Dayegon ba Nimo si Jehova?
“INGON sa imong ngalan, Oh Diyos, mao usab ang imong pagdayeg ngadto sa mga kinatumyan sa yuta.” Kini maoy mga pulong gikan sa usa ka matagnaong awit sa mga anak ni Kore. (Salmo 48:10) Karong adlawa, usa ka gamhanang korus sa minilyong mga Saksi ni Jehova ang nagdayeg sa Diyos ug nagpaila sa iyang ngalan pinaagi sa pagsangyaw sa maayong balita sa iyang Gingharian. Sa pagbuhat niini sa 232 ka kayutaan ug kapuloan sa dagat ug sa kapin sa 300 ka pinulongan, sila sa literal nakaabot “sa mga kinatumyan sa yuta.”
Unsay nagtukmod sa mga tawo sa nagkalainlaing mga kagikan sa kultura, sosyal, ug pinulongan sa pagdayeg kang Jehova? Ang ilang pasalamat sa tukmang kahibalo sa Pulong sa Diyos, ang Bibliya, maoy usa ka dakong katarongan. Ang espirituwal nga kamatuoran nagpahigawas kanila gikan sa mga patuotuo ug gikan sa maong nagaulipong mga pagtulon-ang relihiyoso sama sa walay kataposang pagsakit. (Juan 8:32) Ang kamatuoran nagtabang usab kanila sa pagpabili sa kahibulongang mga hiyas sa Diyos, sama sa iyang gugma, gahom, kaalam, ug hustisya nga inubanan sa kaluoy. Ang pagkasabot sa pagtanyag sa Diyos sa iyang bugtong Anak, si Jesu-Kristo, ingong usa ka halad lukat sa katawhan magdasig sa matarong nga mga tawo sa pagdayeg ug sa pag-alagad kang Jehova.
Sumala sa basahon sa Bibliya sa Pinadayag, usa ka langitnong korus nag-ingon: “Takos ikaw, Jehova, nga mismo among Diyos, nga modawat sa himaya ug sa dungog ug sa gahom, tungod kay imong gilalang ang tanang butang, ug tungod sa imong kabubut-on sila milungtad ug nalalang.” (Pinadayag 4:11) Ang maong pagdayeg dili resulta tungod lamang sa pagbating obligado. Hinunoa, kini nagagikan sa pagtahod kang Jehova.
Dayega ang Diyos Pinaagi sa Pagmantala sa Maayong Balita
Sa pagdayeg kang Jehova, ang usa ka tawo nagasundog sa kinalabwang panig-ingnan ni Jesu-Kristo, ang pangunang magdadayeg sa Diyos. Ang pasunod sa mga tunob ni Jesus naglakip sa pagpakigbahin sa buluhatong pagsangyaw sa maayong balita sa Gingharian sa Diyos. (Mateo 4:17, 23; 24:14) Kining buluhatong pagsangyaw nahimong kinadak-an tibuok yutang paningkamot sa pagdayeg kang Jehova.
Kining buluhatong pagsangyaw hinungdanon kaayo nga tin-awng gilangkit kini sa Bibliya sa kaluwasan. Ang Roma 10:13-15 mabasa: “‘Ang tanang nanagtawag sa ngalan ni Jehova mamaluwas.’ Apan, unsaon nila pagtawag kaniya kang kinsa wala sila magbutang ug pagtuo? Unsaon, sa baylo, pagbutang nila ug pagtuo kaniyang kinsa wala nila madunggi? Unsaon, sa baylo, nila pagkadungog kon walay magwali? Unsaon, sa baylo, nila pagwali gawas kon sila gipadala? Maingon gayod sa nahisulat: ‘Pagkatahom sa mga tiil niadtong mga nagapahayag sa maayong balita sa maayong mga butang!’”
Sa miaging tuig lamang, ang mga Saksi ni Jehova nakagugol ug kapin sa usa ka bilyong oras sa buluhatong pagsangyaw. Ug pagkamaayong mga resulta ang midangat tungod niining pagdayeg sa Diyos! Mga 314,000 ang miduyog sa korus sa mga magdadayeg pinaagi sa pagsimbolo sa ilang dedikasyon kang Jehova pinaagi sa pagbawtismo sa tubig.
