Pagkamadaogon Batok Kang Satanas ug sa Iyang mga Buhat
“Busa, magpasakop kamo sa Diyos; apan sukli ang Yawa, ug siya mokalagiw gikan kaninyo.”—SANTIAGO 4:7.
1. Sa unsang paagi “ang kamot sa daotan nga usa” nakaapektar sa katawhan karong adlawa?
SI Job tukmang mipahayag: “Ang yuta mismo gikahatag ngadto sa kamot sa daotan nga usa.” (Job 9:24) Ug giatubang nato karon ang labing lisod nga kapanahonan sa tibuok kasaysayan sa tawo. Ngano man? Tungod kay karon mao “ang kataposang mga adlaw” sa demonyohanong pagmando ni Satanas sa yuta. Dili katingalahan nga, sa paghulhog ni Satanas, “ang mga tawo nga tuman-kadaotan ug mga impostor mosamot pa kangil-ad, nagapahisalaag ug ginapahisalaag.” (2 Timoteo 3:1, 13) Dugang pa, ang mga paglutos, mga inhustisya, mga kapintasan, mga krimen, mga kalisdanan sa panginabuhi, tagdugay nga mga sakit, mga kasakitan sa pagkatigulang, emosyonal nga mga depresyon—kini sila ug dugang pa mahimong makapaguol ug makapaluya kanato.
2. Sa unsang paagi kita makasagubang sa mga pag-atake ni Satanas karong adlawa?
2 Ang dakong kaaway, si Satanas nga Yawa, nagahimog gipakusgang pag-atake sa katawhan ug ilabina sa matuod nga mga magsisimba sa Diyos. Ang iyang tumong mao nga ang tanang lagmit nga mga tighupot sa integridad mobatok sa Diyos ug dad-on sila ngadto sa kalaglagan duyog kaniya ug sa iyang demonyong mga manulonda. Hinuon, gipasaligan kita nga kon moagwanta kita nga may integridad, ang Yawa mokalagiw gikan kanato. Sama kang Jesus, kita ‘makakat-on ug pagkamasinugtanon’ ngadto sa Diyos pinaagi sa mga butang nga atong giantos, ug pinaagi sa Iyang dili-takos nga kalulot, kita makadangat sa kinabuhing walay kataposan.—Hebreohanon 5:7, 8; Santiago 4:7; 1 Pedro 5:8-10.
3, 4. (a) Unsang mga pagsulay sa gawas ang gisagubang ni Pablo? (b) Unsa ang gikabalak-an ni Pablo ingong usa ka Kristohanong ansiano?
3 Si apostol Pablo nasulayan usab sa daghang paagi. Sa pagpahayag sa iyang mga kredensiyal ingong usa ka ministro ni Kristo, siya misulat: “Ako usa nga labaw pa: sa mga paghago mas daghan, sa mga pagpriso mas daghan, sa mga hampak naghingapin, sa mga pag-ungaw sa kamatayon masubsob. Sa mga Judio ako lima ka higayon nakadawat ug kap-atan ka hampak kulang ug usa, tulo ka higayon ako gigarote, kausa nga ako gibato, tulo ka higayon ako nakasinatig pagkalunod, usa ka gabii ug usa ka adlaw ang akong nagugol sa lawod; sa mga panaw masubsob, sa kapeligrohan sa mga suba, sa kapeligrohan gikan sa mga tulisan sa dalan, sa kapeligrohan gikan sa kaugalingon kong rasa, sa kapeligrohan gikan sa kanasoran, sa kapeligrohan diha sa siyudad, sa kapeligrohan diha sa kamingawan, sa kapeligrohan sa dagat, sa kapeligrohan taliwala sa bakak nga mga igsoon, sa kahago ug kabudlay, sa mga gabiing walay-tulog masubsob, sa kagutom ug kauhaw, sa pagkawalay-kaon makadaghan, sa katugnaw ug kahubo.
