Ang “Diyosnong Pagtulon-an” nga Kombensiyon sa Ethiopia—Usa ka Panahon sa Linaing Kalipay

DILI kadto ang unang distritong kombensiyon sa Ethiopia sukad nga sila nakabatog kagawasan, apan kadto linain gayod. Sukad nga nakabatog legal nga pag-ila niadtong Nobyembre 11, 1991, ang mga Saksi ni Jehova nagtigom sa ikatulong higayon diha sa kinadak-ang estadyum sa nasod, ang City Stadium, nga diha mismo sa sentro sa Addis Ababa. Sanglit kini nga estadyum dili man magamit sa Dominggo ug kay walay laing dako nga pasilidad ang mabatonan, ang programa gisiksik sa tulo ka adlaw, gikan sa Huwebes ngadto sa Sabado, Enero 13-15, 1994.

Kining tulo ka adlaw naghatag kalipay dili lamang sa maayo kasarangang klima ubos sa asul nga kalangitan kondili usab sa espirituwal nga kalamdagan uban sa bug-os nga epekto sa “Diyosnong Pagtulon-an.” Diha sa maanindot nga pagkaplastar nga mga bulak palibot sa entablado, ang tema sa kombensiyon dayag nga makita sa Amharic nga sinulatan.

Apan unsay naghimo sa kombensiyon nga linain? Uban sa tugob nga programa, ang mga hunahuna ug mga pagbati sa tanan napunting diha sa among mahigugmaon internasyonal nga panag-igsoonay ug ang tin-aw nga kapadayagan sa panalangin sa Diyos diha sa iyang katawhan diha sa matang sa pag-uswag sa Gingharian. Dihay mga 270 ka langyawng mga delegado gikan sa 16 ka nasod, lakip bisan ang Djibouti ug Yemen. Kapin sa katunga miabot gikan sa tugnawng klima nga Uropa ug Amerika del Norte. Ang mga bisita naglakip sa duha ka membro sa Nagamandong Lawas sa mga Saksi ni Jehova, sila Lloyd Barry ug Daniel Sydlik.

Ang naandang kamaabiabihon sa mga Ethiopianhon duyog sa kinasingkasing nga gugma alang sa ilang nagaduaw nga mga igsoon nakahatag kasadya nga nakabuntog sa mga kababagan sa pinulongan. Ang mga pangomosta dili lamang pinaagig lamano kondili sa mga gakos ug mga halok, hangtod sa unom ka pilo! Daghang bisita ang nakabasa mahitungod sa buluhaton sa Gingharian sa Ethiopia ug nahibalo nga ang ilang igsoong mga Ethiopianhon maoy nasulayang mga maghuhupot sa integridad nga nakalahutay sa mga pagkabilanggo ug ubang matang sa paglutos.a Apan ang nagaduaw nga mga igsoon natingala sa pagkakitag daghang batan-on nga nagpakitag malipayong panagway ug pagkamatinahuron nga nagakahanaw sa kadaghanang kayutaan karong adlawa. Daghang igsoong babayeng Ethiopianhon nagsul-ob sa ilang puti, maayong-pagkaburdang tradisyonal nga mga sinena, nga nakadugang sa usa ka matuod masadyaong palibot.

Ang bawtismo sa Biyernes napamatud-ang makapalipay. Ang taas nga linya sa 530 ka bag-ong mga dedikado, gikan sa 10 ngadto sa 80 anyos ang edad, naglumbay latas sa katunga sa nataran sa estadyum. Kini daghan gayod kay sa gilaoman sa tanan​—kapin sa 1 sa matag 7 ka Saksi sa nasod. Pagkadako nga pamatuod sa panalangin ni Jehova sa iyang katawhan dinhi! Dihay daghang luha sa kalipay sa pagkakita sa daghang nabawtismohan, nga napalambo sa matahom nga pag-awit sa kapin sa 40 ka delegado gikan sa Italya. Daghan ang naghunahuna sa matagnaong mga pulong sa Isaias 60:5: “Sa maong panahon ikaw makakita ug dayag nga mosidlak, ug ang imong kasingkasing mokuba ug modako, tungod kay ang bahandi sa kadagatan dad-on nganha kanimo; ang manggad mismo sa mga nasod modangat kanimo.”

