan sa mga tawong dili-minyo nga nakigsekso, siya misulat: “Ako wala gayod magdahom nga mabag-o ako bahin niining isyuha, apan karon nagtuo ako nga ang lalaki ug babaye nga seryoso nga magminyo kinahanglang mag-uban sa pipila ka biyahe sa hinapos sa semana aron masusi kon sila ba gayod magkaangay.” Dayon siya midugang: “Dili ako makatuo nga nasulat nako kadto!” Dili gani siya makatuo nga iyang narekomendar ang pakighilawas, apan nahimo niya kadto! Sa tin-aw, kinahanglang mag-amping kita nga ang mga pagtulon-an sa mga demonyo dili makaapektar sa atong panglantaw sa mga buhat nga gisaway sa Diyos.—Roma 1:26, 27; Efeso 5:5, 10-12.
8. (a) Sa unsang paagi gigamit ang pulong “kalibotan” diha sa Bibliya? (b) Kinsay nagmando sa kalibotan, ug unsaon paglantaw sa mga sumusunod ni Jesus ang kalibotan?
8 Dili gayod nato kalimtan nga si Satanas mao ang “magmamando niining kalibotana.” Sa pagkatinuod, si apostol Juan nag-ingon nga “ang tibuok kalibotan nahiluna sa gahom sa daotang usa.” (Juan 12:31; 1 Juan 5:19) Tinuod, si Jesus migamit usahay sa pulong “kalibotan” sa pagtumong sa tanang katawhan. (Mateo 26:13; Juan 3:16; 12:46) Hinunoa, daghang higayon niyang gigamit ang pulong “kalibotan” sa pagtumong sa tanang organisado tawhanong katilingban nga naglungtad sa gawas sa matuod nga Kristohanong kongregasyon. Pananglitan, si Jesus miingon nga ang iyang mga sumusunod kinahanglang “dili bahin sa kalibotan” (dili matarong tawhanong katilingban) ug kay dili man sila bahin sa kalibotan, sila pagadumtan sa kalibotan. (Juan 15:19; 17:14-16) Ang Bibliya dugang nagpasidaan nga kinahanglang maglikay kita nga mahimong mga higala niining kalibotana nga gimandoan ni Satanas.—Santiago 4:4.
9, 10. (a) Unsang kalibotanong mga butang ang makapukaw ug dili-angay nga kaibog sa sekso? (b) Sa unsang paagi posibleng mailhan kon kinsa ang nagpaluyo sa mga ginatudlo sa kalingawan sa kalibotan?
9 Si apostol Juan miawhag: “Ayaw ninyo higugmaa ang kalibotan o ang mga butang nga anaa sa kalibotan.” Siya usab nag-ingon: “Ang tanang butang nga anaa sa kalibotan—ang tinguha sa unod ug ang tinguha sa mga mata ug ang mapagawalong pagpasundayag sa kahinguhaan sa kinabuhi sa usa—wala magagikan sa Amahan.” (1 Juan 2:15, 16) Palandonga kini. Unsay anaa sa kalibotan karon nga nagapukaw sa sayop nga kaibog, pananglitan sa kawat nga pakigsekso? (1 Tesalonica 4:3-5) Unsay ikasulti bahin sa kadaghanan sa musika sa kalibotan? Usa ka polis sa California nag-ingon: “Sa paninugdan, ang musika nagatudlo nga dili ka kinahanglang maminaw sa imong mga ginikanan, ug kinahanglang magkinabuhi ka sumala sa imong gusto.” Naila ba nimo ang tinubdan sa pagtulon-an nga gihatag sa maong musika?
10 Hinumdomi nga si Satanas, sa tinuod, miingon kang Eva: ‘May kulang kanimo nga mapuslanon. Pagkinabuhi sa paagi nga imong gusto. Pagdesisyon na kon unsay maayo o kon unsay daotan. Dili ka kinahanglang maminaw sa Diyos.’ (Genesis 3:1-5) Dili ba mao man kanay samang mensahe nga makita sa kadaghanan sa musika sa kalibotan? Apan ang mga demonyo wala lamang magtudlo pinaagi sa musika. Sila usab mogamit ug komersiyal nga mga programa sa telebisyon, mga pelikula, ug mga video sa pagtudlo. Sa unsang paagi? Aw, ang mga paagi sa komunikasyon sa kalibotan nagpresentar sa kalingawan nga naghimo sa moral nga mga pagtulon-an sa Diyos nga daw mapig-oton. Ilang gipaluyohan ang pakighilawas pinaagi sa pagpasiugda niana ug gipasundayag kana ingong tilinguhaon.
