Walay Pagretiro Alang Kanamo!
“WALAY PAGRETIRO ALANG KANAMO” mao ang mensahe nga makuha nimo sa dihang moduaw ka sa usa ka talagsaong pinuy-anan sa Tokyo, sa Hapon. Usa ka pamilya sa 22 ka lalaki ug babaye, nga nag-aberids ug 70 ka tuig ang edad, ang nagapuyo didto. Sila nahiusa dili tungod sa relasyon sa dugo kondili tungod sa komon nga interes—misyonaryong pag-alagad. Sila milahutay sa bug-os panahong pagsangyaw nga buluhaton sa total nga 1,026 ka tuig! Ang tulo sa kinatigulangang membro natawo niadtong 1910. Pito kanila nagsugod sa ilang bug-os-panahong pag-alagad samtang sila mga tin-edyer pa. Siyam kanila ang nakakita sa pag-uswag sa buluhatong pagsangyaw-sa-Gingharian sa Hapon sukad nga misugod ang buluhaton human sa Gubat Kalibotan II.—Isaias 60:22.
Bisan pa, kining unom-ka-andanang tinukod nga sanga sa Watch Tower kanhi maoy usa ka dapit sa pagdasig, ilabina tungod sa espiritu, sa nangibabawng hilig, sa mga misyonaryo nga nagapuyo didto. Bisag kadaghanan kanila may mga limitasyon sa pisikal tungod sa pagkatigulang ug dili maayong panglawas, walay usa niining espirituwal nga mga manggugubat ang andam sa pag-undang. Ang mga Saksi nga Hapones bug-os nga nagbag-o sa tinukod alang kanila, nagtaganag usa ka Kingdom Hall sa silong ug usa ka elebetor.
Kon Unsay Naghimo Kanilang Malipayon
Kay nakagugol ug daghan kaayong katuigan sa ilang asaynment, kining mga misyonaryoha mibati nga kini maoy ilang pinuy-anan. “Sa dihang mipauli ako sa Australia alang sa distritong kombensiyon niining miaging ting-init,” matud pa sa usa sa kinatigulangang mga membro sa pamilya, “andam na akong mobalik sa Hapon human sa duha ka semana!” Sila nahigugma sa mga tawo nga ilang ginaalagaran ug nakaugmad ug halalom nga pagmahal kanila. Ang tanang misyonaryo mahinangop sa mga sulat ug mga tawag sa telepono nga magpahinumdom sa ilang mga kalihokan sa nanglabay nga mga panahon.
Kana maoy resulta sa masibotong ministeryo. Napalihok tungod sa gugma alang kang Jehova, ang mga misyonaryo nakasangyaw sa Pulong sa Diyos nga dinalian ilalom sa nagkalainlaing mga kahimtang. (Itandi ang 2 Timoteo 4:2.) “Gibansay namo ang among kaugalingon nga magmalipayon tungod kay kami nagaalagad kang Jehova,” matud ni Vera MacKay, nga nag-alagad sa Hapon sulod sa 37 ka tuig. “Bisag walay moabli sa pultahan, kami anaa sa pagsangyaw mahitungod kang Jehova.”
Napulog-duha niini nga mga misyonaryo wala gayod magminyo, apan sila malipayon nga nag-alagad sa Ginoo nga walay kababagan. (1 Corinto 7:35) Si Gladys Gregory, nga nag-alagad ingong usa ka misyonaryo sulod sa 43 ka tuig, maoy usa kanila. Siya miingon: “Aron makabatog mas dakong kagawasan sa pag-alagad kang Jehova, ako misulod sa buluhatong pagpayunir, sa ulahi sa Gilead [Watchtower Bible School of Gilead], ug dayon sa misyonaryong buluhaton. Walay gihimong bisan unsang panaad nga magpabiling dili-minyo, ako nagpabiling dili-minyo, ug sama sa daghang dili-minyong mga Saksi, ako wala gayod magbasol niana.”