Linaing mga Hinungdan sa Kalipay

Ang panalangin ni Jehova dugang gipasiugda sa Biyernes, sa dihang gipalunhaw ang gamay nga pagsugod sa buluhaton sa Gingharian sa Ethiopia pinaagig mga interbiyu. Kadto gidumala sa usa ka grupo sa unang mga misyonaryo kinsa nag-alagad didto sa katuigang 1950 ug 1970. Kapin sa 8,000 ang nakadungog kang Ray Casson, John Kamphuis, ug Haywood Ward nga naghubit sa ilang buluhaton sa edukasyon sa Bibliya, nga nagsugod niadtong Septiyembre 14, 1950, sa dihang sila miabot sa Addis Ababa. Ang imperyal nga kagamhanan niadtong adlawa nagkinahanglan nga sila mahimong aktibo sa edukasyon sa katibuk-an. Busa sila nagtukod ug tunghaan alang sa edukasyon sa mga hamtong diha sa sentro sa lungsod, nga naglakip sa nagkalainlaing mga tun-anan. Apan sa ilang libreng panahon, kini nga mga misyonaryo nangitag paagi sa pagpauswag sa edukasyon nga gipunting diha sa diyosnong pagtulon-an. Sila kinahanglang manlimbasog nga makakat-on sa Amharic, usa ka komplikadong pinulongan nga adunay alpabeto nga 250 ka karakter. Mga tunga sa tuig ang milabay una pa sila milampos sa pagdumala sa ilang unang pagtuon sa Bibliya sa balay. Mga 43 ka tuig sa ulahi, ilang nahibalag ang mga tawo diha sa dalan kinsa nahinumdom niining kanhi mga magtutudlo sa tunghaan. Diha sa kombensiyon, hinunoa, sila nalipay nga nagkita pag-usab uban sa daghan nilang mga estudyante kaniadto sa Bibliya nga nangahimong mga malig-on sa pagtuo, ug kinsa nagpailaila kanila ngadto sa ilang kaugalingong espirituwal nga mga anak ug mga apo.​—1 Tesalonica 2:19, 20.

Ang malipayon ug atentibo kaayong tumatambong namalakpak sa hataas nga panahon dili lamang tungod sa mga interbiyu uban sa mga misyonaryo kaniadto kondili usab tungod sa mga taho ug mga pangomosta gikan sa Alemanya, Britanya, Canada, Israel, Italya, Kenya, Netherlands, ug Tinipong Bansa​—nga gidala sa langyawng mga hawas. Kini nagpasiugda na usab sa mahigugmaon tibuok-yutang panag-igsoonay sa katawhan sa Diyos. Ang pangunang mga pakigpulong nga gihatag sa dinihogang mga igsoon gikan sa Nagamandong Lawas, ingon man ang ilang kinasingkasing nga mga pag-ampo, nakatandog usab pag-ayo sa mga tumatambong. Ang mga batan-on diha sa estadyum nakakita sa ilang kaugalingon nga nahisama sa mga karakter sa drama bahin sa mga batan-on kinsa nahinumdom sa ilang Maglalalang, ang drama gidula sa natural kaayo ug bibo nga paagi. Dugang pa sa bag-ong mga giluwat sa Ingles, tulo ka bag-ong mga giluwat sa Amharic nakahatag ug dakong kadasig.b

Sa panahon sa mga intermisyon ug sa ubang mga panahon, dihay maayong mga higayon nga makaila ang daghang hamiling mga indibiduwal. Pananglitan, diha mismo sa unang linya, naglingkod sa silyang uway, ang labing tigulang nga magmamantala sa Ethiopia, si Tulu Mekuria. Sa miaging tuig, sa hinog nga kagulangong 113, siya gibawtismohan ingong usa sa mga Saksi ni Jehova. Niini nga kombensiyon siya nalipay nga nagtan-aw sa iyang 80-anyos nga asawa nga misunod sa iyang panig-ingnan, nga nahimong iyang espirituwal usab nga igsoong babaye. Ang iyang presensiya sa tibuok nga programa maoy usa ka maayong inspirasyon sa mga batan-on. Usa niini mao si Yohanes Gorems, kinsa sa panuigong 16 ug nagtungha pa nag-alagad na sulod sa upat ka tuig ingong usa ka regular payunir nga magmamantala. Siya ug ang ubang nagtunghang mga payunir nga mas bata pa nakakat-on sa maalamong paggamit sa panahon, sama sa pagsangyaw sayo sa buntag paingon sa tunghaan o pinaagi sa paggamit sa reses ug mga oras human sa klase.