4 “Gawas pa nianang mga butanga nga panggawas, anaay nagasugok kanako adlaw-adlaw, ang kahingawa alang sa tanang kongregasyon. Kinsa man ang maluya, ug ako dili maluya? Kinsa man ang napandol, ug ako wala maglagot sa tuman?” (2 Corinto 11:23-29) Sa ingon, gihuptan ni Pablo ang integridad sa dihang nag-atubang sa mga paglutos ug mga pagsulay gikan sa gawas, ug isip usa ka Kristohanong ansiano, siya dulot nga nabalaka sa pagpalig-on sa mas luyang mga igsoong lalaki ug mga babaye sa kongregasyon, nga nagatabang kanila sa paghupot sa integridad. Pagkamaayong panig-ingnan alang sa Kristohanong mga ansiano karong adlawa!
Integridad Ubos sa Paglutos
5. Unsa ang sulbad sa direktang paglutos?
5 Unsa ang mga galamiton ni Satanas sa pagguba sa integridad? Sumala sa gipaila sa ibabaw, usa sa labing mapintasong mga estratehiya ni Satanas mao ang laktod nga paglutos, apan adunay usa ka sulbad. Ang Efeso 6:10, 11 nagtambag kanato: “Padayon sa pagbaton ug kagahom diha sa Ginoo ug diha sa pagkagamhanan sa iyang kusog. Isul-ob ang kompletong armadora gikan sa Diyos aron kamo makabarog nga malig-on batok sa mga malipatlipatong kaugdahan [o, “malansisong mga buhat,” potnot] sa Yawa.”
6. Sa unsang paagi ikapakita nga ang mga Saksi ni Jehova nakagula nga “bug-os nga madaogon”?
6 Kasagaran nga niining kataposang mga adlaw, ang mga Saksi ni Jehova kinahanglang mosagubang sa mga pagsulay. Busa, kita makaingon duyog kang Pablo: “Sa tanan niining mga butanga kita nanggawas nga bug-os madaogon pinaagi kaniya nga nahigugma kanato.” (Roma 8:37) Kini gipamatud-an sa integridad sa mga Saksi ni Jehova diha sa mga kampong konsentrasyon sa Alemanya, Austria, Polandia, ug Yugoslavia sulod sa panahong Nazi tali sa 1933 ug 1945, ilalom sa Komunistikanhong pagdaogdaog sa Silangang Uropa tali sa 1945 ug 1989, ug panahon sa mga paglutos nga misakit sa mga bahin sa Aprika ug Latin Amerika sa bag-o pang kapanahonan.
7. Unsang makapatandog nga mga panig-ingnan sa integridad ang gitaho gikan sa Ethiopia?
7 Ang mga Saksi ni Jehova sa Ethiopia mitaganag makapatandog nga panig-ingnan sa integridad tali sa 1974 ug 1991. Usa sa mahunahunaon-sa-politika nga mga mananakop misulti sa usa ka igsoong lalaki nga nabilanggo: “Mas dili peligroso ang pagbuhi sa mga leyon gikan sa zoo kay sa pagpagawas pag-usab kaninyo!” Ang maong mapintas nga mga maglulutos nagpasakit sa mga alagad ni Jehova, ug tapos sa ubay-ubayng katuigan usa ka korte sa apelasyon ang nagmando sa mga pagpatay. Ang lawas sa usa ka igsoong lalaki gipasundayag sa publiko ingong usa ka pasidaan. Ang ubang mga igsoong lalaki nga miapelar sa silot sa kamatayon gibuhian sa usa ka mas liberal nga korte, ug pipila nianang matinumanong ‘mga mananaog’ may mga bahin sa programa sa “Balaang Pagtulon-an” nga Distritong Kombensiyon sa Addis Ababa sayo sa 1994.a—Juan 16:33; itandi ang 1 Corinto 4:9.