Kaandam sa Pagpasibo
Bisag ang ubang mga tawo mahimong gahig-ulo samtang sila magkatigulang, ang mga misyonaryo andam gayod sa pagpasibo. Si Lois Dyer, Molly Heron, ug si Lena ug Margrit Winteler maoy diha sa mas gamayng balay sa misyonaryo sa residensiyal nga dapit sa Tokyo. Sila nagpuyo didto kapig 20 ka tuig ug nasuod na sa mga tawo nianang dapita. Sa ilang mga teritoryo, ang managsoong Winteler adunay 40 ka tawo diha sa ilang mga ruta sa magasin, ug si Molly ug Lois adunay 74 ka tawo diha sa ilang ruta. Unya, ang Sosyedad naghangyo kanila nga mobalhin sa unom-ka-andanang balay sa misyonaryo sa kinapusoran sa Tokyo. “Ako naguol ug dili malipayon sa sinugdan,” miadmiter si Lena. Sa kanunay, hinunoa, sila nakapasibo sa ilang bag-ong asaynment. Unsay ilang pagbati karon? “Malipayon kaayo,” tubag ni Lena. “Karon duha ka igsoong lalaki sa Bethel ang ania sa pagluto alang kanamo ug sa paghinlo sa balay. Kami maayong pagkaatiman.” Silang tanan miuyon kang Lois, nga nag-ingon: “Ang mahigugmaong pag-atiman kanamo sa organisasyon ni Jehova maoy nakatabang kanamo sa paglahutay.”
Si Norrine Thompson nakapasibo usab sa bag-ong mga kahimtang. “Sulod sa 15 ka tuig,” matud niya, “ako nakapribilehiyo sa pag-uban sa akong bana [sa orihinal gikan sa New Zealand] sa distritong buluhaton sa dihang ang tibuok Hapon usa lang ka distrito.” Ugaling, ang panglawas sa iyang bana nagkadaot, ug iyang gisagubang ang kinadak-ang pagsulay sa iyang kinabuhi—ang kamatayon sa iyang bana sa milabayng 18 ka tuig. “Niadtong panahona,” matud niya, “ang nagpaarang kanako sa pagpadayon sa misyonaryong buluhaton mao ang gugma nga gipakita sa mga igsoon sa tibuok Hapon, uban sa pag-ampo ug sa padayong puliki nga pag-alagad.”
Pag-agwanta Bisan pa sa mga Suliran sa Panglawas
“Ang kadaghanan adunay pila ka matang sa suliran sa panglawas, apan sila malipayon, ug ang ilang tinguha sa pag-alagad maoy usa ka talagsaong hiyas,” matud ni Albert Pastor, ang magtatan-aw sa balay sa misyonaryo. Sa pag-atiman sa mga misyonaryo, usa ka doktor ug iyang asawa, nga usa ka nars, ang giasayn sa balay.
Usa ka adlaw mga tulo ka tuig ang milabay, si Elsie Tanigawa, usa ka graduwado sa ika-11 nga klase sa Tunghaang Gilead, sa kalit nawad-ag panan-aw ang iyang wala nga mata. Upat ka bulan sa ulahi, ang iyang tuo nga mata usab naapektohan. “Usahay bation ko ang diyutayng kaguol nga dili na makahimo sa pag-alagad sama sa akong mahimo niadto. Apan uban sa tanang matang sa mga tagana sa Sosyedad ug sa mahigugmaong tabang sa akong kauban ug sa uban, ako nagpadayon sa pagkakaplag ug kalipay sa pag-alagad kang Jehova,” matud ni Elsie.
Si Shinichi Tohara ug iyang asawa, si Masako, nga maoy kauban sa klase ni Elsie sa Gilead, nakaatubang ug daghang pagsulay bahin sa ilang panglawas sa miaging pipila ka tuig. Alang kang Shinichi, nga usa ka takos nga mamumulong, usa ka dakong hagit nga dili makakita sa iyang mga nota tungod sa iyang nagakahanap nga panan-aw. Bisag siya nakaagi na sa dagko ug gagmayng operasyon sa dili pa dugayng mga tuig, ang iyang mga mata mohayag sa dihang siya maghisgot bahin sa usa ka 90-anyos nga estudyante sa Bibliya nga iyang ginatabangan karon.