11. Kon bahin sa moralidad, unsa ang kasagarang ginatudlo sa telebisyon?
11 Ang magasing U.S.News & World Report nagpahayag: “Niadtong 1991, ang tulo ka estasyon [sa T.B.] nagpasundayag ug kapin sa 10,000 ka seksuwal nga mga panghitabo sa piniling oras; sa matag esenang gipasundayag ang pakigsekso tali sa mga minyo, ang mga estasyon nagpasundayag ug 14 ka esena sa pakigsekso gawas sa kaminyoon.” Pinaagi sa pagpasundayag ug kapin sa 9,000 ka panghitabo sa kawat nga pakigsekso sa piniling oras sa usa ka tuig, unsay imong ikasulti sa ginatudlo sa telebisyon? Si Barry S. Sapolsky, nga kaubang awtor sa taho nga “Sekso sa Piniling-Oras sa Telebisyon: 1979 Versus 1989,” miingon: “Kon ang tin-edyer motan-aw sa daghang katuigan ug TV diin ang mga tawo nakigbahin sa mabirigbirigon o dayag nga mahilayong buhat, kining libolibong mga hulagway sa daghang katuigan magtudlo kanila nga ang sekso makapalipay—ug walay bisan unsang mga sangpotanan.” Walay duhaduha labot niini: Ang mga kalingawan sa kalibotan nagatudlo sa mga batan-on nga walay mga balaod, nga ang pakighilawas madawat, ug nga walay daotang mga sangpotanan sa pagkinabuhi diha sa paagi nga gisaway sa Diyos.—1 Corinto 6:18; Efeso 5:3-5.
12. Nganong ang mga kalingawan sa kalibotan peligroso ilabina sa Kristohanong mga batan-on?
12 Ang musika, mga pelikula, mga video, ug telebisyon sa kalibotan gidesinyo sa pagdani sa mga batan-on. Ilang gipalambo ang dunot nga mga pagtulon-an sa mga demonyo! Apan katingad-anan ba kini? Palandonga lang kana. Kon ang bakak nga relihiyon ug politika maoy bahin sa kalibotan ni Satanas—ug dayag nga kini mao—makataronganon ba ang pagtuo nga ang kalingawan nga giduso sa kalibotan walay impluwensiya sa demonyo? Kamong mga batan-on ilabina ang kinahanglang magbantay nga dili “tugotan ang kalibotan sa inyong palibot nga moumol kaninyo sa kaugalingon niini nga hulmahan.”—Roma 12:2, The New Testament in Modern English, ni J. B. Phillips.
Susiha ang Imong Kaugalingon
13. Unsang pagsusi sa kaugalingon ang kinahanglang himoon?
13 Ang kamatuoran bahin sa kon kansang mga pagtulon-an ang inyong pagasundon matino dili lamang pinaagi sa inyong pagpanulti kondili pinaagi sa inyong mga buhat. (Roma 6:16) Busa panagutan-a ang inyong kaugalingon, ‘Ang ako bang tinamdan ug kurso sa kinabuhi sayop nga naapektohan sa mga butang nga akong nakat-onan pinaagi sa mga galamiton sa kalibotan sa propaganda? Ang mga pagtulon-an ba sa mga demonyo nakayuhot sa akong kinabuhi?’ Aron matabangan ka sa pagtubag sa maong mga pangutana, nganong dili nimo sulayan pagtandi ang gidaghanon sa panahon ug paningkamot nga imong gigugol sa pagtuon sa Bibliya, pagtambong sa Kristohanong mga tigom, ug sa pagpakigsulti sa uban bahin sa Gingharian sa Diyos uban sa nagugol sa pagtan-aw ug TV, pagpamati sa musika, pagdula sa paboritong esport, o paghimo sa susamang mga kalihokan? Sanglit dako kaayo—sa pagkatinuod, ang imo mismong kinabuhi—ang nameligro, susihang matinud-anon ang imong kaugalingon.—2 Corinto 13:5.
14. Unsay makaapekto sa atong espirituwal nga kahimsog, ug unsang makasubong panghunahuna ang kinahanglang isilsil nato sa hunahuna?
14 Nasayod ka pag-ayo nga ang materyal nga pagkaon nga imong ginakaon makaapekto sa imong pisikal nga panglawas. Sa susama, ang imong espirituwal nga kahimsog maapektohan sa kon unsay imong ginapakaon sa imong hunahuna ug kasingkasing. (1 Pedro 2:1, 2) Samtang mahimo nimong malimbongan ang imong kaugalingon mahitungod sa kon unsa ang imong tinuod nga intereses, dili nimo malimbongan ang atong Maghuhukom, si Jesu-Kristo. (Juan 5:30) Busa pangutan-a ang imong kaugalingon, ‘Kon ania pa sa yuta si Jesus, maulaw ba akong magpasulod kaniya sa akong lawak ug maminaw sa akong musika o sa pagtan-aw sa akong ginatan-aw?’ Ang makasubo nga kamatuoran mao nga si Jesus nagatan-aw ug nahibalo sa atong mga ginabuhat.—Pinadayag 3:15.