Ugaling, unsay ikasulti bahin sa 12,288,917 nga mitambong sa 1994 nga Memoryal sa kamatayon ni Kristo? Lakip kanila mao ang kapin sa 7,000,000 nga wala pa magdayeg kang Jehova ingong mga magwawali sa maayong balita. Apan ang ilang presensiya niining hinungdanong okasyon sa ngadtongadto moresulta sa dugang minilyon pa sa korus sa mga magdadayeg. Unsay mahimo sa pagtabang niining mga interesado nga mahimong mga magdadayeg ni Jehova?
Mabatonang Tabang
Daghang interesadong tawo ang nagtinguha sa pagdayeg kang Jehova apan mobati nga sila dili makaabot sa mga kinahanglanon. Maayong hinumdoman nila ang mga pulong sa salmista: “Iyahat ko ang akong mga mata ngadto sa kabukiran. Diin ba magagikan ang akong tabang? Ang akong tabang nagagikan kang Jehova, ang Magbubuhat sa langit ug yuta.” (Salmo 121:1, 2) Dayag, ang salmista nagyahat sa iyang mga mata ngadto sa kabukiran sa Jerusalem diin nahimutang ang templo ni Jehova ug ang yutan-ong kaulohan sa teokratikanhong kagamhanan. Gikan niini kita sa husto makahinapos nga ang tabang nga gikinahanglan sa pagdayeg sa Diyos ug sa pagmantala sa mensahe sa Gingharian moabot lamang gikan kang Jehova ug sa iyang organisasyon.—Salmo 3:4; Daniel 6:10.
Karong adlawa, kadtong nagtinguha sa pagdayeg kang Jehova makadahom sa mahigugmaong tabang gikan sa iyang yutan-ong organisasyon. Pananglitan, ang mga Saksi ni Jehova nagtanyag ug tabang pinaagi sa pagdumalag libreng mga pagtuon sa Bibliya sa balay uban sa mga tawong interesado. Kining edukasyonal nga programa naglakip ug labaw pa kay sa pagkakat-on lamang sa mga doktrina sa Bibliya. Kini nagtabang sa mga estudyante nga makaugmad ug pagpabili sa iyang nakat-onan ug sa organisasyon nga gigamit ni Jehova.
Uyon niini, ang Saksi nga nagdumala sa pagtuon sa Bibliya maningkamot sa pagtino nga ang bag-ong nakaplagang mga kamatuoran makaabot dili lamang sa kaisipan kondili usab sa kasingkasing. Ug ang magtutudlo dili angayng magpanuko sa pagpakita sa estudyante kon sa unsang paagi si Jehova nagagamit sa Iyang organisasyon sa pagtuman sa Iyang katuyoan sa yuta. Ang brosyur nga Mga Saksi ni Jehova—Nahiusang Nagabuhat sa Kabubut-on sa Diyos sa Tibuok Kalibotan ug ang videoteyp nga Jehovah’s Witnesses—The Organization Behind the Name sagad napamatud-ang makatabang sa pagpalampos niini.
Ang Kristohanong mga tigom usab nagdulag hinungdanong bahin sa pagtabang sa umaabot nga mga magdadayeg ni Jehova. Sa unang mga ang-ang sa pagtuon sa Bibliya, ang estudyante mahimong dapiton sa pagtambong sa Kristohanong mga tigom. Sa ulahi, siya makakat-on sa kahinungdanon sa regular nga pagtambong ug sa pagpakigbahin sa mga tigom sa kongregasyon. (Hebreohanon 10:24, 25) Ang mga magtatan-aw makataganag bililhong tabang alang sa kaubang mga magtutuo ug sa umaabot nga mga magdadayeg ni Jehova pinaagig pagpangandam sa mga tigom nga sa espirituwal makapalig-on ug mapuslanon.