Pagkamaayong Panig-ingnan sa Integridad!

Gatosan diha sa mga tumatambong nakaagig pagkabilanggo ug pagsakit ubos sa nangaging mga kagamhanan. Si Mandefro Yifru namalandong ug balik sa lima niana ka tuig sa pagkabilanggo, apan karon siya malipayong nag-alagad sa bag-ong natukod nga buhatan sa Addis Ababa, nga nagaatiman sa paghubad, pag-imprinta, ug shipping. Ang laing batan-ong lalaki nga nag-alagad uban kaniya, si Zecarias Eshetu, malig-ong nagpabilin sa iyang pagkamaunongon walo ka tuig sa miagi sa dihang gipatay ang iyang amahan tungod sa paghupot sa Kristohanong neyutralidad sulod sa tulo ka tuig nga pagkabilanggo. Si Zecarias, usa sa lima ka anak, diyes anyos lamang sa dihang nabilanggo ang iyang amahan. Si Meswat Girma ug iyang igsoong babaye, si Yoalan, nga karon anaa na sa ilang ulahing pagkatin-edyer ug nagtungha pa, nahinumdom sa ilang amahan sa mga letrato lamang, sanglit sila gagmay pa kaayo sa dihang kalit lang nga gipatay siya tungod sa iyang neyutralidad. Ang iyang pagkamaunongon nagdasig kanila, ug ang duha nag-alagad ingong mga regular payunir, sama sa ilang amahan panahon sa iyang kamatayon.

Ang laing maghuhupot sa integridad mao si Tamirat Yadette, nga karon nag-alagad ingong espesyal payunir diha sa usa ka matahom nga rehiyon sa Rift Valley. Tungod sa iyang Kristohanong neyutralidad, siya migugol ug tulo ka tuig sa pito ka nagkalainlaing bilanggoan, usahay kinadenahan ug kinulatag maayo. Bisan pa, sa bilanggoan daghang tawo ang iyang natabangan nga mobarog dapig sa Gingharian sa Diyos.

Si Tesfu Temelso, nga karon nag-alagad ingong magtatan-aw sa sirkito, nabilanggo sa 17 ka higayon sulod sa iyang mga tuig sa pag-alagad ingong espesyal payunir. Siya may mga ulat sa mga pagkulata, apan siya nalipay sa pagkakitang adunay mga kongregasyon sa iyang mga teritoryo kaniadto. Daghang igsoong lalaki ug babaye gikan sa Kongregasyon sa Akaki nag-antos sa pagkabilanggo ug kapintasan, bisan pa ang kongregasyon miuswag ngadto sa kapin sa usa ka gatos ka magmamantala. Sila nagtukod sa unang Kingdom Hall sa mga Saksi ni Jehova sa Ethiopia. Gikan sa Dese, usa ka lungsod nga maanindot ug talan-awon nga duolan sa 300 kilometros amihanan sa kaulohan, nangabot ang usa ka grupo sa lima kinsa diriyut nga mamatay ug nakakita sa usa ka lokal nga igsoong lalaki nga namatay tungod sa pagsakit nga iyang naagoman. Usa ka ansiano uban kanila, si Maseresha Kasa, nagbatbat nga siya nag-antos sulod sa unom ka tuig nga pagkabilanggo, dili tungod kay siya espesyal sa lain nga paagi, kondili tungod kay siya nakakat-on sa pagsalig kang Jehova.​—Roma 8:35-39; itandi ang Buhat 8:1.