Bisan pag may “tunok sa unod,” giisip niini nga mga misyonaryo ang ilang kaluyahon sama kang apostol Pablo, kinsa miingon: “Sa dihang ako maluya, niana ako gamhanan.” (2 Corinto 12:7-10) Ug tinuod gayod nga sila gamhanan! Sila anaa alang sa pagsimba sa buntag kada adlaw sa alas siyete sa buntag. Human sa pamahaw, kadtong makahimo pa sa pisikal mogula sa ministeryo sa kanataran sayo sa buntag.
Si Richard ug Myrtle Shiroma maoy lakip niadtong regular nga nagagula sa pag-alagad. Si Myrtle naistrok nga makadaghan tungod kay giatake sa arteriosclerosis sa utok niadtong 1978, apan siya nag-ubanan sa iyang bana sa nagapanawng buluhaton hangtod niadtong Nobyembre 1987. Karon si Richard, nga 70 anyos na usab, nagtabang kang Myrtle sa pagbuhat ug bisan unsa. Siya mobangon sa 5:00 s.b., bangonon niya siya, ligoan, ilisan, mek-apan, ug pakan-on. Unya iuban niya siya diha sa iyang wheelchair sa pag-alagad sa kanataran matag buntag, moadto sa balay ug balay sa mga usa ka oras ug human niana mosangyaw sa mga tawo diha sa mga hunonganan sa bus. Si Myrtle dili na makasulti, apan ang kataposang mga pulong nga iyang nalitok maoy Dendo, dendo, ang Hapones alang sa “Pagsangyaw, pagsangyaw.”
Ang ilang anak nga babaye, si Sandra Sumida, mibalhin sa balay sa misyonaryo sa pagtabang kanila. Si Sandra sa dili pa dugay namatyan sa iyang minahal nga bana tungod sa atake sa kasingkasing. Iyang gipabilhan ang malulotong kahikayan sa Watch Tower Society sa pagtudlo kaniyag balik sa Hapon gikan sa Guam, diin siya nakaalagad ingong usa ka misyonaryo uban sa iyang bana. “Gibati ko kanunay nga ako wala gayoy bahin sa pagtabang sa akong mga ginikanan tungod kay ako didto man sa Guam,” matud niya. “Ang akong igsoong babaye, si Joanne, maoy nag-atiman kanila niining balaya. Busa sa dihang nabuksan ang higayon, nalipay ako niini. Ang pagbating gikinahanglan dinhi maoy akong terapiya sukad sa kalit nga kamatayon sa akong bana.”
Sa Gihapon Usa ka Nagpadayong Kabalaka
Bisan tuod gibati sa mga misyonaryo ang mga epekto sa pagkatigulang, sila midumili sa pagsurender sa ilang misyonaryong espiritu. (Salmo 90:10; Roma 5:12) Si Jerry ug Yoshi Toma, nga maoy lakip sa unang graduwado sa Gilead nga giasayn sa Hapon, sa gihapon mogula sa teritoryo sa pamatigayon sa poblasyon sa Shibuya. “Sa dihang kami miabot sa duha-ka-andanang tinukod nga nagbarog dinhi niadtong 1949, kami nagsangyaw gikan sa matag kinubkob nga puy-anan. Karon ang Tokyo nahimo nang dakong siyudad. Kami tigulang na ug dili na makahimo sa among mahimo niadto. Apan sa among pagpauli gikan sa pagsangyaw, bation gayod namo ang kahayahay,” matud ni Yoshi.