Tabangi ang Kabataan sa Pagdayeg Kang Jehova
Ang kabataan maoy lakip sa daghang mahimong mga magmamantala sa maayong balita sa haduol nga umaabot. Ilabina ang mga amahan adunay Biblikanhong kaakohan sa pagmatuto sa ilang kabataan “diha sa disiplina ug mapasiboong pagdumala-sa-kaisipan ni Jehova.” (Efeso 6:4) Kon hustong pagkabansay sa diyosnong mga ginikanan, bisan ang batan-on pa kaayong kabataan makaugmad ug tinguha sa pagdayeg kang Jehova.
Usa ka gamayng batang babaye sa Argentina miduol sa mga ansiano sa kongregasyon sa makadaghan sa ubay-ubayng mga bulan, nangayo sa ilang tabang aron siya mahimong takos ingong magmamantala sa Gingharian. Sa ulahi, ang iyang mga ginikanan ug ang mga ansiano miuyon nga tugotan siya nga mahimong usa ka di-bawtismadong magmamantala. Siya makatanyag na sa mensahe sa Gingharian diha sa mga pultahan nga epektibo. Bisan tuod kining gamayng batang babaye maoy singko anyos lamang ug dili pa makabasa, iyang nasag-ulo ang mga dapit sa pila ka mga teksto sa Bibliya. Human makaplagan ang usa ka teksto, iyang hangyoon ang tagbalay nga mobasa niana, ug unya siya mohatag ug pagpatin-aw.
Tin-aw nga ang mga ansiano ug mga ginikanan makahimog dakong kaayohan pinaagi sa pagdasig ug pagtabang niadtong nagauswag ngadto sa pagkahimong mga magdadayeg ni Jehova.—Proverbio 3:27.
Usa ka Walay Kataposang Relasyon Kang Jehova
Bisan pa, unsa man kon ikaw mismo nakig-uban sa mga Saksi ni Jehova nga taudtaod na apan wala pa gihapon mokuyog kanila sa ilang buluhatong pagsangyaw? Maayong pangutan-on nimo ang imong kaugalingon sa mosunod nga mga pangutana, ‘Nagtuo ba ako nga nakaplagan ko na ang kamatuoran ug nga si Jehova mao lamang ang bugtong matuod nga Diyos? Ako ba kombinsido nga ang Gingharian sa Diyos mao lamang ang bugtong sulbad sa mga suliran sa katawhan? Gisalikway ko na ba ang tanang bakak nga relihiyon ug kalibotanong mga kustombre ug mga panggawi nga makapasuko kang Jehova? Ako ba may halalom nga gugma sa Diyos ug sa iyang matarong nga mga kinahanglanon?’ (Salmo 97:10) Kon ikaw sa kamatinud-anon makatubag ug oo niining mga pangutanaha, unsay nagpugong kanimo sa pagdayeg kang Jehova?—Itandi ang Buhat 8:36.
Ang pagdayeg kang Jehova naglangkit ug labaw pa kay sa pagsangyaw sa maayong balita. Kon nagkuha ka ug tukmang kahibalo, adunay matuod nga pagtuo, ug nagpahiuyon sa imong kinabuhi sa diyosnong mga kinahanglanon, kinahanglan nimo nga mapalig-on ang imong personal nga relasyon kang Jehova. Sa unsang paagi? Pinaagi sa pagpahinungod kaniya diha sa pag-ampo ug unya simbolohan kini pinaagi sa bawtismo sa tubig. Kinabuhing walay kataposan ang nalangkit. Busa, lihok na karon uyon sa tambag ni Jesus: “Sulod kamo agi sa sigpit nga ganghaan; tungod kay lapad ug luag ang dalan padulong ngadto sa kalaglagan, ug daghan ang mga nanagpanulod agi niini; samtang sigpit ang ganghaan ug hagip-ot ang dalan padulong ngadto sa kinabuhi, ug diyutay ra ang mga nakakaplag niini.”—Mateo 7:13, 14.
Tungod kay hapit na ang malaglagong kataposan niining sistema sa mga butang, dili kini panahon nga magpanuko. Paghimog dihadihang mga lakang aron mabatonan ang walay kataposang relasyon kang Jehova. Sa pagkatinuod, karon na ang panahon nga mosanong nga positibo sa pangutanang, Dayegon ba nimo si Jehova?