Bisan karong bag-o, ang uban nagpasundayag sa ilang pagkamatinumanon ubos sa pagsulay. Usa ka dakong grupo miabot diha sa kombensiyon gikan sa kasikbit nga nasod diin, tungod sa ilang neyutralidad, ang mga Saksi hinikawan sa proteksiyon sa kapolisan, sa mga dokumento sa pagbiyahe, sa mga sertipiko sa kaminyoon, sa pagpatambal sa ospital, ug mga trabaho. Sa dihang mainit pa ang gubat duol sa Mesewa, usa ka Eritrean nga dunggoanan sa Pulang Dagat, ang tibuok kongregasyon, 39 ang tanan, lakip ang mga bata, nagpuyo mga upat ka bulan sa ilalom sa mubo nga taytayan sa disyerto aron makalikay sa pagpamomba diha sa ilang mga balay sa kagamhanan kanhi. Niini nga kahimtang sa kainit ug kawalad-on, ang ilang adlaw-adlaw nga mga panaghisgot sa teksto ug sa ubang mga tigom naghatag kanila ug dakong kalig-on ug usa ka suod nga relasyon uban kang Jehova ingon man usab ngadto sa usag usa. Duha ka espesyal-payunir nga mga igsoong babaye nga nag-alagad duol sa tuboran sa Blue Nile nag-antos sa mga panghulga sa magubtanong panon ug panghasi nga gipasiugda sa Ortodoksong Iglesya, apan ang duha milahutay ug nakita ang ubay-ubayng mga estudyante sa Bibliya nga nagpasimbolo sa ilang dedikasyon pinaagig bawtismo niining kombensiyona.

Usa ka igsoong lalaki miasoy sa iyang pagsulay sa pagkanahilain diha sa usa ka trabaho sa kinatung-an sa umaw nga rehiyon sa Ogaden, dili layo gikan sa Somalia. Siya nagpadayong buhi sa espirituwal pinaagi sa pagsangyaw ug unya pagdumalag mga tigom uban sa mga interesado, lakip sa mga doktor sa medisina, kinsa nakabaton ug kaayohan gikan sa diyosnong pagtulon-an ug karon nagatudlo na sa uban. Ang laing maayong panig-ingnan sa paghupot sa integridad mao ang usa ka espesyal payunir sa Addis Ababa kinsa, sa 1992, gibun-og ug maayo ug gibiyaan sa pagtuo nga siya patay na sa usa ka magubtanong panon nga gipasiugda sa Ortodoksong mga pari. Sa makalilipay, siya naulian ug nagpadayong nag-alagad sa mao gihapon nga teritoryo. Ang hayag nga pahiyom sa iyang dagway nagpakita nga siya walay gihambin nga kayugot. Alang kaniya, sama sa tanang ubang nasulayan ug mga bag-ohan, kining “Diyosnong Pagtulon-an” nga Kombensiyon maoy usa ka piyesta sa kalipay.

Ang organisasyon sa kombensiyon mahusay nga gipalakaw, nga nagpahunahuna sa mga bisita nga ang mga boluntaryo nga nalangkit daghan nag katuigan nga kasinatian. Sa pagkatinuod, sila kusog nga miuswag sa milabayng duha ka tuig. Ang tulo-ka-adlaw nga kombensiyon dali nga natapos. Ang kinatas-ang tumatambong sa Sabado maoy 9,556. Ang telebisyon, radyo, ug mga peryodiko sa nasod mihatag ug maayong mga taho. Ang tanan nakakita nga gipadato ni Jehova ang iyang katawhan sa espirituwal. Ang tumatambong naglakip sa linibong mga interesado kinsa misugod sa pagbatog kaayohan gikan sa “Diyosnong Pagtulon-an.” Ang halapad nga nataran bukas alang sa mga Saksi ni Jehova niining nasora sa duolan sa 50 ka milyong tawo, ug ang kombensiyon nagpalig-on sa tanan sa ilang determinasyon sa paggamit sa nahibiling panahon niining sistema sa mga butang sa pagtabang sa mga tawong sinsero nga makabatog kaayohan usab gikan sa diyosnong pagtulon-an.

[Mga footnote]

[Hulagway sa panid 23]

Addis Ababa, Enero 13-15, 1994

[hulagway sa panid 24]

Grupo sa mga payunir sa Addis Ababa (tuo); mga maghuhupot sa integridad kinsa ang tanan nabilanggo (ubos); 113-anyos nga Saksi ug iyang asawa