Si Lillian Samson nahimong usa ka misyonaryo sa Hapon sulod sa 40 ka tuig ug nalipay gayod sa iyang ministeryo. “Ako karon nagatabang sa 80-anyos nga babaye nga nagtuon uban sa akong kauban, nga si Adeline Nako, nga mipauli sa Hawaii sa pag-atiman sa iyang masakitong inahan. Ang babaye sa dili pa dugay nahimong usa ka magmamantala sa Gingharian human nakabuntog sa mga suliran sa pagsimba sa katigulangan. Siya miadto sa templo ug gisultihan ang asawa sa pari, ‘Ako nakombertir sa Kristiyanidad!’” Uban sa daghang kalipay sa iyang kinabuhi, si Lillian wala gayod magbasol sa adlaw nga siya, sa edad 19, mibiya sa iyang sekular nga trabaho ug misugod sa pagpayunir.
Si Ruth Ulrich ug Martha Hess, magkaubang misyonaryo kapin sa 45 anyos, nag-alagad gikan niining balay sa misyonaryo sa 35 ka tuig. Sila nakapanukad ug maayo sa ilang kaugalingon diha sa teritoryo. Kas-a usa ka magtatan-aw sa sirkito mihangyo kang Martha: “Mahimo bang hulamon ko ang imong dagway sa pag-adto sa pultahan ug pultahan?” Ang mga tawo nakaila pag-ayo sa dagway ni Martha ug nagadawat ug mga magasin, samtang ang magtatan-aw sa sirkito naglisod sa pagsugod ug panagsultihay.
Si Ruth may usa ka babaye sa iyang ruta sa magasin nga dili makabasa tungod sa iyang mga suliran sa panglawas. Sa gihapon, ang babaye nagpadayon sa pagdawat ug mga magasin ug midawat gani sa gahig hapin nga librong Pagpangita sa Katawhan sa Diyos. Si Ruth naglibog kon angay ba niyang ipadayon ang pagdalag mga magasin sanglit walay usa ang daw mobasa sa literatura. Unya usa ka adlaw ang bana sa babaye miduol kang Ruth nga nagdalag librong Pagpangita, nga nag-ingon: “Kini usa ka maayong libro! Natapos ko na kini pagbasa makaduha.” Gisugdan ni Ruth ang pagtuon sa Bibliya uban kaniya ug sa iyang asawa.
Kining balay sa misyonaryo mismo nakadanig interes sa mga tawo. Usa ka gabii, usa ka binatilyo mianha sa balay ug miingon: “Nakasabot ako nga kon ako moanhi dinhi, ako matabangan nga makakat-on sa Bibliya.” Usa ka pagtuon sa Bibliya ang gisugdan uban kaniya. Ingong usa ka kosinero sa Intsik nga restawran, siya nagtrabaho uban sa usa ka babaye nga gipalagpot sa daghang tuig. Ang napahimutang nga mga magasin sa miduaw ang usa ka magmamantala sa restawran nakaabot sa kosina. Ang batan-ong kosinero nakagusto niini ug misugod sa pagbangon ug mga pangutana sa kanhi Saksi. Kay wala makatubag kanila, gisultihan siya nga moduaw sa balay sa misyonaryo. Siya karon nag-alagad na ingong usa ka ministeryal nga alagad ug usa ka payunir. Wala magdugay, ang gipalagpot nga babaye nahibalik, ug sa kadugayan siya usab nahimong usa ka regular payunir.
Ang tanang misyonaryo diha sa balay mapabilhon sa nahimo ni Jehova alang kanila. Sila gikan sa Australia, Canada, Hawaii, Switzerland, ug sa Tinipong Bansa, ug ang 11 maoy gikan sa ika-11 nga klase o mas unang mga klase sa misyonaryong tunghaan sa Gilead. Ilang nakita ang pag-uswag sa buluhaton sa Gingharian sa Hapon ug managsamag hunahuna ni Haring David, kinsa miingon: “Nabata ako kaniadto, karon ako tigulang na, ug bisan pa wala ako makakita sa matarong nga gibiyaan, ni magpakilimos sa tinapay ang iyang kaliwat.” (Salmo 37:25) Agig pagpabili sa mahigugmaong tabang sa Diyos, kini nga mga misyonaryo determinado nga dili moretiro apan magpadayon sa pag-alagad kang Jehova.