8. Sa unsang paagi si Satanas misulay sa pagpahimulos sa “ethnic cleansing”?
8 Si Satanas napakyas sa pagbungkag sa integridad nianang maunongong mga igsoong lalaki ug mga babaye pinaagi sa laktod nga pag-atake sa atubangan. Busa, unsang laing malansisong mga galamiton ang iyang gigamit? Ang Pinadayag 12:12 nag-ingon bahin niining kataposang mga adlaw: “Alaot ang yuta ug ang dagat, tungod kay ang Yawa nanaog kaninyo, nga may dakong kasuko, kay nahibalo nga siya may mubo nga yugto sa panahon.” Kay napakyas sa pagpuo sa maunongong katawhan sa Diyos pinaagi sa mga paglutos, tungod sa iyang kasuko siya naninguha sa paghuwes-dekutsilyo sa enterong mga populasyon, sa walay duhaduha uban sa katuyoan nga ang katawhan ni Jehova mamatay kauban sa ubang bahin sa populasyon. Busa ang gitawag nga ethnic cleansing gipatuman diha sa mga bahin sa kanhi Yugoslavia, ug ang mga pagpatay sa tibuok nga mga tribo gisulayan sa Liberia, Burundi, ug Rwanda.
9. Nganong ang mga taktika ni Satanas kasagarang mapakyas? Paghatag ug mga pananglitan.
9 Kasagaran, hinunoa, ang mga taktika ni Satanas misumbalik kaniya, kay ang satanasnong pagsakit mopukaw sa matarong-ug-kasingkasing nga mga tawo sa pagkaamgo nga ang bugtong nilang paglaom nahasandig sa Gingharian sa Diyos, nga masibotong gimantala sa mga Saksi ni Jehova. (Mateo 12:21) Sa tinuoray, ang mga interesado nagganayan paingon sa Gingharian! Pananglitan, sa gibungkag-sa-gubat nga Bosnia ug Herzegovina, sa Marso 26, 1994, ang pagsaulog sa Memoryal sa pagkamatay ni Jesus, 1,307 ang mitambong, nga labaw ug 291 kay sa miaging tuig. Ang kinatas-ang ihap sa mga tumatambong nahitala sa Sarajevo (414), Zenica (223), Tuzla (339), Banja Luka (255), ug ubang mga lungsod. Sa kasikbit nga Croatia dihay usa ka bag-ong kinatas-ang ihap sa tumatambong nga 8,326. Ang kabangisan nga nagakahitabo sa ilang palibot wala makapugong sa mga Saksi ni Jehova nianang mga yutaa sa pagsugot sa sugo nga “ipadayong imantala ang kamatayon sa Ginoo, hangtod sa iyang pag-abot.”—1 Corinto 11:26.
Sa Gibungkag-sa-Gubat nga Rwanda
10, 11. (a) Unsa ang nahitabo sa gitawag nga Kristohanong Rwanda? (b) Sa unsang paagi ang matinumanong mga misyonaryo nagpahayag sa ilang kaugalingon?
10 Sa 1993, ang Rwanda, nga may 2,080 ka magmamantala sa Gingharian, may 4,075 nga mitambong sa “Balaang Pagtulon-an” nga Distritong Kombensiyon, ug 230 ang nabawtismohan. Niana kanila, 142 ang miaplay dayon sa oksilyare payunir nga pag-alagad. Ang mga pagtuon sa Bibliya nga gidumala miuswag ngadto sa 7,655 sa 1994—dayag nga wala magustohi ni Satanas ang maong pag-uswag! Bisan pag ang kinabag-an sa katawhan nag-angkong Kristohanon, ang mga paghuwes-dekutsilyo tali sa mga tribong Hutu ug Tutsi gisugdan. Ang L’Osservatore Romano miangkon: “Kini maoy bug-os nga pagpuo sa kaliwat, nga ikasubo bisan ang mga Katoliko may tulubagon.” Ang gibanabanang tunga sa milyong mga lalaki, mga babaye, ug mga bata ang namatay, ug mga duha ka milyon ang nawad-an ug balay o napugos sa pagkalagiw. Nga naghupot sa ilang dili-mapintasong Kristohanong neyutralidad, ang mga Saksi ni Jehova naningkamot sa pagpabiling nahiusa. Ginatos sa atong mga igsoong lalaki ug babaye ang gipamatay. Apan sa usa ka kongregasyon nga may 65 ka magmamantala sa Gingharian, nga 13 ang gipatay, ang tumatambong sa tigom miuswag ngadto sa 170 sa pagka-Agosto 1994. Ang mga hinabang gikan sa mga Saksi sa ubang kayutaan mao ang unang nangabot. Kita nagaampo alang sa mga nangaluwas.—Roma 12:12; 2 Tesalonica 3:1, 2; Hebreohanon 10:23-25.