Sukli ang mga Pagtulon-an sa mga Demonyo
15. Nganong ang mga Kristohanon makigbisog gayod sa pagsukol sa mga pagtulon-an sa mga demonyo?
15 Ang pagpit-os nga gihimo sa mga demonyo sa mga batan-on aron sundon ang ilang mga pagtulon-an hilabihan gayod. Kining daotang mga espiritu daw nagtanyag ug usa ka kinabuhi sa dihadiha nga katagbawan—usa nga makalingaw ug makalipay. Aron mapahimut-an ang Diyos, gisalikway ni Moises sa karaan ang “temporaryong pagpahimulos sa sala” ingong usa ka iladong membro sa panimalay ni Paraon. (Hebreohanon 11:24-27) Dili sayon nga balibaran ang gitanyag sa mga demonyo, busa kinahanglang makigbisog ka gayod sa pagbuhat sa matarong. Tinuod gayod kini tungod kay napanunod nato ang sala ug ang atong mga kasingkasing sagad mangandoy sa paghimo sa daotan. (Genesis 8:21; Roma 5:12) Tungod sa makasasalang mga kiling, bisan si apostol Pablo nagmalig-on sa iyang kaugalingon ug wala tugoti ang iyang unodnong mga tinguha nga mogahom kaniya.—1 Corinto 9:27; Roma 7:21-23.
16. Sa unsang paagi ang mga batan-on makasukol sa mga pagpit-os sa pagpakigbahin sa imoral nga buhat?
16 Bisan tuod ikaw tingali matintal sa “pagsunod sa kadaghanan sa paghimog daotan,” ang Diyos makatabang kanimo sa pagsukol sa pagpit-os sa imong mga katalirongan sa pagsubay sa sayop nga dalan. (Exodo 23:2; 1 Corinto 10:13) Apan kinahanglang imong patalinghogan ang mga pagtultol sa Diyos, nga pabilhan ang iyang mga pulong diha sa imong kasingkasing. (Salmo 119:9, 11) Kinahanglang imong ilhon nga kon ilain sa mga batan-on ang ilang kaugalingon, mapukaw ang seksuwal nga pangibog ug motultol ngadto sa paglapas sa balaod sa Diyos. “Sa dihang mag-inusara ako uban sa akong trato, ang akong lawas gustong mohimo sa usa ka butang ug ang akong utok magsulti kanako sa paghimo sa lain,” miadmiter ang usa ka batan-on. Busa ilha ang imong mga limitasyon ug sabta nga ang imong kasingkasing malimbongon. (Jeremias 17:9) Ayaw ilain ang imong kaugalingon. (Proverbio 18:1) Pagbutang ug mga utlanan sa pagpakitag mga pagmahal. Ug ilabinang importante, pakigkuyog lamang niadtong nahigugma kang Jehova ug adunay halalom nga pagtahod sa iyang mga balaod.—Salmo 119:63; Proverbio 13:20; 1 Corinto 15:33.
17. Unsay makatabang sa Kristohanong mga batan-on nga makabaton ug kalig-on sa pagsukol sa mga pagtulon-an sa mga demonyo?
17 Ang maampingong pagtuon sa Kristohanong mga publikasyon nga gidesinyo alang sa imong espirituwal nga kalig-on makatabang kanimo. Pananglitan, tagda ang librong Mga Pangutanang Gisukna sa mga Batan-on—Mga Tubag nga Mosaler ug ang kapitulong “Ang Pakigbugno sa Pagbuhat ug Matarong” diha sa librong Ikaw Mabuhing Walay Kataposan sa Paraiso sa Yuta. Tugoti nga ang gitaganang Kasulatanhong instruksiyon modulot sa imong hunahuna ug kasingkasing, ug kini molig-on kanimo. Ang kamatuoran nga dili gayod nimo kalimtan mao nga niining gikontrolar-sa-demonyo nga kalibotan ang paghimo sa matarong dili sayon. Busa pakigbisog ug maayo. (Lucas 13:24) Lig-ona ang imong espirituwal nga kusog. Ayawg sundoga ang mahuyang, mga talawan nga nagsunodsunod sa panon.
