Mga Saksi ni Jehova sa Tibuok Kalibotan—Colombia

ANG Colombia maoy usa ka talagsaong nasod sa Habagatang Amerika. Ang duha ka dagat sa Atlantiko ug Pasipiko namaybay niining nasod nga daghag-bolkan. Ang klima nagkalainlain gikan sa tropikal nga kainit sa kapatagan ngadto sa bugnaw sa hataas, punog-yelong mga tumoy sa Kabukirang Andes.a

Bisan tuod ilado ang Colombia sa bulawan ug esmeralda, ang mga tawo niini mao ang labing bililhong mga kabtangan. Karong adlawa, ginapuno ni Jehova ang iyang espirituwal nga balay ug himaya. Matahom, tilinguhaong mga magsisimba ang nagaganayan ngadto niana sa tanang bahin sa yuta, apil ang Colombia.​—Hageo 2:7.

Mga Ehekutibo sa Negosyo Nakadayeg

Ang Dominggo, Nobyembre 1, 1992, gitiman-an sa pagpahinungod sa bag-ong sangang buhatan ug pasilidad sa pag-imprinta sa Watch Tower Society sa Facatativá, 42 kilometros amihanang-kasadpan sa Bogotá. Ang paglibot sa sanga may dakong epekto sa mga bisita. Sa mibalik sa pabrika nga iyang gitrabahoan, usa ka bisita malipayong miagda sa iyang mga manedyer sa pagduaw ug sa pagpaniid sa usa ka organisasyon nga ‘kahibulongan ang kaepisyente, kahusay, ug kadasig sa empliyado.’ Sa panahon sa ilang sunod-sunod nga duaw, ang mga ehekutibo nagpakitag dakong interes ug daghang gipangutana.

Gusto niini nga mga ehekutibo nga ipadala ang ilang mga superintendente, mga superbisor, ug mga kapatas​—sa pagkatinuod, tanan nilang mga trabahante—​sa paglibot. Matag semana, sila nag-eskedyul ug 15 ngadto sa 25 ka empliyado nga molibot hangtod ang tanang trabahante nga 1,300 makakita sa maong organisasyonal nga kaepisyente.

Gatosan sa ilang mga trabahante ang nakalibot na sa mga pasilidad sa sanga ug nakatan-aw sa video nga Jehovah’s Witnesses​—The Organization Behind the Name. Nakadayeg sa gidak-on sa organisasyon ug sa tibuok-yutang gilapdon sa buluhatong pagsangyaw sa Gingharian, sila nahibulong sa de-kalidad nga teknolohiya nga gigamit sa mga palakaw sa Sosyedad. Sa mibiya, daghan ang nadunggan nga nag-ingon nga daw ilang gibati nga ilang ‘gibiyaan ang Paraiso aron mobalik ngadto sa di-organisadong kalibotan.’

Ang Kamatuoran Nakaabot sa Tanang Matang

Ang tanang matang sa katawhan ginaabotan sa maayong balita. (1 Timoteo 2:3, 4) Pananglitan, usa ka kanhi manunulat ug pangulo sa banda nga heavy-metal rock midawat sa kamatuoran sa Bibliya, mihimog mga kausaban sa iyang kinabuhi, ug wala magdugay nahimong usa ka regular payunir. Sa ulahi siya gitudlo ingong usa ka ministeryal nga alagad. Ubay-ubayng indibiduwal kinsa kanhi mga membro sa subersibong mga grupo nakakat-on sa pagbutang sa ilang pagsalig ug paglaom diha sa Gingharian ni Jehova. Sila karon aktibo na nga nalangkit sa pagsangyaw sa mensahe bahin sa usa ka malinawon bag-ong kalibotan.

Ang mga giyanon ug mga tigbaligyag droga midangop usab sa kamatuoran. Usa ka batan-ong ulitawo kinsa Saksi na karon nagdumalag usa ka plantasyon sa droga ug usa ka laboratoryo sa cocaine sa lasang sulod sa lima ka tuig sa wala pa siya mibulag gikan nianang matanga sa kinabuhi. Iyang nakaplagan ang kalipay diha sa pagkakat-on ug pagpadapat sa mga prinsipyo sa Bibliya. Sa usa ka bilanggoan ang nahukmang mga mamumuno nga napalihok pinaagi sa usa ka sinsero nga pagtuon sa Bibliya kinasingkasing nga nag-ampo nga pasayloon ni Jehova ang ilang mga sala ug dawaton sila ingong iyang mga alagad.

Busa ingon niini ang pagsanong sa mga tawo sa tanang matang sa mensahe sa Gingharian. Sa Colombia, sama sa ubang dapit, si Jehova sa ingon nagapuno sa iyang balay ug himaya.

[Footnote]

[Kahon sa panid 8]

LARAWAN SA NASOD

1993 Tuig sa Pag-alagad

KINATAS-ANG GIDAGHANONG NAGSANGYAW: 60,854

PROPORSIYON: 1 ka Saksi sa 558

TUMATAMBONG SA MEMORYAL: 249,271

ABERIDS NGA PAYUNIR NGA MGA MAGMAMANTALA: 8,487

ABERIDS NGA MGA PAGTUON SA BIBLIYA: 100,927

GIDAGHANON SA NABAWTISMOHAN: 5,183

GIDAGHANON SA MGA KONGREGASYON: 751

SANGANG BUHATAN: FACATATIVÁ

[Hulagway sa panid 9]

Mga trabahante sa sangang buhatan ug mga misyonaryo sa 1956

[Hulagway sa panid 9]

Talan-awon gikan sa ibabaw sa sangang buhatan