11 Taliwala sa tumang kalisang, ang tulo ka misyonaryo nga didto sa Rwanda nakaeskapo. Sila misulat: “Among naamgohan nga ang atong mga igsoon sa tibuok kalibotan kinahanglang moatubang sa susamang mga kahimtang o mas daotan pa, ug kami nahibalo nga kining tanan maoy bahin sa ilhanan sa kataposang mga adlaw niining daotang sistema. Bisan pa, sa dihang ang usa nalangkit sa personal, kini makapaamgo sa usa sa katinuoran sa mga butang ug magpahinabo nga siya magpabili kon unsa ka bililhon ang kinabuhi. Ang pipila ka kasulatan makabaton ug bag-ong kahulogan alang kanamo, ug kami maikagong nagpaabot sa panahon sa dihang ang unang mga butang dili na mosantop sa hunahuna. Kasamtangan buot namong magpabiling puliki sa pag-alagad ni Jehova.”
Batan-ong mga Tighupot sa Integridad
12, 13. (a) Unsang naghupot-sa-integridad nga dalan ang gisubay sa usa ka batan-on? (b) Asa hikaplagi sa atong mga batan-on ang pagdasig karong adlawa?
12 Gipaila ni Jesus nga kadtong isalikway sa mga membro sa pamilya tungod sa kamatuoran pagagantihan ug “usa ka gatos ka pilo.” (Marcos 10:29, 30) Kini nahitabo kang Entellia, usa ka diyes-anyos nga batang babaye sa amihanang Aprika, kinsa nahigugma sa ngalan sa Diyos—Jehova—sa dihang iyang nabatian kini. Siya nagtuon uban sa mga Saksi ni Jehova ug mibaktas sa 90 minutos ngadto-nganhi sa mga tigom, bisan pag ang iyang supak nga pamilya kasagarang dili magpasulod kaniya sa iyang pagpauli. Sa 13 anyos ang edad, siya misugod sa pagwali sa balay-balay, ug ang pagsupak sa pamilya misamot. Usa ka adlaw ang iyang mga paryente migapos sa iyang mga kamot ug mga tiil ug gipabulad siya sa naglagiting nga kainit sulod ug pito ka oras, nga panagsang nagsabyag ug hugawng tubig kaniya. Sila nagbunal kaniya sa mapintason, nga nagdaot sa usa sa iyang mga mata, ug sa kataposan nagpalayas kaniya gikan sa iyang balay. Bisan pa niana, nakakaplag siyag trabaho sa usa ka ospital ug sa kadugayan nakakuwalipikar nga nars. Sa edad nga 20 siya nabawtismohan ug nagpalista dayon ingong oksilyare payunir. Kay nakadayeg sa iyang integridad, ang iyang pamilya nagdawat kaniya balik sa ilang balay, ug siyam kanila ang nagdawat sa mga pagtuon sa Bibliya sa balay.
13 Nakakuha si Entellia ug dakong pagdasig gikan sa Salmo 116, ilabina ang mga bersikulo 1-4, nga iyang gibalikbalik pagbasa: “Ako nahigugma, tungod kay si Jehova namati sa akong tingog, sa akong mga pangaliyupo. Kay iyang gikiling ang iyang igdulongog kanako, ug sa tanan kong mga adlaw ako magatawag. Ang mga gapos sa kamatayon milikos kanako ug ang makapasakit nga mga kahimtang sa Sheol mismo nakakaplag kanako. Ang kasakitan ug kaguol akong kanunay nga makaplagan. Apan sa ngalan ni Jehova ako mitawag: ‘Ay, Jehova, itagana sa akong kalag ang kaikyasan!’” Si Jehova magatubag sa ingong mga pag-ampo!