Pagbaton ug Kaayohan Gikan sa Diyosnong Pagtulon-an
18. Unsay pipila ka benepisyo sa pagsunod sa diyosnong pagtulon-an?
18 Hinumdomi, usab, nga wala gayoy magkulang kanimo nga bisan unsang butang maayo pinaagi sa pagsunod sa pagtulon-an ni Jehova. Siya tinuod gayod nga nahigugma kanimo, ug maoy hinungdan nga siya “nagatudlo kanimo aron ikaw makabatog kaayohan.” (Isaias 48:17) Busa sunda ang pagtulon-an ni Jehova, ug likayi ang kaguol sa usa ka nadaot nga tanlag, pagkawala sa pagtahod-sa-kaugalingon, wala tuyoa nga pagsabak, sakit nga napasa sa sekso, o susamang mga trahedya. Si Jehova malipay kon ang iyang mga alagad mohatag kaniyag tubag sa hagit ni Satanas nga ang mga tawo dili magpabiling matinumanon sa Diyos ubos sa pagsulay. (Job 1:6-12) Kon imong lipayon ang kasingkasing ni Jehova pinaagi sa pagkahimong matinumanon kaniya, ikaw makalabang-buhi sa dihang iyang ipahamtang ang malaglagong paghukom batok niining kalibotana, samtang ang tanan nga magabiaybiay sa iyang mga balaod mangahanaw.—Proverbio 27:11; 1 Corinto 6:9, 10; 1 Juan 2:17.
19. Unsa ang bili sa pagpakig-uban niadtong adunay apresasyon sa mga kaayohan sa pagtulon-an ni Jehova?
19 Kon ikaw suod nga makig-uban niadtong adunay apresasyon sa nahimo ni Jehova alang kanila, makakat-on ka gikan sa ilang kasinatian. Usa ka babaye nga kanhi giyanon sa mga droga ug nalangkit sa imoralidad mipahayag: “Kon wala pa ako maminaw kang Jehova, patay na ako karon. Ang lalaki nga pakaslan unta nako patay na gumikan sa AIDS. Ang akong tanang suod nga mga higalang kalibotanon kaniadto patay na gumikan sa AIDS o kaha himalatyon. Kanunay nako silang makit-an sa kadalanan, ug nagpasalamat ako kang Jehova adlaw-adlaw tungod sa iyang mga balaod nga nagamando sa iyang katawhan ug maghupot kanatong balaan kon ato kanang ipadapat. Wala pa gayod ako sukad malipay, matagbawon, ug masaligon sa akong kinabuhi.” Sa pagkatinuod, ang pagsunod sa pagtulon-an ni Jehova kanunay nga makahatag kaayohan kanato!
Paghimog Hustong Pagpili
20, 21. (a) Unsa ang duha ka kapilian sa mga batan-on? (b) Unsang dumalayong kaayohan ang mosangpot gikan sa pagsunod sa diyosnong pagtulon-an?
20 Gidasig namo kamong mga kabataan: Paghimog hustong pagpili pinaagi sa pag-alagad kang Jehova. Unya magmalig-on sa pagpabilin sa maong desisyon. (Josue 24:15) Sa pagkatinuod, usa lamang sa duha ka kapilian ang mahimo nimong pilion. Si Jesus nag-ingon nga adunay luag ug halapad nga dalan—ang usa nga masayong himoon mao ang pagbuhat sa imong gusto. Kanang dalana walay kalutsan, nga mosangko ngadto sa kalaglagan. Ang laing dalan, hiktin. Lisod kining dalana nga biyaheon niining imoral, gikontrolar-sa-demonyo nga kalibotan. Apan ang dalan sa kataposan modala niadtong nagalakaw niana ngadto sa kahibulongang bag-ong kalibotan sa Diyos. (Mateo 7:13, 14) Haing dalana ang imong subayon? Kansang pagtulon-an ang imong sundon?
21 Pasagdan kamo ni Jehova sa pagpili sa imong kaugalingon. Dili siya mosulay pagpugos kanimo sa pag-alagad kaniya. “Akong gibutang ang kinabuhi ug kamatayon sa imong atubangan,” miingon ang manalagna sa Diyos nga si Moises, nga nag-aghat: “Pilia ang kinabuhi.” Kining pagpili himoon “pinaagi sa paghigugma kang Jehova nga imong Diyos, pinaagi sa pagpamati sa iyang tingog ug sa pagtapot kaniya.” (Deuteronomio 29:2; 30:19, 20) Hinaot maalamon ninyong pilion ang pagsunod sa diyosnong pagtulon-an ug tagamtama ang kinabuhi nga walay kataposan diha sa mahimayaong bag-ong kalibotan sa Diyos.
Unsaon Nimo Pagtubag?
◻ Kinsa ang mga demonyo, ug unsay ilang ginatudlo?
◻ Sa unsang paagi giduso sa mga demonyo ang ilang mga pagtulon-an karong adlawa?
◻ Sa unsang paagi nga posibleng masuklan ang mga pagtulon-an sa mga demonyo?
◻ Unsa ang mga kaayohan sa pagpamati sa mga pagtulon-an ni Jehova?
[Hulagway sa panid]
Sa wala pa ang Lunop, ang masinupakong mga manulonda ug ang ilang kaliwat nagpasiugdag kapintasan ug kalaw-ayan
[Hulagway sa panid]
Maulaw ka ba kon madunggan ni Jesus ang imong paboritong musika?