14. Sa unsang paagi ang mga Saksing Polako nagpakitag talagsaong integridad?
14 Sama sa adlaw ni Jesus, si Satanas kasagaran naggamit sa pagkapanatiko aron mahaling ang paglutos—apan wala molampos. Ang panig-ingnan sa atong mga igsoon sa Polandia maoy talagsaon, sumala sa gibatbat sa 1994 Yearbook of Jehovah’s Witnesses. Bisan ang mga batan-on kinahanglang magpamatuod sa ilang kaugalingon nga mga tighupot sa integridad. Niadtong 1946 ang usa ka ingong batan-on mao ang 15-anyos nga batang babaye nga giingnan: “Mangurus ka lang. Kay kon dili pusilon ka!” Kay naghupot sa integridad, siya giguyod ngadto sa usa ka lasang, gipaantos sa makalilisang nga paagi, ug gipusil.—Itandi ang Mateo 4:9, 10.
Ubang Malansisong mga Galamiton ni Satanas
15, 16. (a) Unsa ang demonyohanong polisa ni Satanas, ug sa unsang paagi makasukol kita kaniya? (b) Nganong dili kinahanglang mahulog ang atong mga batan-on?
15 Ang demonyohanong polisa ni Satanas sa pagkatinuod maoy “pagmando o paglaglag”! Siya daghag mapintasong mga hinagiban nga iyang magamit. Nan, dili katingad-an nga si apostol Pablo nagpasidaan: “Kita adunay pakigdumog, dili batok sa dugo ug unod, apan batok sa mga kagamhanan, batok sa mga awtoridad, batok sa mga magmamando sa kalibotan niini nga kangitngit, batok sa tuman-kadaotang mga puwersa nga espirituhanon diha sa langitnong mga dapit. Tungod niini dad-a ang kompletong armadora sa Diyos, aron kamo makaarang sa pagsukol diha sa tuman-kadaotang adlaw ug, human ninyo mabuhat sa bug-os ang tanang butang, sa pagbarog nga malig-on.” (Efeso 6:12, 13) Ang materyalistikanhong mga tinguha, makadaot nga kalingawan ug propaganda, satanasnong musika, pagpit-os sa mga isigkaingon sa eskuylahan, pag-abusar sa droga, ug paghuboghubog—bisan hain niana makapadaot sa atong mga kinabuhi. Busa, ang apostol nagpadayon sa pagtambag: “Labaw sa tanang butang, dad-a ang dakong taming sa pagtuo, nga pinaagi niini kamo makahimo sa pagpalong sa tanang nagadilaab nga mga udyong sa tuman-kadaotang usa.”—Efeso 6:16.
16 Mopatim-aw nga ilabinang kinahanglanon kini karong adlawa tungod sa katingad-ang musika nga gilumok ni Satanas niining kalibotana. Sa pipila ka kaso anaa ang direktang koneksiyon sa Satanismo. Usa ka taho gikan sa opisina sa serip sa San Diego County (T.B.A.) ang nagpahayag: “Kami may konsiyerto dinhi nga ang grupo may 15,000 ka batang nagaawit ug ‘Natas’—nga mao, Satan nga gibinali.” Ang Satanismo gibatbat ingong usa ka gahong nga niana nahulog ang pipila ka tin-edyer “tungod kay naglaaglaag sila nga nawad-ag paglaom, nangasuko ug nag-inusara.” Kamong mga batan-on sa Kristohanong kongregasyon, dili kinahanglan nga mangahulog kamo! Si Jehova nagtagana kaninyog espirituwal nga hinagiban nga dili gayod madutlan sa mga udyong ni Satanas.—Salmo 16:8, 9.
17. Sa unsang paagi ang emosyonal nga depresyon mabuntog?
17 Ang nagdilaab nga mga udyong ni Satanas gidesinyo aron mamaneobra ang mga emosyon. Pinaagi sa mga kapit-osan sa kinabuhi, sama sa sakit sa lawas o kahimtang sa grabeng depresyon, ipahinabo tingali sa atong kaaway nga mobati ang pipila kanato sa kawalay-kapuslanan. Tingali ang usa maluya kay dili na makaarang sa paggugol ug daghang oras sa pag-alagad sa Diyos o kay dili makatambong sa pipila ka tigom sa kongregasyon. Ang mahigugmaong pagtagad sa mga ansiano ug ubang maluluton-ug-kasingkasing nga mga igsoong lalaki ug mga babaye basin makatabang sa pagbuntog sa maong lisod nga mga kagul-anan. Sa tanang panahon hinumdomi nga gihigugma ni Jehova ang iyang matinumanong mga alagad. (1 Juan 4:16, 19) Ang Salmo 55:22 nag-ingon: “Itugyan ang imong palas-anon diha kang Jehova mismo, ug siya mismo magapalig-on kanimo. Dili gayod niya itugot nga matarog ang matarong nga usa.”
18. Unsang satanasnong mga lipatlipat ang kinahanglang pakigbisogan sa pipila?
18 Ang malansisong “mga lipatlipat” ni Satanas mipatim-aw sa lain pang matang sa dili pa dugay. Sa pipila ka nasod ang daghang hamtong nakasinati ug daotang mga hunahuna nga nagapasa ug makapabug-at nga ideya nga sa bata pa sila mapintasong giabusohan sa satanasnong mga kulto. Diin ba gikan kanang mga ideyaha? Bisan pa sa bug-os nga pagtuki, ang mga pangagpas sa kalibotanong mga espesyalista nagkalainlain kaayo. Giisip sa pipila ka tawo nga kanang mga hunahunaa maoy aktuwal nga mga butang nahinumdoman, giisip sa uban nga kana mga handuraw—nga tingali giaghat sa kaduhaduhaang terapiya—ug giisip kana sa uban nga usa ka matang sa panghanduraw nga gipahinabo sa usa ka kasakitan sa pagkabata.
19. (a) Unsang mga hunahuna ang gisagubang gayod ni Job? (b) Sa unsang paagi ang mga ansiano makasunod sa panig-ingnan ni Eliu?
19 Makaiikag nga ang alagad sa Diyos nga si Job misagubang gayod ug “makapatugawng mga hunahuna” nga gipasa ni Satanas pinaagi ni Elipas ug Sopar. (Job 4:13-18; 20:2, 3) Busa si Job nakasinatig “kakulba,” nga misangpot sa iyang pagsultig “pinataka nga mga sulti” mahitungod sa “mga kalisang” nga nagsakit sa iyang alimpatakan. (Job 6:2-4; 30:15, 16) Si Eliu mahilomong namati kang Job ug tim-os nga mitabang kaniya sa pagsabot sa maalamon-sa-tanang hunahuna ni Jehova mahitungod sa mga butang. Karong adlawa, sa susamang paagi ang masinabtanong mga ansiano nagpakita nga matinagdanon sila sa mga sinakit pinaagi sa dili pagdugang sa labaw pang “kapit-osan” nianang mga tawhana. Hinunoa, sama kang Eliu, mapailobon silang magpatalinghog kanila ug unya ipadapat ang makapahupayng lana sa Pulong sa Diyos. (Job 33:1-3, 7; Santiago 5:13-15) Busa si bisan kinsa kansang mga emosyon natugaw sa mga kasakitan, tinuod man o hinanduraw, o kinsa “nalisang . . . tungod sa mga damgo, ug pinaagi sa mga panan-awon” sama kang Job, mahimong makakaplag ug makapakalmang kahupayan sa Kasulatan sulod sa kongregasyon.—Job 7:14; Santiago 4:7.
20. Sa unsang paagi ang naguol nga mga Kristohanon katabangan sa paghupot sa ilang espirituwal nga panimbang?
20 Sa pagkakaron ang usa ka Kristohanon makatino nga, sa usa o sa laing paagi, si Satanas maoy nagapaluyo niining makapalisang nga mga hunahuna. Kon ang pipila sa kongregasyon nag-antos sa ingon, maalamon nga ilang sabton ang maong makahahadlok nga mga hunahuna ingong laktod nga paninguha ni Satanas nga daoton ang ilang espirituwal nga panimbang. Sila nagkinahanglag mapailobon ug masinabtanon nga Kasulatanhong pagpaluyo. Pinaagi sa mainampoong pagdangop kang Jehova ug pinaagi sa pagpahimulos sa espirituwal nga pagbantay, ang mga nakasinatig kasakitan makabaton sa gahom nga labaw sa kasagaran. (Isaias 32:2; 2 Corinto 4:7, 8) Sa ingon makaarang sila sa pag-agwanta nga matinumanon ug dili motugot nga ang daotang mosal-ot nga mga hunahuna magdaot sa kalinaw sa kongregasyon. (Santiago 3:17, 18) Oo, sila makaarang sa pagsukol sa Yawa, pinaagi sa pagpakita sa samang espiritu nga gipakita ni Jesus sa miingon siya: “Pahilayo, Satanas!”—Mateo 4:10; Santiago 4:7.
21. Sa unsang paagi ang Kasulatan nagpasidaan bahin sa malipatlipatong mga paagi ni Satanas?
21 Nahibalo kita nga ang tumong ni Satanas mao ang pagdaot sa atong mga hunahuna, sumala sa gipasidaan ni apostol Pablo sa 2 Corinto 11:3: “Ako nahadlok nga sa unsa mang paagi, ingon nga ang halas nagdaldal kang Eva pinaagi sa lipatlipat niini, basin unyag ang inyong mga kaisipan madaot gikan sa katim-os ug kaputli nga angay sa Kristo.” Ang pagdaot karon sa tanang unod, o sa tawhanong katilingban nga nahilayo sa Diyos, magpahinumdom kanato sa pangdaot nga gipahinabo sa daotan ug mapintasong mestisong “mga Tighulog” sa adlaw ni Noe. (Genesis 6:4, 12, 13, potnot; Lucas 17:26) Busa, dili katingad-ang si Satanas mogamit ug malansisong mga buhat ug malipatlipatong mga paagi aron ipahungaw ang iyang kasuko, ilabina batok sa katawhan sa Diyos.—1 Pedro 5:8; Pinadayag 12:17.
22. Kay si Satanas dili na magtugaw kanato, unsang mga panalangin ang madahom?
22 Si Satanas wala gani hisgoti sa kataposang mga kapitulo sa basahong Job sa Bibliya. Ang daotan niyang hagit nga ang mga tawo dili makapadayon paghupot sa integridad ngadto sa Diyos gipanghimakak sa integridad ni Job. Sa susama, sa dili na madugay sa dihang ang “usa ka dakong panon” sa mga tighupot sa integridad “mogula sa dakong kasakitan,” mahitabo na unya ang pagtambog kang Satanas sa bung-aw. Ang mga lalaki ug mga babaye sa pagtuo, lakip ang matinumanong si Job, moduyog nianang “dakong panon,” aron pahimuslan ang mga panalangin sa paraiso, nga labaw pa kay sa giganti kang Job!—Pinadayag 7:9-17; 20:1-3, 11-13; Job 14:13.
[Footnote]
a Tan-awa ang 1992 Yearbook of Jehovah’s Witnesses, panid 177.
Mga Pangutana Agig Pagsubli
◻ Unsang maayong mga panig-ingnan sa integridad ang gihatag nila ni Job, Jesus, ug Pablo?
◻ Sa unsang paagi ang mga naghupot sa integridad misukol kang Satanas?
◻ Sa unsang paagi ang mga batan-on makasukol sa malansisong mga paagi ni Satanas?
◻ Unsay mahimo sa pagsagubang sa satanasnong mga lipatlipat?
[Hulagway sa panid 7]
Sa Ethiopia, si Meswat ug Yoalan karon nag-alagad kang Jehova nga bug-os panahon nga nagasunod sa panig-ingnan sa ilang amahan, kinsa gipatay
[Hulagway sa panid 7]
Si Entellia, usa ka batan-ong naghupot sa integridad sa amihanang Aprika